Gagmayng mga Lawas, Dagkong mga Kasingkasing

SAMA sa unsa kaha ang pagpakig-estorya ngadto sa mga estranyo bahin sa Gingharian sa Diyos kon ikaw 76 sentimetros lamang ang gitas-on? Makaasoy si Laura kaninyo. Sa edad nga 33 anyos, mao kana ang iyang gitas-on, 76 sentimetros lamang. Siya ug ang iyang igsoong babaye, si María, nga 24 anyos ug 86 sentimetros ang gitas-on, nagpuyo sa Quito, Ecuador. Pasaysaya sila sa mga kababagan nga ilang maatubang diha sa ilang Kristohanong ministeryo.

“Aron makaadto sa among teritoryong sangyawan ug sa Kristohanong mga tigom, molakaw kamig mga tunga sa kilometro aron makasakay ug bus. Gikan sa among kanaogan, molakaw kamig laing tunga sa kilometro aron makasakay sa ikaduhang bus. Ugaling lang, subay niining maong alagianan dunay nagpuyong lima ka isog nga mga iro. Makahadlok kaayo kanamo ang mga iro tungod kay sila maorag ingon ka dako sa mga kabayo. Aron maabog sila kon gikinahanglan, magbitbit kamig lipak, nga among tagoon sa usa ka lugar sa dili pa mosakay sa bus aron magamit kini sa among pagpauli.

“Ang pagsakay sa bus maoy usa ka dakong lakang alang kanamo sa literal nga paagi. Motindog kami ibabaw sa bungdo sa yuta diha sa hunonganan sa bus aron mas sayon nga makasakay. Ang pipila ka drayber mohunong diha sa bungdo, apan ang uban dili. Sa ingon nianang kahimtang, ang taastaas kanamo motabang sa mas mubo aron makasakay. Kinahanglan kaming motabok sa usa ka puliking haywey aron sa pagsakay sa ikaduhang bus—malisod gayod tungod sa among mugbong mga bitiis. Tungod sa among pagkagamay, ang bug-at nga bag nga sudlanag libro naghatag ug dugang suliran. Aron mogaan-gaan ang bag, mogamit kamig de-bulsang Bibliya ug limitehan usab ang gidaghanon sa literatura nga among dad-on.

“Sukad sa pagkabata, kaming duha hilomon kaayo. Ang among mga silingan nasayod nga ang pagpakig-estorya sa mga estranyo kanunayng makapakulba nga eksperyensiya alang kanamo. Busa sila natingala ug nakadayeg nga makita kaming manuktok diha sa ilang mga pultahan, ug sila kasagarang maminaw kanamo. Apan sa mga dapit nga wala kaayo kami hiilhi, mga enano lamang ang pagtan-aw sa mga tawo kanamo; busa, sila dili kanunayng mohatag kanamog maugdang nga pagtagad nga takos sa among mensahe. Bisan pa niana, ang pagbati sa gugma ni Jehova naghatag kanamog kaisog sa pagpadayon diha sa buluhatong pag-ebanghelyo. Ang pagpalandong sa Proverbio 3:5, 6 naghatag usab kanamog kaisog.”

Ingon sa gipakita ni Laura ug María, ang paglahutay bisan pa sa pisikal nga kabilinggan makahimaya sa Diyos. Giampo ni apostol Pablo nga ang iyang “tunok sa unod,” malagmit usa ka pisikal nga balatian, kuhaon gikan kaniya. Apan giingnan siya sa Diyos: “Ang akong dili-takos nga kalulot igo na alang kanimo; kay ang akong gahom ginahimong hingpit diha sa kaluyahon.” Oo, dili kinahanglang  mawala ang usa ka diperensiya sa lawas aron makaalagad kita sa Diyos. Ang bug-os nga pagsalig sa Diyos makatabang kanato nga pahimuslan ug maayo ang atong mga kahimtang. Tungod kay ingon niini ang pag-isip ni Pablo sa iyang “tunok sa unod,” siya nakaingon: “Sa dihang ako maluya, niana ako gamhanan.” (2 Corinto 12:7, 9, 10) Pipila ka tuig sa ulahi si Pablo misulat: “Sa tanang butang ako adunay kusog tungod kaniya nga nagahatag ug gahom kanako.”—Filipos 4:13.

Sa modernong kapanahonan, ang Diyos naghimog dakong buluhaton pinaagi sa mga lalaki, babaye, ug kabataan kinsa bug-os nga debotado kaniya. Ubay-ubay kanila ang may diperensiya sa usa ka paagi. Bisan pag silang tanan naglaom sa balaang pagpang-ayo ilalom sa Gingharian sa Diyos, wala sila maghulat hangtod ayohon sila sa Diyos sa ilang mga diperensiya una pa maningkamot nga mohimog usa ka butang diha sa pag-alagad kaniya.

Nag-antos ka ba gumikan sa pipila ka pisikal nga mga kaluyahon? Pagbaton ug kaisog! Pinaagi sa imong pagtuo mahimo kang malakip niadtong sama ni Pablo, Laura, ug María. Kini ang ikasulti bahin kanila, sama sa kahimtang sa mga lalaki ug mga babaye sa pagtuo sa karaang kapanahonan: “Gikan sa maluya nga kahimtang [sila] nahimong gamhanan.”—Hebreohanon 11:34.

[Hulagway sa panid 8]

María

Laura

[Hulagway sa panid 9]

Si María nagtabang kang Laura nga makasakay sa bus

[Mga hulagway sa panid 9]

“Makahadlok kaayo kanamo ang mga iro tungod kay sila maorag ingon ka dako sa mga kabayo”

Ubos: Si Laura ug María ug kadtong nagtuon sa Bibliya uban kanila