Mahupayan sa Kusog ni Jehova

“Sa dihang ang akong makapatugaw nga mga hunahuna modaghan sa sulod nako, ang imong mga paglipay naghapohap sa akong kalag.”—SALMO 94:19.

 SA TANANG nangandoy ug kahumpayan, ang Bibliya dunay makapahupayng mga pulong. Nan, dili ikatingala nga ang The World Book Encyclopedia nag-ingon nga “daghang tawo ang midangop sa Bibliya alang sa kahupayan, paglaom, ug giya sa mga panahon sa kasamok ug kawalay-kasegurohan.” Ngano man?

Tungod kay ang Bibliya giinspirar sa atong mahigugmaong Maglalalang, “ang Diyos sa tanang paghupay,” ang Usa ‘kinsa nagahupay kanato sa tanan natong kasakitan.’ (2 Corinto 1:3, 4) Siya mao ‘ang Diyos nga nagahatag ug paghupay.’ (Roma 15:5) Si Jehova naghatag ug panig-ingnan sa pagtaganag paagi sa paghupay kanatong tanan. Gipadala niya ang iyang bugtong Anak, si Kristo Jesus, sa yuta aron hatagan kita ug paglaom ug kalipay. Si Jesus nagtudlo: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” (Juan 3:16) Ang Bibliya naghubit kang Jehova ingong usa “kinsa sa matag adlaw nagapas-an sa atong palas-anon, ang matuod nga Diyos sa atong kaluwasan.” (Salmo 68:19) Ang mahinadlokon-sa-Diyos nga mga tawo masaligong makaingon: “Kanunay kong gibutang sa atubangan ko si Jehova. Tungod kay ania siya sa akong tuong kamot, ako dili matarog.”—Salmo 16:8.

Ang maong mga teksto sa Bibliya nagpakita sa lalom nga gugma ni Jehova nga Diyos alang kanatong mga tawo. Nahimong tin-aw nga siya adunay kinasingkasing nga tinguha—maingon man katakos—sa pagtagana ug dagayang paghupay ug pagpagaan sa atong kasakit sa mga panahon sa kalisdanan. “Siya nagahatag ug gahom niadtong naluya; ug sa usa nga walay dinamikong kabaskog nagadugang siya ug kusog.” (Isaias 40:29) Nan, sa unsang paagi kita mahupayan sa kusog ni Jehova?

Ang Makapahupayng Epekto sa Kahangawa ni Jehova

Ang salmista misulat: “Itugyan ang imong palas-anon kang Jehova, ug siya magasapnay kanimo. Dili gayod niya tugotan ang matarong nga matarog.” (Salmo 55:22) Oo, si Jehova nga Diyos dunay kaikag sa tawhanong pamilya. Si apostol Pedro nagpasalig sa unang-siglong mga Kristohanon: “Siya [Diyos] aduna may kahangawa kaninyo.” (1 Pedro 5:7) Gipasiugda ni Jesu-Kristo ang pagpabili sa Diyos sa mga tawo pinaagi sa pag-ingon: “Ang lima ka goryon ginabaligya sa duha ka sensilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. Apan bisan ang mga buhok sa inyong mga ulo naihap ang tanan. Ayawg kahadlok; kamo labaw pa ug bili kay sa daghang goryon.” (Lucas 12:6, 7) Bililhon gayod kita sa Diyos nga namatikdan niya bisan ang kinagamyang detalye bahin kanato. Nahibalo siya sa mga butang nga kita mismo wala mahibalo tungod kay siya naikag pag-ayo sa matag usa kanato.

Ang pagkaamgo niining personal nga kaikag ni Jehova nakahupay gayod kang Svetlana, ang batan-ong pampam nga gihisgotan sa miaging artikulo. Maghikog na unta siya sa dihang nahimamat niya ang mga Saksi ni Jehova. Dayon miuyon siya nga magtuon sa Bibliya, nga mitabang kaniya nga masinati kang Jehova ingong tinuod nga persona kinsa interesado sa iyang kaayohan. Nakatandog kini sa iyang kasingkasing, nga nagpalihok kaniya sa pag-usab sa iyang paagi sa pagkinabuhi ug pagpahinungod sa iyang kaugalingon ngadto sa Diyos. Naghatag usab kini kang Svetlana sa gikinahanglang sukod sa pagtamod-sa-kaugalingon nga iyang gikinahanglan sa pagpadayon bisan pa sa iyang mga suliran ug sa pagbaton ug positibong panglantaw sa kinabuhi. “Kombinsido ako,” siya miingon karon, “nga si Jehova dili gayod mobiya kanako. Akong nakaplagan nga tinuod ang gisulat sa 1 Pedro 5:7. Kini nag-ingon: ‘Itugyan [kang Jehova] ang tanan ninyong mga kabalaka, kay siya aduna may kahangawa kaninyo.’”

Pinasukad-sa-Bibliya nga Paglaom Makahupay

Usa ka linaing paagi nga ang Diyos nagtagana ug paghupay maoy pinaagi sa iyang sinulat nga Pulong, nga adunay kahibulongang paglaom alang sa umaabot. Si apostol Pablo misulat: “Ang tanang butang nga gisulat kanhi gisulat alang sa atong instruksiyon, aron nga pinaagi sa atong pag-agwanta ug pinaagi sa paghupay gikan sa mga Kasulatan kita makabatog paglaom.” (Roma 15:4) Gipatin-aw ni Pablo ang kalabotan sa matuod nga paglaom ug kahupayan sa dihang misulat siya: “Hinaot . . . ang Diyos nga atong Amahan, kinsa nahigugma kanato ug naghatag ug walay-kataposang paghupay ug maayong paglaom pinaagi sa dili-takos nga kalulot, magahupay sa inyong mga kasingkasing ug magpalig-on kaninyo diha sa matag maayong buhat ug pulong.” (2 Tesalonica 2:16, 17) Kining “maayong paglaom” naglakip sa kalaoman sa hingpit, malipayon, ug walay-kataposang kinabuhi sa paraiso sa yuta.—2 Pedro 3:13.

Ang maong segurado ug masanag nga paglaom nagdasig  kang Laimonis, ang alkoholikong paralitiko nga gihisgotan sa miaging artikulo. Sa pagbasa sa pinasukad-sa-Bibliya nga basahon sa mga Saksi ni Jehova, nagmaya siya sa pagkahibalo bahin sa bag-ong kalibotan ilalom sa Gingharian sa Diyos, diin ang iyang panglawas bug-os nga mapasig-uli. Sa Bibliya, iyang nabasa ang mosunod nga maanindot nga saad sa milagrosong pagpang-ayo: “Nianang panahona ang mga mata sa mga buta makakita, ug ang igdulungog sa mga bungol makadungog. Nianang panahona ang piang mokatkat sama sa lagsaw, ug ang dila sa amang mosinggit sa kalipay.” (Isaias 35:5, 6) Aron mahimong kuwalipikado alang sa kinabuhi sa maong Paraiso, si Laimonis mihimog dakong kausaban. Mihunong siya sa paghuboghubog, ug ang iyang kausaban namatikdan sa iyang mga silingan ug mga kaila. Karon nagdumala siya ug daghang pagtuon sa Bibliya, nga nakig-ambit sa uban sa paghupay nga ihatag sa pinasukad-sa-Bibliya nga paglaom.

Ang Papel sa Pag-ampo

Sa dihang naguol kita tungod sa usa ka hinungdan, mahupayan kita pinaagi sa pag-ampo kang Jehova. Makakuha kana sa atong palas-anon. Sa atong mga pangamuyo, mahupayan tingali kita sa paghinumdom sa mga butang nga giingon sa Pulong sa Diyos. Ang kinatas-ang salmo sa Bibliya nahisama sa usa ka maanindot nga pag-ampo. Ang tigkomposo niini miawit: “Akong gihinumdoman ang imong hudisyal nga mga hukom sukad sa panahong walay tino, Oh Jehova, ug nakakaplag akog kahupayan.” (Salmo 119:52) Sa hilabihan ka lisod nga mga kahimtang, ilabina kanang naglangkit sa mga suliran sa panglawas, sagad walay bugtong malangkobong tubag. Sa atong kaugalingong kusog, dili tingali kita mahibalo sa tukma kon asa modangop. Daghan ang nakakaplag nga sa dihang ang tanang maarangan nahimo na sa tawo, ang pagdangop sa Diyos diha sa pag-ampo misangpot sa dakong kahupayan ug, usahay, sa wa-damhang mga solusyon.—1 Corinto 10:13.

Si Pat, kinsa gidali pagdala ngadto sa emergency room sa ospital, nakasinati niining makapahupayng epekto sa pag-ampo. Human siya maulii, siya miingon: “Nag-ampo ako kang Jehova ug nakakat-on gayod nga kinahanglang itugyan ko ang akong kinabuhi sa iyang mga kamot, nga mosalig kaniya sa pagbuhat kon unsay iyang kabubut-on. Niining panahona, kalmado ako; nasinati nako ang kalinaw sa Diyos nga gihisgotan sa Filipos 4:6, 7.” Pagkamakapahupay niining mga bersikuloha! Didto si Pablo nagtambag kanato: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”

Ang Balaang Espiritu Ingong Maghuhupay

Sa gabii una siya mamatay, gipatin-aw ni Jesus sa iyang mga apostol nga sa dili madugay mobiya siya kanila. Kini nakapahasol ug nakapaguol kanila. (Juan 13:33, 36; 14:27-31) Nakaamgo sa ilang panginahanglan sa padayong paghupay, si Jesus misaad: “Pagahangyoon ko ang Amahan ug siya mohatag kaninyo ug laing magtatabang [o, maghuhupay] nga mahiuban kaninyo hangtod sa hangtod.” (Juan 14:16; potnot) Gitumong ni Jesus dinhi ang balaang espiritu sa Diyos. Lakip sa ubang mga butang, ang espiritu sa Diyos naghupay sa mga apostol panahon sa ilang kalisdanan ug nagpalig-on kanila sa pagpadayon sa pagbuhat sa kabubut-on sa Diyos.—Buhat 4:31.

Si Angie, kansang bana nag-ungaw sa kamatayon human sa grabeng aksidente, malamposong nakasagubang sa tanang kagul-anan ug kasakit sa iyang kahimtang. Unsay nakatabang kaniya? Matod niya: “Kon walay pagpaluyo sa balaang espiritu ni Jehova, dili unta namo malabang ang among naagoman ug magpabiling lig-on. Ang kusog ni Jehova sa pagkatinuod napadayag pinaagi sa atong mga kaluyahon, ug napamatud-an siyang usa ka kuta sa panahon sa atong kagul-anan.”

Makapahupayng Panag-igsoonay

Bisan unsay kahimtang sa kinabuhi sa usa ka tawo, bisan unsang masakit nga mga kasinatian ang motungha, kinahanglang makakaplag siya ug kahupayan sa panag-igsoonay nga naglungtad sulod sa kongregasyon ni Jehova. Kini nga panag-igsoonay magtaganag espirituwal nga pagpaluyo ug pag-abag niadtong nakig-uban niini. Niana, ang usa makakaplag ug grupo sa mahigugmaon, mabalak-on, ug makapahupay nga mga higala, kinsa andam ug kinabubut-on nga  motabang ug maghupay sa uban sa mga panahon sa kalisdanan.—2 Corinto 7:5-7.

Ang mga membro sa Kristohanong kongregasyon gitudloan nga ‘buhaton ang maayo ngadto sa tanan, apan ilabina kanilang iglabot [nila] sa pagtuo.’ (Galacia 6:10) Ang pinasukad-sa-Bibliya nga edukasyon nga ilang nadawat nagtukmod kanila sa pagpasundayag ug inigsoong gugma ug malumong pagbati sa usag usa. (Roma 12:10; 1 Pedro 3:8) Ang espirituwal nga mga igsoong lalaki ug babaye sa kongregasyon gitukmod nga magmaluloton, mahupayon, ug mabination kaayo.—Efeso 4:32.

Si Joe ug Rebecca, kinsa namatyan sa ilang anak nga lalaki, nakasinati sa maong makapahupayng pagpaluyo gikan sa mga membro sa Kristohanong kongregasyon. Matod nila: “Si Jehova ug ang iyang mahigugmaong kongregasyon nakatabang kanamo latas sa among malisod nga panahon. Gatosan ka kard, mga sulat, ug mga tawag sa telepono ang nadawat. Kini nakapaapresyar kanamo kon unsa ka bililhon ang atong panag-igsoonay. Bisan sa nakalitan pa kami sa maong trahedya, daghang lokal nga mga kongregasyon ang mitabang kanamo, nga nagtaganag pagkaon ug nanglimpiyo sa balay.”

Mahupayan!

Sa dihang ang kusog nga unos sa kalisdanan mosugod paghuros, ug ang walay-hunong nga ulan ug yelo sa kagul-anan magsigeg bundak, ang Diyos andam nga motagana ug makapahupayng panalipod. Mao kiniy paghubit kaniya sa usa sa mga salmo mahitungod sa pagtaganag makapahupayng salipdanan: “Sa iyang mga dagang ikaw tabonan niya, ug ilalom sa iyang mga pako ikaw mopasilong.” (Salmo 91:4) Ang ilustrasyon dinhi mahimong iya sa usa ka agila. Kini usa ka hulagway sa usa ka langgam nga nakamatikod ug kapeligrohan ug dayon mapanalipdanong nagtabon sa mga pako niini ibabaw sa iyang mga kuyabog. Sa mas dako pa gani nga diwa, si Jehova mahimong tinuod nga Tigpanalipod sa tanan nga modangop kaniya.—Salmo 7:1.

Kon buot nimong makakat-on ug dugang bahin sa Diyos, sa iyang personalidad, iyang katuyoan, ug iyang katakos sa pagtaganag paghupay, gidapit ka sa pagtuon sa iyang Pulong. Ang mga Saksi ni Jehova malipay sa pagtabang kanimo nianang maong paningkamot. Oo, ikaw usab mahupayan sa kusog ni Jehova!

[Mga hulagway sa panid 7]

Ang pinasukad-sa-Bibliya nga paglaom sa umaabot makataganag paghupay