Ginarekomendar Mo ba ang Imong Kaugalingon sa Uban?

‘Bahala na kon unsay hunahunaon sa ubang mga tawo!’ Sa panahon sa kasuko o kahigawad, tingali maisogon kang misulti niini. Apan sa dihang mohupas na ang kaisog, lagmit mabalaka ka na kaayo. Ngano man? Tungod kay kadaghanan kanato sa pagkatinuod nabalaka kon unsay hunahuna sa uban bahin kanato.

SA PAGKATINUOD, kinahanglang mabalaka kita sa bation sa uban. Ilabina kitang mga Kristohanon, nga ordinadong mga ministro ni Jehova nga Diyos, dunay angayan nga kahangawa kon unsay panglantaw sa uban kanato. Kon buot hunahunaon, kita “talan-awon sa teatro alang sa kalibotan.” (1 Corinto 4:9) Sa 2 Corinto 6:3, 4, makaplagan nato ang maayong tambag ni apostol Pablo: “Wala gayod kami magahatag ug unsa mang hinungdan sa pagkapandol, aron nga ang among ministeryo dili kakit-an ug sayop; apan sa tanang paagi among ginarekomendar ang among kaugalingon ingong mga ministro sa Diyos.”

Apan, unsay ipasabot sa pagrekomendar sa atong kaugalingon sa uban? Nagpasabot ba kini nga atong ipasiugda ang atong kaugalingon o magpamatikod sa dili-angayng paagi sa atong kaugalingon ug sa atong mga katakos? Wala. Apan nagkinahanglan kini ug pagpadapat sa mga pulong sa 1 Pedro 2:12: “Padayong-hupti ang inyong panggawi nga maayo taliwala sa mga nasod, aron nga . . . sila ingong resulta sa inyong maayong mga buhat nga niini sila mga saksing-nakakita magahimaya sa Diyos.” Ang mga Kristohanon magrekomendar sa ilang kaugalingon pinaagi sa pagtugot sa ilang panggawi nga maoy mosulti! Sa kataposan, kini magdayeg, dili kanato, kondili sa Diyos. Bisan pa niana, ang atong pagrekomendar sa atong kaugalingon sa uban mahimong duna usab ing personal nga mga kaayohan. Susihon nato ang tulo ka dapit diin tinuod tingali kini kanimo.

 Ingong Umaabot nga Kapikas sa Kaminyoon

Tagda, pananglitan, ang bahin sa kaminyoon. Usa kini ka gasa gikan kang Jehova nga Diyos, ang usa “kang kinsa utang sa tanang kabanayan sa langit ug sa yuta ang ngalan niini.” (Efeso 3:15) Tingali tinguha nimo nga maminyo sa umaabot. Kon mao, sa unsang gilapdon nga ginarekomendar nimo ang imong kaugalingon ingong umaabot nga kapikas sa kaminyoon? Oo, unsay imong dungog ingong ulitawo o dalaga nga Kristohanon?

Sa ubang kayutaan gikabalak-an kini pag-ayo sa mga pamilya. Sa Ghana, pananglitan, sa dihang ang duha ka tawo gustong magminyo, naandan na alang sa kaslonon nga magpahibalo sa ilang mga ginikanan. Sila, sa baylo, magpahibalo sa ubang mga membro sa pamilya. Dayon ang pamilya sa lalaki magsugod sa pagtino sa dungog sa babaye diha sa silinganan. Sa dihang ang mga ginikanan kombinsido na nga angayan ang maong babaye, pahibaloon nila ang pamilya sa babaye sa tuyo sa ilang anak nga lalaki nga makigminyo sa anak nga babaye. Niining tungora susihon sa pamilya sa babaye ang dungog sa lalaki una pa motugot sa kaminyoon. Usa ka panultihon sa Ghana nag-ingon, “Pagpakisayod kanilang nakaila sa imong minyoan una makigminyo.”

Komosta sa kayutaan sa Kasadpan, diin ang mga tawo sa katibuk-an gitugotan nga mamili sa ilang kaugalingong mga kapikas sa kaminyoon? Bisan didto, ang usa ka hamtong nga Kristohanong lalaki o babaye maalamong mangayog madayganong rekomendasyon gikan niadtong nakaila pag-ayo sa ilang minyoan, sama sa mga ginikanan o hamtong nga mga higala. Sumala sa librong Ang Sekreto sa Kalipay sa Pamilya, ang usa ka dalaga mahimong mangutana: “‘Unsang matang sa dungog ang nabatonan niining tawhana? Kinsay iyang mga higala? Nagpakita ba siya ug pagpugong-sa-kaugalingon? Sa unsang paagi niya gitratar ang edarang mga tawo? Unsang matang sa pamilya ang iyang gigikanan? Sa unsang paagi siya nakiglabot kanila? Unsay iyang tinamdan bahin sa salapi? Naghinobra ba siya sa alkoholikong mga ilimnon? Pungtanon ba siya, nga mapintason pa? Unsang mga responsibilidad sa kongregasyon ang iyang nabatonan, ug sa unsang paagi niya kini ginadumala? Mahimo ba nako siyang tahoron ug halalom?’—Levitico 19:32; Proverbio 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.” a

Ang usa ka lalaki sa susama buot tingaling magpakisayod bahin sa Kristohanong babaye nga iyang gihunahunang minyoan. Sumala sa Bibliya, si Boaz naikag pag-ayo kang Ruth, ang babaye nga iyang giminyoan sa ulahi. Sa dihang nangutana si Ruth: “Nganong nakapahimuot ako sa imong mga mata nga ako gitagad, sanglit ako usa ka dumuloong lamang?” Si Boaz miingon: “Gikataho kanako ang tanan nga imong nabuhat.” (Ruth 2:10-12) Oo, dili lamang kay namatikdan ni Boaz nga si Ruth maunongon, dedikado, ug kugihan nga babaye kondili nakadungog usab siyag maayong mga komento gikan sa uban.

Sa susama, ang imong panggawi dunay kalabotan sa kon unsay hunahunaon sa uban kanimo ingong angayang kapikas sa kaminyoon. Sa unsang paagi ba gayod ginarekomendar nimo ang imong kaugalingon sa uban niining bahina?

Ingong Empleyado

Ang trabahoan maoy laing dapit diin ang pagmentinar sa maayong panggawi mosangpot sa imong kaayohan. Grabe tingali ang pag-indigay sa mga trabaho. Ang mga empleyado nga nailhan nga dili-magpasakop, kanunayng maulahi, ug dili-matinud-anon  kasagarang paphaon. Ang mga kompaniya mahimong magtaktak usab sa eksperyensiyadong mga empleyado aron makamenos sa gasto. Sa dihang ang walay-trabahong mga tawo mangitag bag-ong mga trabaho, makaplagan tingali nila nga ang mga kompaniya magsusi sa ilang kanhing mga amo aron sa pagtino sa ilang mga batasan sa pagtrabaho, tinamdan, ug kasinatian. Daghang Kristohanon ang malamposong nagrekomendar sa ilang kaugalingon sa ilang mga amo pinaagi sa ilang matinahurong panggawi, makasaranganong pamesti, maayong pamatasan, ug talagsaong Kristohanong mga hiyas.

Ang pagkamatinud-anon maoy ingon niana nga hiyas—usa nga gihatagag dakong prioridad sa daghang amo. Sama ni apostol Pablo, buot natong “managgawi mismo nga matinud-anon sa tanang butang.” (Hebreohanon 13:18) Sa usa ka minahan sa Ghana, gikataho ang pagpangawkaw. Ang superbisor sa treatment plant, nga usa ka Saksi, wala taktaka sa trabaho samtang ang uban gipapha. Ngano man? Naobserbahan sa tagdumala ang iyang pagkamatinud-anon latas sa katuigan. Ang iyang pagkugi ug pagtahod sa awtoridad ilado usab kaayo. Oo, nahuptan niya ang trabaho tungod sa iyang matul-id nga panggawi!

Unsa ang ubang mga butang nga mahimo sa usa ka Kristohanon aron irekomendar ang iyang kaugalingon diha sa trabahoan? Magmahanas sa bisan unsang trabaho nga gihatag kanimo. (Proverbio 22:29) Trabaho nga makugihon ug matanlagon. (Proverbio 10:4; 13:4) Tahora ang imong amo ug superbisor sa trabaho. (Efeso 6:5) Ang pag-abot nga untop sa panahon, pagkamatinud-anon, pagkaepisyente, ug makugihong pagtrabaho maoy mga hiyas nga gitamod sa mga amo, ug kanang mga hiyasa makatabang kanimo sa pagpangempleyo bisan pag nihit ang trabaho.

Mga Pribilehiyo sa Kongregasyon

Karon labi na kay sukad masukad, ang hamtong nga mga lalaki gikinahanglan aron manguna sa Kristohanong kongregasyon. Ang hinungdan? Si Isaias nagtagna: “Padakoa ang dapit sa imong tolda. Ug ipabuklad kanila ang mga tabil sa imong dakong tabernakulo.” (Isaias 54:2) Ingong katumanan niining tagnaa, ang tibuok-kalibotang kongregasyon ni Jehova padayong nag-uswag.

Busa kon ikaw usa ka Kristohanong lalaki, sa unsang paagi ikarekomendar nimo ang imong kaugalingon ingong usa ka tawo nga kuwalipikadong mag-alagad sa usa ka tinudlong katungdanan? Tagda ang panig-ingnan sa usa ka batan-ong lalaki nga si Timoteo. Si Lucas nagtaho nga si Timoteo “gikatahong maayo sa mga igsoon sa Listra ug Iconio.” Oo, pinaagi sa iyang maayong panggawi, kining batan-ong lalaki nagrekomendar sa iyang kaugalingon sa uban diha sa duha ka lainlaing mga siyudad. Busa gidapit ni Pablo si Timoteo nga mouban kaniya sa nagapanawng ministeryo.—Buhat 16:1-4.

Sa unsang paagi ang usa ka tawo karon ‘mokab-ot sa katungdanan sa pagkamagtatan-aw’ sa angayan, diyosnong paagi? Tino dili pinaagi sa pagpangampanya alang sa usa ka katungdanan kondili sa pag-ugmad sa espirituwal nga mga hiyas nga gikinahanglan sa maong mga responsibilidad. (1 Timoteo 3:1-10, 12, 13; Tito 1:5-9) Ikapakita usab niya nga siya “matinguhaon sa usa ka maayong buhat” pinaagi sa bug-os nga pagpakigbahin sa pagsangyaw ug paghimog-tinun-an nga buluhaton. (Mateo 24:14; 28:19, 20) Kadtong nagrekomendar sa ilang kaugalingon ingong responsableng Kristohanong mga lalaki adunay sinserong kaikag sa kaayohan sa ilang espirituwal nga mga igsoon. Sundon nila ang tambag ni apostol Pablo: “Pagpaambit ngadto sa mga balaan sumala sa ilang mga panginahanglan. Sunda ang dalan sa pagkamaabiabihon.” (Roma 12:13) Pinaagi sa pagbuhat sa maong mga butang, ang usa ka Kristohanong lalaki tinuod nga ‘makarekomendar sa iyang kaugalingon ingong ministro sa Diyos.’

Sa Tanang Panahon

Ang pagrekomendar sa atong kaugalingon sa uban wala magpasabot ug pagpakaaron-ingnon o mahimong “tigpahimuot ug mga tawo.” (Efeso 6:6) Sa kataposan, nagkahulogan kinig pagrekomendar sa atong kaugalingon sa atong Maglalalang, si Jehova nga Diyos, pinaagi sa matanlagong pagsunod sa iyang mga balaod ug mga prinsipyo. Kon maugmad nimo ang imong espirituwalidad ug mapalig-on ang imong relasyon uban kang Jehova nga Diyos, ang uban makamatikod ug pag-uswag sa paagi nga ikaw makiglabot sa imong mga membro sa pamilya, mga kauban sa trabaho, ug mga isigka-Kristohanon. Maobserbahan usab nila ang imong kalig-on ug pagkatimbang, imong maayong panghukom, imong katakos sa pagdumala sa mga responsibilidad, ug imong pagpaubos. Maangkon nimo ang ilang gugma ug pagtahod ug, labawng hinungdanon, maangkon nimo ang pag-uyon ni Jehova nga Diyos tungod kay imong girekomendar ang imong kaugalingon sa uban!

[Footnote]

[Hulagway sa panid 19]

Daghang ginikanan maalamong nangutana bahin sa dungog sa usa ka tawo nga gustong minyoan sa ilang anak nga lalaki o babaye

[Hulagway sa panid 20]

Ang usa ka igsoong lalaki makarekomendar sa iyang kaugalingon alang sa mga pribilehiyo sa pag-alagad pinaagi sa pagkamahunahunaon sa uban