Kita ang Matang nga May Pagtuo

Pagpaambit sa Kristohanong Paglaom sa Senegal

ANG isda mao ang pangunang pagkaon sukad pa sa karaang kapanahonan. Sulod sa libolibo ka tuig, ang mga tawo nangisda sa kadagatan, kalanawan, ug kasubaan sa yuta. Ang pipila ka apostol ni Jesu-Kristo maoy mga mangingisda sa Dagat sa Galilea. Apan, ngadto kanila gipailaila ni Jesus ang laing matang sa pagpangisda. Kini maoy espirituwal nga pagpangisda nga mohatag ug kaayohan dili lamang sa mangingisda kondili sa isda usab!

Niining bahina, giingnan ni Jesus ang mangingisdang si Pedro: “Sukad karon ikaw magapanagat na ug mga tawong buhi.” (Lucas 5:10) Kining matanga sa pagpangisda ginahimo karong adlawa diha sa kapin sa 230 ka nasod, lakip ang Senegal. (Mateo 24:14) Dinhi ang modernong-adlaw nga “mga mangingisda ug mga tawo” maisogong nagpaambit sa ilang Kristohanong paglaom sa uban.—Mateo 4:19.

Ang Senegal nahimutang sa kinatumyang kasadpan sa Aprika. Gikan sa balasong desyertong mga dapit duol sa utlanan sa Sahara sa amihanan kini moabot hangtod sa umogong kalasangan sa Casamance nga rehiyon sa habagatan. Ang Senegal maoy usa ka nasod nga gihurosan sa init nga hangin sa desyerto maingon man usab sa bugnaw, makaparepreskong huyohoy sa Atlantiko. Dinhi nagpuyo ang kapin sa siyam ka milyong tawo. Ang mga molupyo sa Senegal ilado sa ilang pagkamaabiabihon. Ang kadaghanan wala mag-angkong mga Kristohanon. Daghan ang mga magbalantay sa karnero, samtang ang uban mga tig-atiman ug mga baka, mga kamelyo, ug mga kanding. May mga mag-uuma usab, nga nananom ug mani, gapas, ug humay. Oo, ug adunay mga mangingisda, nga nagdalag mga pukot nga punog isda gikan sa Dagat Atlantiko ug gikan sa pipila ka dagkong mga suba nga naglikoliko latas sa nasod. Ang industriya sa pagpangisda nagdula ug hinungdanong papel sa ekonomiya sa Senegal. Sa pagkamatuod, ang iladong pagkaon sa nasod mao ang ceebu jën, usa ka lamiang pagkaon nga kan-on, isda, ug utanon.

“Mga Mangingisda ug mga Tawo”

Adunay 863 ka masibotong mga magwawali sa Gingharian sa Diyos sa Senegal. Ang espirituwal nga pagpangisda nagsugod dinhi sa sayong bahin sa katuigang 1950. Usa ka sangang buhatan sa Watch Tower Society gibuksan sa Dakar, ang kaulohan, sa 1965. Ang misyonaryong “mga mangingisda” misugod sa pagpangabot gikan sa daghang halayong kanasoran. Ang “pagpangisda” nga kalihokan misugod, ug ang pagpaambit sa Kristohanong paglaom sa Senegal padayong nag-uswag. Sa ngadtongadto, ang bag-ong mga pasilidad sa sangang buhatan gitukod sa Almadies, sa hilit nga dapit sa Dakar, ug gipahinungod kang Jehova sa Hunyo 1999. Pagkamaayong panahon sa pagmaya!

Ang Hagit sa Pagdawat sa Kamatuoran

Ang mga tawo gikan sa nagkalainlain kaayong mga kagikan regular nga ginakontak, ug ang uban misanong nga mauyonon sa mensahe sa paglaom nga makaplagan diha sa Pulong sa Diyos. Bisan pag daghan ang walay kahibalo sa Bibliya, sila nagmaya sa pagkahibalo nga ang mga saad ni Jehova nga Diyos nga gipadayag ngadto sa matinumanong karaang mga manalagna hapit nang matuman.

Kasagaran nagkinahanglag kaisog ang paghimog usa ka lig-ong pagbarog alang sa Kristohanong mga prinsipyo, ilabina kon ang mga tradisyon ug kostumbre sa pamilya maoy nalangkit. Pananglitan, ang poligamiya kaylap nga gibatasan sa Senegal. Tagda ang kahimtang sa usa ka lalaki nga may duha ka asawa sa dihang siya misugod sa pagtuon sa Bibliya. Aduna ba siyay kaisog sa pagdawat sa Kristohanong kamatuoran ug mosunod sa Kasulatanhong kinahanglanon nga mahimong bana sa usa lamang ka asawa? (1 Timoteo 3:2) Ug siya ba moipon sa iyang asawa sa pagkabatan-on, ang babaye nga iyang unang giminyoan? Kana ang iyang gibuhat, ug siya karon nag-alagad ingong usa ka masibotong ansiyano diha sa usa sa dagkong mga kongregasyon sa dapit sa Dakar. Ang iyang unang asawa midawat usab sa kamatuoran duyog sa iyang tanang 12 ka anak, 10 sa iyang unang asawa ug 2 sa iyang kanhing ikaduhang asawa.

Ang laing babag aron dawaton ang Kristohanong paglaom hayan mao ang pagkadili-makamaong mosulat ug mobasa. Nagpasabot ba kini nga ang tawong dili makamaong mosulat ug mobasa dili makadawat ug makasubay sa kamatuoran? Dili gayod. Tagda ang panig-ingnan ni Marie, usa ka kugihang inahan sa walo ka batan-ong anak. Nakita dayon niya ang kahinungdanon sa paghisgot sa teksto sa Bibliya uban sa iyang mga anak matag adlaw sa dili pa sila moeskuyla ug siya moadto sa trabaho. Apan sa unsang paagi mahimo niya kini, sanglit dili siya makamaong mobasa? Sayo sa matag  buntag, iyang kuhaon ang pulyetong Pagsusi sa Kasulatan sa Adlaw-Adlaw ug mobarog diha sa balasong dalan atubangan sa iyang balay. Samtang ang mga tawo moagi, iyang pangutan-on kon sila ba makamaong mobasa. Sa dihang makaplagan niya ang usa nga makamaong mobasa, iyang itunol ang pulyeto ug kinasingkasing nga moingon: “Dili ako makamaong mobasa, busa mahimo bang basahon nimo kanako kini nga seksiyon karong adlawa?” Siya atentibong maminaw sa pagbasa. Dayon iyang pasalamatan ang lumalabay ug mosulod gilayon sa iyang balay aron himoon ang madasigong panaghisgot sa teksto duyog sa iyang mga anak sa dili pa sila moeskuyla!

Ang Tanang Matang sa Tawo Misanong

Sa Senegal, ang mga tawo makaplagan nga naglingkod sa kadalanan nga nagbaligyag isda, utanon, o prutas diha sa tiyanggihan o nag-irag ilalom sa dakong kahoyng baobab nga nagainom ug ataya, usa ka paiton nga berdeng tsa. Kay determinado nga ipaambit ang maayong balita sa tanang ilang mahibalag, duha ka igsoong lalaki nakighinabi sa usa ka baldadong tawo nga nagpakilimos diha sa dalan. Human sa pagtimbaya kaniya, sila miingon: “Daghang tawo ang mohatag kanimog salapi apan dili mohunong aron makig-estorya. Kami mianhi aron makig-estorya kanimo bahin sa usa ka hinungdanon kaayong butang nga naglangkit sa imong umaabot.” Ang makililimos nahingangha. “Buot namong mosukna kanimo ug usa ka pangutana,” ang mga igsoon nagpadayon. “Sa imong hunahuna nganong adunay daghan kaayong pag-antos sa kalibotan?” “Pagbuot kini sa Diyos,” mitubag ang makililimos.

Dayon ang mga igsoon nangatarongan kaniya gikan sa Kasulatan ug gisaysay ang Pinadayag 21:4. Ang makililimos dulot nga natandog niining mensahe sa paglaom ug sa kamatuoran nga adunay tawo nga interesado gayod kaniya nga mihapit ug naghisgot sa Bibliya. Milugmaw ang mga luha sa iyang mga mata. Inay kay mangayog salapi, iyang gihangyo ang mga igsoon sa pagkuha sa tanan niyang sensilyo nga anaa sa iyang lata nga butanganag limos! Siya mapugsanon kaayo nga nakadani kini sa pagtagad sa tanang lumalabay. Nalisdan pag-ayo ang mga igsoon una nila makombinsir siya nga itago ang salapi. Siya sa kataposan miuyon apan miinsistir nga sila moduaw pag-usab kaniya.

Ang dakong unibersidad sa Dakar nakadugang usab sa kuha diha sa espirituwal nga pukot. Didto ang usa ka estudyante sa medisina nga ginganlag Jean-Louis misugod sa pagtuon sa Bibliya. Siya midawat gilayon sa kamatuoran, mipahinungod sa iyang kinabuhi kang Jehova, ug nabawtismohan. Ang iyang tinguha mao ang pag-alagad sa Diyos diha sa bug-os-panahong payunir nga pag-alagad, apan siya usab nagpahimulos sa iyang pagtuon sa medisina. Tungod sa iyang kontrata sa kaugalingong nasod, siya obligado sa pagtapos sa iyang pagtuon. Bisan pa niana, siya misugod sa pag-alagad ingong oksilyare payunir sa samang panahon. Wala madugay human nga madawat ang iyang diploma ingong usa ka kuwalipikadong doktor, siya gidapit sa pag-alagad sa dakong puy-anang Bethel sa Aprika ingong doktor sa pamilya. Laing batan-ong lalaki nga nakontak sa Dakar University nag-alagad na usab karon uban sa pamilyang Bethel diha sa iyang kaugalingong nasod.

Ang espirituwal nga pagpangisda sa Senegal dayag nga magantihon. Ang literatura sa Bibliya sa mga Saksi ni Jehova gipabilhan ug dako ug karon ginapatik na diha sa lokal nga pinulongang Wolof. Ang pagkadungog sa maayong balita diha sa ilang lumad nga pinulongan nakadasig sa daghang matinud-anog-kasingkasing nga mga tawo sa pagsanong nga mapasalamaton. Uban sa panalangin ni Jehova, walay duhaduha daghan pang simbolikong isda ang masikop, samtang ang masibotong “mga mangingisda ug mga tawo” sa Senegal padayong magpaambit sa Kristohanong paglaom nga matinumanon ug maisogon.

[Mapa/Hulagway sa panid 31]

(Alang sa aktuwal nga pagkahan-ay, tan-awa ang publikasyon)

SENEGAL

[Hulagway]

Pagpaambit sa Kristohanong paglaom sa Senegal

[Credit Line]

Mountain High Maps® Copyright © 1997 Digital Wisdom, Inc.