‘Oh Diyos, Ipadan-ag ang Imong Kahayag’

“Ipadan-ag ang imong kahayag ug ang imong kamatuoran. Hinaot nga kini magatultol kanako.”—SALMO 43:3.

1. Sa unsang paagi gipadayag ni Jehova ang iyang mga katuyoan?

 SI Jehova mahunahunaon kaayo sa paagi sa iyang pagpahibalo sa iyang mga katuyoan ngadto sa iyang mga alagad. Inay ipadayag ang kamatuoran sa usa lang ka pagkidlap sa makasulaw nga kahayag, kita anam-anam niyang gipalamdagan. Ang atong pagpanaw sa dalan sa kinabuhi mahimong itandi sa pagbaktas sa usa ka magbabaktas diha sa usa ka hataas nga dalan. Nagsugod siya sayo sa buntag ug wala pa kaayoy makita. Samtang ang adlaw hinayhinayng misubang sa kapunawpunawan, ang magbabaktas makaila na ug pipila ka butang sa iyang palibot. Ang uban hanap pa sa iyang panan-aw.  Apan samtang ang adlaw nagpadayon sa iyang pagsubang, nag-anam katin-aw ang makita niya sa layo. Ingon usab niini ang espirituwal nga kahayag nga gitagana sa Diyos. Kita iyang gitugotan sa pagsabot sa pipila ka butang sa tagsa ka higayon. Ang Anak sa Diyos, si Jesu-Kristo, nagtaganag espirituwal nga kadan-agan sa samang paagi. Atong tagdon kon giunsa ni Jehova paglamdag sa iyang katawhan sa karaang panahon ug kon giunsa niya paghatag ug kadan-agan karong adlawa.

2. Sa unsang paagi si Jehova nagtagana ug kadan-agan sa wala pa ang Kristohanong mga panahon?

² Lagmit mga anak ni Kore ang nagsulat sa ika-43 nga Salmo. Kay mga Levihanon, sila nakapribilehiyo sa pagtudlo sa Kasugoan sa Diyos ngadto sa mga tawo. (Malaquias 2:7) Sa pagkatinuod, si Jehova mao ang ilang Dakong Instruktor, ug sila nagtan-aw kaniya ingong Tuboran sa tanang kaalam. (Isaias 30:20) “Oh Diyos, . . . ipadan-ag ang imong kahayag ug ang imong kamatuoran,” ang salmista nag-ampo. “Hinaot nga kini magatultol kanako.” (Salmo 43:1, 3) Basta magpabiling matinumanon ang mga Israelinhon kaniya, sila tudloan ni Jehova sa iyang mga dalan. Sa milabay ang mga siglo, gihatagan sila ni Jehova ug kahayag ug kamatuoran nga talagsaon kaayo. Gihimo kini sa Diyos sa dihang iyang gipadala ang iyang Anak dinhi sa yuta.

3. Sa unsang paagi ang mga Hudiyo nasulayan sa pagtulon-an ni Jesus?

³ Ingon nga ang tawong si Jesu-Kristo, ang Anak sa Diyos mao “ang kahayag sa kalibotan.” (Juan 8:12) Iyang gitudloan ang katawhan ug “daghang butang uban ang mga sambingay”—bag-ong mga butang. (Marcos 4:2) Iyang gisultihan si Poncio Pilato: “Ang akong gingharian dili bahin niining kalibotana.” (Juan 18:36) Usa kana ka bag-ong ideya alang sa usa ka Romano ug siyempre sa nasyonalistikong mga Hudiyo, kay sila nagtuo nga sakopon sa Mesiyas ang Romanhong Imperyo ug ipasig-uli ang Israel sa kanhing himaya niini. Si Jesus nagbanaag sa kahayag ni Jehova, apan ang iyang mga pulong nakapasuko sa Hudiyohanong mga magmamando, kinsa “nahigugma sa himaya sa mga tawo nga labaw gani kay sa himaya sa Diyos.” (Juan 12:42, 43) Kadaghanan sa mga tawo mipili sa pagpabilin sa ilang tawhanong tradisyon imbes modawat sa espirituwal nga kahayag ug kamatuoran nga gikan sa Diyos.—Salmo 43:3; Mateo 13:15.

4. Sa unsang paagi kita nahibalo nga ang mga tinun-an ni Jesus magpadayon sa pagtubo sa pagsabot?

⁴ Apan, pipila lamang ka matinud-anong mga lalaki ug mga babaye ang malipayong midawat sa kamatuoran nga gitudlo ni Jesus. Sila anam-anam nga miuswag sa ilang pagsabot bahin sa mga katuyoan sa Diyos. Apan, sa hapit nang matapos ang yutan-ong kinabuhi sa ilang Magtutudlo, daghan pa sila ug pagatun-an. Sila gisultihan ni Jesus: “Daghan pang butang nga akong isulti kaninyo, apan kamo dili pa makadaog pagdala niini sa pagkakaron.” (Juan 16:12) Oo, ang mga tinun-an magpadayon sa pagtubo sa pagsabot sa kamatuoran sa Diyos.

Ang Kahayag Nagpadayon sa Pagdan-ag

5. Unsang isyu ang mitungha sa unang siglo, ug kinsa ang may responsibilidad sa paghusay niini?

⁵ Human mamatay ug mabanhaw si Jesus, ang kahayag nga gikan sa Diyos midan-ag nga mas hayag pa. Diha sa usa ka panan-awon nga gihatag ngadto kang Pedro, gipadayag ni Jehova nga ang walay-sirkunsisyon nga mga Hentil sukad niadto mahimo nang mga sumusunod ni Kristo. (Buhat 10:9-17) Pagkatalagsaon nga kapadayagan! Bisan pa niana, usa ka isyu mitungha: Gikinahanglan ba ni Jehova nga ang maong mga Hentil magpasirkunsidar human nga mahimo na silang mga Kristohanon? Kanang pangutanaha wala matubag diha sa panan-awon, ug kini nahimong ulohan sa mainit nga debate taliwala sa mga Kristohanon. Kinahanglang husayon kini, kay basin unyag madaot ang ilang bililhong panaghiusa. Busa, sa Jerusalem “ang mga apostol ug ang mga ansiyano nagtigom aron tan-awon kining butanga.”—Buhat 15:1, 2, 6.

6. Unsang paagi ang gisunod sa mga apostoles ug mga tigulang nga lalaki sa dihang ilang gihisgotan ang isyu sa sirkunsisyon?

⁶ Sa unsang paagi kadtong presente niadtong maong panagtigom makatino sa kabubut-on sa Diyos alang sa magtutuong mga Hentil? Si Jehova wala magpadala ug usa ka manulonda nga maoy modumala sa panaghisgot, ni gihatagan niya kadtong presente niadtong tungora ug usa ka panan-awon. Bisan pa niana, ang mga apostoles ug ang tigulang nga mga lalaki wala pasagdi nga walay pagtultol. Ilang gihisgotan ang pamatuod sa pipila ka Hudiyohanong mga Kristohanon nga nakakita kon sa unsang paagi ang Diyos nagsugod sa pagpakiglabot sa mga tawo sa kanasoran, nga nagbubo sa iyang balaang espiritu diha sa walay-sirkunsisyong mga Hentil. Ilang gisusi usab ang Kasulatan agig giya. Tungod niini, ang tinun-ang Santiago naghatag ug rekomendasyon pinasukad sa usa ka malamdagong kasulatan. Samtang ilang gipamalandong ang pamatuod, ang kabubut-on sa Diyos mitin-aw. Kadtong  sakop sa maong mga nasod dili na kinahanglang magpasirkunsidar aron makabaton sa pag-uyon ni Jehova. Gipasulat dayon sa mga apostoles ug sa ubang mga tigulang nga lalaki ang desisyon aron ang mga isigka-Kristohanon magiyahan pinaagi niana.—Buhat 15:12-29; 16:4.

7. Sa unsang paagi nagmauswagon ang unang-siglong mga Kristohanon?

⁷ Dili sama sa Hudiyohanong mga lider sa relihiyon, kinsa midukot lang gihapon sa mga tradisyon sa ilang mga katigulangan, ang kadaghanang Hudiyohanong mga Kristohanon nalipay sa dihang nadawat nila kining talagsaong bag-ong pagsabot sa katuyoan sa Diyos may kalabotan sa mga tawo sa kanasoran, bisan tuod ang pagdawat niini nagkinahanglag kausaban sa panghunahuna may kalabotan sa mga Hentil sa katibuk-an. Gipanalanginan ni Jehova ang ilang mapaubsanong espiritu, ug “ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.”—Buhat 15:31; 16:5.

8. (a) Sa unsang paagi kita nahibalo nga dugang pang kahayag ang madahom human matapos ang unang siglo? (b) Unsang haom nga mga pangutana ang atong hisgotan?

⁸ Ang espirituwal nga kahayag nagpadayon sa pagdan-ag sa tibuok nga unang siglo. Apan wala ipadayag ni Jehova ang tanang bahin sa iyang mga katuyoan ngadto sa unang mga Kristohanon. Gisultihan ni apostol Pablo ang unang-siglong mga isigkamagtutuo: “Sa pagkakaron kita nakakita diha sa hanap nga dagway pinaagig metal nga salamin.” (1 Corinto 13:12) Ang ingon niini nga salamin dili mopabanaag ug tin-aw nga dagway. Nan, sa sinugdan ang pagsabot sa espirituwal nga kahayag limitado. Sa nangamatay na ang mga apostoles, ang kahayag miawop makadiyot, apan sa mga panahong dili pa dugay ang kahibalo sa Kasulatan nahimong dagaya. (Daniel 12:4) Sa unsang paagi gihatagan ug kadan-agan ni Jehova ang iyang katawhan karong adlawa? Ug sa unsang paagi kita angayng mosanong sa dihang iyang ipasangkad ang atong pagsabot sa Kasulatan?

Ang Kahayag Anam-anam nga Nagakasanag

9. Unsang talagsaon ug epektibong paagi sa pagtuon sa Bibliya ang gigamit sa unang mga Estudyante sa Bibliya?

⁹ Sa modernong panahon ang unang tinuod nga pagsidlak sa kahayag nagsugod sa pagtungha sa kataposang ikaupat ka bahin sa ika-19ng siglo samtang ang usa ka pundok sa Kristohanong mga lalaki ug babaye nagsugod sa tininuod nga pagtuon sa Kasulatan. Sila nakahimo ug usa ka praktikal nga paagi sa pagtuon sa Bibliya. Usa ka tawo ang mangutana; dayon timbangtimbangon sa grupo ang tanang nalangkit nga mga teksto sa Kasulatan. Kon ang usa ka bersikulo sa Bibliya daw magkasumpaki sa lain, kining sinserong mga Kristohanon naningkamot sa pagtakdo sa duha. Dili sama sa relihiyosong mga lider sa maong panahon, ang mga Estudyante sa Bibliya (nga maoy pagtawag niadto sa  mga Saksi ni Jehova) matinguhaon nga ang Balaang Kasulatan, dili tradisyon o hinimog-tawo nga doktrina, ang ilang mahimong giya. Human nga ilang mahisgotan ang tanang makitang pamatuod sa Kasulatan, ilang girekord ang ilang mga panghinapos. Nianang paagiha ang ilang pagsabot sa daghang paninugdang mga doktrina sa Bibliya napatin-aw.

10. Unsang makatabang nga mga giya sa pagtuon sa Bibliya ang gisulat ni Charles Taze Russell?

¹⁰ Talagsaon taliwala sa mga Estudyante sa Bibliya mao si Charles Taze Russell. Nagsulat siya ug seryal sa unom ka makatabang nga mga giya sa pagtuon sa Bibliya nga nag-ulohang Studies in the Scriptures. Si Igsoong Russell nagplano sa pagsulat ug ikapitong tomo, nga magpatin-aw sa mga basahon sa Bibliya nga Ezequiel ug Pinadayag. “Sa panahong makita nako ang kasulbaran,” matod pa niya, “mosulat ako ug Ikapitong Tomo.” Apan, siya midugang: “Kon ihatag sa Ginoo ang kasulbaran ngadto sa uban, siya makasulat niini.”

11. Unsay kalabotan sa paniempo ug sa atong pagsabot sa mga katuyoan sa Diyos?

¹¹ Ang gisulti ni C. T. Russell sa ibabaw nagpasundayag sa usa ka hinungdanong butang sa atong katakos sa pagsabot sa pipila ka mga teksto sa Bibliya—paniempo. Si Igsoong Russell nahibalo nga dili niya mapugos ang kahayag sa pagdan-ag diha sa basahon sa Pinadayag sama nga ang usa ka nabalakang magbabaktas dili makaagda sa adlaw sa pagsubang nga dili pa panahon niini sa pagsubang.

Igapadayag—Apan sa Hustong Panahon sa Diyos

12. (a) Kanus-a masabtan pag-ayo ang tagna sa Bibliya? (b) Unsang pananglitan ang nagpakita nga ang atong katakos sa pagsabot sa tagna sa Bibliya nagadepende sa orasan sa Diyos? (Tan-awa ang potnot.)

¹² Maingon nga ang mga apostoles nakasabot sa daghang tagna bahin sa Mesiyas human lamang nga mamatay ug mabanhaw si Jesus, ang mga Kristohanon karong adlawa makasabot sa tagna sa Bibliya sa kinagamyang detalye niini diha lamang nga kini matuman. (Lucas 24:15, 27; Buhat 1:15-21; 4:26, 27) Ang Pinadayag maoy usa ka basahon sa tagna, busa kita makadahom nga makasabot niini nga mas matin-aw pa sa dihang ang mga hitabo nga gibatbat niini madayag. Pananglitan, dili mahimong masabtan sa hustong paagi ni C. T. Russell ang kahulogan sa simbolikong eskarlatag-kolor nga mapintas nga mananap nga gihisgotan sa Pinadayag 17:9-11, sanglit ang mga organisasyon nga gihawasan sa mananap, nga mao, ang Liga sa Kanasoran ug ang Hiniusang Kanasoran, wala pa gani maglungtad hangtod human nga siya mamatay. a

13. Unsay mahitabo usahay sa dihang ang kahayag modan-ag diha sa pipila ka ulohan sa Bibliya?

¹³ Sa dihang nahibaloan sa unang mga Kristohanon nga ang walay-sirkunsisyong mga Hentil mahimong mga isigkamagtutuo, kana nga kausaban misangpot ug bag-ong isyu maylabot sa panginahanglan sa mga tawo sa kanasoran nga magpasirkunsidar. Kini nagtukmod sa mga apostoles ug sa mga tigulang nga lalaki sa pagsusi pag-usab sa tibuok nga isyu sa sirkunsisyon. Kana nga sumbanan ang ginasunod karong adlawa. Ang usa ka sanag kaayong pangidlap sa kahayag sa usa ka ulohan sa Bibliya usahay magtultol sa dinihogang mga alagad sa Diyos, ‘ang matinumanon ug maalamong ulipon nga matang,’ sa pagsusi pag-usab sa mga tema nga nalangkit, ingon sa ipakita sa mosunod nga dili pa dugayng mga pananglitan.—Mateo 24:45.

14-16. Sa unsang paagi ang pagpasibo sa atong panghunahuna mahitungod sa espirituwal nga templo nakausab sa atong pagsabot sa Ezequiel mga kapitulo 40 ngadto 48?

¹⁴ Sa 1971 usa ka pagpatin-aw sa tagna ni Ezequiel gipatik diha sa librong “The Nations Shall Know That I Am Jehovah”—How? Usa ka kapitulo sa maong libro lakbit nga naghisgot sa panan-awon ni Ezequiel sa templo. (Ezequiel, mga kapitulo 40-48) Niadtong tungora, ang sentro sa pagtagad mao ang kon sa unsang paagi ang panan-awon ni Ezequiel sa templo mamatuman diha sa bag-ong kalibotan.—2 Pedro 3:13.

¹⁵ Apan, duha ka artikulo nga gipatik sa Ang Bantayanang Torre sa Hunyo 1, 1973, nakausab sa atong pagsabot sa panan-awon ni Ezequiel. Ilang gihisgotan ang dakong espirituwal nga templo nga gihubit ni apostol Pablo diha sa Hebreohanon kapitulo 10. Ang Bantayanang Torre nagpatin-aw nga ang Balaang lawak ug ang sawang sa sulod sa espirituwal nga templo may kalabotan sa kahimtang sa mga dinihogan samtang ania pa sila sa yuta. Sa dihang gisusi pag-usab ang Ezequiel mga kapitulo 40  ngadto 48 sa mga tuig sa ulahi, nasabtan nga maingon nga ang espirituwal nga templo naglihok karon, sa ingon ang templo nga nakita ni Ezequiel diha sa panan-awon dayag nga naglihok usab karong adlawa. Sa usang paagi?

¹⁶ Diha sa panan-awon ni Ezequiel, ang mga saserdote nakita nga puliki diha sa mga sawang sa templo samtang ilang gialagaran ang mga tribo nga dili-saserdote. Kini nga mga saserdote tin-awng naghawas sa “harianong pagkasaserdote,” ang dinihogang mga alagad ni Jehova. (1 Pedro 2:9) Apan, sila dili mag-alagad sa yutan-ong sawang sa templo sa tibuok nga Usa ka Libo ka Tuig nga Pagmando ni Kristo. (Pinadayag 20:4) Sa dakong bahin nianang yugtoa, kon dili man tanan niana, ang mga dinihogan mag-alagad sa Diyos diha sa espirituwal nga templo sa Labing Balaan, ang “langit mismo.” (Hebreohanon 9:24) Sanglit nakita ang mga saserdote nga nagngadto-nganhi sa mga sawang sa templo ni Ezequiel, kana nga panan-awon dayag nga nagakatuman karong adlawa, samtang ang pipila sa mga dinihogan ania pa sa yuta. Busa, ang Marso 1, 1999, nga gula niining magasina naghisgot bahin sa usa ka napasibo nga hunahuna bahin niining ulohana. Busa, hangtod sa kataposan sa ika-20ng siglo, ang espirituwal nga kahayag gipadan-ag diha sa tagna ni Ezequiel.

Magmaandam sa Pagpasibo sa Imong Panghunahuna

17. Unsang mga pagpasibo ang imong nahimo sa personal nga panghunahuna sukad makadangat sa kahibalo sa kamatuoran, ug sa unsang paagi kini nakahatag ug kaayohan kanimo?

¹⁷ Ang si bisan kinsa nga buot makahibalo sa kamatuoran kinahanglang andam sa pagdala sa “tanang hunahuna ngadto sa pagkabihag aron himoon kining masinugtanon sa Kristo.” (2 Corinto 10:5) Kana dili kanunayng sayon, ilabina kon ang mga panghunahuna lig-ong nakagamot. Pananglitan, sa wala pa makakat-on sa kamatuoran sa Diyos, tingali malipay ka kaayo sa pagsaulog sa pipila ka relihiyosong mga selebrasyon uban sa imong pamilya. Human nga nagsugod ka sa pagtuon sa Bibliya, imong nahibaloan nga kining mga selebrasyona sa aktuwal maoy pagano ug sinugdanan. Sa sinugdan, tingali nagduhaduha ka sa pagpadapat sa imong nakat-onan. Apan, sa kataposan ang gugma alang sa Diyos nakita nga mas malig-on kay sa relihiyosong pagbati, ug ikaw mihunong sa pagpakigbahin sa mga selebrasyon nga dili-makapahimuot sa Diyos. Dili ba gipanalanginan ni Jehova ang imong desisyon?—Itandi ang Hebreohanon 11:25.

18. Unsay angay natong reaksiyon kon ang atong pagsabot sa kamatuoran sa Bibliya ipatin-aw?

¹⁸ Kita makabaton kanunay ug kaayohan pinaagi sa pagbuhat sa mga butang sa paagi sa Diyos. (Isaias 48:17, 18) Busa kon ang atong hunahuna sa usa ka teksto sa Bibliya matin-awan, magmalipayon kita sa nag-uswag nga kamatuoran! Sa pagkatinuod, ang atong padayon nga pagkanadan-agan nagpamatuod nga kita anaa sa hustong alagianan. Kini “ang alagianan sa mga matarong,” nga “sama sa masanag nga kahayag nga anam-anam nga nagdan-ag hangtod sa pagkahingpit sa adlaw.” (Proverbio 4:18) Tinuod, sa pagkakaron kita makakita ug pipila ka mga bahin sa katuyoan sa Diyos nga “hanap pa sa panan-aw.” Apan sa dihang moabot ang hustong panahon sa Diyos, atong makita ang kamatuoran diha sa tanang katahom niini, basta nga ang atong mga tiil magpabiling lig-ong nagtaak diha sa “alagianan.” Kasamtangan, hinaot nga kalipayan gayod nato ang mga kamatuoran nga gipatin-aw ni Jehova, nga maghulat ug kadan-agan sa mga butang nga wala pa kaayo masabti.

19. Unsa ang usa ka paagi sa pagpakita nga kita nahigugma sa kamatuoran?

¹⁹ Sa unsang paagi atong ikapasundayag ang atong gugma sa kahayag sa praktikal nga paagi? Ang usa ka paagi mao ang pagbasa sa Pulong sa Diyos nga regular—adlaw-adlaw kon mahimo. Ikaw ba dunay gisunod nga regular nga programa sa pagbasa sa Bibliya? Ang mga magasing Bantayanang Torre ug Pagmata! nagtagana usab kanato ug daghang lamiang espirituwal nga pagkaon nga tagamtamon. Tagda, usab, ang mga libro, mga brosyur, ug ubang mga publikasyon nga giandam alang sa atong kaayohan. Ug komosta ang bahin sa makapadasig nga  mga taho sa mga kalihokan sa pagsangyaw sa Gingharian nga gipatik diha sa Yearbook of Jehovah’s Witnesses?

20. Unsay kalabotan tali sa kahayag ug kamatuoran nga gikan kang Jehova ug sa atong pagtambong sa Kristohanong mga tigom?

²⁰ Oo, katingalahang gitubag ni Jehova ang pag-ampo nga gipadayag diha sa Salmo 43:3. Sa kataposan niana nga bersikulo, atong mabasa: “Hinaot [ang imong kahayag ug kamatuoran] magadala kanako ngadto sa imong balaang bukid ug sa imong dakong tabernakulo.” Ikaw ba nagpaabot sa pagsimba kang Jehova, duyog sa daghan pa kaayong uban? Ang espirituwal nga pagpanudlo nga ginapasundayag diha sa atong mga tigom maoy usa ka hinungdanong paagi sa pagtagana ni Jehova ug kadan-agan karong adlawa. Unsay atong mahimo aron molalom pa ang atong apresasyon sa Kristohanong mga tigom? Among gidapit kamo sa pagpalandong niining ulohana nga mainampoon sa sunod nga artikulo.

[Footnote]

Makatubag Ka Ba?

• Nganong anam-anam nga gipadayag ni Jehova ang iyang mga katuyoan?

• Giunsa paghusay sa mga apostoles ug mga tigulang nga lalaki sa Jerusalem ang isyu bahin sa sirkunsisyon?

• Unsang paagi sa pagtuon sa Bibliya ang gisunod sa unang mga Estudyante sa Bibliya, ug nganong talagsaon kini?

• Ipakita kon sa unsang paagi ang espirituwal nga kahayag gipadayag sa hustong panahon sa Diyos.

[Mga Pangutana]

[Hulagway sa panid 12]

Si Charles Taze Russell nahibalo nga ang kahayag modan-ag diha sa basahon sa Pinadayag sa hustong panahon sa Diyos