“Padayong Magbantay”

“Busa, padayong magbantay tungod kay wala kamo mahibalo kon sa unsang adlawa moabot ang inyong Ginoo.”—MATEO 24:42.

1. Unsay gibati sa dugay nang mga alagad ni Jehova sa ilang daghang tuig sa dedikadong pag-alagad? Paghisgot ug usa ka pananglitan.

 DAGHANG dugay nang mga alagad ni Jehova nakahibalo sa kamatuoran sa batan-on pa sila nga mga lalaki ug babaye. Sama sa magpapatigayon nga nakakitag mutya nga dakog bili ug nagbaligya sa tanan niyang gipanag-iya aron paliton kana, kadtong maikagong mga estudyante sa Bibliya nagsalikway sa ilang kaugalingon ug nagpahinungod sa ilang mga kinabuhi ngadto kang Jehova. (Mateo 13:45, 46: Marcos 8:34) Unsay ilang gibati bahin sa paghulat pag dugaydugay kay sa ilang gidahom aron makakita sa mga katuyoan sa Diyos nga matuman sa yuta? Sila wala magbasol! Sila miuyon kang Brader A. H. Macmillan, kinsa human sa halos 60 ka tuig sa dedikadong pag-alagad sa Diyos, miingon: “Mas determinado ako hinuon sa pagpabilin sa akong pagtuo. Kini naghimo sa kinabuhi nga takos pagakinabuhian alang kanako. Kini nagtabang gihapon kanako sa pag-atubang sa umaabot nga walay kahadlok.”

2. (a) Unsang tukma sa panahong tambag ang gihatag ni Jesus sa iyang mga sumusunod? (b) Unsang mga pangutana ang atong hisgotan niining artikuloha?

² Ikaw komosta? Bisag pila pay imong edad, palandonga ang mga pulong ni Jesus: “Busa, padayong magbantay tungod kay wala kamo mahibalo kon sa unsang adlawa moabot ang inyong Ginoo.” (Mateo 24:42) Kanang yanong mga pulong nagsulod sa lalom nga kamatuoran. Kita wala mahibalo kon unsang adlawa ang Ginoo moabot sa pagpahamtang sa paghukom niining daotang sistema, ug dili kinahanglan nga kita mahibalo. Apan kita kinahanglang magkinabuhi sa paagi nga kon siya moabot na, kita dili magbasol. Niining bahina, unsang mga panig-ingnan ang atong makita diha sa Bibliya nga motabang kanato sa pagpadayon sa pagbantay? Sa unsang paagi gilarawan ni Jesus kini nga panginahanglan? Ug unsang ebidensiya ang atong nabatonan karon nga nagpamatuod nga kita nagkinabuhi na sa kataposang mga adlaw niining dili-diyosnong kalibotan?

Usa ka Pasidaang Panig-ingnan

3. Sa unsang paagi daghang tawo karon sama niadtong sa panahon ni Noe?

³ Sa daghang bahin, ang mga tawo karon nahisama sa mga lalaki ug babaye sa panahon ni Noe. Niadtong panahona ang yuta napuno sa kapintasan, ug ang hilig sa kasingkasing sa tawo “lunlon nga kadaotan lamang gihapon.” (Genesis 6:5) Ang kadaghanan okupado sa adlaw-adlawng mga kalihokan sa kinabuhi. Apan, sa wala pa ang dakong Lunop, gihatagan ni Jehova ang mga tawo ug higayon sa paghinulsol. Iyang gisugo si Noe sa pagsangyaw, ug si Noe mituman—nag-alagad ingong “usa ka magwawali sa pagkamatarong” tingali sulod sa 40 o 50 ka tuig o sobra pa. (2 Pedro 2:5) Apan, ang mga tawo wala mamati sa  pasidaang mensahe ni Noe. Sila wala magbantay. Busa, sa kataposan, si Noe ug ang iyang pamilya lamang ang naluwas sa pagpahamtang ni Jehova sa paghukom.—Mateo 24:37-39.

4. Sa unsang diwa nga ang pag-alagad ni Noe matawag nga usa ka kalamposan, ug sa unsang paagi ang sama ikaingon labot sa imong buluhatong pagsangyaw?

⁴ Malamposon ba ang pag-alagad ni Noe? Ayawg hukmi ang gamayng gidaghanon sa misanong. Sa pagkatinuod, ang pagsangyaw ni Noe nakatuman sa katuyoan niini bisag unsa pa ang pagsanong. Ngano? Tungod kay naghatag kini sa mga tawo ug igong higayon sa pagpili kon moalagad ba sila ni Jehova o dili. Komosta ang imong teritoryo sa pagsangyaw? Bisan pag wala kaayoy positibong pagsanong, ikaw dakog nalampos. Ngano? Tungod kay pinaagi sa pagsangyaw, imong gipalanog ang pasidaan sa Diyos, ug sa ingon ikaw nagtuman sa sugo nga gihatag ni Jesus sa iyang mga sumusunod.—Mateo 24:14; 28:19, 20.

Wala Magtagad sa mga Manalagna sa Diyos

5. (a) Unsang mga kahimtang ang kasagaran sa Juda sa panahon ni Habacuc, ug sa unsang paagi ang mga tawo misanong sa iyang matagnaong mensahe? (b) Giunsa pagpasundayag sa mga tawo sa Juda ang ilang kasuko ngadto sa mga manalagna ni Jehova?

⁵ Mga siglo human sa Lunop, ang gingharian sa Juda nag-atubang ug malisod kaayo nga kahimtang. Ang idolatriya, inhustisya, pagdaogdaog, ug bisan pagpatay kasagaran. Gipatungha ni Jehova si Habacuc aron sa pagpasidaan sa mga tawo nga kon sila dili maghinulsol, modangat kanila ang katalagman sa mga kamot sa mga Caldeanhon, o Babilonyanhon. (Habacuc 1:5-7) Apan wala mamati ang mga tawo. Tingali sila nangatarongan, ‘Aw, kapin sa usa ka gatos ka tuig sa miagi, ang manalagnang Isaias nagpalanog ug samang pasidaan, apan wala gihapoy nahitabo!’ (Isaias 39:6, 7) Daghang opisyal sa Juda dili lamang walay interes sa mensahe kondili nangasuko usab sa mga mensahero. Sa usa ka okasyon, sila misulay sa pagpatay sa manalagnang Jeremias, ug sila milampos unta kon wala pa mosalga si Ahikam. Nasuko sa laing matagnaong mensahe, gipapatay ni Haring Jehoiakim si manalagnang Urias.—Jeremias 26:21-24.

6. Sa unsang paagi gilig-on ni Jehova si Habacuc?

⁶ Ang mensahe ni Habacuc sama nga madayganon, ug kini sama nga gikaligutgotan nga parehas kang Jeremias, kinsa gidasig sa Diyos sa pagtagna sa 70-ka-tuig nga pagkaawaaw sa Juda. (Jeremias 25:8-11) Busa, atong masabtan ang kasubo ni Habacuc sa dihang siya mituaw: “Hangtod kanus-a, Oh Jehova, ang akong pagtuaw sa pagpangayog tabang, ug ikaw dili mamati? Hangtod kanus-a nga ako mangayo kanimo ug tabang batok sa kapintasan, ug ikaw dili moluwas?” (Habacuc 1:2) Mapuangorong gitubag ni Jehova si Habacuc niining makapalig-on-sa-pagtuo nga mga pulong: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini sa walay pagkapakyas moabot. Kini dili malangan.” (Habacuc 2:3) Busa si Jehova adunay “tinudlong panahon” sa pagtapos sa inhustisya ug pagdaogdaog. Kon daw may pagkalangan, si Habacuc dili angay malugda, ni siya maghinayhinay. Hinunoa, siya gisugo sa ‘pagpadayon sa pagpaabot,’ nga magkinabuhi adlaw-adlaw nga may pagkadinalian. Ang adlaw ni Jehova dili malangan!

7. Nganong ang Jerusalem gitiman-an nga laglagon pag-usab sa unang siglo K.P.?

 ⁷ Sa mga 20 ka tuig human nakigsulti si Jehova kang Habacuc, ang kaulohan nga siyudad sa Juda, ang Jerusalem, nalaglag. Sa ulahi kini gitukod pag-usab, ug ang daghang kasaypanan nga nakahatag ug kaguol kang Habacuc gitul-id. Sa unang siglo K.P., hinunoa, ang siyudad gitiman-an na usab nga laglagon tungod sa pagkadili-matinuohon sa mga molupyo niini. Sa kamaluluy-on, si Jehova naghikay nga ang mga tawong matarong ug kasingkasing maluwas. Niining higayona, iyang gigamit ang kinalabwang manalagna nga si Jesu-Kristo sa paghatag sa mensahe. Sa 33 K.P., gisultihan ni Jesus ang iyang mga sumusunod: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na. Nan silang anaa sa Judea pakalagiwa na ngadto sa kabukiran.”—Lucas 21:20, 21.

8. (a) Unsa kahay nahitabo sa pipila ka Kristohanon sa milabay ang panahon human mamatay si Jesus? (b) Sa unsang paagi ang matagnaong mga pulong ni Jesus bahin sa Jerusalem natuman?

⁸ Sa milabay ang katuigan, ang ubang mga Kristohanon sa Jerusalem tingali nahibulong kon kanus-a matuman ang tagna ni Jesus. Kon buot sabton, palandonga ang mga halad nga sa walay duhaduha gihalad sa pipila kanila. Tingali ilang gibalibaran ang madanihong mga tanyag sa negosyo tungod sa ilang determinasyon sa pagpadayon sa pagbantay. Sa midagan ang panahon, sila ba gikapoy na? Sila ba mihinapos nga nag-usik sila sa ilang panahon, nga nangatarongan nga ang mga pulong ni Jesus aplikado sa umaabot nga kaliwatan, dili sa ila? Sa 66 K.P., ang tagna ni Jesus nagsugod sa pagkatuman sa dihang ang Jerusalem gilibotan sa Romanong kasundalohan. Kadtong nagpadayon sa pagbantay nakaila sa ilhanan, mikalagiw sa siyudad, ug wala makaagom sa paglumpag sa Jerusalem.

Paglarawan sa Panginahanglan sa Pagbantay

9, 10. (a) Unsaon nimo pagsumaryo sa ilustrasyon ni Jesus bahin sa mga ulipon nga naghulat sa pagbalik sa ilang agalon gikan sa iyang kasal? (b) Nganong ang paghulat sa ilang agalon malisod sa mga ulipon? (c) Nganong makaayo alang sa mga ulipon nga magmapailobon?

⁹ Sa pagpasiugda sa panginahanglan sa pagbantay, gitandi ni Jesus ang iyang mga tinun-an sa mga ulipon nga naghulat sa pagbalik sa ilang agalon gikan sa iyang kasal. Sila nahibalo nga siya mobalik sa usa ka gabii—apan sa unsa nga takna? Sa panahon ba sa unang pagbantay sa gabii? Sa ikaduha? Sa ikatulo? Sila wala mahibalo. Si Jesus miingon: “Kon [ang agalon] moabot sa ikaduhang pagbantay, bisan kon sa ikatulo, ug makakaplag kanila sa ingon [nga nagbantay], malipayon sila!” (Lucas 12:35-38) Hunahunaa ang kahinam niining mga ulipona. Ang matag tingog, matag landong sa anino mopasamot sa ilang kahinam: ‘Ato na ba kaha kining agalon?’

¹⁰ Komosta kon ang agalon moabot sa ikaduhang pagbantay sa gabii, nga mokabat gikan sa alas nuybe hangtod sa tungang-gabii? Ang tanan ba kahang mga ulipon, apil na niadtong nagtrabahog maayo sukad sa sayong buntag, andam sa pagsugat kaniya, o kaha ang uban nangatulog pa? Komosta kon ang agalon miabot panahon sa ikatulong pagbantay sa gabii—ang panahon gikan sa tungang-gabii hangtod sa mga alas tres sa buntag? Ang uban ba kaha niining mga ulipona nawad-an nag kadasig, nagbagulbol pa sa daw pagkalangan sa ilang agalon? a Kadto lamang naabtan nga nagbantay sa dihang miabot ang agalon ang sultihan nga malipayon. Ngadto kanila gayod mapadapat ang mga pulong sa Proverbio 13:12: “Ang pagpaabot nga malangan makapadaot sa kasingkasing, apan ang butang nga gitinguha maoy usa ka kahoy sa kinabuhi kon kini moabot.”

11. Sa unsang paagi ang pag-ampo makatabang kanato sa pagpadayon sa pagbantay?

¹¹ Sulod sa panahon sa daw pagkalangan, unsay magtabang sa mga sumusunod ni Jesus sa pagpadayon sa pagbantay? Samtang didto sa tanaman sa Getsemane una pa siya dakpa, gisultihan ni Jesus ang tulo sa iyang mga apostoles: “Padayon sa pagbantay ug pag-ampo nga mapadayonon, aron nga dili kamo mahisulod sa tintasyon.” (Mateo 26:41) Sa katuigan sa ulahi, si Pedro, nga presente niadtong okasyona, mihatag ug samang tambag ngadto sa kaubang mga Kristohanon. Siya misulat: “Ang kataposan sa tanang butang duol na. Busa,  magmabuot kamo sa hunahuna, ug magmabinantayon nga tuyo ang mga pag-ampo.” (1 Pedro 4:7) Tin-aw, ang kinasingkasing nga pag-ampo angay nga mahimong bahin sa atong Kristohanong rutina. Sa pagkatinuod, kita sa tanang panahon kinahanglang mohangyo kang Jehova nga kita tabangan nga magpadayon sa pagbantay.—Roma 12:12; 1 Tesalonica 5:17.

12. Unsay kalainan sa pagpamanabana ug sa pagkamabinantayon?

¹² Matikdi nga si Pedro usab miingon: “Ang kataposan sa tanang butang duol na.” Unsa ka duol? Walay paagi nga ang tawo makatudlo sa eksaktong adlaw ug takna. (Mateo 24:36) Apan adunay kalainan tali sa pagpamanabana, nga wala idasig sa Bibliya, ug pagpadayon sa pagpaabot sa kataposan, nga gidasig niini. (Itandi ang 2 Timoteo 4:3, 4; Tito 3:9.) Unsa ang usa ka paagi nga kita makapadayon sa pagpaabot sa kataposan? Kini maoy pinaagi sa paghatag ug dakong pagtagad sa ebidensiya nga ang kataposan duol na. Busa atong sublion ang unom ka han-ay sa ebidensiya nga nagpamatuod nga kita nagkinabuhi na sa kataposang mga adlaw niining dili-diyosnong kalibotan.

Unom ka Makapakombinsir nga mga Han-ay sa Ebidensiya

13. Sa unsang paagi ang tagna ni Pablo nga narekord sa 2 Timoteo kapitulo 3 nakapakombinsir kanimo nga kita nagkinabuhi na sa “kataposang mga adlaw”?

¹³ Una, atong dayag nga makita ang katumanan sa tagna ni apostol Pablo bahin sa “kataposang mga adlaw.” Si Pablo nagsulat: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini; ug gikan niini nila magpahilayo ka. Apan ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.” (2 Timoteo 3:1-5, 13) Dili ba makita nato kining tagnaa nga nagakatuman sa atong adlaw? Kadto lamang dili manumbaling sa mga hitabo ang makalimod niini! b

14. Sa unsang paagi ang mga pulong sa Pinadayag 12:9 mahitungod sa Yawa natuman karong adlawa, ug unsay mahitabo kaniya sa dili madugay?

¹⁴ Ikaduha, atong makita ang mga epekto sa pagpapahawa kang Satanas ug sa iyang mga demonyo gikan sa langit, sa katumanan sa Pinadayag 12:9. Didto, atong mabasa: “Gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya.” Misangpot kini ug dakong kaalaotan sa yuta. Sa pagkatinuod, dako kaayo ang pagkaalaot sa katawhan, ilabina sukad sa 1914. Apan ang tagna sa Pinadayag nagdugang nga sa dihang ang Yawa gitambog ngadto sa yuta, siya nahibalo nga “siya may mubo nga yugto sa panahon.” (Pinadayag 12:12) Sulod niining yugtoa, si Satanas nakiggubat sa dinihogang mga sumusunod ni Kristo. (Pinadayag 12:17) Atong nakita na gayod ang mga epekto sa iyang pag-atake sa atong panahon. c Apan, sa dili madugay, si Satanas ihulog sa bung-aw “aron dili na niya mapahisalaag pa ang kanasoran.”—Pinadayag 20:1-3.

15. Sa unsang paagi ang Pinadayag 17:9-11 naghatag ug ebidensiya nga kita nagkinabuhi na sa panahon sa kataposan?

¹⁵ Ikatulo, kita nagkinabuhi na sa panahon sa ikawalo ug kataposang “hari” nga gihisgotan sa tagna nga narekord sa Pinadayag 17:9-11. Dinhi gihisgotan ni apostol Juan ang pito ka hari, nga naghawas sa pito ka gahom sa kalibotan—Ehipto, Asirya, Babilonya, Medo-Persia, Gresya, Roma, ug ang Anglo-Amerikano nga duha ka gahom sa kalibotan. Iyang nakita usab ang “ikawalong hari” nga “nagasumikad sa pito.” Kining ikawalong hari —ang kataposan nga nakita ni Juan diha sa panan-awon—karong adlawa naghawas sa Hiniusang Kanasoran. Si Juan nag-ingon nga kining ikawalong hari “mopadulong ngadto sa kalaglagan,” nga human niini wala nay dugang yutan-ong mga hari ang gihisgotan. d

16. Sa unsang paagi ang mga hitabo sa katumanan sa damgo ni Nabucodonosor nga larawan nagpakita nga kita nagkinabuhi na sa kataposang mga adlaw?

¹⁶ Ikaupat, kita nagkinabuhi na sa panahon nga gisimbolohan sa mga tiil sa larawan sa damgo ni Nabucodonosor. Gihubad ni manalagnang Daniel kining misteryosong damgo bahin sa usa ka dakong larawan sa tawhanong matang. (Daniel 2:36-43) Ang upat ka metalikong mga bahin sa larawan naghawas sa nagkalainlaing mga gahom sa kalibotan, sugod sa ulo (ang Imperyo sa Babilonya) ug hangtod sa mga tiil ug mga tudlo sa tiil (ang mga kagamhanan nga nagmando karong adlawa). Ang tanang gahom sa kalibotan nga gihawasan niana nga larawan nanungha na. Kita nagkinabuhi sa panahon nga gisimbolohan sa mga tiil sa larawan. Walay gihisgotan bahin sa ubang mga gahom nga moabot. e

17. Sa unsang paagi ang atong kalihokan sa pagsangyaw sa Gingharian naghatag ug dugang ebidensiya nga kita nagkinabuhi na sa panahon sa kataposan?

¹⁷ Ikalima, atong makita ang tibuok-kalibotang buluhatong pagsangyaw nga ginahimo, nga maoy giingon ni Jesus nga mahitabo sa dili pa ang kataposan niini nga sistema. Si Jesus miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Karong adlawa, kanang tagnaa nagakatuman sa sukod nga wala pa sukad mahimo. Tinuod, duna pa gihapoy mga teritoryo nga wala pa kasangyawi, ug tingali sa tukmang panahon ni Jehova, usa ka dakong pultahan paingon sa mas dakong kalihokan mabuksan. (1 Corinto 16:9) Bisan pa niana, ang Bibliya wala mag-ingon nga si Jehova maghulat hangtod ang tanang indibiduwal sa yuta makadawat ug personal nga pagpamatuod. Hinunoa, ang maayong balita kinahanglang isangyaw sa katagbawan ni Jehova. Unya moabot ang kataposan.—Itandi ang Mateo 10:23.

18. Lagmit, unsay mahitabo sa pipila sa dinihogan sa dihang magsugod ang dakong kasakitan, ug sa unsang paagi kini matino?

¹⁸ Ikaunom, ang gidaghanon sa tinuod nga dinihogang mga tinun-an ni Kristo nagkadiyutay, hinunoa lagmit nga dunay pipila pang mabilin sa yuta sa dihang magsugod ang dakong kasakitan. Ang kadaghanan sa nanghibilin mga tigulang na, ug sa nangagi nga katuigan ang gidaghanon niadtong tinuod gayod nga dinihogan nagkadiyutay. Bisan pa, naghisgot bahin sa dakong kasakitan, si Jesus miingon: “Gawas kon kanang mga adlawa pamub-on, walay unod nga maluwas; apan gumikan sa mga pinili kanang mga adlawa pagapamub-on.” (Mateo 24:21, 22) Nan, lagmit aduna pay mabilin sa pipila sa “mga pinili” ni Kristo sa yuta sa dihang magsugod ang dakong kasakitan. f

Unsay Anaa sa Unahan?

19, 20. Nganong mas dinalian alang kanato karon sukad masukad nga magpabiling magmata ug magpadayong magbantay?

¹⁹ Unsay anaa sa atong umaabot? Ang kulbahinam nga panahon moabotay pa. Si Pablo nagpasidaan nga ang “adlaw ni Jehova moabot  nga sama gayod sa usa ka kawatan diha sa kagabhion.” Nagpunting sa mga tawo nga daw maalamon-sa-kalibotan, siya miingon: “Sa diha nga sila magaingon: ‘Kalinaw ug kasegurohan!’ niana ang kalit nga kalaglagan modangat dihadiha kanila.” Busa, si Pablo nag-awhag sa iyang mga magbabasa: “Dili kita mangatulog sama sa ginahimo sa uban, kundili managtukaw kita ug managhupot sa atong panimuot.” (1 Tesalonica 5:2, 3, 6) Sa pagkatinuod, kadto sila nga naglaom sa tawhanong mga institusyon nga maoy mopatunghag pakigdait ug kasegurohan wala manumbaling sa kamatuoran. Kining mga tawhana nangatulog!

²⁰ Ang kalaglagan niining daotang sistema sa mga butang moabot nga kalit kaayo. Busa, padayon sa pagpaabot sa adlaw ni Jehova. Gisultihan sa Diyos mismo si Habacuc: “Kini dili maglangan”! Sa pagkatinuod, wala pa nahitabo sukad nga nahimong mas dinalian nga kita magpadayon sa pagbantay.

[Mga footnote]

Nahinumdom Ka Ba?

• Unsang Kasulatanhong mga panig-ingnan ang makatabang kanato aron magpadayon sa pagbantay?

• Sa unsang paagi gilarawan ni Jesus ang panginahanglan sa pagkamabinantayon?

• Unsang unom ka han-ay sa ebidensiya nga nagpamatuod nga kita nagkinabuhi na sa kataposang mga adlaw?

[Mga pangutana]

[Mga hulagway sa panid 9]

Si A. H. Macmillan nag-alagad kang Jehova nga matinumanon duolan sa unom ka dekada

[Hulagway sa panid 10]

Gitandi ni Jesus ang iyang mga tinun-an sa mga ulipon nga nagpadayong nagbantay