Gugma Alang Kanilang ‘Iglabot sa Pagtuo’

ANG tinuod nga mga Kristohanon adunay samag-pamilyang bugkos sa ilang taliwala. Sa pagkatinuod, sukad pa sa unang siglo K.P., ilang gitawag ang usag usa ingon nga “igsoong lalaki” ug “igsoong babaye.” (Marcos 3:31-35; Filemon 1, 2) Dili kini mga pulong lamang; naglangkob kini sa kahubitan kon unsay gibati sa mga magsisimba sa Diyos bahin sa usag usa. (Itandi ang 1 Juan 4:7, 8.) Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”​—Juan 13:35.

Ang maong gugma nadayag niadtong Hulyo 1997 sa dihang ang taas nga hulaw gisundan sa kusog nga mga pagbunok sa ulan ug pagbaha sa Chile. Sa kalit lang, daghan ang nanginahanglan ug pagkaon, sapot, ug ubang mga butang. Sa mga panahon sa katalagman, ang mga Saksi ni Jehova maningkamot sa pagsunod sa tambag ni Pablo sa mga taga-Galacia: “Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.”​—Galacia 6:10.

Busa, ang mga Saksi ni Jehova nag-organisar gilayon sa ilang kaugalingon aron sa pagtabang. Ang pagkaon, sapot, ug susamang mga butang gitigom, giklaseklase, giempake, ug dayon gipadala ngadto sa dapit nga may katalagman. Ang mga bata nag-amot pa gani ug mga dulaan! Ang usa ka igsoong babaye nakurat sa pagkakita niya sa Kingdom Hall nga napuno sa hinabang nga mga abiyo. “Ako nagtindog nga nahingangha, nga wala masayod kon mokatawa o mohilak,” siya miingon. “Mao gayod kadto ang among gikinahanglan.”

 Dayon, sa wala damha, usa ka linog ang mitay-og sa usa ka bahin diha sa samang dapit nga naapektohan sa baha. Daghang balay ang nangahugno. Aron matagan-an ang panginahanglan, dugang mga komite sa hinabang ang giporma. Ang mga Regional Building Committee, nga sagad maoy nagdumala sa pagpanukod sa tigomanang mga pasilidad sa mga Saksi ni Jehova, mitabang ug mihatag sa ilang pagpaluyo. Ang resulta? Ang yanong mga balay​—nga gidisenyo ug gitukod sa mga igsoon—​gihatag alang niadtong nawad-an sa ilang mga balay. Bisag kining mga balaya dili maartehon, kini nagbarog nga lahi kaayo sa mga balay nga gipautang sa sekular nga mga kalihokan sa hinabang ug nga walay mga salog ug mga bentana ug walay pintal.

Ang ubang mga igsoon mipanaw ug lagyong mga distansiya aron sa pagtabang. Ang tsirman sa usa ka Regional Building Committee milibot sa dapit sulod sa duha ka sunodsunod nga adlaw aron susihon ang kadaot​—bisag naglingkod sa wheelchair. Ang usa ka buta nga igsoong lalaki naghago pag-ayo, nga nagpas-an sa mga tablon ngadto sa panday nga maoy naggabas niini sumala sa gitinguhang gidak-on. Ang usa ka bungol nga igsoong lalaki maoy nagtigom sa mga tabla ug naghatod niini ngadto sa dapit diin kini gikinahanglan.

Daghang tigpaniid ang nakadayeg sa tabang nga gihatag sa mga igsoon. Diha sa usa ka lungsod ang sakyanan sa polisya giparking duol sa balay sa igsoong babaye nga gikamulo pag-ayo. Ang mga polis mausisahon. Ang usa misukna sa igsoong lalaki: “Kinsa kining mga trabahante nga daw malipayon kaayo, ug pila ang ilang ginadawat nga suhol?” Ang igsoong lalaki misaysay nga silang tanan maoy mga boluntaryo. Usa sa mga polis misaysay nga nagbayad siyag binulang ikapulo sa iyang iglesya, apan ang iyang pastor wala gani makaduaw kaniya sukad sa linog! Sa pagkasunod adlaw ang igsoong babaye nakadawat ug tawag sa telepono gikan sa usa ka opisyal sa polisya. Siya usab nakapaniid sa mga trabahante. Siya miingon nga siya nakadayeg pag-ayo sa madasigong espiritu sa mga trabahante nga hapit na gani siya matukmod sa pag-apil!

Sa pagkatinuod, ang mga kalihokan sa hinabang sa Chile maoy usa ka malipayong kasinatian alang sa mga boluntaryo ug usa ka ekselenteng pamatuod ngadto sa mga tigpaniid.