1-2. Nganong nakahatag natog kaayohan ang pagkadisenyo ni Jehova kanato nga mobatig labaw nga kalipay sa paghatag kay sa pagdawat?

 GIDISENYO ni Jehova ang mga tawo nga mobatig labaw nga kalipay sa paghatag kay sa pagdawat. (Buh. 20:35) Nagpasabot ba ni nga dili gyod ta mobatig kalipay sa pagdawat? Wala. Siyempre malipay gyod ta kon makadawat tag regalo. Pero mas magmalipayon ta kon kitay mohatag. Ug sa tinuod lang, nakahatag natog kaayohan ang pagkadisenyo ni Jehova kanato niining paagiha. Ngano?

² Kay gidisenyo ta ni Jehova niining paagiha, kita mismo naay mahimo aron magmalipayon. Madugangan nato ang atong kalipay kon mangita tag mga kahigayonan nga makahatag sa uban. Mapasalamaton gyod ta nga ingon niini ang pagkadisenyo ni Jehova kanato.—Sal. 139:14.

3. Nganong si Jehova gitawag nga “malipayong Diyos”?

³ Ang Bibliya nag-ingon nga makapalipay ang paghatag. Kanay hinungdan nga si Jehova gitawag diha sa Bibliya ingong “malipayong Diyos.” (1 Tim. 1:11) Siya ang pinakauna nga naghatag, ug walay makalabaw sa iyang pagkamahinatagon. Tungod niya, “kita dunay kinabuhi ug naglihok ug naglungtad,” sumala sa giingon ni apostol Pablo. (Buh. 17:28) Oo, “ang matag maayong gasa ug matag hingpit nga regalo” naggikan gyod kang Jehova.—Sant. 1:17.

4. Unsay makatabang nato nga mas magmalipayon?

⁴ Gusto gyod natong tanan nga maeksperyensiyahan ang labaw nga kalipay sa paghatag. Mahimo nato na kon atong sundogon ang pagkamahinatagon ni Jehova. (Efe. 5:1) Samtang atong konsiderahon ang maayong ehemplo ni Jehova, matikdi  kon unsay atong mahimo sa dihang mobati ta nga wala giapresyar sa uban ang atong paghatag. Makatabang ni nato nga padayong mohatag ug mas magmalipayon.

SUNDOGA ANG PAGKAMAHINATAGON NI JEHOVA

5. Unsang materyal nga mga butang ang gihatag ni Jehova kanato?

⁵ Unsay gihatag ni Jehova kanato nga nagpakita nga mahinatagon siya? Konsideraha ang pipila ka pananglitan. Si Jehova naghatag natog materyal nga mga butang. Bisag wala nato mabatoni ang tanang butang, giseguro ni Jehova nga mabatonan nato ang tanan natong panginahanglan. Pananglitan, gihatagan ta niyag pagkaon, sinina, ug kapuy-an. (Sal. 4:8; Mat. 6:​31-33; 1 Tim. 6:​6-8) Gitagana ba na ni Jehova tungod lang kay obligado siya? Dili! Nganong iya man ning gihimo para nato?

6. Unsay atong makat-onan sa Mateo 6:​25, 26?

⁶ Gitagana ni Jehova ang atong pisikal nga panginahanglan kay gimahal ta niya. Konsideraha ang giingon ni Jesus sa Mateo 6:​25, 26. (Basaha.) Si Jesus migamit ug mga pananglitan gikan sa kalalangan. Bahin sa mga langgam, siya miingon: “Sila wala magpugas o mag-ani o magtigom diha sa mga kamalig.” Pero matikdi kon unsay sunod niyang giingon: “Ginapakaon sila sa inyong langitnong Amahan.” Dayon si Jesus nangutana: “Dili ba labaw pa man mog bili kay sa mga langgam?” Unsa ang punto? Para kang Jehova, ang iyang mga alagad mas labaw ug bili kay sa mga hayop nga iyang gilalang. Kon giatiman ni Jehova ang panginahanglan sa mga hayop, makaseguro ta nga iya pod tang atimanon ug tagan-an. Samag mapinanggaong amahan, si Jehova magtagana para sa iyang pamilya tungod sa gugma.—Sal. 145:16; Mat. 6:32.

7. Unsay usa ka paagi nga atong masundog ang pagkamahinatagon ni Jehova? (Tan-awa sab ang hulagway.)

⁷ Sama kang Jehova, makahatag pod ta sa uban ug materyal nga mga butang tungod sa atong gugma kanila. Pananglitan, naa ba kay nailhang igsoon nga nanginahanglag pagkaon o sinina? Puwede kang gamiton ni Jehova aron matagan-an ang iyang panginahanglan. Ang mga alagad ni Jehova nailhan nga mahinatagon ilabina dihang naay kalamidad. Pananglitan, panahon sa COVID-19 nga pandemic, ang atong mga igsoon nanghatag ug pagkaon, sinina, ug ubang suplay ngadto sa mga nanginahanglan. Daghan pod ang nag-donate sa worldwide work. Tungod ana, naa tay pondo nga nagamit aron suportahan ang atong mga  igsoon nianang lisod nga panahon. Ila gyong gipadapat ang giingon sa Hebreohanon 13:16: “Ayawg kalimti ang pagbuhat ug maayo ug ang pagpaambit sa imong mga nabatonan, kay malipay pag-ayo ang Diyos sa maong mga halad.”

8. Sa unsang paagi ta nakabenepisyo sa kusog nga gihatag ni Jehova? (Filipos 2:13)

⁸ Si Jehova naghatag ug kusog. Dili mahutdan ug kusog si Jehova, ug malipay siya sa paghatag ug kusog sa iyang mga alagad. (Basaha ang Filipos 2:13.) Naa bay higayon nga mihangyo ka kang Jehova nga hatagan kag kusog nga masuklan ang tentasyon o malahutay ang lisod nga pagsulay? O kaha nakasulay na ba kag hangyo kang Jehova nga hatagan kag kusog nga mahimo ang imong mga buluhaton nianang adlawa? Sa dihang gitubag ni Jehova ang imong pag-ampo, tingali nakaingon pod ka sama kang apostol Pablo: “Naa koy kusog sa pag-atubang sa tanang butang tungod kaniya nga naghatag nakog gahom.”—Filip. 4:13.

9. Unsaon nato pagsundog si Jehova sa iyang paghatag ug kusog? (Tan-awa sab ang hulagway.)

⁹ Bisag dili ta hingpit, masundog nato si Jehova sa iyang paghatag ug kusog. Tinuod, dili ta literal nga makahatag ug kusog para sa uban. Pero puwede natong gamiton ang atong kusog aron tabangan sila. Pananglitan, basin naay tigulang o nasakit nga igsoon nga puwede natong tabangan sa pagpamalit o sa mga buluhaton sa balay. Kon itugot sa atong kahimtang, puwede pod tang moboluntaryo sa pagpanghinlo o pagmentinar sa Kingdom Hall. Ang paggamit sa atong kusog niining mga paagiha makatabang gyod sa atong mga igsoon.

10. Unsay atong himoon aron mapalig-on nato ang uban?

¹⁰ Hinumdomi pod nga ang atong isulti naay epekto sa uban. Naa ba kay mahunahunaan nga puwede nimong hatagan ug sinserong komendasyon? O kaha naa ba kay nailhan nga nagkinahanglan ug paghupay? Kon mao, paningkamoti nga imong mapabati nga gimahal nimo sila. Puwede nimo silang bisitahon, tawagan, i-text, o kaha padal-an ug card o email. Ayaw kaayog kabalaka sa imong isulti. Bisag simple lang ang imong isulti basta kinasingkasing, basig mao nay gikinahanglan sa igsoon aron makapabilin siyang matinumanon o mahupayan sa iyang situwasyon.—Prov. 12:25; Efe. 4:29.

11. Giunsa paggamit ni Jehova ang iyang kaalam?

¹¹ Si Jehova naghatag ug kaalam. Ang tinun-ang si Santiago misulat: “Kon duna kaninyoy nakulangan ug kaalam, padayon siyang mangayo sa Diyos, kay siya madagayaong nagahatag sa tanan ug dili mangitag sayop.” (Sant. 1:5; footnote) Kining mga pulonga nagpakita nga si Jehova dili dalo sa iyang kaalam. Hinuon, andam siyang mohatag niini sa uban. Matikdi  pod nga sa dihang mohatag si Jehova ug kaalam, siya “dili mamuyboy,” o “mangitag sayop.” Dili niya ipabati nga makaluluoy kaayo ta kay nanginahanglan ta sa iyang tabang o giya. Iya pa gani tang gidasig nga moduol niya alang sa giya.—Prov. 2:​1-6.

12. Unsa ang mga kahigayonan nga magamit nato ang atong mga nahibaloan sa pagtabang sa uban?

¹² Sa atong bahin, unsaon nato pagsundog si Jehova sa paggamit sa atong mga nahibaloan aron tabangan ang uban? (Sal. 32:8) Ingong mga alagad ni Jehova, daghan tag kahigayonan sa paghimo niana. Pananglitan, puwede natong bansayon ang mga bag-ohan diha sa ministeryo. Ang mga ansiyano mapailobong motabang sa mga ministeryal nga alagad ug bawtismadong mga brader kon unsaon nila pag-atiman ang ilang mga asaynment sa kongregasyon. Ug kadtong naay eksperyensiya sa pagpanukod ug pagmentinar sa atong mga pasilidad makatabang sa pagbansay niadtong mga dili pa kaayo hanas.

13. Dihang magbansay ta sa uban, unsaon nato pagsundog ang paagi ni Jehova sa paghatag ug kaalam?

¹³ Angayng sundogon niadtong mga nagabansay ang paagi ni Jehova sa paghatag ug kaalam. Hinumdomi nga si Jehova dili dalo sa iyang kaalam ug andam kaayo siyang mohatag niini. Sa samang paagi, andam natong itudlo sa uban ang atong mga nahibaloan o mga skill. Dili ta maghunahuna nga kon itudlo nato ang tanan, basin sa ngadtongadto mapulihan ta sa atong ginabansay. Dili pod ta moingon: ‘Aw, wala man gani nagbansay nako sa una! Maningkamot siyag iya.’ Kana nga panghunahuna dili gyod puwede sa mga alagad ni Jehova. Hinuon, malipay ta nga itudlo ang tanan natong nakat-onan ug himoon ang atong maarangan sa pagbansay sa uban. (1 Tes. 2:8) Naglaom ta nga sila “makabaton sab unyag igong katakos sa pagtudlo sa uban.” (2 Tim. 2:​1, 2) Malipay gyod ta nga motudlo, ug kon ang atong ginatudloan mao na poy mobansay sa uban, seguradong bation pod nila ang samang kalipay.

KON GIBATI NATO NGA ANG ATONG PAGHATAG WALA GIAPRESYAR

14. Unsay kasagarang reaksiyon sa uban kon mohatag ta?

¹⁴ Kon mohatag ta, ilabina sa atong mga igsoon, sagad moapresyar gyod sila. Hatagan tingali ta nilag card o pasalamatan ta sa ubang paagi. (Col. 3:15) Malipay gyod ta kon pasalamatan ta sa uban.

15. Unsay angay natong hinumdoman kon gibati nato nga wala giapresyar sa uban ang atong gihimo?

¹⁵ Pero usahay, ang uban dili tingali magpakitag apresasyon o mosulti nga mapasalamaton sila. Basin migasto ta o kaha migahin tag panahon ug kusog aron tabangan sila, pero morag balewala ra nila ang atong gihimo. Kon mahitabo na, unsay atong himoon aron dili ta madismayar o mawad-ag kalipay? Hinumdomi ang atong temang teksto sa Buhat 20:35. Ang atong kalipay sa paghatag wala magdepende kon mapasalamaton ba sila o dili. Makapili ta nga padayong malipay sa paghatag bisan pag ang uban dili tingali magpakitag apresasyon. Unsay makatabang nato? Konsideraha ang pipila ka paagi.

16. Dihang mohatag ta, sa unsa ta angayng magpokus?

¹⁶ Pagpokus sa ehemplo ni Jehova. Gihatagan niyag maayong mga butang ang mga tawo, mapasalamaton man sila o dili. (Mat. 5:​43-48) Si Jehova nagsaad nga kon mohatag pod ta nga “dili magdahom ug bayad . . . dako unya ang [atong] ganti.” (Luc. 6:35) Ang “bayad” nga giingon dinhi puwede pong magtumong sa apresasyon. Madawat man nato ni nga apresasyon o dili, si Jehova kanunayng mobalos nato tungod sa kaayo nga atong ginahimo sa uban ug tungod sa atong ‘paghatag nga malipayon.’—Prov. 19:17; 2 Cor. 9:7.

17. Unsay atong himoon aron padayon natong masundog si Jehova? (Lucas 14:​12-14)

 ¹⁷ Ang laing paagi nga atong masundog si Jehova sa dihang mohatag ta mao ang pagpadapat sa prinsipyo nga makita sa Lucas 14:​12-14. (Basaha.) Dili sayop nga moabiabi ta o mohatag niadtong makahimo pod niana kanato. Pero komosta kon nagahatag ta kay naa tay gilaoman nga balos? Kon mao, puwede natong himoon ang giingon ni Jesus. Pakitaan natog kaayo bisan kadtong dili makahimo sa pagbalos nato. Pinaagi niana, gisundog nato si Jehova ug makahatag na natog kalipay. Kon dili ta magdahom ug bisan unsang balos, makatabang pod na nato nga padayong magmalipayon bisan pag gibati nato nga ang uban wala magpakitag apresasyon.

18. Unsay makatabang aron makapakita tag pagsabot sa uban?

¹⁸ Likayi ang paghunahunag negatibo sa uban. (1 Cor. 13:7) Kon ang uban wala magpakitag apresasyon, puwede natong pangutan-on ang atong kaugalingon: ‘Dili ba gyod sila mapasalamaton, o nakalimot lang gyod sila sa pagpasalamat?’ Naa tingali mga rason kon nganong wala sila makapasalamat. Ang uban mapasalamaton tingali kaayo pero maglisod lang silag sulti ani. Basin naulaw sila nga nakadawat ug tabang, ilabina kon sa una silay pirmeng motabang sa uban. Bisag unsa pa may kahimtang, ang gugma motabang nato nga sabton ang atong mga igsoon ug padayong malipay sa paghatag.—Efe. 4:2.

19-20. Nganong ang pailob makatabang nga padayon tang malipay sa paghatag? (Tan-awa sab ang hulagway.)

¹⁹ Magmapailobon. Kon bahin sa pagkamahinatagon, ang maalamong hari nga si Solomon misulat: “Ilabay ang imong tinapay sa katubigan, kay human sa daghang adlaw imo ra kining makaplagan pag-usab.” (Eccl. 11:1) Gipakita niini nga teksto nga ang uban ayha pa tingali makasulti sa ilang apresasyon “human sa daghang adlaw.” Matikdi ang mosunod nga eksperyensiya.

²⁰ Daghang tuig sa miagi, ang asawa sa tigdumala sa sirkito nagpadalag makapatandog nga  sulat sa usa ka bag-ong nabawtismohan nga sister ug nagdasig niya nga magpabiling matinumanon. Mga walo ka tuig sa ulahi, ang sister mibalos niyag sulat, nga nag-ingon: “Wala lang ka kabalo, pero dako gyod kaayo kag natabang nako sa milabayng mga tuig.” Miingon pod siya: “Nadasig kaayo ko sa imong sulat, pero mas natandog gyod ko sa teksto nga imong gi-share, ug wala gyod ni nako malimti.” a Human hisgoti sa sister ang mga kalisdanan nga iyang naatubang, siya miingon: “Naay mga panahon nga kasurenderon na kaayo ko. Gusto na nakong biyaan ang kamatuoran ug ang akong mga responsibilidad—ang tanantanan. Pero pirme nakong mahinumdoman ang teksto nga imong gi-share, ug nakatabang to nako nga mopadayon.” Siya midugang: “Ang imong sulat ug ang maong teksto mao gyoy nakatabang nako sa miaging walo ka tuig.” Hunahunaa lang ang gibati nga kalipay sa asawa sa tigdumala sa sirkito sa dihang nadawat niya ang sulat “human sa daghang adlaw”! Sa samang paagi, molabay pa tingali ang taas nga panahon ayha nato madawat ang mga pasalamat sa kaayo nga atong gihimo.

21. Nganong determinado ta nga padayong sundogon ang pagkamahinatagon ni Jehova?

²¹ Sa nahisgotan na, espesyal kaayo ang pagkadisenyo ni Jehova kanato. Bisag malipay ta kon hatagan ta, mas malipay gyod ta kon kita ang mohatag. Nindot kaayo ang bation dihang makatabang ta sa atong mga igsoon, ug malipay ta dihang magpasalamat sila nato. Pero makadawat man tag apresasyon o dili, ang importante mao nga gibuhat nato kon unsay maayo. Hinumdomi nga bisag unsa pay imong ihatag, “si Jehova makahatag kanimo ug mas daghan pa kay niana.” (2 Cron. 25:9) Oo, bisag unsa pa man ka dako ang atong ihatag sa uban, mas labaw pa niana ang ihatag ni Jehova kanato! Wala na gyoy molabaw pa sa kalipay nga atong bation sa dihang si Jehova mismo ang mobalos nato. Hinaot nga padayon natong sundogon ang pagkamahinatagon sa atong langitnong Amahan.