Mga Magmamantala sa Gingharian Nagtaho

Pagbarog nga Lig-on sa Tunghaan Gigantihan

ANG Bibliya nagtagna: “Ang tanan nimong mga anak mahimong mga tawo nga tinudloan ni Jehova, ug ang pakigdait sa imong mga anak magmadagayaon.” (Isaias 54:13) Sa gilugwayang paagi, “ang tanan nimong mga anak” ikapadapat sa tibuok nga pundok sa mga alagad sa Diyos sa yuta, lakip ang mga bata pa kaayo. Karong adlawa, ginatino sa Kristohanong mga ginikanan nga ang ilang mga anak maoy “tinudloan ni Jehova” diha sa balay ug sa Kristohanong mga tigom.

Hinuon, sa dihang nagatungha, ang batan-ong mga Kristohanon nag-atubang ug lisod nga mga hagit. Kasagarang gikinahanglan nga sila mobarog nga lig-on sumala sa ilang nakat-onan gikan sa Bibliya. Sa dihang mobarog silang lig-on, ang mga resulta mahimong mapuslanon sa managsamang mga estudyante ug mga magtutudlo, sumala sa gipakita sa mosunod nga kasinatian gikan sa Micronesia.

Sa gamayng kasadpanhong isla sa Pasipiko sa Tol sa Kaislahan sa Chuuk, ang mga magtutudlo sa lokal nga tunghaan nagsulti sa tanang bata nga mangandam ug mosalmot sa usa ka saulog sa tunghaan sa Kalagkalag. Ang Saksing mga nagtungha nasayod nga ang pagsaulog maglangkit sa mga dekorasyon ug mga linaing besti nga magpasundayag sa mga multo, mga duwende, ug mga ungo​—ang tanan nalangkit sa espiritistikanhong mga tradisyon. Ang maong mga bata dili makasalmot sumala sa konsensiya. a

Gikan sa ilang binase-sa-Bibliya nga pagbansay sa balay ug sa Kristohanong kongregasyon, sila nasayod nga ang maong mga buhat dili makapahimuot sa Diyos, bisan pag himoon nga alang lamang sa kalingawan. Sa pagtabang pagpatin-aw sa ilang baroganan nga mas tin-aw, ang mga bata nagdapit kang Barak, usa sa Saksing mga misyonaryo sa isla, sa pagpakigsulti sa ilang mga magtutudlo.

Human makabati sa katin-awan, gihikay sa mga magtutudlo ang ikaduhang tigom, diin si Barak nakapahayag ngadto sa tibuok nga kawani sa tunghaan. Sa maong tigom, gipahayag ni Barak ang mga kamatuoran sa pagpakita sa tinuod nga kinaiya sa Kalagkalag. Gikuha niya ang iyang impormasyon gikan sa ubay-ubayng basahon sa Watch Tower ingon man gikan sa ubang mga reperensiya. Ang mga magtutudlo ug mga administrador natingala sa ilang nakat-onan bahin sa sinugdanan, kasaysayan, ug relihiyosong kinaiya sa saulog. Mihukom sila sa paghimog usa ka tigom sa mga magtutudlo aron madesisyonan kon unsaon paghusay ang kahimtang.

Pipila ka adlaw sa ulahi, gipahibalo ang usa ka wala-damha nga desisyon. Ang tanang pangandam alang sa Kalagkalag gikanselar. Ang tunghaan tinong dili magsaulog sa Kalagkalag niadtong tuiga. Pagkamaayong sangpotanan sa determinasyon sa maong batan-ong mga Saksi sa pagbuhat kon unsay matarong diha sa tunghaan! Ang mga batan-on dili gayod kinahanglang mahadlok o maulaw sa pagbarog nga lig-on dapig sa kamatuoran sa Bibliya.

Sa tibuok kalibotan, ang mga Saksi ni Jehova nagtudlo sa ilang mga anak nga magkugi sa pagtuon sa tunghaan. Ang batan-ong mga Saksi gibansay usab sa pagsunod sa mga prinsipyo sa Bibliya diha sa kinabuhi ug pagpaambit sa ilang paglaom ug mga pagtuo sa ubang estudyante kon itugot sa higayon. Bisan pag ang mga resulta dili sama ka maayo o dihadiha sumala sa nahitabo sa maong kaso, ang mga batan-on makabaton sa pagsalig ug katagbawan gumikan sa pagbuhat kon unsay matarong. Ug labawng hinungdanon, sila makapaneguro nga ang ilang langitnong Amahan mahimuot ug magapanalangin kanila tungod sa ilang matinumanong pagsugot.

[Footnote]