Matagnaong mga Adlaw ni Daniel ug Atong Pagtuo

“Malipayon siya nga nagpadayon sa paghulat ug moabot sa usa ka libo tulo ka gatos ug katloan ug lima ka adlaw!”​—DANIEL 12:12.

1. Nganong daghan ang napakyas sa pagkaplag sa tinuod nga kalipay, ug sa unsa gilangkit ang tinuod nga kalipay?

 GUSTO sa tanan nga magmalipayon. Apan, pipila lamang ang malipayon karong adlawa. Ngano? Sa usa ka bahin tungod kay gipangita sa kadaghanan ang kalipay diha sa sayop nga mga dapit. Gipangita ang kalipay diha sa mga butang sama sa edukasyon, bahandi, usa ka karera, o pangagpas sa gahom. Hinunoa, si Jesus, sa pagbukas sa iyang Wali sa Bukid, naglangkit sa kalipay sa pagkamahunahunaon sa usa sa espirituwal niyang panginahanglan, sa kaluoy, sa kaputli sa kasingkasing, ug sa susamang mga hiyas. (Mateo 5:3-10) Ang matang sa kalipay nga gipunting ni Jesus maoy matuod ug malungtaron.

2. Sumala sa tagna, unsa ang mohatag ug kalipay sa panahon sa kataposan, ug unsang mga pangutana ang motungha mahitungod niini?

² Alang sa dinihogang nahibilin sa panahon sa kataposan, ang kalipay naglangkit sa dugang nga butang. Sa basahong Daniel, atong mabasa: “Lakaw, Daniel, kay ang mga pulong himoong tinago ug tinakpan hangtod sa panahon sa kataposan. Malipayon siya nga nagpadayon sa paghulat ug moabot sa usa ka libo tulo ka gatos ug katloan ug lima ka adlaw!” (Daniel 12:9, 12) Unsang yugto sa panahon ang gisakop niining 1,335 ka adlaw? Nganong malipayon man ang mga nagkinabuhi latas niini? May kalabotan ba kini sa atong pagtuo karong adlawa? Tabangan kita sa pagtubag niining mga pangutanaha kon balikon ta ang panahon dihang kining mga pulonga gisulat ni Daniel, human dayon sa pagkagawas sa Israel gikan sa pagkabinihag sa Babilonya ug sa ikatulong tuig ni Ciro ang hari sa Persia.​—Daniel 10:1.

Pagpasig-uli Naghatag ug Kalipay

3. Unsay gibuhat ni Haring Ciro nga naghatag ug dakong kalipay sa matinumanong mga Hudiyo sa 537 W.K.P., apan unsang pribilehiyo ang wala ihatag ni Ciro sa mga Hudiyo?

³ Alang sa mga Hudiyo, ang pagkagawas sa Babilonya maoy usa ka higayon alang sa tinuod nga kasadyaan. Human sa pag-antos sa mga Hudiyo sa duolag 70 ka tuig nga pagkabinihag, gidapit sila ni Ciro nga Bantogan sa pagbalik sa Jerusalem aron sa pagtukod pag-usab sa templo ni Jehova. (Esdras 1:1, 2) Kadtong misugot migikan uban ang dagkong mga paglaom, nga miabot sa ilang yutang-natawhan niadtong 537 W.K.P. Bisan pa niana, wala sila dapita ni Ciro sa pagpasig-uli sa usa ka gingharian ubos sa usa ka kaliwat ni Haring David.

4, 5. (a) Kanus-a mapukan ang Davidnong gingharian? Ngano? (b) Unsang pasalig ang gihatag ni Jehova nga ipasig-uli ang Davidnong gingharian?

⁴ Kadto makahuloganon. Mga lima ka siglo nga sayo pa, misaad si Jehova kang David: “Ang imong balay ug ang imong gingharian pagahimoong malig-on sa panahong walay tino sa imong atubangan; ang imong trono mismo pagalig-onon sa panahong walay katinoan.” (2 Samuel 7:16) Makapasubo, kadaghanan sa harianong mga kaliwat ni David nahimong rebelyoso, ug ang pagkasad-ag dugo sa nasod naghingapin gayod nga niadtong 607 W.K.P., gitugotan ni Jehova nga mapukan ang Davidnong gingharian. Gawas sa hamubong panahon ubos sa mga Makabeo, ang Jerusalem nailalom sa langyawng pagmando sukad niadtong panahona hangtod sa ikaduhang pagkalaglag niini sa 70 K.P. Busa, niadtong 537 W.K.P., “ang tinudlong mga panahon sa mga nasod,” nga nianang panahona walay  anak ni David ang magmando ingong hari, nagpadayon.​—Lucas 21:24.

⁵ Bisan pa niana, si Jehova wala mahikalimot sa iyang saad kang David. Pinaagi sa serye sa mga panan-awon ug mga damgo, pinaagi sa iyang propetang si Daniel gipadayag niya ang mga detalye mahitungod sa umaabot nga mga panghitabo sa kalibotan nga mosakop sa mga siglo sukad sa panahon sa pagkamagmamando sa Babilonya sa kalibotan hangtod sa panahong ang usa ka hari sa banay ni David magmando pag-usab sa usa ka gingharian sa katawhan ni Jehova. Kining mga tagnaa, nga natala sa Daniel kapitulo 2, 7, 8, ug 10-12, nagpasalig sa matinuohong mga Hudiyo nga, sa kadugayan, ang trono ni David “pagahimoong malig-on sa panahong walay tino.” Sa pagkatinuod, ang maong gipadayag nga kamatuoran nagdalag kalipay sa mga Hudiyo nga namalik sa ilang yutang-natawhan sa 537 W.K.P.!

6. Nganong nahibalo kita nga ang pipila sa mga tagna ni Daniel matuman sa atong panahon?

⁶ Kadaghanang komentarista sa Bibliya nagpatuo nga ang mga tagna ni Daniel nangatuman halos sa katibuk-an una pa sa pagkatawo ni Jesu-Kristo. Apan matin-aw nga dili kana mao ang kahimtang. Sa Daniel 12:4, usa ka manulonda nagsulti kang Daniel: “Himoang tinago ang mga pulong ug tak-opi ang basahon, hangtod sa panahon sa kataposan. Daghan ang magngadto-nganhi, ug ang tinuod nga kahibalo modagaya.” Kon ang basahong Daniel pagabuksan​—ang iyang kahulogan bug-os nga ipadayag—​sa panahon lamang sa kataposan, seguradong sa labing menos ang pipila sa mga tagna niini mapadapat sa maong yugto.​—Tan-awa ang Daniel 2:28; 8:17; 10:14.

7. (a) Kanus-a matapos ang tinudlong mga panahon sa mga nasod, ug unsang hinungdanong pangutana ang kinahanglang matubag niadtong panahona? (b) Kinsay dili mao “ang matinumanon ug maalamong ulipon”?

⁷ Niadtong 1914 natapos ang tinudlong mga panahon sa mga nasod, ug nagsugod ang panahon sa kataposan niining kalibotana. Ang Davidnong Gingharian napasig-uli, dili sa yutan-ong Jerusalem, apan nga dili-makita didto sa “mga panganod sa mga langit.” (Daniel 7:13, 14) Sa maong panahon, kay “ang mga bunglayon” sa mini nga Kristiyanidad milambo, ang kahimtang sa tinuod nga Kristiyanidad dili dayag​—labing menos sa panan-aw sa tawo. Bisan pa niana, usa ka hinungdanong pangutana ang kinahanglang matubag: “Kinsa ba gayod ang matinumanon ug maalamong ulipon?” (Mateo 13:24-30; 24:45) Kinsay mohawas diha sa yuta sa napasig-uli nga Davidnong Gingharian? Dili ang mga igsoon ni Daniel sa unod, ang mga Hudiyo. Gisalikway na sila kay kulang silag pagtuo ug napandol mahitungod sa Mesiyas. (Roma 9:31-33) Ang matinumanong ulipon dili gayod makaplagan  taliwala sa mga organisasyon sa Kakristiyanohan! Ang daotan nilang mga buhat nagpamatuod nga si Jesus wala makaila kanila. (Mateo 7:21-23) Nan, kinsa ba diay kadto?

8. Kinsay napamatud-an nga mao “ang matinumanon ug maalamong ulipon” sa panahon sa kataposan? Sa unsang paagi nahibalo kita niana?

⁸ Sa walay duhaduha, kadto ang gamayng pundok sa dinihogang mga igsoon ni Jesus nga niadtong 1914 nailhang mga Estudyante sa Bibliya apan sukad sa 1931 nailhang mga Saksi ni Jehova. (Isaias 43:10) Sila lamang ang nagmantala sa napasig-uling Gingharian sa banay ni David. (Mateo 24:14) Sila lamang ang nagpabiling bulag gikan sa kalibotan ug nagbayaw sa ngalan ni Jehova. (Juan 17:6, 14) Ug diha kanila lamang natuman ang mga tagna sa Bibliya may labot sa katawhan sa Diyos sa kataposang mga adlaw. Apil nianang mga tagnaa mao ang sunodsunod nga matagnaong mga yugto nga nahitala sa Daniel kapitulo 12 nga naglakip sa 1,335 ka adlaw nga mohatag ug kalipay.

Ang 1,260 ka Adlaw

9, 10. Unsang mga panghitabo ang nagtimaan sa “panahon, ug mga panahon ug katunga sa panahon” sa Daniel 7:25, ug sa unsang laing kasulatan gihisgotan ang susamang yugto sa panahon?

⁹ Sa Daniel 12:7, atong mabasa ang mahitungod sa unang matagnaong yugto: “Kini maoy alang sa usa ka tinudlong panahon, mga tinudlong panahon ug tunga. Ug sa dihang adunay pagtibawas sa pagdugmok sa gahom sa balaang katawhan, kining tanang butanga modangat sa ilang kataposan.” * Kining yugtoa mismo gihisgotan sa Pinadayag 11:3-6, nga nag-ingong ang mga saksi sa Diyos magwali nga nagsul-ob ug biste nga sako sulod sa tulo ka tuig ug tunga ug unya pagapatyon. Unya usab, sa Daniel 7:25, atong mabasa: “Siya mosulti pag mga pulong nga batok sa Labing Hataas, ug iyang pagasamokon nga padayon ang mga balaan mismo sa Labaw nga Usa. Ug iyang pagausbon ang mga panahon ug ang kasugoan, ug sila igahatag sa iyang kamot sulod sa usa ka panahon, ug sa mga panahon ug sa katunga sa panahon.”

¹⁰ Niining naulahing tagna, “siya” mao ang ikalimang gahom sa kalibotan sa pag-ihap gikan sa Babilonya. Kini mao ang “sungay, usa ka gamayng sungay,” nga sa kang kansang panahon madawat sa Anak sa tawo ang “pagmando ug kahalangdon ug gingharian.” (Daniel 7:8, 14) Kining simbolikong sungay, nga sa sinugdan mao ang imperyong Britanya, naugmad panahon sa unang gubat sa kalibotan ngadto sa pagkahimong Anglo-Amerikanhong dual nga gahom sa kalibotan, nga karon gipangibabawan sa Tinipong Bansa. Sulod sa tulo ug tunga ka panahon, o mga tuig, kining gahoma magasamok sa mga balaan ug maningkamot sa pag-usob sa mga panahon ug sa kasugoan. Sa kataposan, ang mga balaan igahatag ngadto sa iyang kamot.​—Tan-awa usab ang Pinadayag 13:5, 7.

11, 12. Unsang mga panghitabo ang misangpot sa pagsugod sa 1,260 ka matagnaong adlaw?

¹¹ Sa unsang paagi natuman kining tanang susamang mga tagna? Sa katuigan una pa sa Gubat sa Kalibotan I, ang dinihogang mga igsoon ni Jesus sa katilingbanon nagpasidaan nga ang 1914 makakita sa konklusyon sa tinudlong mga panahon sa mga nasod. Sa dihang misilaob ang gubat, nadayag nga wala pakabanaa ang pasidaan. Gigamit ni Satanas ang iyang “mapintas nga mananap,” ang politikanhong organisasyon sa kalibotan nga niadto gidominahan sa Britanikong Imperyo, sa paningkamot “sa pag-usob sa mga panahon ug sa kasugoan,” aron sa paglangan sa panahon sa pagmando sa Gingharian sa Diyos. (Pinadayag 13:1, 2) Siya napakyas. Ang Gingharian sa Diyos natukod sa langit, nga dili maabot sa tawo.​—Pinadayag 12:1-3.

¹² Alang sa mga Estudyante sa Bibliya, ang gubat nagkahulogan sa usa ka panahon sa pagsulay. Sukad sa Enero 1914 sila nagpasalida sa Photo-Drama of Creation, usa ka Biblikanhong pasundayag nga nagtumong sa mga tagna ni Daniel. Sa ting-init niadtong tuiga sa Amihanang Hemispera, ang gubat misilaob. Sa Oktubre, ang tinudlong mga panahon natapos. Sa pagkatapos sa tuig, ang dinihogang nahibilin nagdahom ug paglutos, sumala sa makita  gikan sa kamatuoran nga ang tinuig nga tekstong napili alang sa 1915 mao ang pangutana ni Jesus ngadto sa iyang mga tinun-an, “Makahimo ba kamo sa pag-inom gikan sa akong kopa?” nga gipasukad sa Mateo 20:22, King James Version.

13. Sa unsang paagi ang mga Estudyante sa Bibliya nagwali nga nagsul-ob ug biste nga sako panahon sa 1,260 ka adlaw, ug unsay nahitabo pagkatapos nianang yugtoa?

¹³ Busa, sukad sa Disyembre 1914, kining gamayng pundok sa mga saksi ‘nagwali nga nagsul-ob ug biste nga sako,’ nga mapaubsanong nag-antos samtang gipahayag nila ang mga paghukom ni Jehova. Nakapakurat sa daghan, niadtong 1916, ang pagkamatay ni C. T. Russell, ang unang presidente sa Watch Tower Bible and Tract Society. Samtang ang kainit sa gubat mikaylap, naagoman nila ang misamot nga pagsupak. Ang pipila gibilanggo. Ang mga indibiduwal, sama kang Frank Platt sa Inglaterra ug Robert Clegg sa Canada, gipaantos sa sadistikong mga awtoridad. Sa kataposan, niadtong Hunyo 21, 1918, si J. F. Rutherford, ang bag-ong presidente, kauban sa mga direktor sa Watch Tower Bible and Tract Society, gipahamtangan ug hataas nga sentensiya sa bilanggoan gumikan sa bakak nga mga sumbong. Sa ingon, pagkatapos sa matagnaong yugto, ang “gamayng sungay” nagpatay sa organisadong buluhaton sa dayag nga pagwali.​—Daniel 7:8, King James Version.

14. Sa unsang paagi ang kahimtang nausob alang sa dinihogang nahibilin niadtong 1919 ug human niadto?

¹⁴ Ang basahong Pinadayag mitagna kon unsay sunod nahitabo. Tapos sa hamubong panahon sa kawalay-kalihokan​—gitagna nga sa tulo ka adlaw ug tunga nagbuy-od nga patay diha sa dalan​—ang dinihogang nahibilin nabuhi ug naaktibo pag-usab. (Pinadayag 11:11-13) Sa Marso 26, 1919, ang presidente ug ang mga direktor sa Watch Tower Bible and Tract Society gipagawas sa bilanggoan, ug sa ulahi bug-os nga napalingkawas sila sa sala gikan sa bakak nga mga sumbong batok kanila. Human gayod sa ilang pagkagawas, ang dinihogang nanghibilin misugod sa pag-organisar pag-usab sa dugang buluhaton. Busa, ingong katumanan sa unang kaalaotan sa Pinadayag, migula sila sa bung-aw sa kawalay-kalihokan samag espirituwal nga mga dulon nga giubanan ug bagang aso, nga nagpaila sa mangiob nga umaabot sa bakak nga relihiyon. (Pinadayag 9:1-11) Sulod sa sunod pila ka tuig, gipakaon sila sa espirituwal ug naandam alang sa butang nga anaa sa unahan. Niadtong 1921 gipatik nila ang usa ka bag-ong basahon, The Harp of God, nga gilaraw sa pagtabang sa mga bag-ohan ug sa mga bata aron makakat-on sa pasukaranang mga kamatuoran sa Bibliya. (Pinadayag 12:6, 14) Kining tanang mga butang nga nahisgotan dinhi nahitabo panahon sa laing makahuloganong yugto.

Ang 1,290 ka Adlaw

15. Sa unsang paagi makakalkular kita sa sinugdanan sa 1,290 ka adlaw? Kanus-a matapos kining yugtoa?

¹⁵ Ang manulonda miingon kang Daniel: “Gikan  sa panahon nga ang dayon nga bahin [“ang nagpadayong halad,” potnot] pagakuhaon ug mapahaluna ang butang nga dulumtanan nga nagapahinabo ug kalaglagan, adunay usa ka libo duha ka gatos ug kasiyaman ka adlaw.” (Daniel 12:11) Ubos sa Moisesnong Kasugoan, ang “nagpadayong halad” gisunog sa halaran sa templo sa Jerusalem. Ang mga Kristohanon dili maghalad sa mga halad-nga-sinunog, apan sila naghalad ug nagpadayong espirituwal nga halad. Kini gitumong ni Pablo sa dihang miingon siya: “Ihalad ta kanunay ngadto sa Diyos ang halad sa pagdayeg, nga mao, ang bunga sa mga ngabil nga magahimog katilingbanong pagpahayag sa iyang ngalan.” (Hebreohanon 13:15; itandi ang Oseas 14:2.) Kining nagpadayong halad gikuha niadtong Hunyo 1918. Nan, unsa “ang butang nga dulumtanan”​—ang ikaduhang bahin nga pangitaon? Kadto ang Liga sa Kanasoran, nga gipasiugda sa nagmadaogong mga nasod pagkatapos sa Gubat sa Kalibotan I. * Kadto dulumtanan kay ang mga pangulo sa Kakristiyanohan nagpahaluna niini puli sa Gingharian sa Diyos, nga nagpadayag sa Liga ingon nga bugtong paglaom sa tawo alang sa kalinaw. Ang Liga gisugyot sa Enero 1919. Kon moihap kitag 1,290 ka adlaw (tulo ka tuig, pito ka bulan) sukad niadto, kita modangat sa Septiyembre 1922.

16. Sa pagkatapos sa 1,290 ka adlaw, sa unsang paagi nadayag nga ang dinihogang nahibilin naandam alang sa kalihokan?

¹⁶ Unsay nahitabo niadto? Buweno, ang mga Estudyante sa Bibliya nahupayan niadto, nga nakagula sa Dakong Babilonya, ug naandam alang sa kalihokan. (Pinadayag 18:4) Sa usa ka kombensiyong gihimo sa Septiyembre 1922 sa Cedar Point, Ohio, T.B.A., sila nagsugod sa pagpahayag nga maisogon sa mga paghukom sa Diyos diha sa Kakristiyanohan. (Pinadayag 8:7-12) Ang pinaakan sa mga dulon nagsugod na gayod sa pagsakit! Lain pa, ang ikaduhang kaalaotan sa Pinadayag nagsugod na. Usa ka dakong panon sa Kristohanong kasundalohan​—nga sa sinugdan gilangkoban sa dinihogang nahibilin ug sa ulahi midaghan tungod sa dakong panon​—midasdas sa tibuok yuta. (Pinadayag 7:9; 9:13-19) Oo, ang pagkatapos sa 1,290 ka adlaw naghatag ug kalipay sa katawhan sa Diyos. * Apan labaw pa ang diha sa unahan.

Ang 1,335 ka Adlaw

17. Kanus-a magsugod ug matapos ang 1,335 ka adlaw?

¹⁷ Ang Daniel 12:12 nag-ingon: “Malipayon siya nga nagpadayon sa paghulat ug moabot sa usa ka libo tulo ka gatos ug katloan ug lima ka adlaw!” Kining 1,335 ka Adlaw, o tulo ka tuig, walo ka bulan ug tunga, lagmit nagsugod sa pagkatapos sa nag-unang yugto. Sa pag-ihap gikan sa Septiyembre 1922, kita modangat sa hinapos sa tingpamulak (Amihanang Hemispera) sa 1926. Unsay nahitabo sulod nianang 1,335 ka adlaw?

18. Unsang mga kamatuoran ang nagpaila nga niadtong 1922 duna pay pag-uswag nga pagabuhaton?

¹⁸ Bisan pa sa makahuloganong kinaiya sa mga panghitabo sa 1922, lagmit ang pipila nangandoy gihapon sa nangagi. Ang Studies in the Scriptures, nga sinulat ni C. T. Russell, mao gihapon ang pangunang tun-anan. Dugang pa, ang kaylap-naapod-apod nga pulyetong Millions Now Living Will Never Die nagpahayag sa hunahuna nga sa 1925, ang mga katuyoan sa Diyos bahin sa pagpasig-uli sa yuta ngadto sa Paraiso ug pagbanhaw sa mga matinumanon sa kakaraanan magsugod na sa pagkatuman.  Ang paglahutay sa mga dinihogan maorag hapit nang makompleto. Bisan pa niana, ang pipilang nakig-uban sa mga Estudyante sa Bibliya wala mobating nadasig nga ipakig-ambit ang maayong balita sa uban.

19, 20. (a) Sa unsang paagi daghang butang ang nausob alang sa katawhan sa Diyos sulod sa 1,335 ka adlaw? (b) Unsang mga panghitabo ang nagtimaan sa kataposan sa 1,335-adlaw nga yugto, ug unsay gipaila niana nila mahitungod sa katawhan ni Jehova?

¹⁹ Samtang nagpadayon ang 1,335 ka adlaw, kining tanan nausob. Sa paglig-on sa mga igsoon, giorganisar ang regular ginurupong mga pagtuon sa Ang Bantayanang Torre. Ang pagsangyaw sa kanataran gipasiugda. Sugod sa Mayo 1923, ang tanan giawhag sa pag-apil sa pagsangyaw sa kanataran sa unang Martes sa matag bulan, ug gigahin ang panahon sa tunga sa semanang tigom sa kongregasyon aron dasigon sila sa maong buluhaton. Sa Agosto 1923, panahon sa usa ka asembliya sa Los Angeles, California, T.B.A., gipadayag nga ang sambingay ni Jesus mahitungod sa mga karnero ug sa mga kanding matuman una pa sa Milenyong Paghari. (Mateo 25:31-40) Ang tuig 1924 mao ang inagurasyon sa estasyon sa radyong WBBR, nga gigamit sa pagsibya sa maayong balita sa kahanginan. Ang artikulong “Birth of the Nation” sa Marso 1, 1925, isyu sa The Watch Tower mihatag ug napasibong pagsabot sa Pinadayag kapitulo 12. Sa kataposan, ang matinumanong mga Kristohanon sa hustong paagi nakasabot sa masamokong mga panghitabo sa 1914-19.

²⁰ Ang tuig 1925 natapos, apan ang kataposan wala pa mahitabo! Sukad gayod sa katuigang 1870, ang mga Estudyante sa Bibliya nag-alagad nga may gihunahunang petsa​—sa sinugdan ang 1914, dayon ang 1925. Karon, nakaamgo sila nga kinahanglang mag-alagad hangtod nga kanay gimbut-an ni Jehova. Sa Enero 1, 1926, nga isyu sa The Watch Tower, ang makahuloganong artikulo nga “Kinsay Mopasidungog Kang Jehova?” nagpasiugda labaw pa sukad masukad sa kahinungdanon sa ngalan sa Diyos. Ug sa kataposan, sa Mayo 1926 sa London, Inglaterra, nga kombensiyon, usa ka resolusyon ang gisagop nga may ulohang “Usa ka Pamatuod Ngadto sa mga Magmamando sa Kalibotan.” Kini prangkang nagmantala sa kamatuoran mahitungod sa Gingharian sa Diyos ug sa umaabot nga kalaglagan sa kalibotan ni Satanas. Sa samang kombensiyon, ang bug-at-ug-pinulongan nga librong Deliverance giluwatan, nga nahimong una sa serye nga gipuli sa Studies in the Scriptures. Ang katawhan sa Diyos karon naglantaw sa unahan, dili sa luyo. Natapos na ang 1,335 ka adlaw.

21. Unsay kahulogan sa paglahutay latas sa 1,335-adlaw nga yugto alang sa katawhan sa Diyos niadtong panahona, ug unsay kahulogan alang kanato ang pagkatuman sa tagna mahitungod nianang yugtoa?

²¹ Dili gusto sa pipila nga mopasibo sa maong mga panghitabo, apan kadtong milahutay maoy tinuod nga malipayon. Dugang pa, samtang atong hinumdoman ang pagkatuman niining matagnaong mga yugto, kita malipayon usab kay ang atong pagsalig napalig-on nga ang gamayng pundok sa dinihogang mga Kristohanon nga nakalahutay niadtong mga panahona mao gayod ang matinumanon ug maalamong ulipon. Sa katuigan sukad niadto, ang organisasyon ni Jehova miuswag pag-ayo, apan ang matinumanon ug maalamong ulipon anaa gihapon sa taliwala niini, nga nagagiya niini. Nan, makapaukyab gayod ang pagkahibalo alang sa mga dinihogan ug sa ubang mga karnero, nga ang labawng kalipay anaa pa sa unahan! Hisabtan nato kini sa dihang pagahisgotan nato ang laing tagna ni Daniel.

[Footnotes]

Makasaysay Ka Ba?

◻ Sa unsang paagi nahibalo kita nga ang pipila ka tagna ni Daniel mamatuman sa atong panahon?

◻ Nganong makasalig kita nga ang dinihogang nahibilin mao “ang matinumanon ug maalamong ulipon”?

◻ Kanus-a nagsugod ug natapos ang 1,260 ka adlaw?

◻ Unsang kahupayan ug pagpasig-uli ang gipahinabo sa 1,290 ka adlaw alang sa dinihogang nahibilin?

◻ Nganong kadtong milahutay hangtod sa pagkatapos sa 1,335 ka adlaw malipayon?

[Mga Pangutana sa Pagtuon]

[Kahon sa panid 11]

MATAGNAONG MGA YUGTO NI DANIEL

1,260 ka adlaw:

Disyembre 1914 hangtod Hunyo 1918

1,290 ka adlaw:

Enero 1919 hangtod Septiyembre 1922

1,335 ka adlaw:

Septiyembre 1922 hangtod Mayo 1926

[Hulagway sa panid 8]

Sukad sa 1919 natin-aw nga “ang matinumanon ug maalamong ulipon” mao ang dinihogang nahibilin

[Hulagway sa panid 10]

Hedkuwarter sa Liga sa Kanasoran sa Geneva, Switzerland

[Credit Line]

Letrato sa UN