Sugilanon sa Kinabuhi

Si Jehova Mao ang Akong Dangpanan ug Kusog

SUMALA SA GIASOY NI MARCEL FILTEAU

“Kon imo siyang pakaslan, mapriso ka gayod.” Mao kana ang gisulti sa mga tawo ngadto sa babaye nga akong giplanong pakaslan. Pasaysaya ako kon nganong nasulti nila kana.

SA DIHANG natawo ako sa 1927, ang lalawigan sa Quebec sa Canada maoy usa ka kuta sa Katolisismo. Mga upat ka tuig sa ulahi, si Cécile Dufour, usa ka bug-os-panahong ministro sa mga Saksi ni Jehova, misugod sa pagduaw sa among puy-anan sa siyudad sa Montreal. Tungod niini, siya sagad nga gihulga sa among mga silingan. Sa pagkatinuod, siya gidakop ug gimaltratar sa makadaghan tungod sa pagsangyaw sa mensahe sa Bibliya. Busa wala madugay among nasayran ang pagkatinuod sa mga pulong ni Jesus: “Kamo mahimong mga dulumtanan sa tanang kanasoran gumikan sa akong ngalan.”—Mateo 24:9.

Nianang panahona, daghan ang naghunahuna nga imposible para sa usa ka Pranses-Canadianong pamilya sa pagbiya sa ilang Katolikong relihiyon. Bisan tuod ang akong mga ginikanan wala gayod mahimong bawtismadong mga Saksi, wala madugay sila nakahinapos nga ang mga pagtulon-an sa Iglesya Katolika dili uyon sa Bibliya. Busa ilang gidasig ang ilang walo ka kabataan sa pagbasag literatura nga gipatik sa mga Saksi, ug ilang gipaluyohan kami nga mibarog dapig sa kamatuoran sa Bibliya.

Pagbarog Diha sa Malisod nga mga Panahon

Sa 1942, samtang nag-eskuyla pa ako, nagsugod ako sa pagpakita ug tinuod nga interes sa pagtuon sa Bibliya. Ang mga kalihokan sa mga Saksi ni Jehova gidili niadtong panahona sa Canada tungod kay ilang gisunod ang panig-ingnan sa unang mga Kristohanon ug wala makigbahin sa mga gubat sa mga nasod. (Isaias 2:4; Mateo 26:52) Ang akong kamagulangan nga igsoong lalaki, si Roland, gipriso diha sa kampo sa pinugos nga pagtrabaho tungod sa iyang pagdumili sa pag-alagad ingong sundalo  sa gubat sa kalibotan nga nagpadayon niadtong panahona.

Nianang higayona, gihatagan ako ni Papa ug usa ka libro sa Pranses nga naghubit sa mga pag-antos sa Alemang mga Saksi tungod sa ilang pagdumili nga paluyohan ang mga kampanya militar ni Adolph Hitler. a Napalihok ako sa pagpaila sa akong kaugalingon nga kauban sa maong maisog nga mga panig-ingnan sa integridad, ug ako misugod sa pagtambong sa mga tigom sa mga Saksi ni Jehova nga gihimo diha sa usa ka pribadong puy-anan. Wala madugay gidapit ako sa pagpakigbahin sa buluhatong pagsangyaw. Akong gidawat ang pagdapit uban ang bug-os nga kaamgohan nga ako mahimong dakpon ug prisohon.

Human makaampo alang sa kusog, mituktok ako diha sa akong unang pultahan. Usa ka malulotong babaye ang miabli, ug human mapailaila ang akong kaugalingon, akong gibasa kaniya ang mga pulong sa 2 Timoteo 3:16: “Ang tibuok Kasulatan inspirado sa Diyos ug mapuslanon.”

“Interesado ka bang makakat-on ug dugang bahin sa Bibliya?” ako nangutana.

“Oo,” mitubag ang babaye.

Busa ako siyang giingnan nga magdala akog higala nga mas nahibalo sa Bibliya kay kanako, nga akong gihimo pagkasunod semana. Human nianang unang kasinatian, mibati ako nga mas may kompiyansa, ug akong nakat-onan nga kita wala maghimo sa ministeryo diha sa atong kaugalingong kusog. Sama sa gisulti ni apostol Pablo, ginahimo nato kini sa tabang ni Jehova. Sa pagkatinuod, hinungdanon nga atong ilhon nga ‘ang gahom nga labaw sa kasarangan mamahimong iya sa Diyos ug dili gikan sa atong kaugalingon.’—2 Corinto 4:7.

Human niadto, ang buluhatong pagsangyaw nahimo nang regular nga bahin sa akong kinabuhi ug maingon man ang mga pagdakop ug pagkapriso. Dili ikatingala nga ang akong umaabot nga pangasaw-onon giingnan, “Kon imo siyang pakaslan, mapriso ka gayod”! Hinunoa, ang maong mga kasinatian dili gayod ingon niana ka lisod. Human makagugol ug usa ka gabii sa prisohan, kasagarang piyansahan kami sa usa ka isigka-Saksi.

Hinungdanong mga Desisyon

Sa Abril 1943, akong gipahinungod ang akong kaugalingon kang Jehova ug gisimbolohan kini pinaagig bawtismo sa tubig. Dayon, sa Agosto 1944, ako mitambong sa akong unang dakong kombensiyon, sa Buffalo, New York, T.B.A., duol lamang sa utlanan sa Canada. Dihay 25,000 nga nanambong, ug ang programa nagpukaw sa akong tinguha nga magpayunir, nga maoy pagtawag sa bug-os-panahong mga ministro sa mga Saksi ni Jehova. Ang pagdili sa buluhaton sa mga Saksi ni Jehova sa Canada giwagtang sa Mayo 1945, ug ako misugod sa pagpayunir pagkasunod bulan.

Ugaling, samtang nag-uswag ang akong pagpakigbahin sa ministeryo, balikbalik usab akong gipriso. Makausa gibutang ako sa usa ka selda uban kang Mike Miller, usa ka matinumanon, dugay nang alagad ni Jehova. Nanglingkod kami sa sementadong  salog ug nag-estorya. Ang among makapadasig nga espirituwal nga panaghisgot nagpalig-on kaayo kanako. Apan, pagkahuman niana ang pangutana mitungha sa akong hunahuna, ‘Unsa kaha kon kami nagkabangi ug wala magtingganay?’ Ang panahon nga nagugol uban niining minahal nga igsoon diha sa prisohan nagtudlo kanako sa usa sa kinanindotang leksiyon sa akong kinabuhi—kita nagkinahanglan sa atong mga igsoon ug busa kinahanglang magmapinasayloon ug magmaluloton sa usag usa. Kay kon dili, ingon sa gisulat ni apostol Pablo: “Kon kamo padayong magpinahitay ug magtinukbanay sa usag usa, pagbantay nga kamo dili mahurot ug kalaglag sa usag usa.”—Galacia 5:15.

Sa Septiyembre 1945, gidapit ako sa pag-alagad sa sangang buhatan sa Watch Tower Society sa Toronto, Canada, nga among gitawag ug Bethel. Ang espirituwal nga programa didto tinuod nga makapadasig ug makapalig-on sa pagtuo. Pagkasunod tuig, giasayn ako sa pagtrabaho diha sa umahan sa Bethel, mga 40 kilometros amihanan sa sangang buhatan. Samtang namupo ug mga strawberry uban sa batan-ong si Anne Wolynec, akong namatikdan dili lamang ang iyang pisikal nga katahom kondili ang iyang gugma ug kasibot usab alang kang Jehova. Nagkatrato kami, ug nagpakasal kami sa Enero 1947.

Sa misunod nga duha ka tuig ug tunga, nagpayunir kami sa London, Ontario, ug human niana sa Cape Breton Island, diin mitabang kami sa pagtukod ug usa ka kongregasyon. Dayon, sa 1949, gidapit kami sa ika-14 nga klase sa Watchtower Bible School of Gilead, diin gibansay kami aron mahimong mga misyonaryo.

Misyonaryong Buluhaton sa Quebec

Ang Canadianong mga graduwado sa kanhing mga klase sa Gilead gipang-asayn aron buksan ang buluhatong pagsangyaw sa Quebec. Sa 1950, kami lakip ang ubang 25 gikan sa among ika-14 nga klase miduyog kanila. Ang miuswag nga misyonaryong kalihokan nagpahinabog mas grabe pang paglutos ug kapintasan sa magubtanong panon, nga gihulhogan sa mga lider sa Iglesya Romana Katolika.

Duha ka adlaw human moabot sa among unang misyonaryong asaynment sa siyudad sa Rouyn, si Anne gidakop ug gipasakay sa likod sa sakyanan sa polis. Kini usa ka bag-ong kasinatian alang kaniya, sanglit naggikan siya sa usa ka gamayng balangay sa lalawigan sa Manitoba, Canada, diin talagsa ra siyang makakita ug polis. Siyempre, gikuyawan siya ug nahinumdom sa mga pulong, “Kon imo siyang pakaslan, mapriso ka gayod.” Apan, una pa mogikan, nakit-an usab ako sa polis ug gipasakay sa sakyanan uban kang Anne. “Nalipay gyod ko nga nakita ka!” siya mipatugbaw. Bisan pa niana, siya kalmado kaayo, nga nag-ingon, “Aw, ingon man sab niini ang nahitabo sa mga apostoles tungod sa pagsangyaw bahin kang Jesus.” (Buhat 4:1-3; 5:17, 18) Sa ulahi nianang adlawa gipagawas kami nga gipiyansahan.

Mga usa ka tuig human sa maong hitabo, samtang nagbuhat sa balay-ug-balay nga ministeryo diha sa among bag-ong asaynment sa Montreal, nakadungog akog kaguliyang sa karsada ug nakita ang usa ka nasuko nga magubtanong panon nga nanglabay ug mga bato. Samtang ako miduol aron sa pagtabang kang Anne ug sa iyang kauban, ang polis miabot sa nahitaboan. Imbes dakpon ang mga membro sa magubtanong panon, gidakop sa polis si Anne ug ang iyang kauban! Samtang napriso, gipahinumdoman ni Anne ang bag-ong Saksi nga sila nag-eksperyensiya sa katinuoran sa mga pulong ni Jesus: “Mahimo kamong mga dulumtanan sa tanang katawhan tungod sa akong ngalan.”—Mateo 10:22.

Sa usa ka higayon, mga 1,700 ka kaso batok sa mga Saksi ni Jehova ang nagpaabot sa husay sa Quebec. Sa katibuk-an, gisumbong kami nga nag-apod-apod ug literatura nga nagdasig sa pag-alsa batok sa kagamhanan o nag-apod-apod ug literatura nga walay lisensiya. Tungod niini, ang Legal nga Departamento sa Watch Tower Society milihok batok sa gobyerno sa Quebec. Human sa daghang tuig sa legal nga pakigbugno, gihatagan kami ni Jehova ug duha ka dagkong mga kadaogan diha sa Korte Suprema sa Canada. Sa Disyembre 1950, kami gipahigawas sa sumbong nga nagdasig sa pag-alsa batok sa kagamhanan ang among literatura, ug sa Oktubre 1953, gituboy ang among katungod sa pag-apod-apod ug literatura sa Bibliya nga walay lisensiya. Busa among nakita diha sa makita kaayong paagi kon sa unsang paagi si Jehova sa pagkamatuod maoy usa ka dapit nga “dangpanan ug kusog, usa ka tabang nga daling makaplagan sa panahon sa mga kalisdanan.”—Salmo 46:1.

Sa katalagsaon, ang gidaghanon sa mga Saksi sa Quebec nag-uswag gikan sa 356 sa 1945, sa dihang  misugod ako sa pagpayunir, ngadto sa kapin sa 24,000 karon! Sa pagkatinuod kini miresulta sumala sa gitagna sa Bibliya: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman.”—Isaias 54:17.

Among Buluhaton sa Pransiya

Sa Septiyembre 1959, si Anne ug ako gidapit sa pag-alagad sa Bethel sa Paris, Pransiya, diin giasayn ako sa pagdumala sa pag-imprenta. Una pa sa among pag-abot sa Enero 1960, ang pag-imprenta gihimo sa usa ka komersiyal nga kompaniya. Sanglit Ang Bantayanang Torre gidili niadtong panahona sa Pransiya, among giimprenta ang magasin kada bulan diha sa dagway sa usa ka 64-panid nga pulyeto. Ang pulyeto ginganlan ug The Interior Bulletin of Jehovah’s Witnesses, ug naundan kini sa mga artikulo nga pagatun-an diha sa mga kongregasyon sulod sa usa ka bulan. Gikan 1960 hangtod 1967, ang gidaghanon niadtong nakigbahin sa buluhatong pagsangyaw sa Pransiya miuswag gikan sa 15,439 ngadto sa 26,250.

Sa ngadtongadto, ang kadaghanang misyonaryo gipang-asayn pag-usab sa ubang mga lugar, ang pipila ngadto sa nagsultig-Pranses nga mga nasod sa Aprika ug ang uban balik sa Quebec. Sanglit nagsakit si Anne ug kinahanglang operahan, kami mibalik sa Quebec. Human sa tulo ka tuig nga pagtambal, naulian si Anne. Dayon giasayn ako sa sirkitong buluhaton, nga nagduaw ug lainlaing kongregasyon kada semana sa pagtaganag espirituwal nga pagdasig.

Misyonaryong Buluhaton sa Aprika

Pipila ka tuig sa ulahi, sa 1981, nalipay kami sa pagkadawat ug bag-ong asaynment ingong mga misyonaryo sa Zaire, nga Democratic Republic of Congo na karon. Ang mga tawo kabos, ug sila nag-antos ug daghang kalisdanan. Sa among pag-abot, dihay 25,753 ka Saksi, apan karon kana nga gidaghanon miuswag sa kapin sa 113,000, ug 446,362 ang nanambong sa Memoryal sa kamatayon ni Kristo sa 1999!

Sa 1984 napalit namo gikan sa gobyerno ang mga 200 ka ektaryang yuta aron pagatukoran sa usa ka bag-ong sangang buhatan. Dayon, sa Disyembre 1985, usa ka internasyonal nga kombensiyon ang gihimo sa kaulohang siyudad, sa Kinshasa, nga may 32,000 ka delegadong nanambong gikan sa daghang bahin sa kalibotan. Human niana, ang pagsupak nga giaghat sa klero nagbungkag sa among buluhaton sa Zaire. Sa Marso 12, 1986, ang may-katungdanang mga igsoong lalaki gitunolan ug sulat nga nagdeklarar sa asosasyon sa mga Saksi ni Jehova sa Zaire nga ilegal. Kini nga pagdili sa tanan namong kalihokan gipirmahan sa presidente sa nasod niadtong tungora, si Mobutu Sese Seko.

Tungod niadtong kalit nga mga hitabo, kinahanglan namong ipadapat ang tambag sa Bibliya: “Maalamon ang usa nga nakakita sa katalagman ug nagtago sa iyang kaugalingon.” (Proverbio 22:3) Nakakita kamig mga paagi nga makabaton ug papel, tinta, film, mga palid sa imprenta, ug mga kemikal gikan sa gawas sa nasod aron sa pag-imprenta sa among mga publikasyon sa Kinshasa. Naghimo usab kami sa among kaugalingong sistema sa pag-apod-apod. Sa dihang naorganisar na kami, ang among sistema mas episyente pa kay sa serbisyo sa koreyo sa gobyerno!

Linibo ka Saksi ang gipangdakop, ug daghan ang grabeng gipaantos. Bisan pa niana, sa pipila ka eksepsiyon, sila mibarog nga malig-on sa maong pagtratar ug sila nagpabiling matinumanon. Ako usab gidakop ug nakakita sa grabeng mga kahimtang nga naeksperyensiyahan sa mga igsoon diha sa mga prisohan. Makadaghan kaming gipiotan sa tanang paagi sa mga sekreta ug sa mga awtoridad, apan si Jehova kanunayng naghimog lutsanan alang kanamo.—2 Corinto 4:8.

Among gitago ang mga 3,000 ka karton sa literatura diha sa bodega sa usa ka negosyante. Ugaling, sa ngadtongadto usa sa iyang mga trabahante misumbong sa mga sekreta, ug ilang gidakop ang negosyante. Sa ilang pagpaingon sa prisohan, ila akong nahibalag nga wala tuyoa nga nagsakay sa akong sakyanan. Giingnan sila sa negosyante nga ako mao ang nakigsabot kaniya sa pagtago sa literatura. Gipahunong ug gipangutana ako sa mga sekreta bahin niini, nga nagpasangil kanako sa pagbutang ug ilegal nga literatura diha sa bodega niining tawhana.

“May dala ba mo niining mga libroha?” ako nangutana.

“Siyempre, aduna,” sila mitubag.

“Puwede ba nako kining makita?” ako mihangyo.

Ila akong gitunolan ug usa ka kopya, ug akong  gipakita kanila ang panid sa sulod, nga nag-ingong: “Gipatik sa Tinipong Bansa sa Amerika sa Watch Tower Bible & Tract Society.”

“Kanang inyong ginatipigan maoy Amerikanhong propiedad ug dili iyaha sa Zaire,” ako silang gipahinumdoman. “Ang inyong gobyerno nagdili sa legal nga korporasyon sa asosasyon sa mga Saksi ni Jehova sa Zaire ug dili sa Watch Tower Bible & Tract Society sa Tinipong Bansa. Busa angay gayod kamong magbantay pag-ayo kon unsay inyong himoon niining mga publikasyona.”

Gibuhian ako tungod kay wala silay mando sa korte sa pagdakop kanako. Nianang gabhiona, duha ka trak ang among gidala ngadto sa bodega ug gikuha ang tanang literatura. Sa dihang nangadto ang mga awtoridad pagkasunod adlaw, naaborido kaayo sila sa pagkakaplag sa luna nga walay sulod. Niadtong higayona nangita na sila kanako, sanglit nakabaton na silag mando sa korte aron sa pagdakop kanako. Ila akong nakaplagan, ug tungod kay wala silay sakyanan, ako ang nagdrayb aron ihatod ang akong kaugalingon sa prisohan! Giubanan ako ug laing Saksi aron iyang madalag balik ang akong sakyanan sa dili pa nila kini mailog.

Human sa walo ka oras nga pagsukitsukit, sila nakahukom sa paghingilin kanako. Apan ako silang gipakitaan ug kopya sa sulat gikan sa gobyerno nga nagkompirmar sa akong pagkatinudlo sa pagbaligya sa propiedad sa gidili na niadtong tungora nga asosasyon sa mga Saksi ni Jehova sa Zaire. Busa gitugotan ako sa pagpadayon sa akong kalihokan sa Bethel.

Human sa upat ka tuig nga pag-alagad ubos sa mga pagpit-os sa pagdili sa buluhaton sa Zaire, nakaagom akog nagdugo nga ulser sa tiyan nga nagpameligro sa kinabuhi. Nadesisyonan nga kinahanglan akong mobiya aron magpatambal sa Habagatang Aprika, diin giatiman akog maayo sa sangang buhatan, ug ako naulian. Human mag-alagad ug walo ka tuig sa Zaire, nga usa ka halandomon ug malipayon gayod nga kasinatian, mibalhin kami sa sangang buhatan sa Habagatang Aprika sa 1989. Sa 1998 mibalik kami sa among pinuy-anang yuta ug sukad niadto nag-alagad na usab sa Bethel sa Canada.

Mapasalamaton sa Pag-alagad

Sa dihang hinumdoman nako ang akong 54 ka tuig sa bug-os-panahong ministeryo, ako mapasalamaton kaayo nga akong gigamit ang kabaskog sa akong pagkabatan-on diha sa bililhong pag-alagad kang Jehova. Bisan tuod si Anne kinahanglang moagwanta sa daghang masulayong mga kahimtang, wala siya moreklamo kondili mapaluyohon kaayo sa tanan namong kalihokan. Kaming duha nakabaton ug pribilehiyo sa pagtabang sa daghan nga makaila kang Jehova, nga ang pipila kanila anaa karon sa bug-os-panahong ministeryo. Usa gayod ka dakong kalipay nga makita ang pipila sa ilang mga anak ug bisan sa ilang mga apo nga nag-alagad sa atong dakong Diyos, si Jehova!

Ako kombinsido nga walay bisan unsang butang nga ikatanyag ang kalibotan nga ikatandi sa mga pribilehiyo ug mga panalangin nga nahatag ni Jehova kanamo. Tinuod, nakalahutay kami sa daghang pagsulay, apan kining tanan nakapalig-on sa among pagtuo ug pagsalig kang Jehova. Siya napamatud-an gayod nga usa ka torre sa kalig-on, usa ka dapit nga dangpanan, ug usa ka tabang nga daling makaplagan panahon sa mga kalisdanan.

[Footnote]

[Mga hulagway sa panid 26]

Magkaubang nagpayunir sa 1947; uban kang Anne karon

[Hulagway sa panid 29]

Ang mga tawo nga among nahimamat sa Zaire nahigugma sa kamatuoran sa Bibliya