Pagpangisda ug mga Tawo Diha sa Dagat Aegean

KAY ang dakong yuta sa Gresya anaa sa amihanan ug kasadpan, ang isla sa Creta sa habagatan, ug ang Turkey sa sidlakan, ang Dagat Aegean nagsakop ug dako kaayong dapit sa sidlakang Mediteranyo. Nagkatag ang mga isla ug gagmayng pulo sa Dagat Aegean, ang gigikanan sa pipila sa unang bantogang mga sibilisasyon. Ang bukirong kadaplinan sa mga isla, diin nagkatag ang gagmay, puti nga mga balayng nagdan-ag tungod sa kahayag sa adlaw, nakaaghat sa usa ka magbabalak sa pagtandi sa mga isla ngadto sa “batong mga kabayo nga nagkayabkayab ang mga lambungay.”

Dili ikatingala nga kining mga islaha nahimong usa sa labing popular nga mga dugokan sa mga turista sa kalibotan! Ang pisikal nga katahom sa mga isla midugang tungod sa maayo kaayong mga hiyas sa mga lalaki ug mga babayeng nagpuyo ug nagtrabaho didto. Praktikal ug maabiabihon, apan independente, kining mga tawhana nakadugang ug linaing katahom sa pagkatalagsaon sa dapit.

Daghang taga-isla ang nanginabuhi pinaagig pagpangisda sa katubigan sa Dagat Aegean. Apan, adunay laing matang sa “pagpangisda” nga nagpatunghag dagayang resulta nianang dapita. “Mga mangingisda ug mga tawo,” mga ebanghelisador sa maayong balita sa Gingharian sa Diyos, nga nagtaboktabok sa mga isla sa Aegean, sa paghimog Kristohanong mga tinun-an.—Mateo 4:18, 19; Lucas 5:10.

Mga 19 ka siglo kanhi, giduaw sa Kristohanong mga ebanghelisador ang mga isla sa Aegean. Sa mga 56 K.P., si apostol Pablo, sa pagbalik gikan sa iyang ikatulong misyonaryong panaw, mihapit ug makadiyot sa mga isla sa Lésvos, Quio, Samos, Kos, ug Rodas. Kay sa tanang panahon masibotong magwawali, si Pablo malagmit nga nakasangyaw ngadto sa pipila ka taga-isla. (Buhat 20:14, 15, 24; 21:1, 2) Pagkahuman sa iyang duha ka tuig nga pagkabilanggo sa Roma, malagmit gayod nga miadto siya sa Creta ug nakigbahin sa Kristohanong kalihokan didto. Sa hapit nang matapos ang unang siglo, si apostol Juan gidestiyero sa isla sa Patmos “tungod sa pagpamulong bahin sa Diyos ug sa pagpanaksi bahin kang Jesus.” (Pinadayag 1:9) Komosta ang kahimtang sa modernong-adlaw nga mga magmamantala sa maayong balita niining mga islaha?

Magantihong mga Kampanya sa Pagsangyaw

Ang pagsangyaw niining mga grupoha sa isla maoy malisod ug mahago. Nagkinahanglan kinig dakong paningkamot ug pagsakripisyo sa kaugalingon. Ang ubang isla lagyo kaayo. Ang transportasyon sa dagat o kahanginan panalagsa ra sa pipila niini ug wala gayod sa uban, ilabina sa tingtugnaw. Ang dagat baloron, ilabina kon mohuyop ang meltemia—ang popanahong kusog nga hanging amihan. Dugang pa, ang mga balangay diha sa daghang isla maoy nahilit ug lisod aboton tungod kay ang abogon, libaongon nga mga dalan sagad nga halos dili maagian. Ang ubang mga balangay maabot lamang pinaagi ug gagmayng mga sakayan.

Tagda, pananglitan, ang isla sa Icaria. Dili makobrehan sa 11 ka magmamantala sa maayong balita sa Gingharian sa gamayng kongregasyon didto ang tanang balangay nianang islaha ug ang kasikbit nga mga pulo. Busa, ang Kristohanong mga igsoong  lalaki ug babaye gikan sa Samos moadto sa pagtabang sa pagsangyaw ngadto sa mga tawo sa Icaria, maingon man niadtong didto sa mga isla sa Phournoi, Patmos, ug Lipsos. Di pa dugay, panahon sa maong duha-ka-adlaw nga kampanya, ang mga Saksi nakapahiluna ug 650 ka magasin, 99 ka brosyur, ug 25 ka libro bahin sa mga topiko sa Bibliya! Nahibulong sila sa pagkahimamat ug mga tawo nga walay kalibotan kon kinsa si Jehova, mga tawo nga nagpakiluoy kanila nga magpabilin ug tudloan sila ug dugang gikan sa Bibliya. Giingnan sa usa ka babaye ang usa ka Saksi: “Nan, molakaw na diay ka karon. Pero daghan pa kog mga pangutana bahin sa Bibliya. Kinsay motabang nako?” Ang Kristohanong igsoong babaye misaad sa pag-atiman sa interes pinaagi sa paggamit sa telepono, ug nakasugod gayod siya ug pagtuon sa Bibliya nianang paagiha.

Sa dihang giduaw sa nagapanawng magtatan-aw ang Icaria, iyang gihikay nga makobrehan ang tibuok isla sa hinapos sa semana. Nangayo siyag tabang sa mga 30 ka magmamantala sa Gingharian gikan sa Samos. Ang miduaw nga mga igsoon kinahanglang mobayad sa pag-estar ug duha ka gabii sa usa ka hotel ug sa pag-abang ug mga kotse ug four-wheel-drive nga mga sakyanan. Duha ka adlaw nga mibunok ang ulan, ug dili maayo ang balita sa panahon alang sa hinapos sa semana. Apan wala kini tugoti sa mga igsoon nga mobabag kanila, nga naghinumdom sa mga pulong sa Ecclesiastes 11:4: “Siya nga maniid sa hangin dili makapugas ug binhi; ug siya nga maglantaw sa panganod dili makaani.” Sa ngadtongadto, miarang-arang ra ang panahon, ug human makobrehe ang tibuok isla sa ilang hinungdanong mensahe, ang mga igsoon namauli nga malipayon ug matagbawon.

Ang 16 ka magmamantala nga nagpuyo sa isla sa Andros naghimog dakong paningkamot aron makobrehan ang tibuok isla. Sa dihang miabot ang duha ka igsoong lalaki sa usa ka nahilit nga balangay, determinado sila nga sangyawan ang tanang molupyo. Nakig-estorya sila sa mga tawo diha sa ilang mga balay, sa kadalanan, ug sa kaumahan. Ila pa ganing giadto ang estasyon sa polis ug nagbilin ug literatura didto. Masaligon nga ila nang nakontak ang tanang taga-balangay, manglakaw na unta sila. Samtang nag-aksiyon sila ug biya sa plasa-plasa, ilang nakita nga nagpadulong ang Gregong Ortodoksong pari. Kay nakaamgo nga wala pa siya masangyawi, ila siyang gitanyagan ug gamayng publikasyon, nga malipayon niyang gidawat. Karon nakaseguro na gayod sila nga walay nalaktawan sa ilang mga paningkamot sa pagsangyaw!

Ang Gavdos (o Cauda)—usa ka pulo ubos sa nagkurbang bahin sa Creta nga may 38 lamang ka molupyo—giisip ingong kinahabagatang bahin sa Uropa. (Buhat 27:16) Usa ka magtatan-aw sa sirkito ug iyang asawa, lakip ang laing magtiayon, migugol ug tulo ka adlaw sa pagsangyaw didto. Aron makadaginot sa gastos, natulog sila sa tolda. Ang tanang molupyo nasangyawan sa maayong balita, ug nalipay ang mga igsoon nga ang mga tawo didto dili mapihigon. Wala pa sila kanhi makadungog—maayo man o daotan—bahin sa mga Saksi ni Jehova. Ang lokal nga mga tawo, lakip sa pari, midawat ug 19 ka libro ug 13 ka brosyur. Sa pagbalik sa mga Saksi sa Creta diha sa gamayng sakayan, ang dagat nahimong baloron, nga nagpameligro sa ilang kinabuhi. “Nagpasalamat kami kang Jehova nga nakapauli kami nga buhi, apan gihimaya usab namo siya kay gitugotan kaming pasidunggan ang iyang ngalan sa kinahabagatang bahin sa Uropa,” sila miingon.

Ang Patmos mao ang isla diin gisulat ni apostol Juan ang kataposang basahon sa Bibliya, ang Pinadayag. Bag-o pa lang nga dunay Saksi ni Jehova sa Patmos. Ang kampanya sa pagsangyaw nianang islaha giorganisar ug maayo sa mga igsoon gikan sa Samos. Sila nahibalo nga makadahom sila ug mabangis nga pagsupak tungod kay ang isla maoy kuta sa Grego Ortodoksong Simbahan. Duha ka igsoong babaye nga nagtanyag sa maayong balita ngadto sa usa ka babaye ang gipadayon sa iyang balay. Ang bana sa babaye nagsigeg pangutana kon kinsay nagpadala sa mga igsoong babaye ngadto sa ilang balay. Sa dihang ilang gipatin-aw nga nagduaw sila sa tanang balay, nangutana na usab siya: “Segurado ba kamo nga dili usa  ka silingan ang nagpadala kaninyo dinhi?” Ang asawa, nga nakahibalo bahin sa mga Saksi ni Jehova samtang didto sa Zaire, nagsaysay sa ulahi ngadto sa mga igsoon kon unsay nahitabo nianang buntaga. Siya miingon: “Nag-ampo ko kang Jehova, sama sa akong gihimo sa ubang mga adlaw, nga magpadala siya ug mga Saksi sa isla. Gikataw-an ko sa akong bana. Sa pagkakita ko kaninyo sa pultahan, nahibulong ako ug mao usab ang akong bana. Mao nga gisigehan mo niya ug pangutana kon kinsay nagpadala ninyo sa among balay.” Dihadiha gisugdan ang usa ka pagtuon sa Bibliya sa maong babaye. Ang pagtuon gihimo pinaagi sa telepono sulod sa napulo ka bulan, bisan pag mikostar kinig daghang kuwarta alang sa igsoon ug sa interesado nga babaye. Gibawtismohan siya ug karon mao ang bugtong Saksi nianang islaha diin gidestiyero si apostol Juan 1,900 ka tuig kanhi.

“Pagpangisda” Diha sa mga Pantalan

Ang mga barko modunggo sa daghang pantalan sa mga isla sa Aegean matag ting-init, nga nagdalag daghang bisita nga mga bakasyonista. Busa, ang mga Saksi ni Jehova adunay talagsaong kahigayonan nga maabot ang mga tawo sa lainlaing nasod ug pinulongan. Ang mga kongregasyon adunay pondong literatura sa Bibliya sa daghang lainlaing pinulongan, ug ang mga magmamantala nagpahiluna ug libolibong magasin sa mga turista. Ang ubang mga barko modunggo sa mao gihapong mga pantalan kada semana, nga naghatag sa mga igsoon ug maayo kaayong mga kahigayonan nga makahimog mga balik-duaw ug makadumala pa gani ug mga pagtuon sa Bibliya sa pipila ka tripulante sa mga barko.

Sa ting-init sa 1996, gisangyawan sa igsoong babaye nga usa ka bug-os-panahong magsasangyaw sa Rodas ang batan-ong lalaki nga taga-Jamaica kinsa nagtrabaho diha sa usa ka barko nga modunggo nianang maong pantalan matag Biyernes. Pagkasunod Biyernes gidapit ang maong lalaki sa pagtambong sa usa ka distritong kombensiyon nga pagahimoon diha sa isla. Naggamit ug Iningles nga Bibliya, gitabangan siya sa payunir nga igsoong babaye nga makasabot sa pipila ka kamatuoran sa Bibliya nga gipahayag diha sa programa. Nakadayeg pag-ayo ang batan-ong lalaki sa gugma ug pagkamainiton nga gipakita sa mga Saksi sa kombensiyon. Pagkasunod Biyernes, siya midapit ug duha ka payunir ngadto sa barko. Ang mga payunir nagdalag literatura sa Kinatsila ug Iningles. Wala pay usa ka oras nahurot na ang tanang sulod sa ilang mga bag nga pangsangyaw! Ang batan-ong taga-Jamaica nagtuon sa Bibliya matag Biyernes hangtod sa kataposan sa ting-init. Mibalik siya pagkasunod ting-init, nga andam  magpadayon sa iyang pagtuon. Apan, nianang higayona nakahukom siya nga ilisan ang iyang trabaho aron makahimog espirituwal nga pag-uswag. Dayon mibiya na usab siya. Pagkadako sa kalipay sa mga igsoon sa Rodas sa pagkahibalo nga kining batan-ong lalaki gibawtismohan sa sayong bahin sa 1998!

Pagsikop ug Langyaw nga “Isda”

Ang Dagat Aegean nailhan tungod sa dagayang langyaw nga mga isda niini, sama sa tamban ug malasugi, nga moagi sa katubigan niini ug masikop diha sa mga pukot sa hanas nga mga mangingisda. Sa samang paagi, ang mga ebanghelisador sa Gingharian nakakaplag ug daghang madinawaton nga mga kasingkasing taliwala sa langyawng mga mamumuo nga namalhin sa Gresya gikan sa daghang kanasoran sa Sidlakang Uropa.

Diyes anyos si Rezi sa dihang iyang nabasa ang bahin kang Jehova ug sa iyang mga katuyoan diha sa mga panid sa Ang Bantayanang Torre ug Pagmata! Kana maoy sa Albania. Tulo ka tuig sa ulahi mibalhin siya uban sa iyang pamilya ngadto sa isla sa Rodas. Usa ka adlaw niana, nag-ampo si Rezi kang Jehova sa pagtabang kaniya nga makaplagan ang iyang katawhan diha sa iyang bag-ong nasod nga gipuy-an. Pagkasunod adlaw ang iyang amahan mipauli dala kadtong pamilyar nga mga magasin, Ang Bantayanang Torre ug Pagmata!, sa dakong kalipay ni Rezi. Nakontak ni Rezi ang igsoong babaye nga maoy naghatag sa mga magasin ngadto sa iyang amahan, ug wala madugay misugod siya sa pagtuon gikan sa librong Kahibalo nga Motultol sa Kinabuhing Walay Kataposan. Usahay, mohangyo siya nga magtuon tulo ka beses sa mao ra nga adlaw! Human sa duha ka bulan nahimo siya nga di-bawtismadong magmamantala, ug sa Marso 1998, gibawtismohan siya sa edad nga 14. Niana ra gihapong adlawa, misugod siya sa pag-oksilyare payunir, ug unom ka bulan sa ulahi nagpalista siya ingong regular payunir, o bug-os-panahong ministro.

Usa ka igsoong lalaki sa isla sa Kos nagtuon uban sa pipila ka tawo nga taga-Rusya. Sa dihang iyang gipangutana sila kon duna silay mga higala nga gustong magtuon sa Bibliya, iya silang gitudlo sa usa ka magtiayon nga taga-Armenia—si Leonidas ug ang iyang asawa, si Ophelia—sa usa ka balangay nga mga 30 kilometros ang gilay-on. Dihay sorpresa nga nagpaabot sa mga igsoon. Ang magtiayon nga taga-Armenia nagpagawas ug usa ka bag nga puno sa mga literatura sa Bibliya sa Armenian ug Ruso nga gipatik sa Watch Tower Society! Ilang gisaysay nga nakatuon sila sa Bibliya uban sa mga Saksi ni Jehova ug miuswag ngadto sa punto nga nahimong di-bawtismadong mga magmamantala. Tungod sa politikanhong kagubot ug ekonomikanhong mga kalisdanan, kinahanglan silang mobiya sa ilang yutang-natawhan. Sa pag-abot gayod nila sa Kos, gisugdan nila sa pagtuon ang inahan ug igsoong babaye ni Leonidas, kinsa didto nang daan. Sa kalit lang, ang Saksi may tulo ka bag-ong mga pagtuon sa Bibliya nga dumalahan—usa kang Ophelia, usa kang Leonidas, ug usa sa iyang inahan ug igsoong babaye. Nagkinahanglan kinig pagbiyahe sa motorsiklo 30 kilometros matag biyahe nga tulo ka beses sa usa ka semana. Si Leonidas ug ang iyang asawa gibawtismohan pipila ka bulan sa ulahi. Pagkadakong ganti tungod sa nagsakripisyo-sa-kaugalingon nga espiritu sa lokal nga mga igsoon!

Si Jehova Nagapatubo Niini

Ang panalangin ni Jehova madayag diha sa makugihong mga paningkamot sa kapin sa 2,000 ka aktibong mga magmamantala sa Gingharian niining mga isla sa Aegean. Karon adunay 44 ka kongregasyon ug 25 ka grupo sa mga Saksi ni Jehova didto. Sa mga grupo, 17 ang langyaw ug mga pinulongan, sanglit kabubut-on ni Jehova nga “ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Dugang pa, 13 ka espesyal payunir ang naghimog dugang mga paningkamot sa pag-abot ug daghan pa niining hilit nga mga teritoryo.

Latas sa kasiglohan ang Dagat Aegean maoy sentro sa kaugmaran sa kultura ug komersiyal nga pamatigayon. Sa di pa dugay nga mga dekada kini nahimong popular nga bakasyonan sa ginatos ka libo nga turista. Apan labaw sa tanan, ingong “mga mangingisda ug mga tawo,” ang mga magmamantala sa Gingharian nakakaplag niining mga islaha ug daghang matinud-anon-ug-kasingkasing nga mga tawo nga maikagon sa pagdayeg kang Jehova. Sa tingob, sila nagasanong sa usa ka talagsaong paagi sa matagnaong pagdapit: “Pahataga sila ug himaya kang Jehova, ug diha sa kapuloan papahayaga sila bisan sa iyang pagdayeg.”—Isaias 42:12.

[Mapa sa panid 22]

(Alang sa aktuwal nga pagkahan-ay, tan-awa ang publikasyon)

Dagat Aegean

GRESYA

Lésvos

Quio

Samos

Icaria

Phournoi

Patmos

Kos

Rodas

Creta

TURKEY

[Hulagway sa panid 23]

Isla sa Lésvos

[Hulagway sa panid 24]

Ang isla sa Patmos

[Hulagway sa panid 24]

Ang isla sa Creta