Ang mga Makig-away sa Diyos Dili Makadaog!

“Sila makig-away gayod batok kanimo, apan sila dili makadaog batok kanimo.”—JEREMIAS 1:19.

1. Unsang asaynment ang nadawat ni Jeremias, ug unsa ka dugay nga nagpadayon ang iyang buluhaton?

 GITUDLO ni Jehova ang batan-ong Jeremias nga mahimong manalagna sa kanasoran. (Jeremias 1:5) Kini nahitabo panahon sa pagmando sa buotang Haring Josias sa Juda. Ang ministeryo ni Jeremias ingong manalagna nagpadayon latas sa magubot nga yugto una pa gidaog sa Babilonya ang Jerusalem ug hangtod sa pagkabihag sa katawhan sa Diyos.—Jeremias 1:1-3.

2. Sa unsang paagi gilig-on ni Jehova si Jeremias, ug ang pagpakig-away batok sa maong manalagna nagkahulogan ug unsa?

² Ang mga mensahe sa paghukom nga igapahayag ni Jeremias makapukaw gayod ug pagsupak. Busa, gilig-on siya sa Diyos alang nianang naghulat sa unahan. (Jeremias 1:8-10) Pananglitan, ang espiritu sa manalagna nalig-on sa mga pulong: “Sila makig-away gayod batok kanimo, apan sila dili makadaog batok kanimo, kay ‘ako magauban kanimo,’ mao ang giingon ni Jehova, ‘aron sa pagluwas kanimo.’” (Jeremias 1:19) Ang pagpakig-away kang Jeremias nagkahulogan ug pagpakig-away sa Diyos. Karon, si Jehova adunay samag-manalagna nga pundok sa mga alagad kansang buluhaton kaamgid niadtong kang Jeremias. Sama kaniya, maisogon nilang giwali ang matagnaong pulong sa Diyos. Ug kini nga mensahe nagaapektar sa tanang tawo ug mga nasod alang sa ikaayo o ikadaot, depende sa ilang pagsanong niini. Sama sa panahon ni Jeremias, dunay mga tawo nga makig-away sa Diyos pinaagi sa pagsupak sa iyang mga alagad ug sa ilang tinudlo-sa-Diyos nga mga buluhaton.

 Mga Alagad ni Jehova Ginaatake

3. Nganong ang mga alagad ni Jehova ginaatake?

³ Ang katawhan ni Jehova ginaatake sukad pa sa unang bahin sa ika-20ng siglo. Diha sa daghang nasod, ang mga tawong daotan ug tuyo naningkamot sa pagbabag—oo, pagpahilom—sa pagmantala sa maayong balita sa Gingharian sa Diyos. Sila gihulhogan sa atong pangunang Kaaway, ang Yawa, kinsa “nagasuroysuroy sama sa usa ka leyon nga nagangulob, nga nagapangita ug usa nga matukob.” (1 Pedro 5:8) Human matapos “ang tinudlong mga panahon sa kanasoran” sa 1914, gientrono sa Diyos ang iyang Anak ingong bag-ong Hari sa yuta, uban sa sugo: “Mangdaog ka taliwala sa imong mga kaaway.” (Lucas 21:24; Salmo 110:2) Migamit sa iyang gahom, gitambog ni Kristo si Satanas gikan sa langit ug gikutohan siya diha na lang sa silinganan sa yuta. Kay nahibalo nga mubo na lang ang iyang panahon, gipahungaw sa Yawa ang iyang kasuko diha sa dinihogang mga Kristohanon ug sa ilang mga kauban. (Pinadayag 12:9, 17) Unsay mga resulta sa balikbalik nga mga pag-atake niining mga nakig-away sa Diyos?

4. Unsang mga pagsulay ang naagoman sa katawhan ni Jehova sa panahon sa Gubat sa Kalibotan I, apan unsay nahitabo sa 1919 ug 1922?

⁴ Ang dinihogang mga alagad ni Jehova nag-atubang ug daghang pagsulay sa pagtuo panahon sa Gubat sa Kalibotan I. Sila gibiaybiay ug gibutangbutangan, gigukod sa magubtanong mga tawo, ug gipamunalan. Sumala sa gitagna ni Jesus, sila nahimong “mga dulumtanan sa tanang kanasoran.”  (Mateo 24:9) Taliwala sa kaguliyang sa gubat, gipahimuslan sa mga kaaway sa Gingharian sa Diyos ang mga taktika nga gigamit batok kang Jesu-Kristo. Bakak nilang giakusar ang katawhan ni Jehova ingong rebelde sa kagamhanan, ug ilang giatake ang sentro mismo sa makitang organisasyon sa Diyos. Sa Mayo 1918, ang mga sugo giisyu sa pagdakop sa presidente sa Watch Tower Society, si J. F. Rutherford, ug pito sa iyang suod nga mga kauban. Kining walo ka tawo gipahamtangan ug bug-at nga mga sentensiya sa pagkabilanggo ug gipadala sa pederal nga prisohan sa Atlanta, Georgia, T.B.A. Siyam ka bulan sa ulahi sila gibuhian. Sa Mayo 1919 ang sirkitong korte sa apelasyon nagpakanaog ug hukom nga ang mga sinumbong wala hatagig hustong husay, ug busa ang sentensiya gibali. Ang kaso gipahusay ug balik, apan sa ulahi gisibog sa gobyerno ang sumbong, si Brader Rutherford ug ang iyang mga kauban nahukmang dili-sad-an. Gipadayon nila ang ilang mga buluhaton, ug ang mga kombensiyon nga gihimo sa Cedar Point, Ohio, sa 1919 ug sa 1922 nakapasig-uli sa kadasig sa buluhatong pagsangyaw sa Gingharian.

5. Unsay situwasyon sa mga Saksi ni Jehova sa Nazi Alemanya?

⁵ Ang diktador nga mga pagmando nanungha sa katuigan sa 1930, ug ang Alemanya, Hapon, ug Italya naghiusa nga nahimong Axis nga mga gahom. Sayo niadto nga dekada, ang linuog nga paglutos gipaagom batok sa katawhan sa Diyos, ilabina sa Nazi Alemanya. Ang mga pagdili gipahamtang. Ang mga balay girekisa, ug gidakop ang namuyo niana. Libolibo ang gibalhog sa mga kampo konsentrasyon tungod kay midumili sila sa pagsalikway sa ilang pagtuo. Ang pagpakig-away batok sa Diyos ug sa iyang katawhan gilaraw sa pagpapha sa mga Saksi ni Jehova sa teritoryo sa diktador nga pagmando. a Sa dihang ang mga Saksi midangop sa mga korte sa Alemanya aron depensahan ang ilang mga katungod, ang Ministry of Justice sa Reich nag-andam ug taas nga hukom sa pagtino nga sila dili molampos. Kini nag-ingon: “Kinahanglang dili mapakyas ang mga korte tungod lamang sa daw legal nga mga pormalidad; kondili kini kinahanglang magtinguha ug mangitag mga paagi bisan pa sa legal nga mga babag, sa pagtuman sa ilang hataas nga mga katungdanan.” Kini nagpasabot nga ang hustisya dili gayod maangkon. Ang mga Nazi nagpatuo nga ang mga buluhaton sa mga Saksi ni Jehova makadaot, o mabatokon, ug ‘nakatugaw sa Nasodnon Sosyalistikong kahikayan.’

6. Unsang mga paningkamot ang gihimo aron sa pagpahunong sa atong buluhaton panahon sa Gubat sa Kalibotan II ug human niadto?

⁶ Sa panahon sa Gubat sa Kalibotan II, ang mga pagdili ug mga restriksiyon gipahamtang sa katawhan sa Diyos sa Australia, Canada, ug ubang kayutaan nga nalangkit sa British Commonwealth—sa Aprika, Asia, ug mga isla sa Caribbeano ug sa Pasipiko. Sa Tinipong Bansa, ang dakog-impluwensiya nga mga kaaway ug mga tawong nakadawat ug sayop nga impormasyon nagpahinabog ‘kasamok pinaagi sa balaod.’ (Salmo 94:20) Apan ang mga isyu bahin sa pagsaludar sa bandera ug ang mga ordinansa sa komunidad nga nagdili sa balay-ug-balay nga pagsangyaw gibugno diha sa mga korte, ug ang paborableng mga desisyon sa Tinipong Bansa nakahatag ug kalig-on sa paglaban sa kagawasan sa pagsimba. Tungod sa tabang ni Jehova, ang mga paningkamot sa kaaway wala molampos. Sa dihang natapos ang gubat sa Uropa, ang mga pagdili gikuha. Ang libolibong mga Saksi nga gipriso sa mga kampo konsentrasyon gibuhian, apan ang pagpakig-away wala pa mahuman. Pagkahuman gayod sa Gubat sa Kalibotan II, ang Bugnawng Gubat nagsugod. Dugang gilisodlisod sa mga nasod sa Silangang Uropa ang katawhan ni Jehova. Dihay gihimong legal nga aksiyon aron sa pagbalda ug pagpahunong sa atong buluhatong pagsangyaw, pagpugong sa pag-apod-apod sa literatura sa Bibliya, pagpahunong sa atong publikong mga asembliya. Daghan ang gibilanggo o gipadala ngadto sa mga kampo sa pinugos nga trabaho.

Nagpadayon sa Buluhatong Pagsangyaw!

7. Unsay naagoman sa mga Saksi ni Jehova sa Polandia, Rusya, ug ubang mga nasod sa mga katuigang dili pa dugay?

⁷ Sa paglabay sa daghang katuigan, ang buluhaton sa pagsangyaw sa Gingharian nabuksan. Ang Polandia, bisan ilalom gihapon sa pagmando sa Komunista, mitugot nga himoon ang usa ka adlaw nga mga kombensiyon sa 1982. Didto dihay gihimong internasyonal nga mga kombensiyon sa 1985. Ang dagkong internasyonal nga mga kombensiyon  misunod sa 1989, nga libolibo ang mitambong gikan sa Rusya ug Ukraine. Niadtong tuiga legal nga giila sa Hungaria ug Polandia ang mga Saksi ni Jehova. Sa tinghunlak sa 1989, ang Paril sa Berlin nalumpag. Pipila ka bulan sa ulahi, atong nadawat ang legal nga pag-ila sa Sidlakang Alemanya, ug wala magdugay human niana usa ka internasyonal nga kombensiyon ang gihimo sa Berlin. Ug sa sinugdanan sa kataposang dekada sa ika-20ng siglo, dihay mga paningkamot nga gihimo aron makontak mismo ang mga igsoon sa Rusya. Ang pipila ka opisyales sa Moscow giduol, ug sa 1991, ang mga Saksi ni Jehova legal nga narehistro. Sukad niadto ang buluhaton miuswag pag-ayo sa Rusya ug sa mga republika nga bahin sa Sobyet Unyon kanhi.

8. Unsay nahitabo sa katawhan ni Jehova sa 45 ka tuig human matapos ang Gubat sa Kalibotan II?

⁸ Samtang ang paglutos mihunong na sa pipila ka lugar, migrabe kini sa ubang dapit. Sa 45 ka tuig human matapos ang ikaduhang gubat sa kalibotan, daghang nasod midumili sa paghatag ug legal nga pag-ila sa mga Saksi ni Jehova. Dugang pa, gipahamtang ang mga pagdili kanato o sa atong mga buluhaton sa 23 ka nasod sa Aprika, 9 sa Asia, 8 sa Uropa, 3 sa Latin Amerika, ug 4 sa pipila ka isla nga mga nasod.

9. Unsay naagoman sa mga alagad ni Jehova sa Malawi?

⁹ Ang mga Saksi ni Jehova sa Malawi nakaagom ug mapintas nga paglutos sugod sa 1967. Tungod sa ilang neyutral nga baroganan ingong tinuod nga mga Kristohanon, ang atong kaubang mga magtutuo didto dili mopalit ug mga tarheta sa politikanhong partido. (Juan 17:16) Human sa miting sa Malawi Congress Party sa 1972, misilaob na usab ang pagpamintas. Ang mga igsoon giabog sa ilang mga balay ug gipapahawa sa mga trabaho. Libolibo ang namahawa sa nasod aron dili mapatay. Apan milampos ba ang mga nakig-aaway sa Diyos ug sa iyang katawhan? Wala gayod! Human sa kausaban sa mga kahimtang, ang kinatas-ang ihap nga 43,767 ka magmamantala sa Gingharian nagtaho sa Malawi sa 1999, ug kapin sa 120,000 ang mitambong sa distritong mga kombensiyon didto. Usa ka bag-ong sangang-buhatan ang natukod sa kaulohang siyudad.

Sila Nangitag Ikasumbong

10. Sama sa kahimtang ni Daniel, unsay gihimo sa presenteng-adlawng mga magsusupak sa katawhan sa Diyos?

¹⁰ Ang mga apostata, mga klerigo, ug ang uban pa dili makaantos sa pagpamati sa atong mensahe gikan sa Pulong sa Diyos. Kay gipugos sa relihiyosong mga pundok sa Kakristiyanohan, ang mga magsusupak nangitag legal-kono nga paagi aron pakamatarongon ang ilang pagpakig-away batok kanato. Unsang mga taktika ang gigamit usahay? Buweno, unsay gihimo sa mga nagplanog daotan aron sa pag-atake sa manalagnang Daniel? Diha sa Daniel 6:4, 5, atong mabasa: “Ang hataas nga mga opisyal ug ang mga kadagkoan nangitag paagi nga ilang ikasumbong si Daniel may kalabotan sa gingharian; apan wala gayoy ikasumbong o kahiwian ang ilang nakita, tungod kay siya kasaligan ug wala gayod magpasagad o walay kahiwian nga nakita diha kaniya. Busa kining mga tawhana nag-ingon: ‘Wala gayod kitay makita nga ikasumbong batok kang Daniel, gawas lamang kon mangita kita ug ikasumbong kaniya may kalabotan sa balaod sa iyang Diyos.’” Karong adlawa, ang mga magsusupak mangita usab ug ikasumbong. Sila nagreklamo bahin sa “peligrosong mga kulto” ug naningkamot nga matawag sa ingon niini ang mga Saksi ni Jehova. Pinaagi sa pagdaot, mga pasumbingay, ug kabakakan, sila nag-atake sa atong pagsimba ug sa atong pagsunod sa mga prinsipyo sa Diyos.

11. Unsang bakak nga mga pangangkon ang gipatugbaw sa ubang mga magsusupak sa mga Saksi ni Jehova?

¹¹ Diha sa ubang mga nasod, ang relihiyoso ug politikanhong mga elemento dili moila nga atong gisunod “ang dagway sa pagsimba nga hinlo ug wala-mahugawi sa panglantaw sa atong Diyos.” (Santiago 1:27) Bisag ang atong Kristohanong mga buluhaton ginahimo diha sa 234 ka nasod, ang mga magsusupak moingon nga kita dili usa ka “nailhang relihiyon.” Una pa sa usa ka internasyonal nga kombensiyon sa 1998, gikutlo sa mantalaan sa Atenas ang pari sa Gregong Ortodokso nga nag-ingong “[ang mga Saksi ni Jehova] dili usa ka ‘nailhang relihiyon,’” bisan pag sukwahi niana ang desisyon sa Uropanhong Korte sa Tawhanong mga Katungod. Pipila ka adlaw sa ulahi, laing mantalaan sa mao gihapong siyudad nagkutlo sa usa ka tigpamaba sa simbahan nga nag-ingon: “[Ang mga Saksi ni Jehova] dili mahimong ‘usa ka Kristohanong kongregasyon,’ tungod kay sila wala mahiuyon sa Kristohanong pagtuo diha sa persona ni Jesu-Kristo.” Kini katingalahan gayod, kay walay laing relihiyosong pundok ang labawng nagpasiugda sa pagsundog kang Jesus kay sa mga Saksi ni Jehova!

12. Sa atong espirituwal nga pagpakiggubat, unsay atong kinahanglang buhaton?

 ¹² Kita nagtinguha sa pagdepensa ug pagtukod sa maayong balita sa legal nga mga paagi. (Filipos 1:7) Dugang pa, dili nato ikompromiso o paluyahon ang atong malig-ong pagsunod sa mga sukdanan sa Diyos sa pagkamatarong. (Tito 2:10, 12) Sama kang Jeremias, atong ‘baksan ang atong mga hawak ug mosulti sa tanan nga gisugo kanato ni Jehova,’ nga dili magpadala sa kahadlok sa mga makig-away sa Diyos. (Jeremias 1:17, 18) Ang Balaang Pulong ni Jehova tin-awng nagpakita sa hustong dalan nga atong subayon. Dili gayod kita mosandig diha sa huyang nga “bukton nga unod” o mangitag “panalipod diha sa landong sa Ehipto,” sa ato pa, kining kalibotana. (2 Cronicas 32:8; Isaias 30:3; 31:1-3) Sa espirituwal nga pagpakiggubat, kita kinahanglang magpadayon sa pagsalig kang Jehova uban sa atong bug-os nga kasingkasing, tugotan siya nga tultolan kita sa atong mga lakang, ug dili mosalig sa atong kaugalingong salabotan. (Proverbio 3:5-7) Gawas kon kita dunay pagpaluyo ni Jehova ug siya mismo ang nagabantay kanato, ang tanan natong paghago “walay kapuslanan.”—Salmo 127:1.

Gilutos Apan Dili Mokompromiso

13. Nganong ikaingon nga ang satanasnong pag-atake kang Jesus wala molampos?

¹³ Ang kinalabwang pananglitan sa walay pagkompromiso nga debosyon kang Jehova mao si Jesus, kinsa bakak nga giakusar nga nangaghat sa pagrebelde batok sa kagamhanan ug nagtugaw sa establisado nang kahikayan. Human sa pagsusi sa kaso ni Jesus, si Pilato andam sa pagbuhi kaniya. Apan ang mga tawo, nga gihulhogan sa relihiyosong mga pangulo, naninggit nga ilansang si Jesus, bisan pag siya walay sala. Puli kaniya, ilang gipangayo nga buhian si Barabas—usa ka tawo nga nabilanggo tungod sa pagrebelde sa kagamhanan ug pagpatay! Si Pilato misulay na usab sa pagkabig sa dili-makataronganong mga magsusupak, apan siya sa kataposan nagpadala sa kagustohan sa katilingban. (Lucas 23:2, 5, 14, 18-25) Bisan tuod si Jesus namatay sa estaka, ang makalilisang satanasnong pag-atake sa walay-sala nga Anak sa Diyos napakyas gayod, kay gibanhaw ni Jehova si Jesus ug gibayaw  siya ngadto sa Iyang kaugalingong tuong kamot. Ug sa adlaw sa Pentekostes 33 K.P., pinaagi sa hinimaya nga Jesus, ang balaang espiritu gibubo, nga nagtukod sa Kristohanong kongregasyon—‘usa ka bag-ong linalang.’—2 Corinto 5:17; Buhat 2:1-4.

14. Unsay misangpot sa dihang giatake sa Hudiyohanon nga relihiyosong elemento ang mga sumusunod ni Jesus?

¹⁴ Human niadto gihulga sa relihiyosong elemento ang mga apostoles, apan ang maong mga sumusunod ni Kristo wala mohunong sa pagsulti bahin sa mga butang nga ilang nakita ug nadungog. Ang mga tinun-an ni Jesus miampo: “Jehova, hatagig pagtagad ang ilang mga hulga, ug itugot sa imong mga alagad nga padayong magasulti sa imong pulong uban ang tanang kaisog.” (Buhat 4:29) Gitubag ni Jehova ang ilang pangaliyupo pinaagi sa pagpuno kanila sa balaang espiritu ug paglig-on kanila aron makapadayon sa ilang maisogong pagmantala. Sa wala magdugay gimandoan na usab ang mga apostoles sa paghunong sa pagsangyaw, apan si Pedro ug ang ubang mga apostoles mitubag: “Kinahanglang among sugton ang Diyos ingong magmamando inay kay sa mga tawo.” (Buhat 5:29) Ang mga panghulga, mga pagdakop, ug mga pagbunal wala makapahunong kanila sa pagpauswag sa ilang buluhaton sa Gingharian.

15. Kinsa si Gamaliel, ug unsay iyang gitambag sa relihiyosong mga magsusupak sa mga sumusunod ni Jesus?

¹⁵ Unsay reaksiyon sa relihiyosong mga lider? “Sila nasakitan pag-ayo ug nagtinguha sa pagpatay [sa mga apostoles].” Apan, dihay usa ka magtutudlo sa Balaod nga ginganlag Gamaliel, nga usa ka Pariseo, ug siya tinahod gayod sa tanang tawo. Nagpagawas ug makadiyot sa mga apostoles gikan sa tigomanan sa Sanhedrin, iyang gitambagan ang maong relihiyosong mga magsusupak: “Mga tawo sa Israel, tagda ang inyong kaugalingon sa kon unsay buot ninyong buhaton labot niining mga tawhana. . . . Sultihan ko kamo, Ayaw panghilabot niining mga tawhana, hinuon pasagdi sila; (tungod kay, kon kining larawa o kining buhata gikan sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila;) kay kon dili, basin kamo hikaplagan sa tinuod nga mga mag-aaway batok sa Diyos.”—Buhat 5:33-39.

Walay Hinagiban nga Buhaton Batok Kanato ang Molampos

16. Sa imong kaugalingong mga pulong, unsaon nimo pagpahayag ang pasalig nga gihatag ni Jehova sa iyang katawhan?

¹⁶ Ang tambag ni Gamaliel makataronganon, ug kita moapresyar gayod kon dunay tawo nga mosultig pabor kanato. Atong giila usab nga ang kagawasan sa pagsimba gituboy sa mga hukom sa korte pinaagi sa makataronganong mga huwes. Siyempre, ang atong pagsunod sa Pulong sa Diyos magpasuko sa mga klero sa Kakristiyanohan ug sa ubang mga lider sa Dakong Babilonya, ang tibuok-kalibotang imperyo sa bakak nga relihiyon. (Pinadayag 18:1-3) Bisan pag sila ug kadtong naimpluwensiyahan nila makig-away kanato, kita aduna niini nga pasalig: “‘Bisan unsa nga hinagiban nga buhaton batok kanimo dili magmalamposon, ug ang tagsatagsa ka dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong maoy gikan kanako,’ mao ang giingon ni Jehova.”—Isaias 54:17.

17. Bisan pag makig-away batok kanato ang mga magsusupak, nganong kita magmaisogon?

¹⁷ Ang atong mga kaaway makig-away batok kanato sa walay hinungdan, apan kita dili angay mahadlok. (Salmo 109:1-3) Dili gayod kita magpadala sa kahadlok niadtong masuko sa atong mensahe sa Bibliya aron ikompromiso ang atong pagtuo. Bisan pag makadahom kita nga ang atong espirituwal nga pagpakig-away mograbe pa, kita nahibalo sa sangpotanan. Sama kang Jeremias, atong masinati ang katumanan sa matagnaong mga pulong: “Sila makig-away gayod batok kanimo, apan sila dili makadaog batok kanimo, kay ‘ako magauban kanimo,’ mao ang giingon ni Jehova, ‘aron sa pagluwas kanimo.’” (Jeremias 1:19) Oo, kita nahibalo nga ang mga makig-away sa Diyos dili makadaog!

[Footnote]

Unsaon Nimo Pagtubag?

• Nganong ang mga alagad ni Jehova ginaatake?

• Sa unsang mga paagi ang mga magsusupak nakig-away batok sa katawhan ni Jehova?

• Nganong makatino kita nga ang mga makig-away sa Diyos dili makadaog?

[Mga pangutana]

[Hulagway sa panid 17]

Si Jeremias gipasaligan nga si Jehova magauban kaniya

[Hulagway sa panid 18]

Nangaluwas sa kampo konsentrasyon

[Hulagway sa panid 18]

Kapintasan sa magubtanong mga tawo batok sa mga Saksi ni Jehova

[Hulagway sa panid 18]

J. F. Rutherford ug mga kauban

[Hulagway sa panid 21]

Sa kahimtang ni Jesus, ang mga nakig-away sa Diyos wala makadaog