Nahinumdom Ka Ba?

Gipabilhan mo ba ang pagbasa sa di pa dugayng mga isyu sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsay nagpasayon sa pagdawat sa Pasko sa Korea?

Dihay karaang pagtuo sa Korea ug sa pipila sa ubang mga nasod bahin sa usa ka diyos sa kosina kinsa gituohan nga moabot agi sa panghaw ug magdalag mga gasa sa Disyembre. Dugang pa, human sa Gubat sa Kalibotan II, ang kasundalohan sa T.B. nag-apod-apod ug mga gasa ug mga hinabang diha sa lokal nga mga simbahan.—12/15, mga panid 4, 5.

• Sa katumanan sa Isaias 21:8, adunay unsang “magbalantay” ang Diyos sa atong panahon?

Ang dinihogan-sa-espiritu nga mga Kristohanon, nga nag-alagad ingong magbalantay nga matang, nagpaigmat sa mga tawo bahin sa kahulogan sa mga panghitabo sa kalibotan nga magtuman sa tagna sa Bibliya. Sila nagtabang usab sa mga estudyante sa Bibliya sa pag-ila ug paglikay sa dili-kasulatanhong mga doktrina ug mga tulumanon.—1/1, mga panid 8, 9.

• Kinsa ang “Polakong Sekta”?

Sila usa ka gamayng relihiyosong grupo sa ika-16 ug ika-17 nga mga siglo sa Polandia kinsa nagdasig sa pagsunod sa Bibliya ug busa nagsalikway sa iladong mga doktrina sa simbahan, sama sa Trinidad, pagbawtismo sa masuso, ug impiyernong-kalayo. Ngadtongadto, sila grabeng gilutos ug gipugos sa pagtibulaag ngadto sa ubang mga nasod.—1/1, mga panid 21-3.

• Nganong ang mga tagna sa Bibliya angayng saligan inay kay sa mga panagna sa mga futurologist o mga astrologo?

Ang mga tawong nag-angkong mga propeta napamatud-ang di-kasaligan tungod kay ilang gisalikway si Jehova ug ang Bibliya. Ang mga tagna sa Bibliya lamang ang makatabang kanimo sa pagkahibalo kon sa unsang paagi ang mga panghitabo mohaom sa katuyoan sa Diyos, nga mohatag ug malungtarong kaayohan alang kanimo ug sa imong pamilya.—1/15, panid 3.

• Unsang pipila ka han-ay sa ebidensiya ang nagpamatuod nga kita nagkinabuhi na sa kataposang mga adlaw?

Atong makita ang mga epekto sa pagpapahawa kang Satanas gikan sa langit. (Pinadayag 12:9) Kita nagkinabuhi na sa panahon sa kataposang “hari” nga gihisgotan sa Pinadayag 17:9-11. Ang gidaghanon sa tinuod nga dinihogang mga Kristohanon nagkadiyutay, hinunoa lagmit nga dunay pipila pang magpabilin sa yuta sa dihang magsugod ang dakong kasakitan.—1/15, mga panid 12, 13.

• Kanus-a gisulat ang basahon ni Habacuc, ug nganong kita mainteres niana?

Kining basahona sa Bibliya gisulat sa mga 628 W.K.P. Naundan kini sa paghukom ni Jehova batok sa karaang Juda ug batok sa Babilonya. Kini naghisgot usab sa paghukom sa Diyos nga hapit nang modangat niining presenteng daotang sistema.—2/1, panid 8.

• Asa nato makaplagi sa Bibliya ang maalamong tambag sa usa ka inahan alang sa takos nga mga asawa?

Ang kataposang kapitulo sa basahon sa Proverbio, kapitulo 31, maoy ekselenteng tinubdan nianang tambaga.—2/1, mga panid 30, 31.

• Nganong kita magmapasalamaton nga gipadayag ni Jehova kanato “ang kaisipan ni Kristo”? (1 Corinto 2:16)

Pinaagi sa rekord sa Ebanghelyo, gipaposible ni Jehova nga atong mahibaloan ang mga hunahuna, pagbati, kalihokan, ug mga butang nga giuna ni Jesus. Makatabang kini kanato nga mahimong mas pang mahisama kang Jesus, ilabina sa atong pagpabili sa nagaluwas-sa-kinabuhi nga buluhatong pagsangyaw.—2/15, panid 25.

• Ang Diyos ba nagatubag sa mga pag-ampo karong adlawa?

Oo. Bisan kon ang Bibliya nagpakita nga ang Diyos dili motubag sa tanang pag-ampo, ang modernong-adlawng mga eksperyensiya nagpamatuod nga siya sagad mosanong sa mga tawo kinsa miampo alang sa kahupayan ug tabang sa mga butang sama sa pagsulbad sa mga suliran sa kaminyoon.—3/1, mga panid 3-7.

• Unsay atong mahimo aron makakuha ug kusog gikan sa Diyos?

Kita makapangayo niana pinaagi sa pag-ampo, makakuha ug espirituwal nga kalig-on gikan sa Bibliya, ug mapalig-on pinaagi sa Kristohanong panag-ubanay.—3/1, mga panid 15, 16.

• Sa unsang paagi makatabang ang mga ginikanan sa ilang mga anak aron mas pang makapahimulos gikan sa Kristohanong mga tigom?

Sila makatabang sa ilang mga anak nga magpabiling magmata, lagmit pakatulgon usa sila sa dili pa ang tigom. Ang mga bata mahimong dasigon sa pagkuhag “mga nota,” sama sa pagsulat sa papel matag panahon nga ang pamilyar nga mga pulong o mga ngalan gigamit.—3/15, mga panid 17, 18.

• Unsa ang pipila ka butang nga atong makat-onan gikan sa panig-ingnan ni Job?

Si Job naghimo sa iyang relasyon sa Diyos nga panguna, walay pagpihig sa pagpakiglabot sa isigkatawo, naningkamot nga magmaunongon sa iyang kapikas sa kaminyoon, nagpakitag kabalaka alang sa espirituwalidad sa iyang pamilya, ug milahutay nga matinumanon ilalom sa pagsulay.—3/15, mga panid 25-7.

• Ang Bibliya naundan ba sa tinagong sistema sa mga simbolo nga maghatag ug pagsabot sa mga mensahe nga anaa sa dagway sa mga simbolo?

Wala. Ang mga pangangkon bahin sa gikaingong tinagong sistema sa mga simbolo mahimong himoon usab maylabot sa pipila ka sekular nga mga basahon. Ang gikaingong sistema sa mga simbolo diha sa Bibliya mahimong walay kahulogan tungod sa kalahian sa espeling diha sa Hebreohanong mga manuskrito.—4/1, mga panid 30, 31.