1. Unsay hapit nang himoon ni Jesus?

 NAGKINABUHI na ta sa makapahinam kaayo nga panahon! Sa dili madugay, hukman na ni Jesus ang tanang tawo sa yuta. Gisultihan ni Jesus ang iyang mga tinun-an kon unsay mahitabo sa dili pa ang iyang paghukom pinaagi sa paghatag kanilag “ilhanan” sa iyang dili makitang presensiya ug sa “hinapos sa sistema sa mga butang.” (Mat. 24:3) Kini nga tagna narekord sa Mateo kapitulo 24 ug 25 ug sa susamang mga asoy niini diha sa Marcos kapitulo 13 ug Lucas kapitulo 21.

2. Unsay atong hisgotan niining artikuloha, ug nganong makatabang ni nato?

² Si Jesus naghatag ug mga pasidaan pinaagig tulo ka ilustrasyon: ang ilustrasyon bahin sa mga karnero ug mga kanding, sa maalamon ug sa buangbuang nga mga ulay, ug sa mga talanton. Kini nga mga ilustrasyon makatabang nato nga masabtan nga hukman ni Jesus ang matag usa base sa iyang binuhatan. Samtang hisgotan nato ni nga mga ilustrasyon, atong tan-awon kon unsang mga leksiyon ang atong makat-onan ug kon unsaon nato ni pagpadapat. Ang una natong hisgotan mao ang ilustrasyon bahin sa mga karnero ug mga kanding.

MGA KARNERO UG MGA KANDING

3. Kanus-a hukman ni Jesus ang mga tawo?

³ Sa ilustrasyon bahin sa mga karnero ug mga kanding, si Jesus miingon nga iyang hukman ang mga tawo base sa kon midawat ba sila sa maayong balita ug misuportar sa iyang dinihogang mga igsoon. (Mat. 25:​31-46) Panahon sa “dakong kasakitan,” iya silang hukman sa dili pa magsugod ang Armagedon. (Mat.  24:21) Sama nga ilain sa magbalantay ang mga karnero gikan sa mga kanding, ilain pod ni Jesus kadtong maunongong misuportar sa iyang dinihogang mga sumusunod gikan niadtong wala misuportar kanila.

4. Base sa Isaias 11:​3, 4, nganong makaseguro ta nga patas ang paghukom ni Jesus sa mga tawo? (Tan-awa sab ang hulagway.)

⁴ Ang tagna sa Bibliya nagpakita nga ang gipili ni Jehova nga Maghuhukom, si Jesus, maghukom sa matarong nga paagi. (Basaha ang Isaias 11:​3, 4.) Iyang ginaobserbahan ang binuhatan, panghunahuna, ug sinultihan sa matag usa—apil na kon giunsa nila pagtratar ang iyang dinihogang mga igsoon. (Mat. 12:​36, 37; 25:40) Nahibalo si Jesus kon kinsay misuportar sa iyang dinihogang mga igsoon ug sa ilang buluhaton. a Ang usa ka pangunang paagi nga masuportahan sa mga tawo ang mga igsoon sa Kristo mao ang pagtabang kanila sa buluhatong pagsangyaw. Kadtong mitabang niini nga buluhaton hukman ingong “matarong” ug naay paglaom nga makadawat ug “kinabuhing walay kataposan” dinhi sa yuta. (Mat. 25:46; Pin. 7:​16, 17) Nindot gyod kaayo ni nga ganti para niadtong magpabiling maunongon! Kon padayon silang magmatinumanon panahon sa dakong kasakitan ug human niana, ang ilang mga ngalan masulat diha sa “basahon sa kinabuhi.”—Pin. 20:15.

5. Unsang leksiyon ang atong makat-onan sa ilustrasyon bahin sa mga karnero ug mga kanding, ug kinsay angayng mainteres niini?

⁵ Magmatinumanon ug magmaunongon. Ang ilustrasyon ni Jesus bahin sa mga karnero ug mga kanding pangunang nagtumong niadtong may yutan-ong paglaom. Gipakita nila ang ilang pagtuo dili lang pinaagi sa pagtabang sa mga igsoon sa Kristo sa buluhatong pagsangyaw kondili pinaagi pod sa ilang pagsunod sa direksiyon sa gamayng grupo sa dinihogang mga brader nga gipili ni Jesus. (Mat. 24:45) Pero kadtong naay langitnong paglaom angay sab mosunod sa pasidaan niini nga ilustrasyon. Ngano? Kay giobserbahan pod ni Jesus ang ilang binuhatan, panghunahuna, ug sinultihan. Kinahanglan nilang pamatud-an nga matinumanon pod sila. Gani naghisgot si Jesus ug duha pa ka ilustrasyon nga nagsilbing pasidaan sa mga dinihogan. Mabasa pod nato ni nga mga ilustrasyon sa Mateo kapitulo 25. Karon, atong hisgotan ang ilustrasyon bahin sa maalamon ug sa buangbuang nga mga ulay.

ANG MAALAMON UG ANG BUANGBUANG NGA MGA ULAY

6. Giunsa pagpakita sa lima ka ulay nga maalamon sila? (Mateo 25:​6-10)

⁶ Sa ilustrasyon bahin sa mga ulay, si Jesus naghisgot bahin sa 10 ka ulay nga nanggawas aron sa pagsugat sa pamanhonon. (Mat. 25:​1-4) Gusto nilang tanan nga mouban sa pamanhonon ngadto sa iyang kombira sa kasal. Si Jesus miingon nga ang lima kanila “maalamon” pero ang laing lima “buangbuang.” Ang maalamon nga mga ulay andam ug alerto. Andam silang mohulat bisag unsa pa ka dugay moabot ang pamanhonon, bisag moabot siya sa lawom nang gabii. Busa nagdala silag mga lampara aron makahatag nilag kahayag. Nagdala pa gani silag reserbang lana aron padayong magsiga ang ilang mga lampara enkasog malangan ang pamanhonon. (Basaha ang Mateo 25:​6-10.) Sa dihang miabot ang pamanhonon, ang maalamong mga ulay misulod uban niya sa kombira sa kasal. Sa samang paagi, kinahanglang pamatud-an sa dinihogang mga Kristohanon ang ilang kaandam pinaagi sa pagpabiling alerto ug matinumanon hangtod  sa pag-abot sa Kristo. Kon andam sila, hukman sila nga takos mouban sa Pamanhonon, si Jesus, sa iyang langitnong Gingharian. b (Pin. 7:​1-3) Komosta kadtong lima ka buangbuang nga ulay?

7. Unsay nahitabo sa lima ka buangbuang nga ulay, ug ngano?

⁷ Dili sama sa maalamon nga mga ulay, ang lima ka buangbuang nga ulay dili andam dihang miabot ang pamanhonon. Ang ilang mga lampara hapit nang mapalong ug wala silay dala nga reserbang lana. Dihang nahibaloan nila nga hapit nang moabot ang pamanhonon, milakaw sila aron mopalit ug lana. Wala pa sila makabalik dihang miabot ang pamanhonon. Nianang panahona, “ang mga ulay nga nakapangandam nanguban kaniya sa kombira sa kasal. Ug dihang nakasulod na sila, ang pultahan gisirhan.” (Mat. 25:10) Sa ulahi, dihang nakabalik na ang buangbuang nga mga ulay ug gusto nilang mosulod, giingnan sila sa pamanhonon: “Wala gyod ko makaila ninyo.” (Mat. 25:​11, 12) Ang maong mga ulay dili gyod andam sa pag-abot sa pamanhonon. Unsay leksiyon niini para sa mga dinihogan?

8-9. Unsang leksiyon ang makat-onan sa mga dinihogan gikan sa ilustrasyon sa mga ulay? (Tan-awa sab ang hulagway.)

⁸ Pabiling andam ug alerto. Si Jesus wala magtagna nga naay duha ka klase sa dinihogan—usa nga andam mohulat hangtod sa kataposan niini nga sistema ug usa nga dili andam. Hinuon, gipakita lang niya kon unsay mahitabo sa mga dinihogan kon dili sila andam nga molahutay nga matinumanon hangtod sa kataposan. Kon dili sila andam, dili nila madawat ang ilang ganti. (Juan 14:​3, 4) Seryoso gyod ni nga pasidaan! Langitnon man o yutan-on ang atong paglaom, dili gyod nato angayng balewalaon ang pasidaan gikan sa ilustrasyon sa mga ulay. Ang matag usa nato kinahanglang magpabiling alerto ug andam molahutay hangtod sa kataposan.—Mat. 24:13.

⁹ Human hisgoti ni Jesus ang ilustrasyon bahin sa mga ulay aron ipasiugda ang kaimportante  sa pagpabiling andam ug alerto, gihisgotan pod niya ang ilustrasyon bahin sa mga talanton aron ipakita kon unsa ka importante ang pagkamakugihon.

MGA TALANTON

10. Sa unsang paagi gipamatud-an sa duha ka ulipon nga kasaligan sila? (Mateo 25:​19-23)

¹⁰ Sa ilustrasyon sa mga talanton, si Jesus naghisgot bahin sa tulo ka ulipon—ang duha kasaligan ug ang usa dili. (Mat. 25:​14-18) Sa wala pa mobiya ang ilang agalon paingon sa laing nasod, iya silang gibinlan ug mga talanton, nga dako kaayong kantidad sa kuwarta. Gipamatud-an sa duha ka ulipon nga kasaligan sila kay naningkamot sila nga mapatubo ang kuwarta sa ilang agalon. Nagkugi sila ug ilang gigamit ang kuwarta sa maayong paagi. Unsay resulta? Pagbalik sa ilang agalon, nadoble na nila ang kuwarta nga iyang gihatag. Tungod ana, iya silang gikomendahan, ug sila ‘naglipay uban sa ilang agalon.’ (Basaha ang Mateo 25:​19-23.) Pero komosta ang ikatulong ulipon? Unsay iyang gihimo sa kuwarta nga gihatag sa iyang agalon?

11. Unsay nahitabo sa “tapolan” nga ulipon, ug ngano?

¹¹ Ang ikatulong ulipon nakadawat ug usa ka talanton. Gidahom sa agalon nga gamiton niya ang talanton sa maalamong paagi aron makaganansiya. Pero kay “tapolan” siya, iya ning gilubong sa yuta. Pagbalik sa agalon, igo rang giuli sa ulipon ang kuwarta nga walay tubo. Kini nga ulipon dili pod maayog kinaiya. Imbes nga mangayog pasaylo kay wala niya mapatubo ang kuwarta, iya na hinuong giingnan ang iyang agalon nga “estrikto.” Tungod ana, wala niya madawat ang pag-uyon sa iyang agalon. Gawas pa ana, gikuha kaniya ang talanton ug gipalayas siya sa balay sa iyang agalon.—Mat. 25:​24, 26-30.

12. Kang kinsa nagrepresentar ang duha ka kasaligang ulipon?

¹² Ang duha ka kasaligang ulipon nagrepresentar sa matinumanon nga dinihogang mga Kristohanon. Ang Agalon, si Jesus, nagdapit nila nga ‘maglipay uban’ kaniya. Madawat nila ang ilang langitnong ganti, ang unang pagkabanhaw. (Mat. 25:​21, 23; Pin. 20:5b) Sa laing bahin, ang tapolan nga ulipon nagsilbing  pasidaan para sa mga dinihogan. Sa unsang paagi?

13-14. Unsay makat-onan sa mga dinihogan sa ilustrasyon sa mga talanton? (Tan-awa sab ang hulagway.)

¹³ Magmakugihon. Sama sa ilustrasyon sa mga ulay, dihang gihisgotan ni Jesus ang ilustrasyon sa mga talanton, wala siya magtagna nga ang mga dinihogan mahimong tapolan. Hinuon gipakita lang niya kon unsay mahitabo kon mawala ang ilang kadasig. Mawala kanila ang ilang “pagkatinawag ug pagkapinili,” ug dili sila tugotan nga mosulod sa langitnong Gingharian.—2 Ped. 1:10.

¹⁴ Ang mga ilustrasyon ni Jesus bahin sa mga ulay ug mga talanton klarong nagpakita nga ang tanang dinihogang mga Kristohanon kinahanglang andam, alerto, ug kugihan. Pero naa pa bay giingon si Jesus nga nagsilbing pasidaan para sa mga dinihogan? Oo! Naay giingon si Jesus sa Mateo 24:​40, 41 nga nagtumong sab sa kataposang paghukom sa mga dinihogan.

KINSAY “DAD-ON”?

15-16. Giunsa pagpakita sa Mateo 24:​40, 41 nga ang mga dinihogan kinahanglang magpadayon sa pagbantay?

¹⁵ Sa wala pa isulti ni Jesus ang tulo ka ilustrasyon, naa siyay giingon bahin sa kataposang paghukom sa mga dinihogan nga magpaila kon kinsa gyoy iyang giuyonan. Naghisgot siya bahin sa duha ka lalaki nga naa sa uma ug duha ka babaye nga naggaling. Sa matag kahimtang, ang duha morag parehas rag ginahimo. Pero si Jesus miingon nga ang usa “dad-on ug ang usa biyaan.” (Basaha ang Mateo 24:​40, 41.) Dayon gidasig niya ang iyang mga sumusunod: “Padayon sa pagbantay kay wala mo mahibalo kon unsang adlawa moabot ang inyong Ginoo.” (Mat. 24:42) Halos parehas ana ang giingon ni Jesus human niya isulti ang ilustrasyon sa mga ulay. (Mat. 25:13) Kini bang mga giingon ni Jesus konektado? Posible. Kadto lang tinuod nga matinumanong mga dinihogan ang “dad-on” ni Jesus sa iyang langitnong Gingharian.—Juan 14:3.

¹⁶ Padayon sa pagbantay. Kadtong mga dinihogan nga dili magpabiling alerto sa espirituwal dili maapil sa tigomon nga “mga pinili.” (Mat. 24:31) Pero ang tanang alagad sa Diyos, bisag unsa pay ilang paglaom, angay sab magpadayon sa pagbantay ug magpabiling matinumanon.

17. Nganong dili ta angayng matingala kon sa atong panahon karon naay dihogan si Jehova sa iyang balaang espiritu?

¹⁷ Nakaila na ta pag-ayo kang Jehova maong naa tay pagsalig sa tanan niyang desisyon. Dili ta matingala kon sa atong panahon karon, mipili si Jehova nga dihogan ang ubang mga matinumanon. c Nahibalo ta sa giingon ni Jesus bahin sa ilustrasyon sa ubasan diin naay mga sinuholan nga misugod pagtrabaho sa ika-11 na nga takna. (Mat. 20:​1-16, footnote) Kadtong ulahing gidapit nga magtrabaho sa ubasan parehas rag suhol niadtong sayo misugod pagtrabaho. Sa susama, bisan kanus-a man pilion ni Jehova ang mga dinihogan, madawat nila ang langitnong ganti kon mapamatud-an silang matinumanon.

PAMINAW SA MGA PASIDAAN

18-19. Unsang mga leksiyon ug pasidaan ang atong nahisgotan?

¹⁸ Unsa nay atong nahisgotan? Para niadtong naglaom nga mabuhi sa yuta hangtod sa hangtod, ang ilustrasyon bahin sa mga karnero ug mga kanding nagpakita nga kinahanglang magpabilin tang matinumanon ug maunongon kang Jehova, karon ug sa umaabot nga dakong kasakitan. Nianang panahona, hukman ni Jesus ang mga matinumanon ingong takos  makadawat ug “kinabuhing walay kataposan.”—Mat. 25:46.

¹⁹ Nahisgotan pod nato ang duha ka ilustrasyon nga nagsilbing pasidaan para sa mga dinihogan. Sa ilustrasyon ni Jesus sa 10 ka ulay, lima kanila ang maalamon. Sila alerto ug andam maghulat bisag unsa pa ka dugay moabot ang pamanhonon. Pero ang buangbuang nga mga ulay dili andam, maong wala sila pasudla sa pamanhonon sa iyang kombira sa kasal. Sa atong bahin, kinahanglang andam pod ta bisag unsa pa ta ka dugay maghulat nga taposon ni Jesus kining daotang sistema. Dayon, sa ilustrasyon ni Jesus bahin sa mga talanton, nahisgotan nato ang duha ka kasaligang ulipon nga nagkugi pag-ayo para sa ilang agalon maong nadawat nila ang iyang pag-uyon. Sa laing bahin, ang tapolan nga ulipon gisalikway. Unsay leksiyon? Kinahanglan tang magpabiling aktibo sa pag-alagad kang Jehova hangtod sa kataposan. Pero gawas pa sa mga leksiyon nga atong nakat-onan niining duha ka ilustrasyon, nahisgotan pod nato nga ang mga dinihogan kinahanglang magpadayon sa pagbantay aron apil sila sa “dad-on” ni Jesus ug makadawat sa ilang langitnong ganti. Naghinamhinam na gyod ang mga dinihogan nga ‘matigom’ ngadto kang Jesus didto sa langit. Human sa gubat sa Armagedon, mahitabo na ang kasal sa Kordero ug sila mahimong pangasaw-onon ni Jesus.—2 Tes. 2:1; Pin. 19:9.

20. Unsay himoon ni Jehova para niadtong maminaw sa iyang mga pasidaan?

²⁰ Bisag nagkaduol na ang paghukom, wala tay angayng kahadlokan. Kon magpabilin tang matinumanon, ang atong mahigugmaong langitnong Amahan mohatag natog “gahom nga labaw sa kasarangan” aron “makabarog [ta] atubangan sa Anak sa tawo.” (2 Cor. 4:7; Luc. 21:36) Langitnon man o yutan-on ang atong paglaom, mapalipay nato ang atong Amahan kon sundon nato ang mga pasidaan gikan sa mga ilustrasyon ni Jesus. Pinaagi sa dili hitupngang pagkamaayo ni Jehova, ang atong mga ngalan ‘masulat sa basahon’ sa kinabuhi.—Dan. 12:1; Pin. 3:5.