Ang Ika-101ng Klase sa Gilead—Masiboton sa Maayong mga Buhat

ANG atong Maglalalang, si Jehova nga Diyos, madasigon alang sa maayong mga buhat, ug mao man usab ang iyang Anak, si Jesu-Kristo. Ingong atong panig-ingnan, si Jesus nagpakitag kadasig pinaagi sa pagtuman sa iyang hinatag-Diyos nga asaynment, nga naglakip sa paghatag sa “iyang kaugalingon alang kanato aron siya . . . makahinlo alang sa iyang kaugalingon ug usa ka katawhan nga sa linain iyahang kaugalingon, masiboton sa maayong mga buhat.” (Tito 2:14) Ang 48 ka membro sa ika-101ng klase sa Watchtower Bible School of Gilead nagpasundayag gayod sa ilang kadasig alang sa maayong mga buhat. Ang programa sa graduwasyon alang niining mga misyonaryoha gihimo niadtong Septiyembre 7, 1996, sa Edukasyonal nga Sentro sa Watchtower sa Patterson, New York.

Praktikal nga Tambag Aron Magpabiling Madasigon

Ang tsirman sa programa sa graduwasyon mao si Carey Barber, usa ka membro sa Nagamandong Lawas, nga adunay kapin sa 70 ka tuig diha sa bug-os-panahong ministeryo. Sa iyang pangabling mga komento, si Brader Barber naghisgot sa pagsangyaw ug pagpanudlo nga kalihokan ni Jesus, kinsa mao “ang kahayag sa kalibotan.” (Juan 8:12) Iyang gipunting nga wala hupti ni Jesus sa kaugalingon lamang ang maong dungganong papel kondili nag-awhag sa iyang mga tinun-an nga pasidlakon usab ang ilang kahayag. (Mateo 5:14-16) Kining maong pribilehiyo sa pag-alagad nagdugang ug kahulogan sa kinabuhi sa usa ka Kristohanon ug nagpatong ug bug-at nga responsabilidad diha sa mga abaga niadtong tanan nga ‘naglakaw ingon nga mga anak sa kahayag.’​—Efeso 5:8.

Human niadtong pangabling mga komento, si Don Adams sa Ehekutibong mga Buhatan sa hedkuwarter sa Brooklyn gipailaila. Siya namulong bahin sa ulohang “Pag-abante, Dili Pag-atras.” Si Brader Adams nagtunong sa pagtagad diha sa Tunghaang Gilead mismo ug sa katuyoan niini​—ang pagpakaylap sa maayong balita ngadto sa langyawng mga nasod. Siya naghisgot bahin sa pag-uswag sa organisasyon sa Diyos, nga nagpatik ug mga literatura sa Bibliya sa tibuok kalibotan sa kapin sa 300 ka pinulongan. Ang librong Kahibalo nga Motultol sa Kinabuhing Walay Kataposan, nga gipatik sa 1995, mabatonan sa 111 ka pinulongan ug gieskedyul nga imprentahon sa dugang pang mga pinulongan. Galamiton na kini sa pagtabang sa bag-ong mga tinun-an ni Jesus nga makaabot sa punto nga magpahinungod ug magpabawtismo sulod sa pipila lamang ka bulan. Busa ang bag-ong mga misyonaryo makabaton sa kinaulahiang mga tabang sa pagtuon sa Bibliya alang sa ilang buluhaton.

Sunod, si Lyman Swingle, usa ka membro sa Nagamandong Lawas, namulong bahin sa topikong “Padayon sa Paghatag Kang Jehova sa Imong Sagradong Pag-alagad,” nga gipasikad sa Pinadayag 7:15. Sanglit si Jehova mismo maoy usa ka malipayong Diyos, ang padayong pag-alagad kaniya maoy makapalipay sa usa. (1 Timoteo 1:11) Ingong resulta niining malipayong pag-alagad, usa ka dakong panon sa katawhan gikan sa tanang bahin sa yuta nagasimba kaniya. Latas sa katuigan, kadtong gibansay sa Tunghaang Gilead may bahin sa pagtabang sa daghan kanila nga makadangat sa tukmang kahibalo sa kamatuoran. Busa, kita may katarongan gayod sa pagtuo nga si Jehova padayong magapanalangin niadtong ginapadala karon sa pagtigom sa dugang mga membro sa mausbawong dakong panon.

Ang “Pagpalandong sa Kalipay ni Jehova” mao ang tema nga gipasiugda ni Daniel Sydlik, usa usab ka membro sa Nagamandong Lawas. Iyang gipakita nga ang tanang alagad sa Diyos, lakip ang bag-ong mga misyonaryo, adunay pribilehiyo nga magtudlo sa mga tawo sa dalan sa  walay-kataposang kinabuhi ug sa dalan sa pagpahimulos sa labing maayo sa kinabuhi karon. “Ang pagtudlo,” matod ni Brader Sydlik, “maoy magantihon-sa-kaugalingon nga propesyon. Kini nabanaag sa mga nawong sa katawhan nga nagapanudlo ug sa mga nawong sa mga tawo nga nakakat-on.” (Salmo 16:8-11) Iyang gikutlo ang usa ka misyonaryo sa Estonia nga miingon, “Nabatonan nato ang labing hinungdanong mensahe sa nawong sa yuta, ug gibanaag kana sa atong nawong.” Ang atong ekspresyon sa nawong mahimong magpahinabo sa mga tawo nga mamati kanato ug makapukaw sa interes. Ang mga tawo buot mahibalo kon unsay nakapalipay sa mga alagad ni Jehova. “Busa tagda ang imong ekspresyon sa nawong,” mitambag si Brader Sydlik. “Ang mga tawo malipay nga makakita ug malipayong mga tawo.”

Si Ulysses Glass, kinsa nakig-ambit sa pagtudlo sa mga estudyante sa Gilead sukad sa ika-12ng klase sa 1949, nakigsulti sa mamiminaw sa ulohang “Uban sa Pailob, Bantayi ang Inyong mga Kalag.” Unsa may pailob? Kini nagpasabot sa ideya sa paghulat nga kalmado alang sa usa ka butang, nga nagpasundayag sa pag-antos ilalom sa paghagit o sobrang kapit-os. Ang mapailobong tawo magpabiling kalmado; ang dili-mapailobong usa mahimong apurado ug masuk-anon. “Daghan ang naghunahuna nga ang pagpailob nagpakitag kahuyang o pagkamaduhaduhaon,” matod ni Brader Glass, apan “kang Jehova kini nagpakita sa kalig-on ug katuyoan.” (Proverbio 16:32) Unsa ang mga ganti sa pagkamapailobon? “Ang pagkamapailobon sa usa ka yugto sa kasuko makaluwas kanimo gikan sa usa ka gatos ka adlaw sa kagul-anan,” matod sa usa ka Insek nga panultihon. “Ang pagkamapailobon makapauswag sa personalidad sa usa,” mikomento si Brader Glass. “Ingong resulta, kini mopalungtad sa maayong mga hiyas. Kini makapahimo sa pagtuo nga tilinguhaon, sa kalinaw nga dumalayon, ug sa gugma nga dili-matarog.”

“Usa ka pribilehiyo ang pagdawat ug asaynment gikan kang Jehova nga Diyos pinaagi sa iyang organisasyon,” matod ni Mark Noumair, kinsa nag-alagad ingong misyonaryo sa Kenya sulod sa 11 ka tuig ug sa pagkakaron usa ka instruktor sa Gilead. Samtang iyang giugmad ang tema nga “Gawas kon Kamo May Pagtuo, Dili Kamo Molahutay,” gipunting ni Brader Noumair ang pananglitan ni Haring Ahaz sa Juda. Gipasaligan ni Isaias ang hari sa pagpaluyo ni Jehova sa iyang asaynment, apan si Ahaz napakyas gihapon sa pagsalig Kaniya. (Isaias 7:2-9) Unya gipunting dayon ni Brader Noumair nga ang mga misyonaryo​—sa pagkatinuod, kitang tanan​—kinahanglang magbaton ug pagtuo kang Jehova aron molahutay sa ilang teokratikanhong mga asaynment. Ang linaing mga hagit sa usa ka misyonaryong asaynment nagkinahanglag lig-ong pagtuo. “Kanunayng ibutang sa hunahuna nga walay hingpit nga kahimtang niining sistemaha sa mga butang,” nag-ingon si Brader Noumair.

Mga Kasinatian nga Nagdasig sa Madasigong Kalihokan

Panahon sa kurso sa ilang pagbansay sa Gilead, ang mga estudyante matag hinapos sa semana migugol ug panahon diha sa publikong ministeryo, nga maoy pangunang buluhaton sa ilang misyonaryong mga asaynment. Si Wallace Liverance, usa ka membro sa pakultad sa Gilead, miinterbiyo sa 15 ka estudyante, nga miasoy sa ilang mga kasinatian. Unya si Leon Weaver sa Service Department Committee ug Lon Schilling sa Bethel Operations Committee miinterbiyo sa mga membro sa komite sa sangang buhatan gikan sa Aprika ug Latin Amerika, nga miasoy ug mga kasinatian gikan sa misyonaryong natad ug may maayong tambag alang sa migraduwar nga mga misyonaryo. Sa Sierra Leone, gipunting, mga 90 porsiyento niadtong nabawtismohan sulod sa 1995 nga tuig sa pag-alagad ang gitabangan sa mga misyonaryo. Pagkamaayong rekord sa madasigong kalihokan!

Sa kataposan, si Milton Henschel, ang presidente sa Sosyedad, namulong sa 2,734 ka mamiminaw  bahin sa ulohang “Ang Makitang Organisasyon ni Jehova Maoy Talagsaon.” Unsay nakapahimo sa organisasyon sa Diyos nga dili matupngan? Dili ang gidak-on ni ang gahom niini apan ang kamatuoran nga kini gigiyahan sa matarong nga mga lagda ug hudisyal nga mga desisyon sa Diyos. Sa karaang kapanahonan ang katawhan ni Jehova, ang nasod sa Israel, mao ang gisaligan sa iyang sagradong mga pahayag, nga maoy naghimo sa nasod nga talagsaon. (Roma 3:1, 2) Karong adlawa, ang organisasyon ni Jehova nahiusa samtang kini nagalihok ubos sa paggiya ni Jesu-Kristo. (Mateo 28:19, 20) Kini nagauswag, nagatubo. May lain pa bang organisasyon sa yuta kansang Nagamandong Lawas nagkonsulta sa Pulong sa Diyos, ang Bibliya, una mohimog hinungdanong mga desisyon? Niini ug sa ubang mga paagi, ang makitang organisasyon ni Jehova tinuod nga talagsaon. Ang makapahimuot nga programa natapos pinaagi sa presentasyon sa mga diploma ug sa pagbasa sa usa ka sulat gikan sa klase nga nagpahayag ug apresasyon alang sa espesyal nga pagbansay.

[Kahon sa panid 22]

Estadistika sa Klase

Mga nasod nga gihawasan: 9

Mga nasod nga giasaynan: 12

Gidaghanon sa mga estudyante: 48

Aberids nga edad: 31.7

Aberids nga tuig diha sa kamatuoran: 13.8

Aberids nga tuig diha sa bug-os-panahong ministeryo: 9.8

[Hulagway sa panid 23]

Ika-101ng Graduwadong Klase sa Watchtower Bible School of Gilead

Sa lista sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Swint, H.; Zezenski, A.; Highfield, L.; Mercado, S.; Diehl,  A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.