Angay ba Nimong Palapdon ang Imong Panglantaw?

USA ka malaglagong linog ang mihapak sa Kobe City sa kasadpang Hapon, ug ang nagsakripisyo-sa-kaugalingong mga boluntaryo mitabang gilayon sa naapektohan nga mga molupyo. Hinunoa, usa ka tem sa nagduaw nga mga doktor nakakaplag sa ilang hangyo alang sa medikal nga abiyo nga giayran sa usa ka tawo diha sa Ahensiya sa Maayong Panglawas sa siyudad. Ang maong opisyal, nga mao usab ang direktor sa usa ka dakong munisipal nga ospital, gusto nga ang mga biktima moadto sa mga ospital sa Kobe inay kay dapatan sa mga doktor ug mahal nga mga ineksiyon ug mga dekstros diha sa mga sentro sa hinabang. Ngadtongadto, gitugotan ang hangyo sa mga doktor, apan ang unang gahi nga tinamdan ug daw kakulang sa pagkamabination sa opisyal nagpahinabog kaylap nga pagsaway.

Malagmit ikaw nakasinati na ug susamang pagkagahian sa usa ka tawong may awtoridad. Mahimo ganing ikaw mismo sad-an maylabot niini. Makabaton  ka bag kaayohan gikan sa pag-ugmad ug mas lapad nga punto de bista?

Kuhaa ang Bug-os nga Hulagway

Naandan alang sa mga tawo nga molantaw sa mga butang gikan sa usa lamang ka anggulo, o punto de bista, sa ingon naglimite sa ilang kaisipan ug pagsabot sa mga butang. Sagad nga tungod kini sa mga hinungdan sama sa edukasyon, kasinatian sa kinabuhi, ug kagikan. Makab-ot ang mas maalamong mga desisyon sa dihang maningkamot ang usa sa pagkuha sa bug-os nga hulagway. Pananglitan, kon nagtabok ka sa usa ka puliki nga kinasang-ang dalan diin walay mga suga sa trapiko, maalamon kahang basta na lang motan-aw deretso sa unahan? Siyempre dili! Sa susama, ang pagpalapad sa imong hunahuna aron sa pagkuha sa tibuok nga panglantaw makatabang kaayo sa paghimog mga desisyon ug paglihok diha sa usa ka responsableng paagi. Kini mahimo pa ganing makaluwas ug kinabuhi.

Malagmit, kitang tanan makahimog pag-uswag niining bahina. Busa pangutan-a ang imong kaugalingon, ‘Unsa ang pipila ka luna diin ako posibleng makabaton ug kaayohan pinaagi sa pagpalapad sa akong hunahuna?’

Imong Panglantaw sa Uban

Unsay imong makita sa dihang motan-aw ka sa uban? Aduna ka bay kiling sa paglantaw sa ilang gisulti o gihimo ingong daotan tanan o maayo tanan, nga maora bag wala nay uban pang posible nga konklusyon? Ang komento nga himoon sa usa ka tawo isipon ba nimong pagdayeg o insulto? Ang usa ba ka tawo husto sa bug-os o sayop sa bug-os? Ang pagbaton ug ingon niana nga panglantaw mahisama sa usa ka letratista nga wala magtagad sa daghang nagkadaiyang hayag nga mga kolor ug timpla sa bulok diha sa tinghunlak nga palibot, nga maora bag itom ug puti lamang nga mga larawan ang naglungtad. O may kiling ka ba nga isentro ang pagtagad diha sa negatibong mga bahin sa personalidad sa usa ka tawo, sama gayod sa usa ka magpapanaw nga motugot nga madaot ang iyang pagkalingaw sa matahom nga talan-awon tungod sa usa ka gamayng basura nga gibilin sa walay-konsiderasyong bisita?​—Itandi ang Ecclesiastes 7:16.

Dako ang makat-onan pinaagi sa paghatag ug pagtagad sa panglantaw ni Jehova sa tawhanong kasaypanan. Bisan tuod nasayod sa daghang kahuyangan ug kakulangan sa tawo, iyang gipili nga dili itumong o ipunting ang pagtagad diha niana. Ang mapasalamatong salmista miingon: “Kon sayop lang ang imong ginabantayan . . . Oh Jehova, kinsay makabarog?” (Salmo 130:3) Andam si Jehova nga ipahilayo ang kasaypanan gikan sa mahinulsolong mga makasasala, oo mapasayloong magpala niini, aron dili kini mahimong lama sa atong relasyon kaniya. (Salmo 51:1; 103:12) Si Jehova makasulti mahitungod kang Haring David, kinsa sa usa ka higayon nakabuhat ug seryosong kasal-anan kang Bat-seba, nga siya usa ka tawo “kinsa misunod kanako sa tibuok niyang kasingkasing pinaagi sa pagbuhat lamang sa kon unsay matarong sa akong mga mata.” (1 Hari 14:8) Nganong makasulti ang Diyos niini bahin kang David? Tungod kay iyang gipunting ang pagtagad diha sa mas maayong mga hiyas sa mahinulsolong David. Iyang gihatagag pagtagad ang tanang nalangkit nga mga hinungdan ug mipili sa pagpadayon sa pagpakita ug kaluoy ngadto sa iyang alagad.

Si Kristo Jesus hingpit nga nagpabanaag niining maong lapad nga panglantaw sa kasaypanan sa uban. (Juan 5:19) Sa dihang nag-atubang sa mga kakulangan sa iyang mga apostoles, si Jesus maluluy-on ug masinaboton. Iyang giila mahitungod sa dili-hingpit nga mga tawo nga bisan kon ‘ang espiritu maikagon, ang unod maluya.’ (Mateo 26:41) Naghunahuna niini, si Jesus makaatubang sa mga kahuyangan ug kasaypanan sa iyang mga tinun-an diha sa mapailobon ug masinabotong paagi. Wala niya isentro ang iyang hunahuna sa ilang mga kakulangan kondili, hinunoa, nagtumong sa iyang pagtagad diha sa ilang maayong mga hiyas.

Sa usa ka okasyon human mabadlong ang mga apostoles tungod kay sila naglalis kon kinsay mipatim-aw nga labing dako, si Jesus midugang: “Hinunoa, kamo mao ang mga mitapot kanako diha sa akong mga pagsulay; ug ako nagahimo ug kasabotan uban kaninyo, maingon nga ang akong Amahan naghimo ug kasabotan uban kanako, alang sa usa ka gingharian, aron nga kamo mangaon ug manginom sa akong lamesa diha sa akong gingharian, ug molingkod sa mga trono aron sa paghukom sa napulog-duha ka tribo sa Israel.” (Lucas 22:24-30) Oo, bisan pa sa daghang kakulangan sa mga apostoles, gihinumdoman ni Jesus ang ilang pagkamatinumanon ug ilang gugma alang kaniya. (Proverbio 17:17) Si Jesus may pagsalig kon unsay ilang mahimo ug pagahimoon, busa siya naghimo  ug pakigtugon alang sa usa ka Gingharian uban kanila. Oo, ‘si Jesus nahigugma sa iyang mga tinun-an hangtod sa kataposan.’​—Juan 13:1.

Busa kon ang pagkalahi sa kinaiya ug mga sayop sa usa ka tawo mokiling sa pagpalagot kanimo, sundoga si Jehova ug Jesus. Palapda ang imong hunahuna, ug tinguhaa sa pagsabot ang tanang hinungdan. Pinaagi sa paglantaw sa mga butang sa hustong kahimtang niini, imong makaplagan nga mas sayon higugmaon ug pabilhan ang imong mga igsoon.

Sa Paghatag ug Materyal

Ang pribilehiyo sa paghatag maoy usa sa mga kangaya nga gihatag ngadto sa mga Kristohanon. Apan kinahanglan bang atong limitehan ang atong paghatag sa usa lamang ka buluhaton, pananglitan, sa pagpakigbahin sa ministeryo sa kanataran? (Mateo 24:14; 28:19, 20) O mapalapad kaha ang imong hunahuna aron sa paglakip sa pisikal nga mga panginahanglan ug kaayohan sa uban? Siyempre, giila sa tanang Kristohanon nga importante kaayo ang paghatag sa espirituwal nga paagi. (Juan 6:26, 27; Buhat 1:8) Bisan pa niana, maingon nga importante ang paghatag sa espirituwal nga paagi, ang paghatag sa materyal nga paagi dili gayod angayng pasagdan.​—Santiago 2:15, 16.

Samtang atong gipalandong ang dinaliang mga  panginahanglan sa atong espirituwal nga kaigsoonan diha sa atong kaugalingong kongregasyon ug sa tibuok kalibotan, atong makita sa bug-os kon unsay atong mahimo sa pagtabang kanila. Sa dihang kadtong mga arangan madagayaong makig-ambit sa uban, mahitabo ang pag-angay-angay. Niining paagiha ang mga panginahanglan sa tanan natong kaigsoonan maatiman. Gipahayag kini sa usa ka Kristohanong ansiyano niining paagiha: “Kon motungha ang panginahanglan sa usa ka bahin sa kalibotan, ang kaigsoonan sa laing bahin sa kalibotan motabang kanila. Kon dili sila makaarang sa pagtabang, nan ang mga igsoon sa lain pang dapit maoy motabang. Sa ingon ang mga panginahanglan sa atong mga igsoon sa tibuok kalibotan maatiman. Ang tibuok-kalibotang panag-igsoonay kahibulongan gayod.”​—2 Corinto 8:13-15; 1 Pedro 2:17.

Usa ka Kristohanong igsoong babaye kinsa tim-os nga nagtinguha sa pagtambong sa usa sa internasyonal nga mga kombensiyon nga gihimo sa Sidlakang Uropa dili gayod makaarang sa pagtambong. Apan, siya nakadungog nga ang mga igsoon didto may dakong panginahanglan alang sa mga Bibliya, busa miamot siya alang sa maong mga Bibliya pinaagi sa usa ka tawo nga mitambong. Sa ingon siya nakasinati sa kalipay sa paghatag, sa pagpaambit ngadto sa iyang mga igsoon sa langyawng yuta.​—Buhat 20:35.

Tingali pinaagi sa pagpalapad sa imong hunahuna makahimo kag mas dako pang kontribusyon ngadto sa padayong-nagkaylap nga tibuok-kalibotang buluhaton sa edukasyon sa Bibliya, nga magpahinabog kalipay kanimo ug sa uban usab.​—Deuteronomio 15:7; Proverbio 11:24; Filipos 4:14-19.

Sa Dihang Naghatag ug Tambag

Sa dihang hangyoon aron sa paghatag ug tambag o pagbadlong, ang mahunahunaon ug timbang nga pangatarongan motabang kanato nga maangkon ang pagtahod sa atong espirituwal nga mga igsoon ug sa paghatag ug tinuod nga epektibong pag-abag. Sayon ra kaayong isentro ang pagtagad diha sa pipila ka impormasyon ug mohimog hinanali, mapihigong konklusyon. Mohatag kini sa impresyon nga kita hiktin-ug-pangisip, basin siradog-pangisip pa gani, sama sa relihiyosong mga lider sa adlaw ni Jesus, kinsa nakiling sa pagpabug-at sa uban pinaagi sa ilang walay-kataposang mga tulumanon. (Mateo 23:2-4) Sa laing bahin, kon atong likayan ang mga paghinobra ug mohatag ug maayong tambag nga lig-ong gipasukad sa Kasulatanhong mga prinsipyo, nga nagpabanaag sa matarong apan timbang ug maluluy-ong hunahuna ni Jehova, mas sayon alang sa uban nga dawaton ug ipadapat ang atong mga sugyot.

Pipila ka tuig kanhi ang batan-ong mga igsoong lalaki gikan sa ubay-ubayng kongregasyon nagtipontipon aron magdula. Ikasubo, mitungha ang espiritu sa panag-indig taliwala nila, nga misangpot sa mga pagbayloay ug masakit nga mga pulong. Giunsa pag-atubang sa lokal nga mga ansiyano ang problema? Nga nag-ila sa panginahanglan sa mga batan-on nga maglulinghayaw, sila wala magrekomendar nga sila mohunong sa bug-os. (Efeso 5:17; 1 Timoteo 4:8) Hinunoa, sila mihatag ug lig-on apan makataronganong mga pasidaan mahitungod sa mahimong sangpotanan sa espiritu sa panag-indig. Sila usab mitanyag ug makatabang nga mga sugyot, sama sa pagkapresente sa edaran, responsableng mga kauban. Gipabilhan sa mga batan-on ang kaalam ug pagkatimbang sa maong tambag ug maayo kaayong misanong. Dugang pa, ang ilang pagtahod ug pagmahal sa mga ansiyano mitubo.

Paningkamot nga Mopalapad

Bisan tuod dili ka tingali tinuyo nga naghambin ug pagpihig, nagkinahanglan gihapon ug determinadong paningkamot aron sa pagpalapad sa imong hunahuna. Samtang nagtuon ka sa Pulong sa Diyos, palandonga kini aron masabtan ug mapabilhan ang paagi ni Jehova sa paghunahuna. (Salmo 139:17) Tinguhaa sa pagsabot ang mga katarongan sa mga pahayag nga gihimo diha sa Bibliya ug ang mga prinsipyo nga nalangkit, ug paningkamoti sa pagtimbangtimbang sa mga butang sama sa paagi ni Jehova. Uyon kini sa pag-ampo ni David: “Ipaila kanako ang imong kaugalingong mga dalan, Oh Jehova; tudloi ako sa imong kaugalingong mga alagianan. Palakta ako sa imong kamatuoran ug tudloi ako.”​—Salmo 25:4, 5.

Samtang imong gisagop ang mas lapad nga panglantaw, ikaw pagapanalanginan. Ang usa ka panalangin sa napalapad nga panglantaw mao ang imong pagbaton ug reputasyon sa pagkatimbang ug pagkamasinaboton. Ikaw makasanong sa mas makataronganon ug masinabotong paagi sa dihang naghatag ug tabang sa lainlaing mga kahimtang. Kini, sa baylo, makaamot ngadto sa kahibulongang panaghiusa ug panag-uyon sa Kristohanong panag-igsoonay.

[Mga hulagway sa panid 12]

Ang paghatag nga madagayaon motabang sa uban, mohatag ug kalipay sa maghahatag, ug mopahimuot sa atong langitnong Amahan