Ang pagpabaog nahimo na nga labing kaylap nga gigamit nga paagi sa pagplano sa pamilya. Alang sa daghang tawo, ang pagkadalawaton niini daw nag-agad sa sosyal ug edukasyonal nga kagikan, maingon man sa relihiyosong mga panglantaw. Ang bahin sa relihiyosong pagtuo maoy usa ka hinungdan alang sa mga Saksi ni Jehova, kinsa adunay susamang tinguha sa salmista: “Tudloi ako, Oh Jehova, sa imong dalan, ug mandoi ako sa alagianan nga matul-id.” (Salmo 27:11) Unsay nalangkit sa mga paagi sa pagpabaog?

Ang pagpabaog sa lalaki aron sa pagpugong sa pagpanganak gitawag ug vasectomy. Ang duha ka gagmayng mga sperm cord, o mga tubotubo, diha sa lagay putlon ug abongan. Kini mahimo diha sa nagkadaiyang medikal nga mga paagi, apan ang tuyo maoy aron dili gayod makaagi ang binhi gikan sa mga itlog. Ang pagpabaog sa babaye gitawag ug tubal ligation. Sagad kining ginahimo pinaagi sa pagputol ug paghigot (o, pagsunog) aron matak-op ang mga Fallopian tube, nga maoy agianan sa mga itlog gikan sa mga tagoangkan ngadto sa matris.

Dugay nang giisip kining mga lakanga nga permanente—nga kini magpahinabo ug dili-mauliang pagkabaog. Apan ang pipila ka tawo, tungod kay nagbasol sa ilang lakang o ingong resulta sa bag-ong mga kahimtang, nagpadoktor aron balihon ang vasectomy o tubal ligation. Tungod sa pagkaimbento sa linaing mga instrumento ug microsurgery, ang mga pagsulay sa pagbali nahimong mas malamposon. Dili talagsaong makabasa nga sa pinili nga mga pasyente adunay 50 hangtod 70 porsiyentong kalamposan sa pagbali sa vasectomy pinaagi sa pagsumpay pag-usab sa giputol nga mga tumoy sa gagmayng mga tubotubo. Giangkon nga may 60 hangtod 80 porsiyentong kalamposan sa pagbali sa tubal ligation sa babaye. Ang pipila nga nakahibalo bahin niini mibati nga ang pagpabaog dili na kinahanglang isipon ingong permanente. Tingali nagtuo sila nga ang vasectomy ug tubal ligation maisip nga samag kategoriya sa tomaron nga mga kontraseptibo, mga kondom, ug mga diaphragm—mga paagi nga mahimong ihunong kon gusto nang momabdos. Apan, ang pipila ka seryosong mga bahin dili angayng ibalewala.

Ang usa mao nga ang mga kalaoman alang sa pagbali seryosong maapektohan sa mga hinungdan sama sa gidak-on sa pagkadaot sa mga tubotubo sa panahon sa proseso sa pagpabaog, gidak-on sa tubotubo nga gikuha o miulat, gidaghanon sa mga tuig nga milabay na sukad sa proseso, ug sa kaso sa usa ka vasectomy, kon kaha miresulta ang pagtungha sa mga antibody batok sa binhi sa lalaki. Ug dili ikasalikway ang kamatuoran nga hayan walay mga pasilidad alang sa microsurgery diha sa daghang dapit, o ang gasto tingali dili maarangan. Busa, daghan tingali kinsa nangandoy pag-ayo nga mabali ang pagkabaog dili makahimo niini. Alang kanila kini permanente na. * Busa ang gihisgotan sa ibabaw nga mga kalamposan sa pagbali maoy sa pagkatinuod sa teoriya lamang, dili kasaligang mga aberids.

Ang pipila ka kamatuoran adunay kalabotan sa mga katinuoran. Usa ka artikulo nga gipatik sa Tinipong Bansa mahitungod sa pagbali sa vasectomy mikomento nga human sa $12,000 nga operasyon, “63 porsiyento lamang sa mga pasyente ang makapamabdos sa ilang mga paris.” Dugang pa, aduna lamay “sayis porsiyento sa mga lalaking nagpa-vasectomy nga sa ngadtongadto nagtinguha sa usa ka pagbali.” Sa usa ka pagtuon nga gihimo sa Alemanya mahitungod sa sentral nga Uropa, mga 3 porsiyento sa kalalakin-an nga mipili sa pagpabaog sa ulahi nagtinguha sa usa ka pagbali. Bisan kon katunga niadtong mga pagsulaya ang molampos, kini magkahulogan nga alang sa 98.5 porsiyento, ang pagpa-vasectomy susama ra sa permanenteng pagpabaog. Ug ang gidaghanon mas taas diha sa mga nasod nga diyutay ra o walay mga microsurgeon.

Tungod niana, dili realistikanhong pakamenoson ang pagpabaog sa lalaki o babaye, nga maora bag kini temporaryo nga pagpugong sa pagpanganak. Ug alang sa sinserong Kristohanon, adunay ubang mga bahin nga timbangtimbangon.

Ang usa ka hinungdanong punto mao nga ang mga gahom sa pagsanay maoy gasa gikan sa atong Maglalalang. Ang iyang orihinal nga katuyoan naglakip sa  pagsanay sa hingpit nga mga tawo, nga ‘magpuno sa yuta ug gamhan kini.’ (Genesis 1:28) Human makunhori sa Lunop ang populasyon sa yuta ngadto sa walo, gisubli sa Diyos kadtong paninugdang mga instruksiyon. (Genesis 9:1) Wala sublia sa Diyos ang maong mando ngadto sa nasod sa Israel, apan ang mga Israelinhon naglantaw sa pagbaton ug mga anak ingong usa ka butang nga tilinguhaon kaayo.—1 Samuel 1:1-11; Salmo 128:3.

Ang Balaod sa Diyos ngadto sa Israel naundan ug mga ilhanan sa iyang panglantaw sa tawhanong pagsanay. Pananglitan, kon ang minyo nga lalaki namatay sa wala pa makapatungha ug anak nga lalaki aron maoy magpadayon sa iyang kaliwatan, ang iyang igsoong lalaki kinahanglang maoy mahimong amahan sa usa ka anak nga lalaki pinaagi sa kaminyoon sa bayaw nga lalaki. (Deuteronomio 25:5) Labaw pang may kalabotan niini mao ang balaod mahitungod sa asawa nga misulay sa pagtabang sa iyang bana diha sa usa ka away. Kon iyang gibunlot ang pribadong mga bahin sa kaaway sa iyang bana, putlon ang iyang kamot; hinuon, ang Diyos wala magbaod ug katugbang nga kadaot ngadto kaniya o ngadto sa mga organo sa pagsanay sa iyang bana. (Deuteronomio 25:11, 12) Kining balaora tin-aw nga nagpalambo ug pagtahod alang sa mga organo sa pagsanay; kini dili angayng daoton nga wala-kinahanglana. *

Kita nahibalo nga ang mga Kristohanon wala mailalom sa Kasugoan sa Israel, busa ang lagda sa Deuteronomio 25:11, 12 dili kinahanglang sundon nila. Si Jesus wala magsugo ni magsugyot nga ang iyang mga tinun-an kinahanglang magminyo ug magbaton ug daghang anak kutob sa maarangan, nga maoy gitimbangtimbang sa daghang magtiayon sa dihang nagdesisyon kon mogamit ba ug usa ka matang sa pagpugong sa pagpanganak. (Mateo 19:10-12) Gidasig ni apostol Pablo ang mainitong ‘batan-on pa nga mga babayeng balo nga magminyo ug magpatunghag mga anak.’ (1 Timoteo 5:11-14) Wala siya maghisgot sa permanenteng pagpabaog sa mga Kristohanon—ang ilang boluntaryong pagsakripisyo sa ilang katakos nga makapatunghag mga anak.

Maayo nga timbangtimbangon sa mga Kristohanon ang maong mga timailhan nga ang Diyos nagpabili sa ilang katakos sa pagsanay. Ang matag magtiayon angayng magtino kon mogamit ba ug kon kanus-a mogamit ug nahiangayng mga metodo sa pagplano sa pamilya. Ibutang ta, ang ilang desisyon ilabinang mabug-at kon gikompirmar sa doktor nga ang inahan o anak nag-atubang ug grabeng medikal nga mga kapeligrohan, ngani may kalagmitan nga mamatay, sa umalabot nga pagmabdos. Ang pipila nga anaa nianang kahimtanga may pagpanuko nga nagpailalom sa proseso sa pagpabaog ingon sa gihubit ganiha aron mapaneguro nga dili na momabdos nga maoy makapameligro sa kinabuhi sa inahan (kinsa aduna na tingaliy ubang mga anak) o nianang sa usa ka bata nga basin ipanganak sa ulahi nga dunay sakit nga nagpameligro sa kinabuhi.

Apan ang mga Kristohanon nga wala mag-atubang sa maong talagsaon ug tataw nga kapeligrohan tinong buot mogamit sa ‘kabuot sa hunahuna’ ug iumol ang ilang panghunahuna ug panggawi sumala sa pagtamod sa Diyos sa katakos sa pagsanay. (1 Timoteo 3:2; Tito 1:8; 2:2, 5-8) Kini magpabanaag ug hamtong nga pagkasensitibo sa gipakita sa Kasulatan. Apan, komosta kon dayag nga nahibaloang ang usa ka Kristohanon walay-pagtagad nga misalikway sa mga panglantaw sa Diyos? Dili kaha kaduhaduhaan sa uban kon siya ba usa ka maayong panig-ingnan, nga may reputasyon sa paghimog mga desisyon nga uyon sa Bibliya? Siyempre, ang maong makapatugaw nga lama sa reputasyon sa usa makaapektar sa pagkakuwalipikado sa usa ka ministro alang sa linaing mga pribilehiyo sa pag-alagad, bisan tuod dili tingali ingon niana ang mahitabo kon ang usa tungod sa kawalay-alamag napailalom niining maong proseso.—1 Timoteo 3:7.