Ang Bag-ong Kalibotan—Atua Ka ba Unya Didto?

“Walay mas maayo alang kanila kay sa pagmaya ug sa pagbuhat sa maayo samtang buhi pa; ug usab nga ang matag tawo mokaon ug sa pagkatinuod moinom ug magpahimulos ug maayo sa tanan niyang kahago. Kini ang gasa sa Diyos.”—ECCLESIASTES 3:12, 13.

1. Nganong maghupot kita ug positibong tinamdan bahin sa umaabot?

 DAGHANG tawo ang nagtuo nga ang Labing Gamhanang Diyos estrikto, mapintas. Apan, ang teksto sa ibabaw maoy usa ka kamatuoran nga imong makita diha sa iyang dinasig nga Pulong. Kini nahiuyon sa iyang kinaiya ingong “malipayong Diyos” ug sa iyang pagbutang sa atong unang mga ginikanan diha sa usa ka yutan-ong paraiso. (1 Timoteo 1:11; Genesis 2:7-9) Sa dihang mangita ug kahibalo sa umaabot nga gisaad sa Diyos alang sa iyang katawhan, kita dili angayng matingala dihang mahibalo bahin sa mga kahimtang nga mohatag kanato ug dumalayon nga kalipay.

2. Unsa ang pipila ka butang nga imong gipaabot?

² Diha sa nag-una nga artikulo, atong gisusi ang tulo sa upat ka higayon diin ang Bibliya nagtagna sa “bag-ong mga langit ug usa ka bag-ong yuta.” (Isaias 65:17) Ang usa niadtong kasaligang mga tagna narekord diha sa Pinadayag 21:1. Ang sunod nga mga bersikulo nag-asoy bahin sa panahon sa dihang usbon sa Labing Gamhanang Diyos ang mga kahimtang sa yuta alang sa dugang pang kaayohan. Iyang pahiran ang mga luha sa kasubo. Wala nay mga tawo nga mamatay tungod sa pagkatigulang, sakit, o mga aksidente. Ang pagbangotan, pagtiyabaw, ug kasakit mawala na. Pagkatahom nga palaaboton! Apan kita ba makasalig nga kini moabot,  ug unsay epekto sa maong palaaboton diha kanato karon mismo?

Mga Katarongan sa Pagsalig

3. Nganong makasalig kita sa mga saad sa Bibliya bahin sa umaabot?

³ Matikdi kon sa unsang paagi ang Pinadayag 21:5 nagpadayon. Kini nagkutlo sa Diyos, nga naglingkod sa iyang langitnong trono, nga nag-ingon: “Tan-awa! Ginabag-o ko ang tanang butang.” Kana nga saad sa Diyos mas maayo kay sa bisan unsang nasodnong deklarasyon sa kagawasan, bisan unsang presenteng-adlawng mga lagda sa mga katungod sa tawo, o bisan unsang tawhanong tingusbawan alang sa umaabot. Kini kasaligan gayod nga deklarasyon sa Usa nga giingon sa Bibliya nga “dili makabakak.” (Tito 1:2) Masabtan kon tingali makahunahuna ka nga kita makahunong na dinhi, nga kalipayan kining maanindot nga palaaboton ug mosalig sa Diyos. Apan dili kita angayng mohunong. Aduna pay daghan nga angay natong mahibaloan bahin sa atong umaabot.

4, 5. Unsang mga tagna sa Bibliya ang nahisgotan na nga makapalig-on sa atong pagsalig kon unsay anaa sa unahan?

⁴ Palandonga kon unsay gipamatud-an sa nag-unang artikulo bahin sa mga saad sa Bibliya nga bag-ong mga langit ug usa ka bag-ong yuta. Si Isaias nagtagna bahin sa maong bag-ong sistema, ug ang iyang tagna natuman sa dihang ang mga Hudiyo mibalik sa ilang yutang-natawhan ug gitukod pag-usab ang matuod nga pagsimba. (Esdras 1:1-3; 2:1, 2; 3:12, 13) Apan, mao ba lamang kana ang gitumong sa tagna ni Isaias? Dili gayod! Ang mga butang nga iyang gitagna matuman sa mas dakong paagi sa halayong panahon sa umaabot. Nganong mao kanay atong panghinapos? Tungod sa atong mabasa diha sa 2 Pedro 3:13 ug Pinadayag 21:1-5. Kanang mga tekstoha nagtumong sa bag-ong mga langit ug usa ka bag-ong yuta nga mohatag ug kaayohan sa mga Kristohanon sa tibuok yuta.

⁵ Sumala sa gipadayag na, gigamit sa Bibliya ang mga pulong “bag-ong mga langit ug usa ka bag-ong yuta” sa upat ka higayon. Nahisgotan na nato ang tulo niini ug nakaabot sa makapadasig nga mga panghinapos. Matin-aw, ang Bibliya nagtagna nga wagtangon sa Diyos ang pagkadaotan ug ang ubang mga hinungdan sa pag-antos ug unya iyang dugang panalanginan ang katawhan diha sa iyang gisaad nga bag-ong sistema.

6. Unsay gitagna sa ikaupat nga tagna nga naghisgot sa “bag-ong mga langit ug usa ka bag-ong yuta”?

⁶ Ato karong susihon ang kataposang higayon nga makita ang mga pulong “bag-ong mga langit ug usa ka bag-ong yuta,” diha sa Isaias 66:22-24: “‘Kay ingon nga ang bag-ong mga langit ug ang bag-ong yuta nga akong ginahimo magpabilin sa akong atubangan,’ nagaingon si Jehova, ‘maingon man ang inyong kaliwatan ug ang inyong ngalan magpabiling magbarog. Ug mahitabo gayod nga gikan sa bag-ong pagsubang sa bulan ngadto sa laing bag-ong pagsubang sa bulan ug gikan sa adlawng igpapahulay ngadto sa laing adlawng igpapahulay ang tanang unod manganhi aron sa pagyukbo sa akong atubangan,’ nag-ingon si Jehova. ‘Ug sila gayod manggula ug motan-aw sa mga patayng lawas sa mga tawo nga naghimo ug kalapasan batok kanako; kay ang mga ulod sa ibabaw nila dili mamatay ni mapalong ang ilang kalayo, ug sila mahimong dulumtanan sa tanang unod.’”

7. Nganong makahinapos kita nga ang Isaias 66:22-24 dunay katumanan sa umaabot nga mga adlaw?

⁷ Kining tagnaa natuman diha sa mga Hudiyo nga mipuyo ug balik sa ilang yuta, apan adunay laing katumanan niini. Kana matuman sa halayo pang panahon sa umaabot human isulat ang ikaduhang sulat ni Pedro ug ang basahon sa Pinadayag, kay kini nagtumong sa umaabot nga ‘bag-ong langit ug yuta.’ Kita makalaom nianang dako ug bug-os nga katumanan diha sa bag-ong sistema. Palandonga ang pipila ka kahimtang nga atong malaomang tagamtamon.

8, 9. (a) Sa unsang diwa nga ang katawhan Diyos “magpadayon sa pagbarog”? (b) Unsay kahulogan sa tagna nga ang mga alagad ni Jehova magasimba “gikan sa bag-ong pagsubang sa bulan ngadto sa laing bag-ong pagsubang sa bulan ug gikan sa adlawng igpapahulay ngadto sa laing adlawng igpapahulay”?

⁸ Ang Pinadayag 21:4 nagpaila nga ang kamatayon mawala na. Ang teksto sa Isaias kapitulo 66 nahiuyon niana. Atong makita diha sa Isa 66 bersikulo 22 nga si Jehova nahibalo nga ang bag-ong mga langit ug ang bag-ong yuta dili temporaryo, nga limitado ug gidugayon. Dugang pa, ang iyang katawhan magpabilin; sila “magpadayon sa pagbarog” sa iyang atubangan. Ang nahimo na sa Diyos alang sa iyang piniling katawhan naghatag kanato ug katarongan sa pagsalig. Ang matuod nga mga Kristohanon nakaagom ug mapintas nga paglutos, bisan panatikong mga paningkamot sa pagpuo kanila. (Juan 16:2; Buhat 8:1) Apan, bisan ang gamhanan  kaayong mga kaaway sa katawhan sa Diyos, sama sa Romanong Emperador Nero ug ni Adolf Hitler, wala gayod makapuo sa mga maunongon sa Diyos, nga nagdala sa iyang ngalan. Gibantayan ni Jehova ang kongregasyon sa iyang mga pinili, ug kita makatino nga siya makahimo sa pagpabarog niini hangtod sa hangtod.

⁹ Sa susama, ang mga matinumanon sa Diyos ingong bahin sa bag-ong yuta, ang kapunongan sa matuod nga mga magsisimba diha sa bag-ong kalibotan, magpadayon sa pagbarog sa tinagsa-tagsa tungod kay sila maghatag ug putli nga pagsimba sa Maglalalang sa tanang butang. Kanang maong pagsimba dili himoon kon makalugar lamang o sa tinaphaw. Ang Balaod sa Diyos, nga gihatag sa Israel pinaagi ni Moises, nagkinahanglan ug pipila ka mga buhat sa pagsimba matag bulan, nga gitiman-an sa bag-ong pagsubang sa bulan, ug matag semana, nga gitiman-an sa adlawng Igpapahulay. (Levitico 24:5-9; Numeros 10:10; 28:9, 10; 2 Cronicas 2:4) Busa ang Isaias 66:23 nagtumong sa regular, mapinadayonong pagsimba sa matuod nga Diyos, semana-semana ug bulan-bulan. Ang ateyismo ug ang relihiyosong pagkasalingkapaw mawala na unya. “Ang tanang unod manganhi aron sa pagyukbo sa atubangan” ni Jehova.

10. Nganong makasalig ka nga ang bag-ong kalibotan dili sa dayon pagadaoton sa mga daotan?

¹⁰ Ang Isaias 66:24 nagpasalig kanato nga ang pakigdait ug pagkamatarong sa bag-ong yuta dili gayod mameligro. Dili na makahimog kadaot niini ang mga tawong daotan. Hinumdomi nga ang 2 Pedro 3:7 nag-ingon nga ang anaa sa atong unahan mao “ang adlaw sa paghukom ug sa kalaglagan sa mga tawong dili-diyosnon.” Ang mga tawong malaglag mao ang mga dili-diyosnon. Walay kadaot ang modangat sa mga tawong inosente, dili sama nianang kasagarang mahitabo diha sa tawhanong mga gubat, diin mas daghang sibilyan ang mangamatay kay sa mga sundalo. Ang Dakong Maghuhukom nagpasalig kanato nga ang iyang adlaw maoy adlaw unya sa kalaglagan sa mga dili-diyosnon.

11. Unsay gipakita ni Isaias nga mahimong umaabot ni bisan kinsa nga moalsa batok sa Diyos ug sa iyang pagsimba?

¹¹ Ang maluwas nga mga matarong makakita nga tinuod ang matagnaong pulong sa Diyos. Ang Isa 66 bersikulo 24 nagtagna nga “ang mga patay nga lawas sa mga tawo nga nakasala batok” kang Jehova mao unyay pamatuod sa iyang paghukom. Ang detalyado kaayong mga pulong nga gigamit ni Isaias medyo makalilisang. Apan, kini nahiuyon sa hitabo sa kasaysayan. Sa gawas sa mga paril sa karaang Jerusalem makita ang labayanan sa basura ug, usahay, sa mga patayng lawas sa gipatayng mga kriminal nga gihukmang dili angayan sa desenteng paglubong. a Didto ang mga ulod ug kalayo nga nagdilaab sa ngadtongadto mout-ot sa basura ug sa patayng mga lawas. Dayag, gigamit ni Isaias kanang maong talan-awon aron ihulagway ang  kabug-osan sa paghukom ni Jehova sa mga malapason.

Kon Unsay Iyang Gisaad

12. Unsang dugang mga timaan ang gihatag ni Isaias bahin sa kinabuhi diha sa bag-ong kalibotan?

¹² Ang Pinadayag 21:4 nag-asoy kanato ug pipila ka butang nga dili na unya maglungtad diha sa umaabot nga bag-ong sistema. Apan, unsa unyay maglungtad? Sama sa unsa unya ang kinabuhi? Makakuha ba kita ug kasaligang mga giya? Oo. Ang Isaias kapitulo 65 matagnaong nagbatbat sa mga kahimtang nga atong matagamtam kon maangkon nato ang pag-uyon ni Jehova nga mabuhi sa dihang siya, sa hingpit nga diwa, maglalang niining bag-ong mga langit ug bag-ong yuta. Kadtong panalanginan ug malungtarong dapit diha sa bag-ong yuta dili na matigulang ug sa ngadtongadto mamatay. Ang Isaias 65:20 nagpasalig kanato: “Wala na unyay bata nga pipila lang ka adlaw ang kagulangon gikan sa maong dapit, ni usa ka tawong tigulang nga dili makabug-os sa iyang mga adlaw; kay ang usa mamatay ingong bata lamang, bisan tuod usa ka gatos ka tuig ang panuigon; ug kon bahin sa makasasala, bisan tuod usa ka gatos ka tuig ang panuigon siya panghimaraoton.”

13. Sa unsang paagi ang Isaias 65:20 nagpasalig kanato nga makatagamtam ang katawhan sa Diyos ug kasegurohan?

¹³ Sa dihang unang natuman kini diha sa katawhan ni Isaias, kini nagpasabot nga ang mga bata sa maong yuta luwas sa kapeligrohan. Walay mga kaaway nga manulong, sama sa gihimo kanhi sa mga Babilonyanhon, sa pagdagit bisan sa mga masuso o pagpatay sa mga lalaki nga baskog pa ang lawas. (2 Cronicas 36:17, 20) Diha sa umaabot nga bag-ong kalibotan, ang mga tawo luwas sa kapeligrohan, adunay kasegurohan, nga makapahimulos sa kinabuhi. Kon mopili ang usa ka tawo sa pagsukol sa Diyos, dili siya tugotan nga magpabiling buhi. Laglagon siya sa Diyos. Apan komosta kon ang masukolong makasasala nag-edad ug usa ka gatos ka tuig? Siya mamatay “ingong bata lamang” kon itandi sa pagbaton ug way-kataposang kinabuhi.—1 Timoteo 1:19, 20; 2 Timoteo 2:16-19.

14, 15. Sumala sa Isaias 65:21, 22, unsang magantihong mga kalihokan ang imong mapaabot?

¹⁴ Imbes isentro ang pagtagad kon sa unsang paagi ang usa nga motuyo sa pagpakasala pagalaglagon, si Isaias nagbatbat sa mga kahimtang sa kinabuhi nga maglungtad sa bag-ong kalibotan. Ilarawan ang imong kaugalingon diha sa talan-awon. Ang unang mosantop sa imong hunahuna mao ang personal nga mga butang. Gibatbat ni Isaias kana diha sa mga bersikulo 21 ug 22: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang kaugalingong mga kamot.”

¹⁵ Kon wala kay kasinatian sa pagpanukod o wala gayod makasulay sa pagpananom, ang tagna ni Isaias nagpasabot nga usa ka edukasyon ang naghulat kanimo. Apan, andam ka bang motuon uban sa tabang sa eksperyensiyadong mga magtutudlo, tingali buotang mga silingan nga malipayng motabang kanimo? Si Isaias wala mag-ingon nga ang imong balay tingali aduna unyay dagkong walay-bildo nga mga bentana nga dunay mga salimbong, aron makapahayahay ka sa tropikanhong mga hoyuhoy, o dunay siradong  mga bentanang bildo nga diha niana imong makita ang nag-usab-usab nga mga klima. Ang disenyo ba unya sa imong balay may pinahirig nga atop aron modailos ang ulan ug niyebe? O ang lokal nga klima ba magkinahanglan ug lapad nga atop—sama nianang sa Tungang Sidlakan—usa ka atop diin magkatapok kamo sa imong pamilya alang sa makalingaw nga mga panahon sa pagpangaon ug kolokabildo?—Deuteronomio 22:8; Nehemias 8:16.

16. Nganong makalaom ka nga ang bag-ong kalibotan makatagbaw sa walay kataposan?

¹⁶ Ang mas importante kay sa pagkahibalo sa maong mga detalye mao nga ikaw makabaton ug imong kaugalingong balay. Imo gayod kana—dili sama karon nga tingali maghago ka sa pagtukod apan laing tawo ang makapahimulos. Ang Isaias 65:21 nag-ingon usab nga ikaw magtanom ug magkaon sa mga bunga. Tin-aw, kana nagsumaryo sa katibuk-ang kahimtang. Makabaton kag dako kaayong katagbawan gikan sa imong mga paningkamot, ang mga bunga sa imong kaugalingong mga paghago. Mahimo nimo kana nga may taas nga kinabuhi—‘sama sa mga adlaw sa usa ka kahoy.’ Kana motakdo gayod sa kahubitang “tanang butang bag-o”!—Salmo 92:12-14.

17. Unsang saad ang makapadasig gayod sa mga ginikanan?

¹⁷ Kon ikaw usa ka ginikanan, kining mga pulonga motandog sa imong kasingkasing: “Sila dili maghago sa walay kapuslanan, ni manganak sila alang sa kagul-anan; tungod kay sila ang kaliwatan sa mga gipanalanginan ni Jehova, ug ang ilang mga kaliwatan kauban nila. Ug mahitabo gayod nga sa dili pa sila mosangpit ako motubag na; samtang sila nagasulti pa, ako mamati kanila.” (Isaias 65:23, 24) Ikaw ba nakasinati na sa kasakitan sa ‘pagpanganak alang sa kagul-anan’? Dili kinahanglang ilista pa nato ang nagkalainlaing mga problema sa mga anak nga makapaguol sa mga ginikanan ug sa uban. May kalabotan niana, kitang tanan nakapaniid ug mga ginikanan nga okupado kaayo sa ilang kaugalingong mga karera, mga kalihokan, o mga paglingawlingaw nga diyutay na lamang sila ug panahon sa ilang mga anak. Sa kasukwahi, si Jehova nagpasalig kanato nga siya mamati ug mohatag sa atong mga panginahanglan, nga nagpaabot pa gani niana.

18. Nganong ikaw makadahom nga malingaw sa mga hayop diha sa bag-ong kalibotan?

¹⁸ Kon nagpalandong ka kon unsay imong matagamtam diha sa bag-ong kalibotan, hulagwaya ang talan-awong gipahayag sa matagnaong pulong sa Diyos: “‘Ang lobo ug ang nating karnero magsalo sa pagpanibsib, ug ang leyon mokaon ug dagami sama sa torong baka; ug ang abog maoy kalan-on sa bitin. Sila dili modaot ni molaglag sa tibuok nakong balaan nga bukid,’ nag-ingon si Jehova.” (Isaias 65:25) Gisulayan sa tawhanong mga pintor ang pagdibuho niining maong talan-awon, apan kini dili lamang kay usa ka hinandurawng hulagway nga gidibuho sumala sa gusto sa pintor. Kining maong talan-awon matinuod unya. Aduna unyay pakigdait taliwala sa mga tawo ug kini tugbangan sa pakigdait  uban sa kahayopan. Daghang biologo ug mga mahigugmaog mga hayop ang naggugol sa kinamaayohang mga tuig sa ilang kinabuhi sa pagtuon bahin sa pipila ka matang sa mga hayop o sa usa lamang ka klase o kaliwat. Sa kasukwahi, hunahunaa kon unsay imong makat-onan sa dihang ang mga hayop dili na magamhan sa kahadlok sa mga tawo. Dayon imong maduol bisan ang mga langgam ug ang gagming nga mga linalang kansang pinuy-anan mao ang kakahoyan o kalasangan—oo, maniid, mokat-on, ug malingaw kanila. (Job 12:7-9) Makahimo ka niana nga hilwas, layo sa peligro gikan sa tawo o hayop. Si Jehova nag-ingon: “Sila dili modaot ni molaglag sa tibuok nakong balaan nga bukid.” Pagkadakong kausaban unya kana kay sa atong makita ug masinati karon!

19, 20. Nganong ang katawhan sa Diyos lahi kaayo gikan sa kadaghanang tawo karong adlawa?

¹⁹ Sumala sa nahisgotan na ganiha, ang mga tawo dili makatagna sa tukma bahin sa umaabot, bisan pa sa kaylap nga mga kabalaka labot sa usa ka bag-ong milenyo. Kana makapabati sa daghan ug kahigawad, kalibog, o pagkawala sa paglaom. Si Peter Emberley, direktor sa usa ka unibersidad sa Canada, misulat: “Daghang [edaran] sa kataposan nagpatugbaw ug hinungdanong mga pangutana bahin sa kinabuhi. Kinsa ba ako? Unsa ba gayod ang akong gipaningkamotan? Unsa ba ang panulondon nga akong ibilin sa sunod nga kaliwatan? Sila naningkamot sa panahon sa ilang pagkahamtong sa pagkab-ot sa kahusay ug kahulogan sa ilang mga kinabuhi.”

²⁰ Imong masabtan kon nganong mao kanay kahimtang sa daghan. Sila tingali maningkamot sa pagpahimulos sa kinabuhi pinaagi sa mga pasatiempo o makapaukyab nga mga matang sa kalingawan. Bisan pa niana, sila wala mahibalo kon unsay anaa sa umaabot, busa ang kinabuhi maorag walay bili, kahusay, o tinuod nga kahulogan. Karon itandi kana uban sa imong panglantaw sa kinabuhi, sumala sa ato nang nahisgotan. Nahibalo ka nga diha sa gisaad ni Jehova nga bag-ong mga langit ug bag-ong yuta, kita makatan-aw sa palibot ug makaingon sa kinasingkasing, ‘Tinuod gayod nga gibag-o sa Diyos ang tanang butang!’ Malipay gayod unya kita niana!

21. Unsang kasamahan ang atong makita diha sa Isaias 65:25 ug Isaias 11:9?

²¹ Dili pagpangandak ang paghanduraw nga kita magkinabuhi diha sa bag-ong kalibotan. Kita iyang gidapit, giawhag pa gani, sa pagsimba kaniya sa kamatuoran karon ug mahimong takos alang sa kinabuhi sa dihang ‘sila dili na modaot ni molaglag sa tibuok niyang balaan nga bukid.’ (Isaias 65:25) Apan, nakamatikod ka ba nga si Isaias nakapahayag na ug samang kabatbatan ug nga iyang gilakip ang usa ka butang nga hinungdanon sa atong tinuod nga pagtagamtam sa bag-ong kalibotan? Ang Isaias 11:9 nag-ingon: “Dili nila pagadaoton ni pagagub-on ang tibuok nakong balaan nga bukid; tungod kay ang yuta mapuno sa kahibalo ni Jehova ingon sa tubig nga nagatabon sa kadagatan.”

22. Ang atong paghisgot sa upat ka tagna sa Bibliya angay magpalig-on sa atong determinasyon sa paghimog unsa?

²² Ang “kahibalo ni Jehova.” Sa dihang bag-ohon sa Diyos ang tanang butang, ang mga molupyo sa yuta makabaton ug tukmang kahibalo bahin kaniya ug sa iyang kabubut-on. Kana naglangkit ug labaw pa kay sa pagtuon sa kalalangan sa hayop. Ang iyang dinasig nga Pulong nalangkit. Pananglitan, palandonga kon unsa ka daghan ang atong nahibaloan gikan sa pagsusi sa upat lamang ka tagna nga naghisgot sa “bag-ong mga langit ug usa ka bag-ong yuta.” (Isaias 65:17; 66:22; 2 Pedro 3:13; Pinadayag 21:1) Duna kay maayong katarongan sa pagbasa sa Bibliya sa adlaw-adlaw. Usa ba kana ka bahin sa imong rutina? Kon dili, unsang mga pagpaangay ang imong mahimo aron nga sa matag adlaw imong mabasa ang pipila sa gipamulong sa Diyos? Imong makita nga gawas sa pagpaabot sa pagtagamtam sa bag-ong kalibotan, ikaw makadawat ug dugang kalipay karon mismo, sama sa salmista.—Salmo 1:1, 2.

[Footnote]

Unsaon Nimo Pagtubag?

• Nganong makahinapos kita nga ang Isaias 66:22-24 nagtagna nianang anaa pa sa unahan?

• Unsa ilabina ang imong ginapaabot diha sa mga butang nga gihisgotan sa mga tagna sa Isaias 66:22-24 ug Isaias 65:20-25?

• Unsay imong mga katarongan sa pagkamasaligon bahin sa imong umaabot?

[Mga pangutana]

[Mga hulagway sa panid 15]

Si Isaias, Pedro, ug Juan nagtagna sa mga bahin sa “bag-ong mga langit ug usa ka bag-ong yuta”