Mga Magmamantala sa Gingharian Nagtaho

Pagtahod sa Pagkabalaan sa Kinabuhi

ANG Bibliya nagpakita nga ang dugo bililhon sa mga mata sa Diyos ug nga siya nagsaway sa sayop nga paggamit niana. (Levitico 17:14; Buhat 15:19, 20, 28, 29) Tungod niining mga sugoa sa Bibliya, ang mga Saksi ni Jehova dili modawat sa abuno sa dugo.

Aron sa pagtabang sa mga doktor ug sa mga kawani sa ospital nga mosabot sa relihiyosong baroganan sa mga Saksi ni Jehova niining butanga ug magpabili nga ang mga Saksi modawat sa kapuling pagtambal, ang Watch Tower Society nag-organisar ug mga Hospital Liaison Committee (HLC) sa lainlaing kayutaan. Ang mga membro niining mga komite nagduaw sa mga ospital ug nakigsulti sa medikal nga mga kawani. Di pa dugay, sa 12 ka siyudad sa Polandiya, kapin sa 200 ka tigom ang gihimo, nga naglakip sa 500 ka medikal nga doktor, ilabina mga pangulo sa mga klinika o sa mga seksiyon sa ospital. Ang mosunod nga kasinatian nahitabo panahon sa usa nianang pagduawa:

“Labing malamposon ang usa ka tigom sa Cardio-Surgical Clinic sa Zabrze. Sukad sa 1986 ang tem sa klinika nag-opera sa atong mga igsoon nga wala maggamit sa dugo. Hangtod karon, 40 ka susamang operasyon ang nahimo. Ang klinika andam nga modawat sa mga pasyente gikan sa lainlaing dapit sa Polandiya ug gikan usab sa laing nasod. Tapos sa 50-ka-minuto nga panaghisgot, usa ka luyoluyong manedyer sa usa ka seksiyon sa ospital nagpailaila sa mga membro sa HLC ngadto sa grupo sa mga pasyente ug nag-ingon: ‘Kining mga tawhana mga Saksi ni Jehova. Sila makigkooperar sa among klinika, ug sila motabang kanamo. Dili lang ang ilang isigkamagtutuo apan tanang ubang mga pasyente makabatog kaayohan sa ilang tabang. Salamat sa mga Saksi ni Jehova, kami kombinsido nga ang dakong operasyon sa kasingkasing mahimo nga dili mogamit ug dugo.

“‘Pananglitan, kami nag-opera niining babayhana [nga gitudlo ang usa sa iyang mga pasyente] nga wala mogamit ug dugo, ug sa Lunes siya mopauli na. Buot kong ipahibalo nga nagakamenos ang among paggamit ug dugo kay kaniadto tungod kay kini peligroso. Kini nalangkit sa HIV, hepatitis, ug dugay nga pagkaayo.

“‘Ako usa ka Katoliko, apan sa among balay masinabuton kami kanunay sa panglantaw sa uban. Usa ka adlaw ako nagsuroysuroy sa Slaski Stadium uban sa akong mga bata. Kaniadto, kining maong estadyum napasagdan, apan among namatikdan nga karon kana nausab nga dili na gayod mailhan. Nangutana ako sa usa sa mga trabahante sa unsang paagi nahitabo kining maong kausaban. Matud niya nawad-an nag paglaom ang tagdumala sa pag-ayo sa estadyum, apan kini gipaabangan sa mga Saksi ni Jehova, ug ila kanang gibag-o.

“‘Busa kini sila maoy mga katawhan nga gikan kanila kitang tanan daghag makat-onan. Sa akong hunahuna kitang tanan niining seksiyona sa ospital kinahanglang masinabuton sa panglantaw sa uban.’ Unya, mitudlo na usab sa usa ka Saksi nga pagaoperahan sa pipila ka adlaw, siya miingon: ‘Kining babayhana usa sa mga Saksi ni Jehova, ug siya pagaoperahan nga dili mogamit ug dugo.’”

Samtang ang mga Saksi ni Jehova dili maningkamot sa pagpugos sa ilang mga pagtuo sa uban, sila mismo nagsunod sa panig-ingnan sa mga apostoles ug ‘magatuman sa Diyos ingon nga magmamando inay sa mga tawo.’ (Buhat 5:29) Kini naglakip sa pagtahod sa dugo. Sila nagpabili kon ang uban nagtahod sa ilang matanlagon relihiyosong baroganan niining isyuha.