Ang Diyos Nagatubag Gayod sa mga Pag-ampo

Si Cornelio maoy tawo nga nangita sa pabor sa Diyos pinaagi sa makanunayon, kinasingkasing nga mga pag-ampo. Dugang pa, gigamit niyag maayo ang iyang katungdanan ingong opisyal sa kasundalohan. Sumala sa Bibliya, “siya mihimog daghang gasa sa kaluoy” ngadto sa nanginahanglang katawhan.—Buhat 10:1, 2.

SA MAONG panahon, ang Kristohanong kongregasyon gilangkoban sa matinuohong mga Hudiyo, mga proselita, ug mga Samaritanhon. Si Cornelio maoy usa ka dili-tinuling Hentil ug dili bahin sa Kristohanong kongregasyon. Nagpasabot ba kana nga kawang ang iyang mga pag-ampo? Dili. Gitagad ni Jehova nga Diyos si Cornelio ug ang iyang mainampoong mga buhat.—Buhat 10:4.

Pinaagi sa paggiya sa manulonda, si Cornelio gitultolan ngadto sa Kristohanong kongregasyon. (Buhat 10:30-33) Ingong resulta, siya ug ang iyang panimalay nakapribilehiyo sa pagkahimong unang dili-tinuling mga Hentil nga gidawat ngadto sa Kristohanong kongregasyon. Giisip ni Jehova nga Diyos ang personal nga kasinatian ni Cornelio nga angayng ilakip sa talaan sa Bibliya. Sa walay duhaduha, naghimo siyag daghang kausaban aron ipahiuyon sa bug-os ang iyang kinabuhi sa mga sukdanan sa Diyos. (Isaias 2:2-4; Juan 17:16) Makapadasig pag-ayo ang kasinatian ni Cornelio sa mga tawo sa tanang kanasoran kinsa nangitag pabor sa Diyos karong adlawa. Matikdi ang pipila ka panig-ingnan.

Modernong-Adlawng mga Panig-ingnan

Nanginahanglag dinaliang paghupay ang usa ka batan-ong babaye sa India. Naminyo sa pangedarong 21, siya nakabatog duha ka anak. Apan wala madugay human mahimugso ang ikaduhang anak, ang iyang bana namatay. Sa hinanali, sa pangedarong 24, siya nabalo nga may 2-ka-bulang anak babaye ug 22-ka-bulang anak lalaki. Dili ikatingalang nagkinahanglan siyag paghupay! Asa man siya moadto? Usa ka gabii niana, sa tumang kaguol, siya nag-ampo nga nag-ingon, “Langitnong Amahan, palihog hupaya ako pinaagi sa imong Pulong.”

Sa pagkabuntag, diha siyay bisita. Usa siya sa mga Saksi ni Jehova. Nianang adlawa, lisod ang iyang balaybalay nga ministeryo kay pipila ra ang nagbukas sa ilang pultahan kaniya. Gikapoy ug daw naluya, hapit na siyang mopauli, apan gibati niyang morag gitukmod nga duawon ang usa na lang ka balay. Didto niya nahimamat ang batan-ong balo. Gipasulod siya sa balo ug gidawat ang publikasyon nga nagsaysay sa Bibliya. Nahupayan ug dako ang babaye sa pagbasa niadtong publikasyona ug sa iyang pagpakighisgot uban sa Saksi. Nakat-onan niya ang saad sa Diyos bahin sa pagbanhaw sa patay ug sa Gingharian sa Diyos, nga  sa di madugay maghimo sa yuta nga paraiso. Mas hinungdanon, siya nakaila ug nahigugma sa usa ka tinuod nga Diyos, si Jehova, nga nagtubag sa iyang pag-ampo.

Si Nora, nga nagpuyo sa siyudad sa George, Habagatang Aprika, naggahin ug usa ka bulan aron makigbahin sa bug-os-panahong buluhaton sa pag-ebanghelyo. Sa wala pa mosugod, tim-os siyang nag-ampo kang Jehova nga tabangan siyang makakaplag ug tawong tinuod nga interesado sa pagtuon sa Bibliya. Ang teritoryo nga siya natudlo naglakip sa balay sa usa ka tawong walay tahod gayod kang Nora sa unang mga pagduaw. Sa kamaisogon, giduaw pag-usab ni Nora ang maong balay. Sa iyang katingala, iyang naabtan ang bag-ong nagpuyo didto, nga ginganlag Noleen. Dugang pa, si Noleen ug ang iyang inahan dugay nang nag-ampo sa Diyos nga tabangan nga makasabot sa Bibliya. “Sa dihang gitanyagan nako silag usa ka pagtuon sa Bibliya,” saysay pa ni Nora, “sila nalipay.” Daling miuswag si Noleen ug ang iyang inahan. Wala madugay, silang duha misugod sa pagpakigbahin uban kang Nora sa espirituwal nga buluhaton sa pagpang-ayo.

Ang laing panig-ingnan nga nagpakita sa gahom sa pag-ampo mao kanang iya sa magtiayong nagpuyo sa siyudad sa Johannesburg sa Habagatang Aprika. Usa niana ka Sabado sa gabii sa 1996, ang kaminyoon ni Dennis ug Carol hapit nang mabugto. Ingong kataposang paagi, nakahukom sila sa pag-ampo alang sa tabang, nga sublisubli nilang gihimo hangtod sa halawom nga kagabhion. Sa pagkabuntag, sa alas 11 ang takna, duha sa mga Saksi ni Jehova nanuktok sa ilang pultahan. Gibuksan ni Dennis ang pultahan ug giingnan silang maghulat hangtod iyang matawag ang iyang asawa. Gipasidan-an ni Dennis si Carol nga kon ilang pasudlon ang mga Saksi, lisod na silang pagawason. Gipahinumdoman ni Carol si Dennis nga nagsige silag ampo alang sa tabang ug miingon nga basig mao na kadto ang tubag sa Diyos sa ilang mga pag-ampo. Busa gipasulod ang mga Saksi, ug ang pagtuon sa Bibliya nasugdan diha sa librong Kahibalo nga Motultol sa Kinabuhing Walay Kataposan. Nahinam si Dennis ug Carol sa ilang nakat-onan. Nianang hapona mismo, mitambong sila sa ilang unang tigom sa lokal nga Kingdom Hall sa mga Saksi ni Jehova. Pinaagi sa pagpadapat sa kahibalo nga ilang nakat-onan gikan sa Bibliya, nakaplagan ni Dennis ug Carol ang kasulbaran sa ilang mga suliran sa kaminyoon. Sa pagkakaron sila maoy malipayon, bawtismadong mga magdadayeg ni Jehova ug regular nga nagpaambit sa ilang gipasukad-sa-Bibliyang mga tinuohan ngadto sa ilang mga silingan.

Unsa na man Kon Mobati Kang Dili-Takos sa Pag-ampo?

Mobati ang pipila ka sinserong mga tawo nga dili-takos sa pag-ampo tungod sa ilang daotang dalan sa kinabuhi. Nag-estorya si Jesu-Kristo bahin nianang matanga sa tawo, usa ka sinalikway nga maniningil ug buhis. Sa pagsulod sa sawang sa templo, gibati niining tawhana nga dili-takos moadto sa naandang dapit sa pag-ampo. “Nagbarog nga may gilay-on . . . [siya] nagapamukpok sa iyang dughan, nga nag-ingon, ‘O Diyos, magmapuangoron ka kanako nga usa ka makasasala.’” (Lucas 18:13) Matod ni Jesus, kining tawhana gidungog nga may pag-uyon. Nagpamatuod kini nga mapuangoron gayod si Jehova nga Diyos ug gustong motabang sa sinsero mahinulsolong mga makasasala.

Matikdi ang batan-ong lalaki nga taga-Habagatang Aprika nga ginganlag Paul. Sa bata pa, mitambong si Paul sa Kristohanong mga tigom uban sa iyang inahan. Apan sulod sa iyang mga tuig sa hayskul, misugod siya pagpakig-uban sa mga batan-ong wala magsunod sa mga paagi sa Diyos. Human sa pagtungha, mialagad  siya sa kasundalohan sa kanhing mapihigon-sa-rasang kagamhanan sa Habagatang Aprika. Dayon, sa wala damha, gibulagan siya sa iyang trato. Kining di-makapatagbawng paagi sa kinabuhi hilabihang nakapahigawad kang Paul. “Usa ka gabii niana,” siya nag-ingon, “nag-ampo ako kang Jehova ug nangayo sa iyang tabang, bisan tuod wala na ako moduol sa Diyos nga sinsero sa daghang tuig.”

Wala madugay human niadtong pag-ampoa, gidapit si Paul sa iyang inahan nga motambong sa tinuig nga Memoryal sa kamatayon ni Kristo. (Lucas 22:19) Nahibulong si Paul nga gibuhat kini sa iyang inahan, kay dugay na siyang masukihon ug halos walay kaikag sa Bibliya. “Akong giisip kadtong imbitasyona ingong tubag ni Jehova sa akong pag-ampo ug mibating kinahanglang ako motambong.” Sukad niadto, misugod si Paul pagtambong sa tanang Kristohanong mga tigom. Human ang upat ka bulan sa pagtuon sa Bibliya, nahimo siyang kuwalipikado sa bawtismo. Dugang pa, gihunong niya ang iyang pagtuon sa inhenyeriya ug gipili ang karera sa pagpakigbahin sa bug-os-panahong buluhaton sa pag-ebanghelyo. Karon, malipayon na si Paul, wala na masubo sa iyang kanhing kinabuhi. Sa miaging 11 ka tuig, nag-alagad siya sa sangang buhatan sa Watch Tower Society sa Habagatang Aprika.

Sa pagkatinuod, si Jehova nga Diyos mapuangorong nagtubag sa mga pag-ampo ug “maoy tigganti sa mga matinuorong nagapangita kaniya.” (Hebreohanon 11:6) Sa dili madugay ang dakong adlaw ni Jehova moabot ug motapos sa tanang pagkadaotan. Sa kasamtangan, ginatubag ni Jehova ang mga pag-ampo sa iyang katawhan alang sa kusog ug pagtultol samtang masiboton silang nakigbahin sa hinungdanong buluhaton sa pagsangyaw. Busa, milyonmilyong indibiduwal gikan sa tanang kanasoran ang ginatultolan ngadto sa Kristohanong kongregasyon ug ginapanalanginan sa kahibalo sa Bibliya nga motultol sa kinabuhing walay kataposan.—Juan 17:3.

[Hulagway sa panid 5]

Ang kinasingkasing nga pag-ampo ni Cornelio misangpot nga siya giduaw ni apostol Pedro

[Hulagway sa panid 6]

Ang pag-ampo nakatabang sa daghan latas sa mga panahon sa kaguol

[Mga hulagway sa panid 7]

Maayong mag-ampo alang sa tabang aron masabtan ang Bibliya

Ang mga magtiayon makaampo alang sa tabang aron malig-on ang ilang kaminyoon