Dili ta angayng maghunahuna nga tungod kay dili presente ang 70 ka tinun-an dihang gisugdan ni Jesus ang Panihapon sa Ginoo, wala sila uyoni ni Jesus o mibiya sila kaniya. Gusto lang ni Jesus nga makauban ang iyang mga apostoles niana nga okasyon.

Parehas nga giuyonan ni Jesus ang 12 ka apostoles ug ang 70 ka tinun-an. Gikan sa iyang daghang mga tinun-an, si Jesus mipilig 12 ka lalaki, nga gitawag niyag mga apostoles. (Luc. 6:​12-16) Naa siya sa Galilea dihang “gitigom niya ang Dose” ug “gipadala sila sa pagwali sa Gingharian sa Diyos ug sa pagpang-ayo.” (Luc. 9:​1-6) Sa ulahi didto sa Judea, si Jesus “mipilig 70 gawas sa iyang mga apostoles ug gipadala sila nga tinagurha.” (Luc. 9:51; 10:1) Busa, si Jesus naay mga sumusunod nga nagsangyaw bahin kaniya sa lainlaing lugar.

Ang mga Hudiyo nga nahimong mga tinun-an ni Jesus nagsaulog gihapon sa tinuig nga Paskuwa, tingali kauban sa ilang mga pamilya. (Ex. 12:​6-11, 17-20) Samtang nagkaduol ang kamatayon ni Jesus, siya ug ang iyang mga apostoles miadto sa Jerusalem. Pero wala niya ipatawag ang tanan niyang mga tinun-an gikan sa Judea, Galilea, ug Perea aron sa pagsaulog sa Paskuwa. Klaro nga ang mga apostoles lang ang gustong makauban ni Jesus niini nga okasyon. Iya silang giingnan: “Gusto kaayo nako nga makauban mo niini nga panihapon sa Paskuwa sa dili pa ko mag-antos.”—Luc. 22:15.

Naay maayong rason kon nganong gihimo na ni Jesus. Hapit na siyang mamatay ingong “Kordero sa Diyos nga magpapas sa sala sa kalibotan.” (Juan 1:29) Ug mahitabo ni sa Jerusalem, diin dugay nang ginahimo ang pagtanyag ug mga halad para sa Diyos. Ang karnero nga gikaon sa mga Israelinhon panahon sa Paskuwa nagpahinumdom nila nga gipagawas sila ni Jehova gikan sa Ehipto. Pero mas labaw ang kamatayon ni Jesus, kay pinaagi kaniya mapahigawas ang tanang tawo gikan sa sala ug kamatayon. (1 Cor. 5:​7, 8) Tungod sa halad ni Jesus, ang Dose mahimong bahin sa pundasyon sa Kristohanong kongregasyon. (Efe. 2:​20-22) Makapainteres nga ang balaang siyudad sa Jerusalem naay “12 ka bato nga pundasyon” nga nasulat ang “12 ka ngalan sa 12 ka apostoles sa Kordero.” (Pin. 21:​10-14) Oo, ang matinumanong mga apostoles naay importanteng papel sa pagtuman sa katuyoan sa Diyos. Busa masabtan nato kon nganong gusto ni Jesus nga makauban sila sa kataposang Paskuwa ug sa okasyon nga mahitabo human niana—ang Panihapon sa Ginoo.

Ang 70 ug ang ubang mga tinun-an wala makauban ni Jesus niana nga panihapon. Bisan pa niana, kadtong nagpabiling matinumanon nakabenepisyo sa okasyon nga gisugdan ni Jesus—ang Panihapon sa Ginoo. Kining matinumanong mga tinun-an nahimong dinihogang mga Kristohanon sa ulahi ug nahimong bahin sa pakigsaad alang sa usa ka Gingharian nga gihisgotan ni Jesus ngadto sa iyang mga apostoles niadtong gabhiona.—Luc. 22:​29, 30.