Kita Nagkinahanglan sa Organisasyon ni Jehova

NAKADUNGOG ka na ba sukad nga dunay miingon, “Ako nagtuo sa Diyos apan dili sa organisadong relihiyon”? Ang susamang mga hunahuna sagad gipahayag sa mga indibiduwal nga kanhi maoy madasigong mga maninimba apan nalugda tungod sa pagkapakyas sa ilang relihiyon sa pagtagbaw sa ilang espirituwal nga mga panginahanglan. Bisan pag nahigawad sa relihiyosong mga organisasyon sa katibuk-an, daghan ang moinsistir nga buot pa gihapon nilang simbahon ang Diyos. Ugaling, sila nagtuo nga mas maayong simbahon siya sa ilang kaugalingong paagi kay sa pagbuhat sa ingon nga mahimong sakop sa usa ka iglesya o ubang organisasyon.

Unsay giingon sa Bibliya? Buot ba sa Diyos nga ang mga Kristohanon mahimong sakop sa usa ka organisasyon?

Ang Unang mga Kristohanon Nakabenepisyo Tungod sa Pagkaorganisado

Sa Pentekostes 33 K.P., gibubo ni Jehova ang iyang balaang espiritu, dili ngadto sa pipila ka magtutuo, kondili ngadto sa usa ka grupo sa mga lalaki ug babaye nga nagtigom “diha sa samang dapit,” nga mao, sa usa ka lawak sa taas diha sa siyudad sa Jerusalem. (Buhat 2:1) Sa maong panahon, ang Kristohanong kongregasyon, nga nahimong usa ka internasyonal nga organisasyon, natukod. Kadto napamatud-ang usa ka tinuod nga panalangin alang niadtong unang mga tinun-an. Ngano? Sa usa ka katarongan, sila gihatagan ug usa ka hinungdanong asaynment—nga mao ang pagsangyaw sa maayong balita sa Gingharian sa Diyos sa ngadtongadto diha “sa tibuok gipuy-ang yuta.” (Mateo 24:14) Diha sa kongregasyon ang bag-ong mga kinabig makakat-on gikan sa may-kasinatiang mga isigkamagtutuo kon unsaon paghimo ang buluhatong pagsangyaw.

Wala madugay ang mensahe sa Gingharian mikaylap nga saylo pa sa mga paril sa Jerusalem. Tali sa 62 ug 64 K.P., si apostol Pedro nagsulat sa iyang unang sulat ngadto sa mga Kristohanon nga “nangatibulaag sa Ponto, Galacia, Capadocia, Asia, ug Bitinia,” ang tanan nahimutang sa modernong-adlawng Turkey. (1 Pedro 1:1) Dihay mga magtutuo usab sa Palestina, Lebanon, Sirya, Cipro, Gresya, Creta, ug Italya. Sumala sa gisulat ni Pablo ngadto sa mga taga-Colosas sa 60-61 K.P., ang maayong balita “gikawali diha sa tibuok kalalangan ilalom sa langit.”—Colosas 1:23.

Ang ikaduhang benepisyo sa pagkahimong sakop sa usa ka organisasyon mao ang pagdasig nga ikahatag sa mga Kristohanon sa usag usa. Sa pagpakig-uban sa kongregasyon, ang mga Kristohanon makadungog ug makapadasig nga mga pakigpulong, duyog nga makatuon sa Sagradong Kasulatan, makapaambit ug makapalig-on-sa-pagtuong mga kasinatian, ug makaduyog sa kaubang mga magtutuo sa pag-ampo. (1 Corinto, kapitulo 14) Ug ang hamtong  nga mga lalaki ‘makabantay sa panon sa Diyos.’—1 Pedro 5:2.

Ingong mga membro sa kongregasyon, ang mga Kristohanon magkailhanay usab sa usag usa ug nahigugma sa usag usa. Imbes mobati nga nabug-atan sa ilang pagpakig-uban sa kongregasyon, ang unang mga Kristohanon nadasig ug napalig-on niana.—Buhat 2:42; 14:27; 1 Corinto 14:26; Colosas 4:15, 16.

Ang laing katarongan nga gikinahanglan ang nahiusa nga tibuok-kalibotang kongregasyon, o organisasyon, mao ang pagpalambo sa panaghiusa. Ang mga Kristohanon nakakat-on sa ‘pagpamulong diha sa panag-uyon.’ (1 Corinto 1:10) Kini mahinungdanon. Ang mga membro sa kongregasyon naggikan sa nagkadaiyang edukasyonal ug sosyal nga mga kagikan. Sila nagsulti ug lainlaing mga pinulongan, ug sila nagbaton ug tatawng mga kalainan sa personalidad. (Buhat 2:1-11) Usahay, dihay tiunayng mga kalainan sa opinyon. Hinunoa, ang mga Kristohanon natabangan sa pagsulbad sa maong mga kalainan sulod sa kongregasyon.—Buhat 15:1, 2; Filipos 4:2, 3.

Ang seryosong mga pangutana nga dili matubag sa lokal nga mga ansiyano gipasa ngadto sa hamtong nga nagapanawng mga magtatan-aw, sama ni Pablo. Ang hinungdanong doktrinal nga mga butang gipasa ngadto sa sentro sa nagamandong lawas nga nahimutang sa Jerusalem. Ang nagamandong lawas unang gilangkoban sa mga apostol ni Jesu-Kristo apan sa ulahi gidugangan nga naglakip sa tigulang nga mga lalaki sa kongregasyon sa Jerusalem. Ang matag kongregasyon miila sa hinatag-sa-Diyos nga awtoridad sa nagamandong lawas ug sa mga hawas niini sa pag-organisar sa ministeryo, pagtudlo ug mga lalaki diha sa mga katungdanan sa pag-alagad, ug sa paghimog mga desisyon bahin sa doktrinal nga mga butang. Sa dihang ang usa ka isyu gihusay sa nagamandong lawas, ang mga kongregasyon midawat sa desisyon ug “nagmaya maylabot sa maong pagdasig.”—Buhat 15:1, 2, 28, 30, 31.

Oo, si Jehova naggamit ug usa ka organisasyon sa unang siglo. Apan komosta karon?

Kita Nagkinahanglan ug Usa ka Organisasyon Karon

Sama sa ilang unang-siglong mga katugbang, ang mga Saksi ni Jehova karon seryosong nagtuman sa sugo sa pagsangyaw sa maayong balita sa Gingharian. Usa ka paagi sa ilang pagtuman niining buluhatona maoy sa pagpang-apod-apod ug mga Bibliya ug mga tabang sa pagtuon sa Bibliya, nga nagkinahanglag organisasyon.

Ang Kristohanong mga publikasyon kinahanglang andamon pag-ayo, susihon kon tukma ba, imprentahon, ug dayon ipadala ngadto sa mga kongregasyon. Sa baylo, ang indibiduwal nga mga Kristohanon kinahanglang moboluntaryo sa pagdala sa literatura ngadto kanilang buot mobasa niana. Ang mensahe sa Gingharian nakaabot sa milyonmilyong tawo niining paagiha. Ang mga magmamantala sa maayong balita nanlimbasog sa pagbuhat sa ilang kalihokan sa pagsangyaw diha sa hapsay nga paagi, nga nagseguro nga walay bahin sa teritoryo ang kanunayng masangyawan samtang ang ubang mga dapit mapasagdan. Kining tanan nagkinahanglan ug organisasyon.

Sanglit “ang Diyos dili mapihigon,” ang mga Bibliya ug literatura sa Bibliya kinahanglang hubaron. (Buhat 10:34) Sa pagkakaron, kining magasina mabatonan sa 132 ka pinulongan, ug ang kauban niini, ang Pagmata!, gipatik sa 83 ka pinulongan. Kana nagkinahanglag maayo kaayong pagkaorganisar nga mga grupo sa mga maghuhubad sa tibuok kalibotan.

Ang mga membro sa kongregasyon makadawat ug pagdasig sa dihang sila motambong sa Kristohanong mga tigom ug mga asembliya. Didto sila makadungog ug makapadasig nga mga pakigpulong sa Bibliya, duyog nga magtuon sa Kasulatan, mag-ambitay sa makapalig-ong mga kasinatian, ug moduyog sa kaubang mga magsisimba diha sa pag-ampo. Ug sama sa ilang mga igsoon sa unang siglo, sila nagatagamtam sa makapalig-on-sa-pagtuo nga mga duaw sa mahigugmaon nga nagapanawng mga magtatan-aw. Busa, ang mga Kristohanon karon nahimong ‘usa ka panon, usa ka magbalantay.’—Juan 10:16.

Siyempre, ang mga Saksi ni Jehova dili hingpit, ni ang ilang kanhing mga katugbang. Sa gihapon, sila nagtambayayongay nga nagkahiusa. Ingong resulta, ang buluhaton sa pagwali sa Gingharian napalampos sa tibuok yuta.—Buhat 15:36-40; Efeso 4:13.

[Hulagway sa panid 31]

Ang mga Kristohanon karon nahimong ‘usa ka panon, usa ka magbalantay’