Ang Maglulutos Nakakita ug Dakong Kahayag

NAGBUKAL ang dugo ni Saulo sa mga sumusunod ni Jesus. Dili pa kontento sa paglutos nga gipahamtang kanila sa Jerusalem, nga naglakip sa pagbato kang Esteban, siya karon nagtinguha sa pagpakaylap sa pagpit-os. “Nga nagapangusmo pa gihapon ug hulga ug pagbuno batok sa mga tinun-an [si Saulo] miadto sa hataas nga saserdote ug nangayo kaniyag mga sulat ngadto sa mga sinagoga sa Damasco, aron nga iyang madalang ginapos ngadto sa Jerusalem ang bisan kinsang makaplagan nga iya sa Dalan, mga lalaki ug mga babaye.”—Buhat 9:1, 2.

Samtang naglakaw si Saulo paingon sa Damasco, lagmit naghunahuna gayod siya kon unsaon niya pagtuman ang gimando kaniya sa labing epektibong paagi. Ang awtoridad nga gihatag kaniya sa hataas nga saserdote sa walay duhaduha nagpasalig ug pakigtambayayongay gikan sa mga pangulo sa dakong Hudiyong katilingban sa maong siyudad. Si Saulo mangayo sa ilang tabang.

Lagmit misamot gayod ang kahinam ni Saulo samtang nagkaduol siya sa iyang destinasyon. Ang panaw gikan sa Jerusalem paingon sa Damasco—pito- o walo-ka-adlaw nga paglakaw sa mga 220 kilometros—makabudlay. Sa kalit lang sa hapit na ang kaudtohon, usa ka kahayag nga mas sanag kay sa adlaw mikidlap libot kang Saulo, ug natumba siya sa yuta. Nadungog niya ang usa ka tingog nga nag-ingon kaniya sa Hebreohanon: “Saulo, Saulo, nganong ginalutos mo ako? Ang padayong pagpatid batok sa mga tudyok nagpalisod kanimo.” “Kinsa ka man, Ginoo?,” si Saulo nangutana. “Ako si Jesus, kinsa imong ginalutos,” nadungog ang tubag. “Bisan pa niini, bangon ug bumarog sa imong tiil. Kay alang niining katuyoana ako mismo nagpakita kanimo, aron pilion ikaw ingong usa ka tig-alagad ug usa ka saksi sa mga butang nga imong nakita ug sa mga butang nga akong ipakita kanimo maylabot kanako; samtang ipahigawas ko ikaw gikan niini nga katawhan ug gikan sa kanasoran, nga ngadto kanila ako magapadala kanimo.” “Unsay akong buhaton, Ginoo?” nangutana si Saulo. “Tindog, lakaw ngadto sa Damasco, ug didto ikaw sultihan bahin sa tanang butang nga gikatudlo nga imong buhaton.”—Buhat 9:3-6; 22:6-10; 26:13-17.

 Kadtong nagapanawng kauban ni Saulo nakadungog ug tingog, apan wala sila makakita sa mamumulong o makasabot sa iyang gisulti. Tungod sa kasanag sa kahayag, sa dihang si Saulo mitindog dili siya makakita ug kinahanglan siyang agakon. “Sulod sa tulo ka adlaw siya walay nakitang bisan unsa, ug siya wala mokaon ni moinom.”—Buhat 9:7-9; 22:11.

Tulo ka Adlaw nga Pagpamalandong

Si Saulo giabiabi ni Judas, kinsa nagpuyo sa dalan nga gitawag ug Tul-id. a (Buhat 9:11) Kining dalana—nga gitawag ug Darb al-Mustaqim sa Arabe—sa gihapon maoy pangunang dalan sa Damasco. Handurawa kon unsay anaa sa hunahuna ni Saulo samtang siya atua sa balay ni Judas. Ang maong kasinatian nakapabuta ug nakapalisang kang Saulo. Karon dihay panahon sa pagpamalandong bahin sa mga kahulogan niana.

Ang maglulutos giatubang sa iyang giisip nga kabuangan. Ang gilansang nga Ginoong Jesu-Kristo—nga gitunglo sa kinatas-ang awtoridad sa mga Hudiyo ug ‘gipakawalay-bili ug gilikayan sa mga tawo’—maoy buhi. Aw, siya nagabarog pa gani diha sa tuong kamot sa Diyos sa “dili-maduol nga kahayag”! Si Jesus mao ang Mesiyas. Husto si Esteban ug ang uban. (Isaias 53:3; Buhat 7:56; 1 Timoteo 6:16) Si Saulo nasayop gayod, kay gipaila ni Jesus ang iyang kaugalingon uban sa mismong mga tawo nga ginalutos ni Saulo! Atubangan sa ebidensiya, sa unsang paagi makapadayon si Saulo “pagpatid batok sa mga tudyok”? Bisan ang gahig-ulo nga torong baka sa ngadtongadto mapasunod sa direksiyon nga gusto sa tag-iya niini. Busa, pinaagi sa dili pakigtambayayong sa mga awhag ni Jesus, pasakitan ni Saulo ang iyang kaugalingon.

Ingong Mesiyas, si Jesus dili gayod mahimong tinunglo sa Diyos. Bisan pa niana, si Jehova nagtugot kaniya nga antoson ang labing makauulaw sa mga kamatayon ug mailalom sa silot sa Balaod: “Siya nga gibitay tinunglo sa Diyos.” (Deuteronomio 21:23) Si Jesus namatay samtang siya nagbitay sa estaka sa pagsakit. Siya gitunglo, dili tungod sa iyang kaugalingong mga sala, sanglit siya walay sala, kondili tungod sa kasal-anan sa katawhan. Si Saulo sa ulahi misaysay: “Silang tanan nga nagasalig diha sa mga buhat sa balaod maoy ilalom sa tunglo; kay nahisulat: ‘Tinunglo ang matag usa nga wala magapabilin sa tanang butang nga nahisulat diha sa basahong-linukot sa Balaod aron sa pagbuhat niini.’ Dugang pa, tataw nga sa Diyos walay usa nga mapahayag nga matarong pinaagi sa balaod . . . Gipagawas kita ni Kristo pinaagig pagpalit gikan sa tunglo sa Balaod pinaagi sa pagkahimong tinunglo inay nga kita, tungod kay kini nahisulat: ‘Tinunglo ang matag tawo nga binitay diha sa estaka.’”—Galacia 3:10-13.

Ang halad ni Jesus may pangtubos nga bili. Pinaagi sa pagdawat sa maong halad, sa mahulagwayon gilansang ni Jehova ang Balaod ug ang tunglo niana sa estaka. Sa pagkasabot nianang kamatuorana, mahimong tamdon ni Saulo ang estaka sa pagsakit ingong “kaalam sa Diyos” nga “ngadto sa mga Judio usa ka hinungdan sa pagkapandol.” (1 Corinto 1:18-25; Colosas 2:14) Busa, kon ang kaluwasan dili mabatonan pinaagi sa mga buhat sa balaod kondili pinaagi sa pagpasundayag sa Diyos ug dili-takos nga kalulot ngadto sa mga makasasala sama ni Saulo mismo, posible nga bukas kana alang niadtong dili sakop sa Balaod. Ug ngadto sa mga Hentil nga si Jesus nagpadala kang Saulo.—Efeso 3:3-7.

Wala kita mahibalo kon unsa gayod ka daghan ang nasabtan ni Saulo sa panahon sa iyang pagkakabig. Si Jesus kinahanglang makigsulti kaniya pag-usab, lagmit dili lamang kas-a, bahin sa iyang misyon ngadto sa mga nasod. Dugang pa, ubay-ubayng katuigan ang milabay una pa sulata ni Saulo kining tanan ilalom sa pagdasig sa Diyos. (Buhat 22:17-21; Galacia 1:15-18; 2:1, 2) Bisan pa niana, pipila ka adlaw lamang ang milabay una nadawat ni Saulo ang dugang mga sugo gikan sa iyang bag-ong Ginoo.

Ang Pagduaw ni Ananias

Human magpakita kang Saulo, si Jesus nagpakita usab kang Ananias, nga nagsulti kaniya: “Umadto  sa dalan nga gitawag Tul-id, ug sa balay ni Judas pangitaa ang usa ka tawo nga ginganlag Saulo, nga taga-Tarso. Kay, tan-awa! siya nagaampo, ug sa usa ka panan-awon iyang nakita ang usa ka tawo nga ginganlag Ananias nga misulod ug nagpatong sa iyang mga kamot diha kaniya aron mahiuli kaniya ang panan-aw.”—Buhat 9:11, 12.

Sanglit si Ananias nakaila kang Saulo, ang iyang katingala sa mga pulong ni Jesus masabtan. Siya miingon: “Ginoo, nakadungog ako gikan sa daghan mahitungod niining tawhana, kon unsa kadaghang makadaot nga mga butang nga iyang gihimo ngadto sa imong mga balaan sa Jerusalem. Ug ania siya may awtoridad gikan sa pangulong mga saserdote nga ibanlod sa pagkaginapos kadtong tanan nga nagatawag diha sa imong ngalan.” Apan, si Jesus miingon kang Ananias: “Lumakaw, tungod kay kining tawhana maoy usa ka piniling sudlanan alang kanako aron modala sa akong ngalan ngadto sa tanang kanasoran maingon man ngadto sa mga hari ug sa mga anak sa Israel.”—Buhat 9:13-15.

Kay gipasaligan, si Ananias miadto sa direksiyon nga gihatag ni Jesus kaniya. Sa pagkakaplag ug pagtimbaya kang Saulo, gipatong ni Ananias ang iyang mga kamot kaniya. “Ug dihadiha,” nag-ingon ang asoy, “may natagak gikan sa mga mata [ni Saulo] nga maorag mga himbis, ug siya naulian sa panan-aw.” Si Saulo karon andam na nga maminaw. Ang mga pulong ni Ananias naglig-on kon unsa ang lagmit nasabtan ni Saulo gikan sa mga pulong ni Jesus: “Ang Diyos sa atong mga katigulangan mipili kanimo aron mahibalo sa iyang kabubut-on ug makakita sa matarong nga Usa ug aron makadungog sa tingog sa iyang baba, tungod kay ikaw mahimong usa ka saksi alang kaniya ngadto sa tanang tawo sa mga butang nga imong nakita ug nadungog. Ug karon nganong ikaw nagalangan? Tindog, pabawtismo na ug hugasi ang imong mga sala pinaagi sa imong pagtawag sa iyang ngalan.” Ang resulta? Si Saulo “mitindog ug gibawtismohan, ug siya mikaon ug nakabatog kabaskog.”—Buhat 9:17-19; 22:12-16.

Human nga matuman ang iyang tahas, ang matinumanong Ananias kalit nga nawala sa esena sama sa iyang pagsulod niini, ug wala na kita sultihi ug dugang bahin kaniya. Apan nakapahingangha si Saulo sa tanang nakadungog kaniya! Ang kanhing maglulutos, nga miadto sa Damasco aron dakpon ang mga tinun-an ni Jesus, misugod sa pagsangyaw diha sa mga sinagoga ug sa pagpamatuod nga si Jesus mao ang Kristo.—Buhat 9:20-22.

“Apostol Ngadto sa Kanasoran”

Ang naagoman ni Saulo diha sa dalan paingon sa Damasco kusganong nagpahunong sa maglulutos sa iyang pagpanglutos. Sanglit nakaila sa Mesiyas, si Saulo makapadapat na sa daghang hunahuna ug tagna sa Hebreohanong Kasulatan kang Jesus. Ang kaamgohan nga si Jesus nagpakita kaniya ug ‘naghupot kaniya’ ug nagsugo kaniya ingong “apostol ngadto sa kanasoran” nakapausab pag-ayo sa kinabuhi ni Saulo. (Filipos 3:12; Roma 11:13) Karon ingong apostol Pablo, siya adunay pribilehiyo ug awtoridad nga mag-impluwensiya dili lamang sa nahibilin niyang mga adlaw sa yuta kondili sa dalan usab sa Kristohanong kasaysayan.

Katuigan sa ulahi, sa dihang ang pagkaapostol ni Pablo gilantugian, iyang gidepensahan ang iyang awtoridad pinaagi sa paghisgot sa iyang kasinatian diha sa dalan paingon sa Damasco. “Dili ba ako usa ka apostol? Wala ba ako makakita kang Jesus nga atong Ginoo?,” siya nangutana. Ug human hisgoti ang mga pagpakita sa nabanhawng Jesus ngadto sa uban, si Saulo (Pablo) miingon: “Ulahi sa tanan siya mipakita usab ngari kanako nga daw ngadto sa usang natawong ahat.” (1 Corinto 9:1; 15:8) Maorag si Saulo, pinaagi sa iyang panan-awon sa langitnong himaya ni Jesus, gihatagan ug dungog nga matawo, o mabanhaw, ngadto sa espirituhanong kinabuhi nga abante.

Gidawat ni Saulo ang iyang pribilehiyo ug nanlimbasog sa pagkinabuhi sumala niana. “Ako ang labing ubos sa mga apostol, ug ako dili angay tawgon nga usa ka apostol, tungod kay akong gilutos ang kongregasyon sa Diyos,” siya misulat. ‘Apan . . . ang dili-takos nga kalulot [sa Diyos] ngari kanako wala mahimong kawang, hinuon ako naghago nga mas pa kanilang tanan [nga ubang mga apostol].’—1 Corinto 15:9, 10.

Lagmit sama kang Saulo imong nahinumdoman ang panahon sa dihang imong naamgohan nga aron makabatog pag-uyon sa Diyos, kinahanglan nimong usbon ang dugay-nang-gihuptang relihiyosong mga hunahuna. Walay duhaduha ikaw mapasalamaton kaayo nga si Jehova mitabang kanimo nga makasabot sa kamatuoran. Sa dihang nakita ni Saulo ang kahayag ug nakaamgo kon unsay gikinahanglan kaniya, wala siya magpanuko sa pagbuhat niana. Ug siya padayong nagabuhat niana nga may kasibot ug determinasyon sa nahibiling panahon sa iyang kinabuhi sa yuta. Pagkamaayo kaayong panig-ingnan alang sa tanan nga nagtinguha sa pag-uyon ni Jehova karon!

[Footnote]

[Hulagway sa panid 27]

Ang dalan nga gitawag ug Tul-id sa presenteng-adlawng Damasco

[Credit Line]

Photo by ROLOC Color Slides