Mga Pangutana Gikan sa mga Magbabasa

Tulo sa mga Ebanghelyo nag-asoy sa reklamo bahin sa pagdihog kang Jesus ug mahalong lana. Daghang apostol ba ang mireklamo, o si Judas lamang ang pangunang mireklamo?

Atong makita kining hitaboa nga giasoy diha sa mga Ebanghelyo ni Mateo, Marcos, ug Juan. Mopatim-aw nga si Judas nanguna sa pagreklamo, dayon duyog sa labing menos pipila ka apostol nga miuyon kaniya. Kining hitaboa nag-ilustrar kon nganong kita magmapasalamaton sa pagkabaton ug upat ka asoy sa Ebanghelyo. Ang gisulat sa matag magsusulat maoy tukma, apan dili samang mga detalye ang gitagana sa tanan. Pinaagig pagtandi sa susamang mga asoy, atong maangkon ang bug-os, mas detalyadong panglantaw sa daghang hitabo.

Ang asoy sa Mateo 26:6-13 naghatag sa dapit—ang balay ni Simon nga sanlahon, sa Betania—apan wala magngalan sa babaye nga misugod pagbubo sa pinahumot nga lana diha sa ulo ni Jesus. Si Mateo nag-ingon: “Sa pagkakita niini ang mga tinun-an naglagot” ug mireklamo nga ang lana ikabaligya unta ug ang salapi ikahatag ngadto sa mga kabos.

Ang asoy ni Marcos naglakip sa kadaghanan nianang mga detalyeha. Apan siya midugang nga iyang gibuak pag-abli ang sudlanan. Duna kiniy pinahumot nga lana nga “lunsay nga nardo,” sama tingali nianang gipalit gikan sa India. Bahin sa reklamo, si Marcos nagtaho nga “dihay pipila nga mipahayag ug kalagot,” ug “mibati sila ug dakong kasungot kaniya.” (Marcos 14:3-9) Busa ang duha ka asoy nagpakita nga kapin sa usa ka apostol ang nalangkit sa pagreklamo. Apan sa unsang paagi kini misugod?

Si Juan, kinsa maoy saksing-nakakita, midugang ug hinungdanong mga detalye. Iyang ginganlan ang babaye—si Maria, igsoon ni Marta ug Lazaro. Gitagana usab ni Juan kining detalyeha, nga mahimo natong sabton ingong nalangkit sa usag usa inay kay nagkasumpaki: “Iyang gihaplasan ang mga tiil ni Jesus ug gipahiran kini pinaagi sa iyang buhok.” Sa pagtapo sa mga asoy, atong masabtan nga gibubo gayod ni Maria ang lana, nga gipanghimatud-an ni Juan nga maoy “lunsay nga nardo,” diha sa ulo ug mga tiil ni Jesus. Si Juan suod kaayo kang Jesus ug naglagot tungod sa dili pagpabili Kaniya. Atong mabasa: “Si Judas Iskariote, usa sa iyang mga tinun-an, nga hapit nang mobudhi kaniya, miingon: ‘Ngano man nga kining pinahumot nga lana wala ibaligya sa tulo ka gatos ka denario ug ihatag sa mga tawong kabos?’”—Juan 12:2-8.

Siyempre, si Judas maoy “usa sa iyang mga tinun-an,” apan imong masabtan ang kalagot ni Juan nga adunay usa nga anaa niining posisyona ang nagplano sa pagbudhi kang Jesus. Ang maghuhubad nga si Dr. C. Howard Matheny nag-ingon bahin sa Juan 12:4: “Ang presenteng partisipyo nga ‘kay hapit na’ [o, “hapit na”] ug ang presenteng inpinitibo nga ‘mobudhiay’ [o, “hapit nang mobudhi”] parehong nagpahayag ug sunodsunod nga kaugmaran o mapinadayonong lihok. Kini nagpakita nga ang pagbudhi ni Judas kang Jesus dili usa ka kadiyot ra nga lihok nga kalit lang gibuhat tungod kay kadto gihunahuna ug giplano sulod sa daghang adlaw.” Gipasabot ug dugang ni Juan nga si Judas mireklamo “dili tungod kay siya nahingawa sa mga kabos, apan tungod kay siya usa man ka kawatan ug nagbaton sa kahon sa salapi ug nagkuhaan sa mga salapi nga gibutang niini.”

Busa mopatim-aw nga makataronganon nga ang kawatang si Judas nagpasiugda sa pagreklamo tungod kay mas daghan ang iyang makawat kon ang mahalong lana ibaligya ug ang salapi ibutang sa kahon sa salapi nga iyang gidaladala. Sa dihang gipatugbaw ni Judas kini nga reklamo, ang pipila sa ubang mga apostoles hayan nagbagulbol nga miuyon sa daw usa ka balidong punto. Bisan pa niana, si Judas mao ang pangunang tighulhog sa reklamo.