Kita ang Matang nga May Pagtuo

Pagtanyag ug Mensahe sa Paghupay sa Italya

SI Jehova mao “ang Diyos sa tanang paghupay.” Pinaagi sa pagkat-on sa pagsundog kaniya, ang iyang mga alagad “makahupay nilang anaa sa bisan unsang matang sa kasakitan.” (2 Corinto 1:3, 4; Efeso 5:1) Kini mao ang usa sa pangunang mga tumong sa buluhatong pagsangyaw nga gihimo sa mga Saksi ni Jehova.

Pagtabang sa Usa ka Babaye nga Nanginahanglan

Ilabina sa dili pa dugayng katuigan ang kakabos, gubat, ug ang tinguha sa usa ka mas maayong kinabuhi nagtukmod sa daghan sa paglalin ngadto sa mas adunahang mga nasod. Apan dili sayon ang pagpahiuyon sa bag-ong mga palibot. Si Manjola nagpuyo uban sa kaubang mga taga-Albania sa Borgomanero. Sanglit siya nanimuyo sa Italya nga ilegal, siya nagpanuko sa pagpakigsulti kang Wanda, nga usa sa mga Saksi ni Jehova. Bisan pa niana, sa kataposan nahikay ni Wanda nga makigkita kang Manjola, kinsa nagpakita gilayon ug dakong interes sa pagtuon sa Pulong sa Diyos, bisan kon ang babag sa pinulongan nagpalisod niini.

Apan, human sa pipila ka pagduaw wala nay maabtan si Wanda sa balay. Unsay nahitabo? Nahibaloan ni Wanda nga ang tanang nagpuyo nianang balaya nangalagiw tungod kay ang usa kanila—ang trato ni Manjola—gipangita kay nakapatay!

Upat ka bulan sa ulahi, nahibalag pag-usab ni Wanda si Manjola. “Luspad ug niwang, ang iyang panagway maoy sa usa ka tawo nga naglisod gayod,” nahinumdom si Wanda. Gisaysay ni Manjola nga ang iyang kanhing trato napriso ug ang mga higala nga iyang gipangayoag tabang nakapahigawad kaayo kaniya. Sa kawalay-paglaom, siya miampo sa Diyos alang sa tabang. Dayon iyang nahinumdoman si Wanda, nga naghisgot bahin sa Bibliya. Pagkamalipayon ni Manjola nga nakita siya pag-usab!

Gisugdan pag-usab ang pagtuon sa Bibliya, ug wala magdugay si Manjola misugod na pagtambong sa Kristohanong mga tigom. Siya milampos sa pagkuhag legal nga permiso nga magpabilin sa Italya. Human sa usa ka tuig, si Manjola nahimong usa ka bawtismadong Saksi. Kay nahupayan sa mga saad sa Diyos, mipauli siya sa Albania aron ipakig-ambit ang makapahupay nga mensahe sa Bibliya uban sa iyang katagilungsod.

Pagsangyaw Diha sa Kampo sa mga Lalin

Daghang Italyanhong mga kongregasyon ang naghimog mga kahikayan sa pagsangyaw sa mga lalin sama ni Manjola. Pananglitan, usa ka kongregasyon  sa Florence naghimog mga kahikayan sa pagduaw sa kampo sa mga lalin nga regular. Ang mga molupyo sa kampo—kadaghanan gikan sa Sidlakang Uropa, Macedonia, ug Kosovo—nakasinatig lainlaing kalisdanan. Ang uban adunay mga suliran sa droga o alkohol. Gisuportaran sa daghan ang ilang kaugalingon pinaagi sa ginagmayng pagpangawat.

Ang pagsangyaw niini nga katilingban maoy usa ka hagit. Bisan pa niana, usa ka bug-os-panahong ebanghelisador nga ginganlag Paola ngadtongadto nakakontak kang Jaklina, usa ka babaye nga taga-Macedonia. Human sa pipila ka panaghisgot, gidasig ni Jaklina ang iyang higala nga si Susanna sa pagsusi sa Bibliya. Sa baylo, si Susanna nakigsulti sa ubang mga paryente. Wala magdugay, lima ka membro sa pamilya ang regular nga nagtuon sa Bibliya, nagtambongan sa Kristohanong mga tigom, ug nagpadapat sa ilang nakat-onan. Bisan pa sa mga suliran nga kinahanglan nilang atubangon, sila nakabatog paghupay gikan kang Jehova ug sa iyang Pulong.

Usa ka Madre Midawat ug Paghupay Gikan Kang Jehova

Sa lungsod sa Formia, usa ka bug-os-panahong ebanghelisador nga ginganlag Assunta nakigsulti sa usa ka babaye nga naglisod paglakaw. Ang babaye maoy usa ka madre nga sakop sa usa ka relihiyosong grupo nga naghatag ug mga tabang sa mga masakiton ug maluyahon diha sa mga ospital ug sa pribadong mga balay.

Si Assunta miingon sa madre: “Nag-antos ka usab, dili ba? Ikasubo, kitang tanan may mga suliran nga sagubangon.” Niana ang madre mihilak ug misaysay nga siya adunay grabeng mga balatian. Gidasig siya ni Assunta, nga nag-ingon nga ang Diyos sa Bibliya makahupay kaniya. Gidawat sa madre ang binase-sa-Bibliyang mga magasin nga gitanyag kaniya ni Assunta.

Sa ilang sunod nga panaghisgot, ang madre, kansang ngalan mao si Palmira, miangkon nga hilabihan gayod ang iyang pag-antos. Nagpuyo siya sa dugayng panahon diha sa usa ka institusyon nga gidumala sa mga madre. Sa dihang kinahanglan siyang mobiya nga temporaryo tungod sa mga balatian, siya wala na tugoting mobalik. Bisan pa niana, si Palmira mibating may obligasyon sa Diyos tungod sa iyang gipanaad ingong madre. Midangop siya sa mga mananambal aron sa “pagpatambal” apan nag-antos sa kahasol sa hunahuna tungod sa naagoman. Si Palmira miuyon sa pagtuon sa Bibliya, ug siya mitambong sa Kristohanong mga tigom sulod sa usa ka tuig. Dayon siya mibalhin ngadto sa laing dapit, ug wala na siya makontak sa mga Saksi. Duha ka tuig ang milabay una pa siya makaplagi ni Assunta pag-usab. Nasinati ni Palmira ang grabeng pagsupak gikan sa iyang pamilya ug sa klero. Bisan pa niana, nagtuon siya pag-usab sa Bibliya, miuswag sa espirituwal, ug nagpabawtismo ingong usa sa mga Saksi ni Jehova.

Oo, daghan ang nadasig sa mensahe sa ‘Diyos nga nagahatag ug paghupay.’ (Roma 15:4, 5) Busa, ang Italyanong mga Saksi ni Jehova determinado sa pagpadayon sa pagsundog sa Diyos pinaagi sa pagtanyag sa uban sa iyang kahibulongang mensahe sa paghupay.