Matagnaong Pulong sa Diyos Naghatag ug Paglaom Alang sa Umaabot

TUNGOD sa Pulong sa Diyos, ang Balaang Bibliya, ang tinuod nga mga Kristohanon nagalantaw sa umaabot uban ang pagtuo, paglaom, ug masanagong panglantaw. Kay segurado sa ilang relasyon kang Jehova nga Diyos, sila nagalantaw sa umaabot. Sumala sa gisaysay sa pangbukas nga pakigpulong sa “Matagnaong Pulong sa Diyos” nga Distritong mga Kombensiyon, ang mga Saksi ni Jehova maoy masibotong mga estudyante sa tagna sa Bibliya sa daghang tuig. Busa, unsay giandam ni Jehova alang sa iyang katawhan niini nga mga kombensiyon? Uban sa dalang mga Bibliya, ang tanang nanambong mahinamon sa pagsusi niini. Ang tema sa matag adlaw sa kombensiyon gipakita ingong bulag nga sub-ulohan.

UNANG ADLAW: Paglakaw Diha sa Kahayag sa Pulong sa Diyos

Ang pakigpulong nga “Ang Pulong sa Diyos Nagtultol Kanato” nagsaysay nga ang katawhan ni Jehova nahisamag usa ka tawo nga misugod sa pagpanaw diha sa kangitngit sa kagabhion. Sa pagsubang sa adlaw, anino lamang ang iyang makita, apan sa udtong-tutok, maklaro na niya ang iyang makita. Segun sa gitagna sa Proverbio 4:18, tin-aw nga makita sa katawhan ni Jehova ang ilang dalan ilalom sa masanag nga kahayag sa kamatuoran gikan sa matagnaong pulong sa Diyos. Sila wala pasagding mapandol sa espirituwal nga kangitngit.

Ang keynote address, “Tagda ang Matagnaong Pulong sa Diyos,” nagpahinumdom sa mga mamiminaw nga kadtong nagalaom kang Jehova makalikay sa kahigawad ug kasagmuyo nga nasinati sa mga tawong misunod sa bakak nga mga mesiyas ug mga propeta. Sa kasukwahi kaayo, ubay-ubay ang pamatuod sa tinuod nga Mesiyas, si Jesu-Kristo! Pananglitan, ang milagrosong pagkausab sa dagway ni Jesus nagtaganag pasiunang pagsud-ong kaniya ingong naentronong Hari sa Gingharian sa Diyos. Sukad nga nadawat ang gahom sa Gingharian sa 1914, si Jesus usab ang ‘kabugason’ nga gihisgotan sa 2 Pedro 1:19. “Ingong Mesiyanikong Kabugason, iyang gimantala ang bag-ong adlaw, o panahon, nga nagbanagbanag alang sa tanang masinundanong katawhan,” matod sa mamumulong.

Nagpailaila sa programa sa hapon, ang pakigpulong nga “Nagasidlak Ingon nga mga Kahayag” nagpatin-aw sa Efeso 5:8, diin si apostol Pablo nagtambag kanato nga ‘mopadayon sa paglakaw ingon  nga mga anak sa kahayag.’ Ang mga Kristohanon maoy mga tigpasidlak, dili lamang pinaagi sa pagpaambit sa Pulong sa Diyos ngadto sa uban kondili pinaagi usab sa pagpadapat sa Bibliya diha sa ilang kinabuhi isip pagsundog kang Jesus.

Aron mahimong tigpasidlak niining matanga, kita kinahanglang ‘Mahimuot sa Pagbasa sa Pulong sa Diyos.’ Kining ulohana gitagik diha sa tulo-ka-bahin nga simposyum. Human kutloa si Abraham Lincoln, nga nagtawag sa Bibliya nga “kinamaayohang gasa nga gihatag sa Diyos ngadto sa tawo,” gisukna sa unang mamumulong ang mamiminaw kon unsay gibutyag sa ilang mga batasan sa pagbasa maylabot sa kalalom sa ilang pagpabili sa Pulong ni Jehova. Ang mga mamiminaw gidasig sa pagbasa sa Bibliya sa maampingong paagi, sa paggahin ug panahon sa paghanduraw sa Kasulatanhong mga asoy ug sa paglangkit sa bag-ong mga punto uban sa mga butang nga nakat-onan na.

Ang sunod nga bahin sa simposyum nagpasiugda sa panginahanglan sa pagtuon, dili basta lang pagbasa, aron atong matunaw ang “gahi nga pagkaon.” (Hebreohanon 5:13, 14) Ang pagtuon ilabinang makapalig-on, matod sa mamumulong, kon atong ‘andamon daan ang atong mga kasingkasing,’ sama sa gibuhat sa Israelinhong saserdoteng si Esdras. (Esdras 7:10) Apan nganong hinungdanon kaayo ang pagtuon? Tungod kay kini dunay direktang kalabotan sa atong relasyon kang Jehova. Busa, ang pagtuon sa Bibliya angay nga mahimong bililhon, makapahimuot, ug makapalagsik, bisan nagkinahanglan kinig disiplina sa hunahuna ug paningkamot. Unsaon nato pagkaplag ug panahon alang sa makahuloganong pagtuon? Pinaagi sa ‘pagpalit sa nahiangayng panahon’ gikan sa di-kaayo hinungdanong mga kalihokan, matod sa kataposang mamumulong sa simposyum. (Efeso 5:16) Oo, ang yawi sa pagkaplag ug panahon mao ang labing maayong paggamit sa atong nabatonang panahon.

Ang pakigpulong nga “Ang Diyos Nagpalig-on sa Maluya” miila nga daghang tawo ang nangaluya karong mga adlawa. Busa aron atong mabatonan ang “gahom nga labaw sa kasarangan” alang sa Kristohanong ministeryo, kita kinahanglang mosalig kang Jehova, kinsa “naghatag ug gahom sa maluya.” (2 Corinto 4:7; Isaias 40:29) Ang makapalig-ong mga tabang naglakip sa Pulong sa Diyos, pag-ampo, Kristohanong kongregasyon, regular nga pagpakig-ambit sa ministeryo, Kristohanong mga magtatan-aw, ug sa matinumanong mga panig-ingnan sa uban. Ang temang “Mahimong mga Magtutudlo Tungod sa Panahon” nagpasiugda sa panginahanglan nga ang mga Kristohanon mahimong mga magtutudlo maingon man mga magsasangyaw ug magkugi sa pag-ugmad sa “arte sa pagpanudlo.”—2 Timoteo 4:2.

Ang kataposang pakigpulong sa adlaw, “Ang mga Makig-away Batok sa Diyos Dili Makadaog,” naghisgot sa bag-ong wala-sa-lugar nga mga panlimbasog sa pipila ka nasod aron ang mga Saksi ni Jehova tawgong usa ka peligrosong kulto. Apan kita dili angayng mahadlok, kay ang Isaias 54:17 nag-ingon: “‘Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong gikan kanako,’ mao ang giingon ni Jehova.”

IKADUHANG ADLAW: Mga Butang Gipahibalo Pinaagi sa Matagnaong Kasulatan

Human ang panaghisgot sa teksto sa Bibliya sa adlaw, silang natigom nakapahimulos sa ikaduhang simposyum sa kombensiyon, nga  nag-ulohang “Paghimaya Kang Jehova Ingong mga Tigdala sa Kahayag.” Ang unang pakigpulong nagpakita nga ang tumong sa usa ka Kristohanon mao ang paghimaya kang Jehova pinaagi sa pagsangyaw bisan asa. Ang sunod nga bahin naghisgot sa panginahanglan sa pagtultol sa masanongong mga tawo ngadto sa organisasyon sa Diyos. Sa unsang paagi? Pinaagi sa atong pagkuhag lima o napulo ka minuto sa dili pa o human sa matag pagtuon sa Bibliya sa balay aron ipakita kon sa unsang paagi nagalihok ang organisasyon sa Diyos. Ang ikatulong pakigpulong niini nga simposyum nagpasiugda sa panginahanglan sa paghimaya sa Diyos pinaagi sa maayong mga buhat.

Ang pakigpulong nga “Higugmaa Pag-ayo ang mga Pahinumdom ni Jehova” nagkobreg piniling mga bersikulo sa Salmo 119. Sa pagkatinuod, kita nagkinahanglag mga pahinumdom, kay kitang tanan daling makalimot. Nan, pagkahinungdanon nga atong maugmad ang gugma sa mga pahinumdom ni Jehova, sama sa gihimo sa salmista!

Dayon miabot ang espesyal nga bahin—ang pakigpulong sa bawtismo nga nag-ulohang “Pagsunod sa Matagnaong Pulong Motultol sa Bawtismo.” Ang mga kandidato sa bawtismo gipahinumdoman nga ilang sundogon si Kristo dili lamang pinaagi sa pagpabawtismo kondili pinaagi usab sa pagsunod pag-ayo sa iyang mga lakang. (1 Pedro 2:21) Pagkadakong pribilehiyo ang nabatonan niining mga bag-ohan nga makaambit sa katumanan sa Juan 10:16, diin si Jesus nagtagna nga iyang tigomon ang “ubang mga karnero” nga moalagad duyog sa iyang dinihogan-sa-espiritung mga tinun-an!

Sugod sa programa sa hapon, ang pakigpulong nga “Paminaw Kon Unsay Isulti sa Espiritu” nagsaysay nga ang espiritu ni Jehova nagsulti kanato pinaagi sa Bibliya, sa ‘matinumanon ug maalamong ulipon,’ ug sa atong nabansay-sa-Bibliya nga tanlag. (Mateo 24:45) Busa, ang mga Kristohanon dili kinahanglang makadungog ug literal nga tingog gikan sa langit aron mahibalo kon unsaon pagpahimuot ang Diyos. Ang misunod nga panaghisgot, ‘Malig-on sa Pagtulon-an nga Nahiuyon sa Diyosnong Pagkamahinalaron,’ nagtambag sa mga Kristohanon nga dili mosusi sa makapaluyang mga ideya nga gipasiugda niining kalibotana. Sa tinuoray, ang walay-pugong nga pagkamausisahon magladlad kanato sa makadaot nga impormasyon nga gipugas sa mga apostata ug ubang mga ahente ni Satanas. Pagkamaayo pa gayod ang regular nga pagbasa sa Bibliya maingon man sa tanang artikulo sa Ang Bantayanang Torre ug Pagmata!

Nag-ulohang “Padayong Hupti ang Sumbanan sa Makapahimsog nga mga Pulong,” ang sunod nga pakigpulong nagpasiugda sa kahinungdanon sa pagkahimong bug-os nga sinati sa Kasulatanhong “sumbanan,” o gambalay, sa kamatuoran. (2 Timoteo 1:13) Ang pagsabot niini nga sumbanan mao ang yawi dili lamang sa pagbaton ug diyosnong debosyon kondili sa pag-ila usab nianang dili uyon sa kamatuoran.

Handurawa nga ginaisip ka ni Jehova ingong tilinguhaon. Pagkadakong dungog! Gipasukad sa tagna ni Hageo, ang pakigpulong nga “‘Tilinguhaong mga Butang’ Nagapuno sa Balay ni Jehova” ilabinang makapadasig kay nagpasalig kadto sa mga mamiminaw nga ang matag membro sa “dakong panon” tilinguhaon gayod para kang Jehova. (Pinadayag 7:9) Busa, luwason sila ni Jehova latas sa iyang kataposang “pag-uyog” sa mga nasod sa umaabot nga “dakong kasakitan.” (Hageo 2:7, 21, 22; Mateo 24:21) Hinuon, sa kasamtangan, ang katawhan ni Jehova kinahanglang padayong magbantay sa espirituwal nga paagi, sumala sa gisaysay sa bahin nga “Matagnaong mga Kasulatan Makapaigmat Kanato nga Magmabinantayon.” Ang mamumulong nagkutlo sa mga pulong ni Jesus: “Busa, padayong magbantay tungod kay wala kamo mahibalo kon sa unsang adlawa moabot ang inyong Ginoo.” (Mateo 24:42) Unsaon nato pagmentinar ang pagkaigmat sa espirituwal? Pinaagi sa pagkapuliki diha sa pag-alagad kang Jehova, pagpadayon sa pag-ampo, ug pagpabiling nagapaabot sa dakong adlaw ni Jehova.

Ang kataposang pakigpulong sa adlaw nag-ulohang “Ang Matagnaong Pulong sa Panahon sa Kataposan.” Pagahandomon kini sa katuigang moabot. Ngano? Kay ang mamumulong nagpahibalo sa pagluwat sa usa ka bag-ong libro—Patalinghogi ang Tagna ni Daniel! “Kining nindot-pagkailustrar nga 320-panid nga publikasyon nagkobre sa tanang bahin sa basahon ni Daniel,” matod sa mamumulong. Pagkamakapalig-on-sa-pagtuo nga pamatuod nga si Jehova nagapatin-aw sa iyang matagnaong Pulong!

IKATULONG ADLAW: Ang Matagnaong Pulong sa Diyos Dili Gayod Mapakyas

Ang kataposang adlaw sa kombensiyon gisugdan sa simposyum nga “Matagnaong mga Pulong Alang sa Tinudlong Panahon.” Ang tulo ka bahin nagsusi  sa tulo ka pahayag ni Habacuc bahin sa pagpakanaog sa mga paghukom ni Jehova. Ang una maoy batok sa badlonganong Juda ug ang ikaduha batok sa malupigong Babilonya. Ang kataposang paghukom, nga mamatuman pa, mapadapat sa duol nang kalaglagan sa tanang daotang mga tawo. Naghisgot bahin sa Armagedon, ang kataposang igsoong lalaki sa simposyum nakapukaw ug igong sukod sa diyosnong kahadlok diha sa iyang mga mamiminaw sa dihang siya miingon: “Sa pagkatinuod, makahahadlok gayod unya sa dihang gamiton ni Jehova ang bug-os nga puwersa sa iyang dakong gahom.”

Ang “Pagpabili sa Atong Espirituwal nga Panulondon” mao ang ulohan sa makapatandog nga drama sa Bibliya sa kombensiyon. Kining nagasusi-sa-tanlag nga pasundayag nagtandi sa mga tinamdan ni Jacob ug Esau sa espirituwal nga mga butang. Gisalikway ni Esau ang iyang espirituwal nga panulondon, mao nga kini gihatag ngadto kang Jacob, kinsa nagmahal niini. “Unsa [nga espirituwal nga panulondon] ang gihatag ni Jehova kanato?” ang mga kombensiyonista gisukna. “Ang kamatuoran sa iyang Pulong, ang Bibliya; ang paglaom sa walay-kataposang kinabuhi; ug ang dungog sa paghawas kaniya ingong mga magwawali sa maayong balita,” mitubag ang mamumulong.

Ang sunod nga bahin nag-ulohang “Unsay Kahulogan sa atong Bililhong Panulondon Alang Kanimo?” Atong ikapakita ang hustong tinamdan sa atong espirituwal nga panulondon pinaagi sa pagbutang sa pag-alagad kang Jehova ug espirituwal nga mga pribilehiyo nga una kay sa personal o materyal nga intereses. Niining paagiha atong masentro ang atong kinabuhi sa atong relasyon kang Jehova, nga sukwahi kaayo sa iya ni Adan, Esau, ug sa di-matinumanong mga Israelinhon.

Ang pakigpulong publiko, “Pagbag-o sa Tanang Butang—Sumala sa Gitagna,” nagtagik sa upat ka yawing mga tagna bahin sa “bag-ong mga langit” ug “bag-ong yuta.” (Isaias 65:17-25; 66:22-24; 2 Pedro 3:13; Pinadayag 21:1, 3-5) Dayag, diha sa hunahuna ni Jehova ang mas dakong katumanan niining mga tagnaa kay nianang diha sa iyang napasig-uling katawhan sa 537 W.K.P. Oo, diha sa iyang hunahuna ang iyang Ginghariang kagamhanan (ang “bag-ong mga langit”) ug yutan-ong mga ginsakpan niini (ang “bag-ong yuta”), nga magpuyo sa mahimayaong tibuok-yutang paraiso.

Nagdala sa kombensiyon ngadto sa makapahinam ug makapadasig nga paniklop mao ang pakigpulong nga “Atong mga Palaaboton Samtang ang Pulong sa Diyos Magagiya Kanato.” Nagpahinumdom kini sa tanan nga “ang panahong nabilin mubo na” sa paghuman sa buluhaton sa pagwali sa Gingharian. (1 Corinto 7:29) Oo, nagabarog kita sa tugkaran mismo sa katumanan sa paghukom ni Jehova batok kang Satanas ug sa iyang tibuok daotang sistema. Hinaot ang atong pagbati mahisama nianang iya sa salmista kinsa miawit: “Ang among kalag nagapaabot kang Jehova. Siya ang among magtatabang ug among taming.” (Salmo 33:20) Pagkamahimayaong palaaboton ang anaa sa unahan alang niadtong kansang mga pagdahom gipasukad sa matagnaong pulong sa Diyos!

[Hulagway sa panid 7]

Ang makapadasig nga drama nagpalalom sa pagpabili sa espirituwal nga panulondon sa mga alagad ni Jehova

[Hulagway sa panid 7]

Daghan kinsa misunod sa matagnaong pulong sa Diyos gibawtismohan