Paghatag ug Hinabang Taliwala sa Kagun-oban

ANG paningkamot sa tawo sa paghatag ug hinabang pagkatapos gayod sa usa ka katalagman tinuod nga dalayegon. Daghang programa sa hinabang nakatabang sa pagkatukod pag-usab sa mga balay, pagkahiusa pag-usab sa mga pamilya, ug, labaw sa tanan, pagkaluwas sa mga kinabuhi.

Sa dihang mohampak ang katalagman, ang mga Saksi ni Jehova magpahimulos​—ug mapasalamaton​—sa bisan unsang tagana nga ginahimo pinaagi sa sekular nga mga programa sa panghinabang. Sa samang panahon, sila adunay Kasulatanhong katungdanan “sa pagbuhat ug maayo . . . ilabina kanilang iglabot [nila] sa pagtuo.” (Galacia 6:10) Oo, gibati sa mga Saksi nga daw paryente sila; giisip nila ang usag usa ingong “pamilya.” Kanay hinungdang nagtawganay sila sa usag usa nga “brader” ug “sister” o “igsoon.”​—Itandi ang Marcos 3:31-35; Filemon 1, 2.

 Busa inigkahitabo sa usa ka katalagman sa usa ka dapit, ang mga ansiyano sa mga Saksi ni Jehova maningkamot gayod sa pagtino kon hain ug kon unsay mga panginahanglan sa matag membro sa kongregasyon ug maghimog mga kahikayan alang sa gikinahanglang tabang. Tagda kon sa unsang paagi nahitabo kini sa Accra, Ghana; San Angelo, T.B.A.; ug sa Kobe, Hapon.

Accra​—“Giming nga Adlaw ni Noe”

Misugod ang ulan sa mga alas 11 sa gabii, ug way-hunong nga mibunok kini sulod sa daghang oras. “Kusog kaayo ang ulan nga wala makatulog ang tibuok nakong pamilya,” matod ni John Twumasi, usa sa mga Saksi ni Jehova sa Accra. Ang Daily Graphic nagtawag niana nga “giming nga Adlaw ni Noe.” “Gisulayan namo pagdala sa taas ang pipila ka mahal nga butang,” mipadayon si John, “apan pag-abre namo sa pultahan paingon sa hagdan, mibul-og ang tubig sa baha.”

Gipahayag sa mga awtoridad ang pasidaan sa pag-ebakwet, apan daghan ang nagpanuko, kay nahadlok nga ang balayng walay tawo​—bisan pag punog tubig​—basin magdani sa mga kawatan. Dili gani makabiya ang uban bisan pag gusto nila. “Ang akong inahan ug ako wala makaabre sa pultahan,” matod sa usa ka batang babaye nga ginganlag Paulina. “Ang tubig nagpadayon pagtubo, mao nga mitungtong kami sa tablang mga baril ug nangupot sa usa ka sagbayan sa bubongan. Sa kataposan, sa mga alas singko sa buntag, gitabangan kami sa among mga silingan.”

Sa dihang puwede na, ang mga Saksi ni Jehova milihok. Usa ka Kristohanong sister nga ginganlag Beatrice miasoy: “Gipangita kami sa mga ansiyano sa kongregasyon, ug ila kaming nakaplagan sa balay sa usa ka kaubang Saksi, diin midangop kami. Tulo lang ka adlaw human sa baha, ang mga ansiyano ug ang batabatang mga membro sa kongregasyon miabot sa among dapit ug nagkiskis sa lapok sa sulod ug sa gawas sa among balay. Ang Watch Tower Society naghatag ug mga deterhente, mga pangpatay sa kagaw, pintal, mga kutson, mga habol, panapton, ug sinina alang sa mga bata. Ang mga igsoon nagpadala kanamog pagkaon alang sa ubay-ubayng adlaw. Dulot nga natandog ang akong pagbati!”

Si John Twumasi, nga gikutlong sayosayo, mitaho: “Gisultihan nako ang ubang mga mangangabang nga gipadalhan kami sa among Sosyedad ug mga deterhente ug mga pangpatay sa kagaw​—igo sa paglimpiyo sa tibuok nga apartment. Mga 40 ka mangangabang mitabang sa pagpanglimpiyo. Gihatag nako ang pipila sa mga deterhente ngadto sa akong mga silingan, lakip sa usa ka tawo nga maoy pari sa usa ka lokal nga simbahan. Ang akong mga kauban sa trabaho sayop nga naghunahuna nga ang mga Saksi ni Jehova magpakitag gugma ngadto lamang sa ilang kaugalingong katawhan.”

Ang Kristohanong mga igsoon mapasalamaton kaayo sa mahigugmaong hinabang nga gihatag kanila. Si Brader Twumasi mihinapos: “Bisan pag ang mga butang nga nawala kanako tungod sa baha labaw ug bili kay sa mga hinabang, gibati sa akong pamilya ug nako nga tungod niining makapatandog-sa-pagbati nga tagana gikan sa Sosyedad, labi pang dako ang among naangkon kay sa nawala kanamo.”

San Angelo​—“Sama Kadtog Matapos na ang Kalibotan”

Ang mga buhawi nga mimakmak sa San Angelo sa Mayo 28, 1995, nag-ibot sa mga kahoy, nagbali sa mga poste sa elektrisidad, ug naglabog sa mga alambre sa koryente tabok sa mga karsada. Ang hangin mihuros abot sa 160 kilometros kada oras, nga naglumpag sa publikong mga estruktura. Sa bug-os nawad-ag koryente ang kapig 20,000 ka balay. Unya nahitabo ang ulan sa yelo. Ang Nasyonal nga Serbisyo sa Panahon mitaho bahin sa “samag-bola sa golf ang gidak-on nga  ulan sa yelo,” unya “samag-bola sa sopbol ang gidak-on nga ulan sa yelo,” ug sa kataposan “samag-buongon ang gidak-on nga ulan sa yelo.” Ang dahunog makabungol. Usa ka molupyo miingon: “Sama kadtog matapos na ang kalibotan.”

Ang makahahadlok nga kalinaw mibanos sa bagyo. Ang mga tawo inanayng migawas sa gimakmak nilang kabalayan aron masusi ang kadaot. Nahulos ang kadahonan sa mga punoan sa kahoy nga nagtindog pa. Ang kabalayang nagbarog pa samag gipanitan. Sa pipila ka dapit ang ulan sa yelo mitabon sa yuta nga tumpoktumpok nga abot ug usa ka metros ang giladmon. Libolibong sira sa bentana gikan sa mga balay ug mga kotse nangabuak tungod sa bagyo, mao nga niadtong panahona ang mga bildo misidlak tapad sa yelong milimin sa yuta. “Sa pagkauli nako sa balay,” usa ka babaye miingon, “milingkod lang ako sa akong kotse sa draybwey ug mihilak. Grabe kaayo ang kadaot, nahugno gayod ang akong balatian.”

Ang mga programa sa panghinabang ug ang mga ospital midali sa paghatag ug pinansiyal nga hinabang, materyales nga igtutukod, tambal, ug panambag. Dalayegon, daghang tawo nga maoy mga biktima mismo sa bagyo nagbuhat sa ilang maarangan aron tabangan ang uban.

Ang mga kongregasyon sa mga Saksi ni Jehova milihok usab. Si Aubrey Conner, usa ka ansiyano sa San Angelo, mitaho: “Pagkatapos sa bagyo, kami nanawag sa telepono aron pagsusi sa usag usa. Kami nagtinabangay sa usag usa ug sa among dili-Saksing mga silingan sa pagtabon sa mga bentana, pagbutang ug plastik sa bubongan, ug pagpalig-on sa mga balay batok sa daotang panahon kutob sa mahimo. Unya among gitala ang matag tawo sa kongregasyon kansang balay naapektahan. Duolag usa ka gatos ka balay kinahanglang ayohon, ug dili igo ang materyal nga gihatag sa mga ahensiya sa hinabang. Busa namalit kamig ekstrang materyales ug nag-organisar alang sa trabaho. Sa kabug-osan, mga 1,000 ka Saksi ang miboluntaryo sa pagtabang, mga 250 matag hinapos sa semana. Sila nangabot gikan sa ingon ka layo nga 740 kilometros. Ang tanan mitrabahong walay hunong, kasagaran sa halos 40° C. nga klima. Bisan ang usa ka 70-anyos nga sister miduyog sa pagtrabaho uban namo matag hinapos sa semana gawas sa usa, ug kana maoy sa panahong giayo ang iyang balay. Ug sa maong hinapos sa semana didto siya sa taas sa iyang bubongan nga nagtabang sa mga ayohonon!

“Kasagaran makabati kamig mga komento gikan sa mga makakita sama sa, ‘Dili ba maayo unta kon ang ubang mga relihiyon maghimo niini alang sa ilang mga membro?’ Ang among mga silingan nakadayeg sa pagkakitag mga trabahante nga 10 ngadto 12 ka boluntaryo (lakip ang mga sister) nga moabot sayo sa buntag sa Biyernes sa balay sa usa ka isigka-Saksi, nga andam nga moayo o bisan motukod pag-usab sa enterong bubongan nga libre. Sa kadaghanang kahimtang ang trabaho nahuman sa usa ka hinapos sa semana. Usahay, usa ka tagagawas nga kontratista nagtrabaho na sa bubongan sa pag-abot sa among grupo sa trabahante sa usa ka balay sa tapad. Among malangkat ang daang atop ug mataod na usab ang among atop ug mahinloan ang tugkaran sa dili pa nila mahuman ang ilaha. Usahay mohunong sila sa ilang trabaho aron manan-aw lamang kanamo!”

Si Brader Conner mihinapos: “Mingawon kaming tanan sa mga kasinatian nga natagamtam namong tanan. Nagkailhanay kami sa usag usa gikan sa lainlaing panglantaw pinaagi sa pagpakita ug pagkagipakitaan ug inigsoong gugma nga walay ingon sukad masukad. Gibati namo nga kini patilaw lamang kon unsa unyay kahimtang sa bag-ong kalibotan sa Diyos, nga ang mga igsoong lalaki ug babaye magtinabangay sa usag usa tungod kay gusto gayod nilang motabang.”​—2 Pedro 3:13.

 Kobe​—“Usa ka Kagun-oban sa Tabla, Bulit nga Yeso ug mga Lawas sa Tawo”

Ang mga molupyo sa Kobe gituohan nga andam. Sa tinuoray, matag Septiyembre 1 ginasaulog nila ang Adlaw sa Panagang sa Katalagman. Ang mga batang nagtungha maghimo sa mga bansaybansay engkasog adunay linog, ang militar magbansaybansay sa mga misyon sa pagluwas pinaagig helikopter, ug ang mga departamento sa bombero magpagawas sa ilang mga makina nga mosundog sa linog, diin ang mga boluntaryo magbansay sa ilang mga kahanas aron maluwas sila sulod sa usa ka kahon nga ingon ka dako sa kuwarto nga mouyog ug mokurog nga sama gayod sa tinuod nga linog. Apan pagkahitabo sa tinuod nga linog sa Enero 17, 1995, ang tanang pangandam morag walay kapuslanan. Tinagpulo ka libong bubongan nahugno​—butang nga wala gayod mapahinabo sa mga makinang tigsundog. Ang mga tren nabalintong; mga seksiyon sa haywey nabungkag; mga tubo sa gas ug tubig mingbuto; mga balay nalumpag nga samag binuhat sa karton. Ang magasing Time nagbatbat sa esena ingong “usa ka kagun-oban sa tabla, bulit nga yeso ug mga lawas sa tawo.”

Unya nahitabo ang mga sunog. Ang mga tinukod nagsilaob samtang ang mibatig-kapakyasan nga mga bombero natanggong sa milyamilyang trapiko. Kadtong nakaabot sa mga sunog kasagarang nakadiskobre nga walay makuhang tubig gikan sa nadaot nga sistema sa tubig sa siyudad. “Ang unang adlaw maoy bug-os nga kalisang,” matod sa usa ka opisyal. “Wala gayod ako mobati sukad sa kawalay-mahimo sa akong kinabuhi, kay nasayod nga may daghan kaayong tawo nga nalubong niadtong nagsilaob nga mga balay. Ug ang pagkahibalo nga wala koy mahimo bahin niana.”

Sa katibuk-an, mga 5,000 ka tawo namatay, ug mga 50,000 ka tinukod naguba. Ang Kobe may un-tersiya lamang sa pagkaon nga gikinahanglan niini. Aron makabatog tubig gidaginot sa pipila ang hugawng tubig gikan sa ilalom sa mibutong mga tubo sa tubig. Daghan sa walay puy-anan nangadto sa mga silonganan, nga ang pipila niana nagrasyon sa pagkaon, nga nanghatag sa matag tawo ug usa ka inumol nga kan-on matag adlaw. Sa wala madugay ang pagkadiskontento mikaylap. “Walay gibuhat ang mga awtoridad,” mimulo ang usa ka lalaki. “Kon kita magpadayon pagsalig kanila kita mangamatay sa gutom.”

Ang mga kongregasyon sa mga Saksi ni Jehova sa Kobe ug sa duol nga mga dapit nag-organisar dayon sa ilang kaugalingon. Usa ka piloto sa helikopter nga nakakitang direkta sa ilang trabaho miingon: “Miadto ako sa dapit sa katalagman sa adlaw sa linog ug migugol ug usa ka semana didto. Sa pag-abot nako sa usa ka silonganan, ang tanan gubot. Walay gihimong kalihokan sa pagtabang. Ang mga Saksi ni Jehova mao lamang ang miadto dayon sa dapit, nga nagbuhat sa kinahanglanong mga buluhaton.”

Sa pagkatinuod, daghan kaayo ang pagabuhaton. Napulo ka Kingdom Hall ang dili na angayang gamiton, ug kapig 430 ka Saksi ang walay puy-anan. Ang dugang 1,206 ka balay nga ilang gipuy-an kinahanglang ayohon. Dugang pa ang mga pamilya sa 15 ka Saksi nga namatay sa katalagman nagkinahanglan gayod ug paghupay.

Mga 1,000 ka Saksi gikan sa tibuok nasod miboluntaryo sa ilang panahon sa pagtabang sa pagpang-ayo. “Sa dihang nagtrabaho kami sa mga balay sa mga estudyante sa Bibliya nga wala pa mabawtismohi,” miingon ang usa ka igsoong lalaki, “kami kanunayng gisukna, ‘Pilay among ibayad alang niining tanan?’ Sa among giingnan sila nga ang buluhaton gisuportahan sa mga kongregasyon, ila kaming gipasalamatan, nga miingon, ‘Ang among gitun-an natuman na karon!’”

Daghan ang nakadayeg sa dali ug mabug-osong pagsanong sa mga Saksi ngadto sa katalagman. “Ako dulot nga nakadayeg,” miingon ang piloto nga gikutlo nga sayosayo. “Kamo nagtawganay nga ‘brader’ ug ‘sister.’ Nakita nako kon giunsa ninyo pagtinabangay; kamo tinuod nga usa ka pamilya.”

Ang mga Saksi mismo nakakat-on ug bililhong mga leksiyon gikan sa linog. Usa ka igsoong babaye miangkon: “Kanunay kong gibati nga kon mahimong mas dako ang organisasyon, mas lisod ang pagpakitag personal nga kabalaka.” Apan ang mabinationg pagtagad nga iyang nadawat nag-usob sa iyang hunahuna. “Karon ako nasayod na nga si Jehova matinagdanon kanato dili lamang ingong usa ka organisasyon kondili ingon usab nga mga indibiduwal.” Hinuon, ang permanenteng kahupayan gikan sa mga katalagman umaabot pa.

 Permanenteng Kahupayan sa Dili Madugay!

Ang mga Saksi ni Jehova nagpaabot sa panahon sa dihang ang kinabuhi ug panginabuhi sa tawo dili na putlon sa mga katalagman. Sa bag-ong kalibotan sa Diyos, ang tawo tudloan sa pagpakigtambayayong sa kalikopan sa yuta. Samtang isalikway sa mga tawo ang mahakogong mga buhat, sila dili na kaayo maapektahan sa kinaiyanhong mga kapeligrohan.

Dugang pa, si Jehova nga Diyos​—ang Maglalalang sa mga puwersa sa kinaiyahan​—magtino nga ang iyang tawhanong pamilya ug yutan-ong mga linalang dili na gayod hulgaon sa mga puwersa sa kinaiyahan. Unya ang yuta mahimo na gayong usa ka paraiso. (Isaias 65:17, 21, 23; Lucas 23:43) Ang tagna sa Pinadayag 21:4 sa mahimayaon matuman: “Iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.”

[Hulagway sa panid 5]

Si Beatrice Jones (wala) nagpasundayag kon giunsa niya ug sa uban pagkinuptanay aron molabang sa mga tubig sa baha

[Hulagway sa panid 6]

Pagpanghinabang human sa mga buhawi