Pahilayo Gikan sa Peligrosong Dapit!

MAOY tahas sa mga bolkanologo ang paghimog mga obserbasyon ug pagsusi sa mga ebidensiya ug dayon sa pagpasidaan bahin sa umaabot nga mga pagbuto sa bolkan. (Human mobuto ang Mount Fugen, kinahanglang papahawaon sa kapolisan ang mga tawo gikan sa peligrosong dapit.) Sa susama, ang mga estudyante sa Bibliya nakasabot sa ilhanan “sa katiklopan sa sistema sa mga butang” ug nagpasidaan sa uban sa nagsingabot nga kapeligrohan.—Mateo 24:3.

Sa mao gihapong kapitulo sa Bibliya nga nagpasidaan bahin sa nagsingabot nga tibuok-kalibotang katalagman, atong mabasa kining pagbatbat sa pasiunang mga panghitabo: “Ang nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa usa ka dapit human sa laing dapit. . . . Manungha ang daghang bakak nga mga propeta ug magpahisalaag sa daghan; ug tungod sa pag-uswag sa kalapasan mobugnaw ang gugma sa kadaghanan. . . . Ug kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”—Mateo 24:7-14.

Dili kinahanglang mahimo kitang mga tig-analisar sa balita aron makasabot sa bag-ong katumanan niining tagnaa. Ilabina sukad sa 1914, kita nakasinati niini. Nahitabo niining sigloha ang duha ka gubat sa kalibotan, daghang sibil nga mga gubat, lokal nga mga bugnoay, ug rasanhon ug relihiyosong mga kagubot. Nakaagom ang katawhan ug mga kanihit sa pagkaon ingong resulta sa maong mga gubat, dugang pa sa mga kanihit nga gipahinabo sa kinaiyanhong mga katalagman. Daghang kinabuhi ang gilamoy sa mga linog. Nanungha ang mga kulto nga may katahapang mga lider ug panatikong mga sumusunod. “Ang pag-uswag sa kalapasan” nagpugong sa mga tawo sa pagpakitag gugma, ug ang pagkamaayong silingan wala na mauso.

Ang tibuok-kalibotang buluhaton sa pagsangyaw, lain pang bahin sa ilhanan, ginapalampos gayod. Paklia lamag balik ang hapin niining magasina, ug imong makita ang mga pulong “Nagapahayag sa Gingharian ni Jehova” ingong bahin sa ulohan. Ang Bantayanang Torre, nga gipatik sa 132 ka pinulongan ug may sirkulasyon nga kapin sa 22 ka milyon, maoy usa ka pangunang himan alang  niadtong nagamantala ‘niining maayong balita sa gingharian’ sa tibuok gipuy-ang yuta. Kanang maayong balita naglakip sa mensahe nga ang Maglalalang sa uniberso, si Jehova nga Diyos, nagtukod sa langitnong Gingharian nga maglaglag sa daotang sistema sa mga butang ug maghimog paraiso sa yuta. Sa tinuoray, makita karon ang ilhanan nga ang Diyos sa di-madugay molihok na, nga nagpakitang ang mga kinabuhi sa mga tawo niining sistemaha sa mga butang nameligro.—Itandi ang 2 Timoteo 3:1-5; 2 Pedro 3:3, 4; Pinadayag 6:1-8.

Ang Makalilisang nga Adlaw ni Jehova

Unsay mahitabo inig-abot sa panahon nga si Jehova magpakanaog sa iyang paghukom? Paminaw sa iyang tin-aw nga paghubit sa mahitabo: “Ako magahatag ug mga tilimad-on diha sa kalangitan ug sa yuta, dugo ug kalayo ug mga haligi nga aso. Ang adlaw mahimong kangitngit, ug ang bulan mahimong dugo, sa dili pa moabot ang dako ug makalilisang nga adlaw ni Jehova.”—Joel 2:30, 31.

Kanang adlawa, nga mas makahahadlok ug malaglagon kay sa bisan unsang pagbuto sa bolkan o linog, haduol na. Ang propetang si Sofonias nag-ingon: “Ang dakong adlaw ni Jehova haduol na. Kini haduol na, ug nagadali pag-ayo. . . . Pinaagi sa kalayo sa iyang kasibot ang tibuok yuta pagalamyon, tungod kay iyang pagapuohon, sa makalilisang gayod, ang tanang molupyo sa yuta.” Bisan ug “ang ilang plata o ang ilang bulawan dili makaluwas kanila sa adlaw sa mabangis nga kasuko ni Jehova,” adunay paagi nga maluwas nianang makalilisang nga adlaw.—Sofonias 1:14-18.

Nagpakita kon unsaon, si Sofonias nag-ingon: “Sa dili pa modangat kaninyo ang nagasilaob nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa si Jehova, kamong tanang maaghop sa yuta . . . Pangitaa ang pagkamatarong, pangitaa ang kaaghop. Tingali kamo pagatagoan sa adlaw sa kasuko ni Jehova.” (Sofonias 2:2, 3) Makabaton kitag kadangpan pinaagi sa ‘pagpangita kang Jehova, pagpangita sa pagkamatarong, ug pagpangita sa kaaghop.’ Kinsa karong adlawa ang nagapangita kang Jehova?

Sa walay duhaduha imong ikalangkit ang pulong “Jehova” ngadto sa mga Saksi ni Jehova tungod sa ilang buluhatong pagsangyaw. Mahimong nakadawat ka niining magasina gikan sa usa kanila. Nailhan sila ingong mga molupyo nga may maayong moral nga nagkinabuhing matul-id. Naningkamot sila sa pagsul-ob sa “bag-ong personalidad,” nga naglakip sa pag-ugmad sa kaaghop. (Colosas 3:8-10) Sila mouyon nga kini maoy gumikan sa pagkanatudloan sa makitang organisasyon ni Jehova, nga sa tibuok yuta gihawasan sa lokal sa mga kongregasyon sa mga Saksi ni Jehova. Oo, ikaw makadangop duyog sa ‘tibuok kaubanan sa mga igsoon’ taliwala sa mga Saksi ni Jehova sa tibuok kalibotan.—1 Pedro 5:9.

Dangop na Karon

Aron makadangop pinaagi sa pagpangita kang Jehova, kita kinahanglang mahimong iyang mga higala. Unsay nalangkit niana? Ang Bibliya nagtubag: “Wala ba kamo mahibalo nga ang pakighigala sa kalibotan maoy pakigdumot sa Diyos? Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” (Santiago 4:4) Aron mahimong mga higala sa Diyos, kinahanglang atong hinloan ang atong kaugalingon sa bisan unsang emosyonal nga kalangkitan sa presenteng daotang sistema sa kalibotan, nga nailhan pinaagi sa rebelyosong tinamdan ngadto sa Diyos.

Ang Bibliya nagtambag kanato: “Ayaw ninyo higugmaa ang kalibotan o ang mga butang nga anaa sa kalibotan. Kon ang usa nagahigugma sa kalibotan, ang gugma sa Amahan wala diha kaniya; tungod kay ang tanang butang nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa kahinguhaan sa kinabuhi sa usa—wala magagikan sa Amahan, kundili nagagikan sa kalibotan. Labot pa, ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:15-17) Kadaghanang tawo karong adlawa napalihok pinaagig unodnong mga tinguha—way-pugong nga seksuwal nga gana, hinakog nga pagpangagpas sa salapi, ug abusadong paggamit sa gahom. Apan aron mahimong dapig sa kiliran ni Jehova, ang usa kinahanglang magbuntog sa maong mga tinguha.—Colosas 3:5-8.

Mahimong makabasa ka niining basahona sa popanahon, ug tingali mouyon ka sa pagpadapat niini sa mga tagna sa Bibliya. Apan, tingali magduhaduha ka sa paghimog dugang tikang sa pagpakig-uban sa mga Saksi ni Jehova. Apan, kon mag-atubang kita ug katalagman, igo na ba ang pagpaminaw lamang sa pasidaan? Sumala sa  atong nakita sa kahimtang sa pagbuto sa Mount Fugen, kita kinahanglang molihok sumala sa pasidaan. Hinumdomi, labing menos 15 ka tigbalita ug mga letratista nga naninguha sa pagkuhag kinaulahiang balita ang nawad-an sa ilang mga kinabuhi. Sa pagkatinuod, usa ka letratista namatay nga ang iyang tudlo diha sa tulpokanan sa iyang kamera. Usa ka bolkanologo—kinsa miingong, “Kon usa ka adlaw niana ako mamatay, gusto kong kini maoy diha sa kilid sa bolkan”—ang nawad-an sa iyang kinabuhi sumala gayod sa iyang gusto. Silang tanan dedikado sa ilang trabaho ug sa ilang mga pangagpas. Apan, sila nawad-an sa ilang mga kinabuhi—ang bili sa pagbalewala sa pasidaan.

Daghan karong adlawa ang makadungog bahin sa desisyon sa Diyos sa paglaglag niining daotang sistema sa mga butang ug makasabot, sa tinong gidak-on, sa pagkatinuod sa pasidaan. ‘Moabot ra na ngadtongadto,’ sila tingali mangatarongan, ‘apan dili pa karon.’ Ilang gituyo nga ipaunya-unya ang adlaw ni Jehova sa mas ulahing panahon aron sila tingali dili mabalda sa daw mas hinungdanon sa ilang mga mata niining panahona.

Ingon niana ang suliran ni Baruk. Ingong sekretaryo sa karaang propetang si Jeremias, maisogong nagpasidaan si Baruk sa mga Israelinhon bahin sa nagsingabot nga kalaglagan sa Jerusalem. Apan, sa usa ka higayon siya gikapoy sa iyang buluhaton. Niana, si Jehova nagtul-id kaniya: “Kon bahin kanimo, ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagpangita.” Bahandi man kadto, dungog, o kasegurohan sa materyal, si Baruk dili angayng ‘mangita ug dagkong mga butang alang sa iyang kaugalingon.’ Angay siyang magmaikagon sa usa ka butang, ang pagbuhat sa kabubut-on sa Diyos aron sa pagtabang sa mga tawo sa pagdapig sa Iyang kiliran. Ingong resulta, iyang madawat ang ‘iyang kalag ingong inagaw.’ (Jeremias 45:1-5) Sa pagtandi, inay ‘mangitag dagkong mga butang alang sa atong kaugalingon,’ kita angayng mangita kang Jehova, nga motultol sa pagkaluwas sa atong mga kinabuhi.

Sa Mount Fugen, kapin sa usa ka dosenang polis ug boluntaryong mga bombero ang nagtrabaho sa dihang ang tuman-ka-init nga agos sa bolkan mihampak kanila. Naningkamot sila sa pagtabang ug pagpanalipod sa nameligrong katawhan. Nahisama sila sa maayog-katuyoang mga lalaki ug babaye kinsa nalangkit sa pagpaarang-arang niining kalibotana. Bisag dalayegon tingali ang ilang mga motibo, “kanang gihimong baliko dili na matul-id.” (Ecclesiastes 1:15) Ang balikong sistema sa mga butang dili na matul-id. Makataronganon ba nga himoon ang kaugalingon nga “higala sa kalibotan” pinaagi sa pagpaningkamot sa pagluwas sa usa ka tibuok-kalibotang sistema nga gihukom sa Diyos nga laglagon?

Kon Nakakalagiw Ka na, Ayaw nag Balik

Usa ka butang ang pagkalagiw gikan sa nameligrong sistema, apan laing butang gayod ang pagpabilin diha sa mapanalipdong pag-atiman sa “tibuok kapunongan sa mga igsoon.” (1 Pedro 2:17) Dili nato kalimtan ang mga mag-uuma kinsa, human makabakwet, mibalik aron sa pagsusi sa ilang kaumahan duol sa Mount Fugen. Lagmit, gusto gayod silang mobalik sa ilang naandang “normal” nga kinabuhi. Apan imong makitang dili maalamon ang ilang desisyon sa pagbalik. Tingali dili kadto ang ilang unang pagsulay sa pagsulod sa peligrosong dapit. Tingali misulod sila sa peligrosong dapit sa makadiyot lamang nga walay nahitabo. Sa sunod higayon, lagmit nagpabilin silag dugaydugay, ug wala gihapoy nahitabo. Lagmit, sa wala madugay naanad na sila sa paglabang sa mapanalipdong utlanan ug nakabatog kaisog sa paglanganlangan diha sa nameligrong dapit.

Gihisgotan ni Jesu-Kristo ang susamang kahimtang nga mahitabo panahon sa ‘kataposan sa sistema sa mga butang.’ Siya miingon: “Kay ingon nga sila niadtong mga adlawa sa wala pa ang baha, nanagpangaon ug nanagpanginom, nanagpangminyo ang mga lalaki ug ang mga babaye gipanghatag diha sa kaminyoon, hangtod sa adlaw nga misulod si Noe sa arka; ug wala sila magmatikod hangtod nga ang baha miabot ug mibanlas kanilang tanan, mao man usab unya ang pagkaanaa sa Anak sa tawo.”—Mateo 24:3, 38, 39.

Matikdi nga gihisgotan ni Jesus ang pagkaon, pag-inom, ug pagminyo. Walay sayop niadtong mga butanga mismo sa mga mata ni Jehova. Nan unsa may sayop? Ang mga tawo sa adlaw ni Noe ‘wala nagmatikod,’ nga nagkinabuhing nasentro diha sa ilang regular nga rutina. Sa panahon sa emerhensiya, ang usa dili makakinabuhi ug “normal” nga kinabuhi. Sa dihang nakakalagiw ka na, o nakapahilayo na, gikan sa  presenteng laglagonong kalibotan, kinahanglang makigbisog ka sa bisan unsang agda sa pagbalik aron sa pagpahimulos sa bisan unsang butang nga makuha gikan niana. (1 Corinto 7:31) Makahimo ka tingali sa pagsuroysuroy diha sa gawas sa luwas nga dapit sa espirituwal ug makabalik nga walay tatsa ug wala ganiy usang makamatikod niini. Hinunoa, lagmit magdasig kana kanimo ug magtukmod kanimo sa pagbalik pag-usab ngadto sa kalibotan, nga maglanganlangan didtog dugaydugay. Sa di-madugay maugmad ang tinamdang: “Ang kataposan dili pa moabot karon.”

Matikdi usab ang tulo ka drayber sa taksi nga nawad-an sa ilang mga kinabuhi nga naghulat sa mga tigbalita ug mga letratista sa dihang ang agos sa bolkan mihaguros sa bakilid. Ang pipila karong adlawa tingali mokuyog sa uban kinsa nangahas sa pagbalik ngadto sa kalibotan. Bisan unsa pay rason, dayag nga ang pagkadani nga mobalik ngadto sa peligrosong dapit dili takos sa risgo.

Ang tanang biktima sa pagbuto sa Mount Fugen milatas sa luwas nga utlanan ug miadto sa peligrosong dapit. Bisag sila nagdahom nga mobuto ang bolkan usa ka adlaw niana, walay usang naghunahuna nga kadto mahitabo niadtong adlawa. Pinaagi sa pag-obserbar sa ilhanan sa kataposan sa sistema sa mga butang, daghan ang nagdahom nga ang adlaw ni Jehova moabot sa usa ka panahon apan lagmit dili pa dihadiha dayon. Ang uban mobati pa gani nga ang adlaw dili pa gayod “karon.” Delikado kaayo ang maong tinamdan.

“Ang adlaw ni Jehova moabot ingon sa usa ka kawatan,” nagpasidaan si apostol Pedro. Angay kitang magbantay, “nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova,” nga magabuhat sa atong “maarangan nga makaplagan niya sa kataposan nga walay-buling ug walay-lama ug anaa sa pakigdait.” (2 Pedro 3:10-14) Human sa kalaglagan sa presenteng daotang sistema sa mga butang, nagapaabot ang usa ka paraisong yuta ilalom sa Gingharian sa Diyos. Hinaot nga kita dili matental sa pag-adto sa peligrosong dapit sa bisan unsang rason nga tingali motungha sa atong hunahuna, kay sa adlaw nga kita mobalik ngadto sa kalibotan mahimong mao na unya kana ang adlaw ni Jehova.

Dangop uban sa katawhan ni Jehova ug pabilin uban kanila.

[Mga hulagway sa panid 7]

Dangop uban sa katawhan ni Jehova ug pabilin uban kanila

[Picture Credit Line sa panid 4]

Iwasa/Sipa Press