Unsay Imong Panglantaw sa Imong Kaugalingon?

GARBOSO siya nga tawo. Kay natuboy ngadto sa hataas kaayong posisyon sa kagamhanan, siya nagpasiatab tungod sa panglana ug pagdayeg nga gihatag kaniya. Apan sa iyang dakong kalagot, ang laing opisyal wala mohatag kaniya sa maong pasidungog. Sa pagpanimalos, ang mapahitas-ong opisyal naglaraw sa paglaglag sa tanang tawo diha sa imperyo nga may samang etnikong kagikan sa nakasala. Pagkahiwi nga ideya sa pagpadako-sa-kaugalingon!

Ang naglaraw mao si Haman, usa ka hataas nga opisyal sa palasyo sa Persianhong Haring Ahasuero. Ug ang iyang gikalagotan? Usa ka Hudiyo nga ginganlag Mardokeo. Bisan kon naghingapin ang pagpuo-sa-kaliwat nga reaksiyon ni Haman, kini nag-ilustrar sa kapeligrohan ug grabeng mga sangpotanan sa garbo. Ang iyang mapahitas-ong espiritu wala lamang magmugnag krisis alang sa uban kondili misangpot usab kini sa iyang kaulawan sa publiko ug sa kataposan sa iyang kamatayon.—Ester 3:1-9; 5:8-14; 6:4-10; 7:1-10.

Ang Matuod nga mga Magsisimba Dili kay Dili Maapektohan sa Garbo

Si Jehova nagbaod nga kita ‘maglakaw nga makasaranganon uban sa atong Diyos.’ (Miqueas 6:8) Ang Bibliya naundan sa lainlaing mga asoy bahin sa mga tawo kinsa napakyas sa pagmentinar ug makasaranganong panglantaw sa ilang kaugalingon. Nakahatag kini kanilag mga suliran ug kaguol. Ang pagkonsiderar sa pipila niining maong mga panig-ingnan makatabang kanato nga masabtan ang kabuangan ug kapeligrohan sa dili-timbang nga panghunahuna.

Ang panghunahuna sa manalagna sa Diyos nga si Jonas nahimo gayong dili-timbang nga siya misulay sa pag-ikyas sa dihang siya gisugo sa Diyos sa pagpasidaan sa daotang mga tawo sa Nineve bahin sa paghukom ni Jehova batok kanila. (Jonas 1:1-3) Sa ulahi, sa dihang ang iyang kalihokan nga pagsangyaw milampos sa pagpahinabo sa mga taga-Nineve nga maghinulsol, si Jonas nagmug-ot. Nabalaka siya pag-ayo sa iyang reputasyon ingong manalagna nga ang kinabuhi sa linibong taga-Nineve gamay lang o dili hinungdanon alang kaniya. (Jonas 4:1-3) Kon kita sa pagkadili-makasaranganon sobrang mabalaka bahin sa atong kadungganan, basin malisdan kita sa pagmentinar sa usa ka dili-mapihigon ug tukmang panglantaw sa mga tawo ug mga hitabo sa atong palibot.

Tagda usab si Uzzias, nga kanhi usa ka maayong hari sa Juda. Sa dihang nahimo siyang dili-timbang sa iyang panghunahuna, siya mapahitas-ong misulay sa pag-ilog sa pipila ka saserdotehanong mga katungdanan. Tungod sa iyang dili-makasaranganon ug mapangahason kaayong mga lihok, siya nasakit ug nawad-an sa pag-uyon sa Diyos.—2 Cronicas 26:3, 16-21.

Ang dili-timbang nga panghunahuna hapit makalit-ag sa mga apostol ni Jesus. Sila nahimong mabalak-on kaayo sa personal nga himaya ug gahom. Sa dihang ang panahon sa dakong pagsulay midangat, ilang gibiyaan si Jesus ug nangalagiw. (Mateo 18:1; 20:20-28; 26:56; Marcos 9:33, 34; Lucas 22:24) Ang ilang kakulang sa pagkamakasaranganon ug ang ilang mga hunahuna bahin sa kaugalingong kadungganan hapit magpahinabo kanila nga malimot sa mga katuyoan ni Jehova ug sa ilang papel maylabot sa iyang katuyoan.

Makadaot nga mga Epekto sa Pagpadako-sa-Kaugalingon

Ang dili-timbang nga panglantaw sa atong kaugalingon makapahinabog kasakit ug makadaot sa atong relasyon sa uban. Pananglitan, kita tingali naglingkod sa usa ka lawak ug tingali nakamatikod sa duha ka tawo nga naghunghongay ug nagkinataw-anay. Kon kita mahunahunaon-sa-kaugalingon lamang, kita tingali sayop nga maghunahuna nga gibugalbugalan kita nila tungod kay sila nagsultihanay nga hinay kaayo. Ang atong hunahuna tingali dili motugot kanato sa pagkonsiderar sa bisan unsang posibleng katin-awan sa ilang lihok. Kon buot sabton, kinsa pay ilang gihisgotan? Kita tingali masuko ug mohukom nga dili na gayod makigsulti pag-usab sa maong duha ka tawo. Nianang paagiha ang usa ka dili-timbang nga panglantaw sa atong kaugalingong kadungganan mahimong motultol sa mga dili-pagsinabtanay ug modaot sa mga relasyon  uban sa mga higala, membro sa pamilya, ug uban pa.

Kadtong sobrang nabalaka sa ilang kaugalingon hayan mahimong mga hambogiro, nga kanunayng manghambog bahin sa ilang gituohang daghang katakos, mga binuhatan, o mga kabtangan. O sila tingali ang mokontrol sa mga panaghisgot, nga kanunayng maghisgot ug mga butang bahin kanila. Ang maong sinultihan nagpaila sa kakulang sa tiunay nga gugma ug mahimong makapalagot kaayo. Busa, ang mga tawong andakan kasagarang magpalain sa ilang kaugalingon gikan sa uban.—1 Corinto 13:4.

Ingong mga Saksi ni Jehova, kita hayan makasugamak ug mga pagtamay ug pagsalikway diha sa atong publikong ministeryo. Angay natong hinumdoman nga ang maong pagsupak gitumong gayod, dili batok kanato mismo, kondili batok kang Jehova, ang Tinubdan sa atong mensahe. Ugaling, ang hiwi nga panglantaw sa atong kaugalingong kadungganan mahimong motultol sa seryosong mga sangpotanan. Katuigan kanhi, giisip sa usa ka igsoong lalaki nga gitumong sa iyang kaugalingon ang binaba nga pag-atake sa tagbalay ug mibalos sa pagsulting mapasipad-anon. (Efeso 4:29) Human niadto, ang igsoong lalaki wala na gayod makigbahin pag-usab sa pultahan-sa-pultahan nga ministeryo. Oo, ang garbo lagmit magtukmod kanato nga masuko sa dihang magsangyaw. Paningkamotan nato nga dili gayod tugotan kana nga mahitabo. Hinunoa, mapainubsanon natong pangayoon ang tabang ni Jehova sa pagmentinar sa haom nga pagpabili alang sa pribilehiyo sa pagpakig-ambit diha sa Kristohanong ministeryo.—2 Corinto 4:1, 7; 10:4, 5.

Ang nagapakaimportante-sa-kaugalingon nga tinamdan makapugong usab kanato sa pagdawat ug gikinahanglan-kaayong tambag. Sa usa ka nasod sa Sentral Amerika pipila ka tuig kanhi, usa ka tin-edyer nga lalaki naghatag ug pakigpulong sa Tunghaan sa Teokratikanhong Ministeryo diha sa Kristohanong kongregasyon. Sa dihang ang magtatan-aw sa tunghaan mihatag kaniyag pintok nga tambag, gilabay sa nasukong batan-on ang iyang Bibliya sa salog ug nagbundakbundak sa tiil pagawas sa Kingdom Hall sa tuyo nga dili na gayod mobalik. Apan human sa pipila ka adlaw, iyang gitulon ang iyang garbo, nakig-uli sa magtatan-aw sa tunghaan, ug mapainubsanong midawat sa iyang tambag. Ngadtongadto, kining batan-ong lalaki mitubo ngadto sa Kristohanong pagkahamtong.

Ang pagkadili-makasaranganon ug ang sobrang kabalaka sa kaugalingon mahimong mosangpot sa pagkadaot sa atong relasyon uban sa Diyos. Ang Proverbio 16:5 nagpasidaan: “Ang tagsatagsa nga garboso sa iyang kasingkasing maoy dulumtanan kang Jehova.”

Usa ka Timbang nga Panglantaw sa Atong Kaugalingon

Tin-aw, kita dili angayng sobrang mabalaka bahin sa atong kaugalingon. Siyempre, wala kini magpasabot nga dili na kita angayng magmaseryoso bahin sa kon unsay atong buhaton o isulti. Ang Bibliya nagpakita nga ang mga magtatan-aw, ministeryal nga mga alagad—sa pagkamatuod, ang tanan diha sa kongregasyon—angayng magmaseryoso. (1 Timoteo 3:4, 8, 11; Tito 2:2) Busa sa unsang paagi ang mga Kristohanon makaugmad ug makamentinar sa usa ka makasaranganon, timbang, ug seryosong panglantaw sa ilang kaugalingon?

Ang Bibliya nagtaganag daghang makapadasig nga mga panig-ingnan sa mga indibiduwal nga naghupot ug timbang nga panglantaw sa ilang kaugalingon. Talagsaon ang panig-ingnan ni Jesu-Kristo sa pagkamapainubsanon. Aron buhaton ang kabubut-on sa iyang Amahan ug magdalag kaluwasan sa katawhan, ang Anak sa Diyos kinabubut-ong mibiya sa iyang mahimayaong langitnong posisyon ug nahimong ubos nga tawo sa yuta. Bisan pa sa mga pag-insulto, pag-abuso, ug sa makauulawng kamatayon, siya padayong naghupot ug pagpugong-sa-kaugalingon ug dignidad. (Mateo 20:28; Filipos 2:5-8; 1 Pedro 2:23, 24) Sa unsang paagi nahimo kini ni Jesus? Siya bug-os nga misalig kang Jehova ug determinadong motuman sa kabubut-on sa Diyos. Si Jesus nagtuon sa Pulong sa Diyos nga makugihon, nag-ampo nga mainiton, ug nanlimbasog pag-ayo diha sa ministeryo. (Mateo 4:1-10; 26:36-44; Lucas 8:1; Juan 4:34; 8:28; Hebreohanon 5:7) Ang pagsunod sa panig-ingnan ni Jesus makatabang kanato sa pag-ugmad ug paghupot ug timbang nga panglantaw sa atong kaugalingon.—1 Pedro 2:21.

Tagda usab ang maayong panig-ingnan sa anak ni Haring Saul nga si Jonathan. Tungod sa pagkadili-masinugtanon sa iyang amahan, si Jonathan nawad-ag kahigayonan sa pagpuli kang Saul ingong hari. (1 Samuel 15:10-29) Si Jonathan ba nayugot tungod sa nawala kaniya? Siya ba nangabugho kang David, ang batan-ong lalaki nga maoy momando ilis kaniya? Bisan kon si Jonathan mas tigulang kaaayo ug lagmit mas may kasinatian kay kang David, siya makasaranganon ug mapainubsanong misunod sa kahikayan ni Jehova ug maunongong nagpaluyo kang David. (1 Samuel 23:16-18) Ang pagbaton ug tin-aw nga panglantaw sa kabubut-on sa Diyos ug ang pagkaandam sa pagpasakop niana motabang  kanato nga ‘dili maghunahunag labaw bahin sa atong kaugalingon kay sa gikinahanglan nga pagahunahunaon.’—Roma 12:3.

Si Jesus nagtudlo sa bili sa pagpakitag pagkamakasaranganon ug pagkamapainubsanon. Siya nag-ilustrar niini pinaagi sa pag-ingon nga sa dihang ang iyang mga tinun-an motambong sa usa ka kombira sa kasal, sila dili angayng molingkod sa “labing inilang dapit” tungod kay ang labawng inila basig moabot ug sila lagmit mag-antos sa kaulaw nga moadto sa kinaubsang dapit. Naghimo sa pagtulon-an nga tin-aw kaayo, si Jesus midugang: “Kay ang matag usa nga nagabayaw sa iyang kaugalingon igapaubos ug siya nga nagapaubos sa iyang kaugalingon igabayaw.” (Lucas 14:7-11) Maalamon kita kon mamati sa tambag ni Jesus ug ‘isul-ob sa atong kaugalingon ang pagkamapaubsanon sa hunahuna.’—Colosas 3:12; 1 Corinto 1:31.

Mga Panalangin sa Usa ka Timbang nga Panglantaw

Ang pagbaton ug makasaranganon ug mapainubsanong espiritu makapaarang sa mga alagad ni Jehova sa pagkaplag ug tinuod nga kalipay diha sa ilang ministeryo. Ang mga ansiyano mas daling duolon kon sila mapainubsanong “magtratar sa panon uban ang kalumo.” (Buhat 20:28, 29) Dayon ang tanan diha sa kongregasyon mobating mas komportable nga makig-estorya kanila ug mangayo sa ilang tabang. Sa ingon ang kongregasyon hayan mas masuod diha sa espiritu sa gugma, kainit, ug pagsalig.

Ang dili sobrang pagkabalaka sa atong kaugalingon makapaarang kanato sa pagbaton ug maayong mga higala. Ang pagkamakasaranganon ug pagkamapainubsanon mopahilayo kanato gikan sa pag-ugmad ug maindigong espiritu ug sa pagpalabaw sa uban sa mga binuhatan o sa materyal nga mga butang. Kining diyosnong mga hiyas motabang sa paghimo kanatong mas mahunahunaon, ug busa kita ang maanaa sa mas maayong posisyon sa paghupay ug pagpaluyo kanilang nanginahanglan. (Filipos 2:3, 4) Sa dihang ang katawhan matandog sa gugma ug kalulot, sila sagad maayog pagsanong. Ug dili ba ang maong dili-mahakogong relasyon mahimong pundasyon nga niana ang lig-ong panaghigalaay pagatukoron? Pagkadakong panalangin sa makasaranganong dili sobrang pagkabalaka sa atong kaugalingong kadungganan!—Roma 12:10.

Ang timbang nga panglantaw sa atong kaugalingon magpasayon usab sa pagdawat sa atong sayop sa dihang kita nakapasakit sa usa ka tawo. (Mateo 5:23, 24) Kini moresulta sa mas maayong mga relasyon, nga maghatag ug higayon alang sa pag-uliay sa maayong kabubut-on ug pagtahod sa usag usa. Kon sila mapainubsanon ug makasaranganon, kadtong anaa sa mga posisyon sa pagdumala, sama sa Kristohanong mga ansiyano, adunay kahigayonan sa pagbuhat ug daghang kaayohan sa uban. (Proverbio 3:27; Mateo 11:29) Ang mapainubsanong tawo makakaplag usab nga mas sayon ang pagpasaylo sa uban kinsa nakasala batok kanila. (Mateo 6:12-15) Siya dili maghingapin sa pagsanong sa gibating mga kasilo, ug siya mosalig kang Jehova sa pagtul-id sa mga butang nga dili matul-id sa bisan unsang ubang paagi.—Salmo 37:5; Proverbio 3:5, 6.

Ang kinadak-ang panalangin nga mabatonan sa paghupot ug makasaranganon ug mapainubsanong panglantaw sa atong kaugalingon mao ang pagtagamtam sa pabor ug pag-uyon ni Jehova. “Ang Diyos nagasupak sa mga mapahitas-on, apan siya nagahatag ug dili-takos nga kalulot sa mga mapainubsanon.” (1 Pedro 5:5) Hinaot nga dili gayod kita mahulog ngadto sa lit-ag sa paghunahuna nga kita mas maayo kay sa kon kinsa kita sa tinuoray. Hinunoa, mapainubsanon natong ilhon ang atong posisyon diha sa kahikayan ni Jehova sa mga butang. Ang dagkong mga panalangin gitagana alang sa tanan nga makakab-ot sa iyang kinahanglanon nga ‘magmakasaranganon sa paglakaw uban sa Diyos.’

[Hulagway sa panid 22]

Si Jonathan mapainubsanong nagpaluyo kang David