Malipayong mga Kasal nga Magpasidungog Kang Jehova

Si Welsh Ug Elthea Gikasal Sa Soweto, Habagatang Aprika, Sa 1985. Matag Karon Ug Unya Ilang Tan-awon Ang Ilang Album Sa Kasal Uban Sa Ilang Anak Nga Babaye, Si Zinzi, Ug Handurawon Kadtong Malipayong Adlaw. Ganahan Si Zinzi Sa Paghingalan Sa Mga Bisita Sa Kasal Ug Ilabinang Malipay Sa Mga Hulagway Sa Iyang Inahan Nga Nindot Kaayog Boda.

ANG kasal gisugdan ug pakigpulong nga gihimo diha sa usa ka tinukod sa komunidad sa Soweto. Dayon usa ka koro sa Kristohanong mga batan-on ang miawit ug mga awit sa pagdayeg sa Diyos nga ang upat ka tono sa tingog nagduyog. Sunod, ang mga bisita malipayong nangaon samtang ang teyp sa Kingdom melodies hinay nga nagtokar. Walay gidalit nga makahubog nga mga ilimnon, ug walay kusog nga musika o pagsayaw. Hinunoa, ang mga bisita nalipay sa pagtipontipon ug pagpahalipay sa magtiayon. Tanantanan ang okasyon miabot ug mga tulo ka oras. “Kadto maoy kasal nga maghatag kanako kanunay ug makapalipayng panumdoman,” nahinumdom si Raymond, usa ka Kristohanong ansiyano.

Panahon sa ilang kasal, si Welsh ug Elthea maoy boluntaryong mga trabahante sa sangang buhatan sa Watch Tower Bible and Tract Society sa Habagatang Aprika. Makaarang lamang sila sa paggasto alang sa usa ka simpleng kasal. Ang ubang mga Kristohanon mihukom sa pag-undang sa bug-os-panahong ministeryo ug misulod sa sekular nga mga trabaho aron dunay ikagasto alang sa usa ka luho nga kasal. Apan, si Welsh ug Elthea wala magmahay nga sila mihukom sa paghimo sa kasal nga simple tungod kay nagtugot kini kanila sa pagpadayon sa pag-alagad sa Diyos ingong bug-os-panahong mga ministro hangtod natawo si Zinzi.

Apan, komosta na man kon ang kaslonon modesisyon nga gusto nilang dunay kalibotanong musika ug pagsayaw sa ilang kasal? Komosta kon mohukom sila sa pagdalit ug bino o ubang alkoholikong mga ilimnon? Komosta kon makaarang sila sa paggasto alang sa usa ka dako ug luho nga kasal? Unsaon nila pagsegurong ang kasal mahimong malipayong okasyon nga nahiangay sa mga magsisimba sa Diyos? Ang maong mga pangutana kinahanglang pamalandongon pag-ayo, tungod kay ang Bibliya nagsugo: “Kon kamo man magakaon o magainom o magabuhat sa unsa pang butang, himoa ang tanang butang alang sa kahimayaan sa Diyos.”—1 Corinto 10:31.

Paglikay sa Hudyaka

Lisod handurawon ang usa ka kasal nga walay kalipay. Ugaling, dunay mas dakong kapeligrohan nga magpasulabi ug sobrang magpatuyang sa hudyaka. Sa daghang dili-Saksing mga kasal, mahitabo ang mga butang nga makapasipala sa Diyos. Pananglitan, naandan na ang pag-inom ug alkoholikong mga ilimnon hangtod sa punto nga mahubog. Ikasubo, nahitabo kini bisan sa pipila ka Kristohanong mga kasal.

Ang Bibliya nagpasidaan nga “ang makahubog nga ilimnon sabaan.” (Proverbio 20:1) Ang Hebreohanong pulong nga gihubad nga “sabaan” nagkahulogag “pagsabasaba.” Kon ang alkoholikong ilimnon makahimo sa usa ka tawo nga sabaan, handurawa kon unsay mahimo niini diha sa dakong panon sa mga tawong nagtipontipon ug masobrahan sa pag-inom! Dayag nga ang maong mga okasyon sayon rang madaot sa pagkahimong “mga paghuboghubog, mga hudyaka, ug mga butang nga sama niini,” nga gilista diha sa Bibliya ingong “mga buhat sa unod.” Ang maong mga binuhatan makadiskuwalipikar ni bisan kinsang di-mahinulsolon nga makapanunod sa walay-kataposang kinabuhi ubos sa pagmando sa Gingharian sa Diyos.—Galacia 5:19-21.

 Ang Gregong pulong alang sa “hudyaka” gigamit sa paghubit sa saba nga prosesyon sa dalan sa medyo-hubog nga mga batan-ong mokanta, mosayaw, ug magtokar ug musika. Kon dunay pagpatuyang sa pag-inom ug alkoholikong ilimnon sa usa ka kasal, ug kon dunay kusog nga musika ug mapatuyangon nga pagsayaw, duna gayoy kapeligrohan nga ang okasyon mahimong usa ka kahimtang nga sama sa hudyaka. Sa ingon niana nga atmospera, ang mga maluya mahimong matental ug makahimog ubang mga buhat sa unod sama sa “pakighilawas, pagkadili-hinlo, malaw-ayng panggawi, [o magpadaog sa] mga pagsinta sa kasuko.” Unsa ang mahimo aron malikayan nga daoton sa maong mga buhat sa unod ang kalipay sa usa ka Kristohanong kasal? Aron matubag kanang pangutanaha, atong tagdon kon unsay giingon sa Bibliya bahin sa usa ka kasal.

Kasal nga Gitambongan ni Jesus

Si Jesus ug ang iyang mga tinun-an gidapit sa pagtambong sa usa ka kasal sa Cana sa Galilea. Ilang gidawat ang pagdapit, ug nakaamot pa gani si Jesus sa kalipay sa maong okasyon. Sa dihang nakulang ang bino, siya milagrosong naghimog dugang suplay nga primera klase. Human sa kasal, ang nabilin seguradong nakatagana sa mga panginahanglan sa mapasalamatong pamanhonon ug sa iyang pamilya sulod sa usa ka panahon.—Juan 2:3-11.

Daghang pagtulon-an ang atong makat-onan gikan sa kasal nga gitambongan ni Jesus. Una, si Jesus ug ang iyang mga tinun-an wala manambong sa kombira sa kasal nga wala dapita. Ang Bibliya espesipikong nag-ingon nga sila gidapit. (Juan 2:1, 2) Sa susama, diha sa duha ka ilustrasyon bahin sa mga kombira sa kasal, si Jesus sublisubling naghisgot nga nakatambong ang mga bisita tungod kay gidapit sila.—Mateo 22:2-4, 8, 9; Lucas 14:8-10.

Sa ubang kayutaan naandan alang sa tanan sa komunidad nga basta na lang motambong sa usa ka kombira sa kasal gidapit man o wala. Apan, mosangpot kinig pinansiyal nga kalisod. Ang kaslonong dili dato basin mangutang aron mapaneguro nga dunay igong pagkaon ug ilimnon alang sa mga tawong walay limite ang gidaghanon. Busa, kon ang usa ka Kristohanong kaslonon mohukom sa pag-andam ug simpleng salosalo uban ang espesipikong gidaghanon sa mga bisita, kinahanglan kining sabton ug tahoron sa mga isigka-Kristohanon nga wala dapita. Usa ka lalaki nga nagpakasal sa Cape Town, Habagatang Aprika, nahinumdom nga midapit ug 200 ka bisita sa iyang kasal. Apan, 600 ang nangadto, ug nahutdan dayon silag pagkaon. Lakip sa wala-dapitang mga tawo mao ang usa ka bus sa mga bisita nga naatlang miduaw sa pagtan-aw sa Cape Town sa hinapos sa semana nga himoon ang kasal. Ang konduktor niining bus maoy layo nga paryente sa pangasaw-onon ug nagtuo nga katungod niya ang pagdala sa tibuok grupo nga wala gani mokonsulta sa pangasaw-onon o pamanhonon!

Gawas kon isulti nga ang salosalo bukas alang sa tanan, ang tinuod nga sumusunod ni Jesus molikay sa pagtambong sa usa ka salosalo sa kasal nga wala dapita ug pag-ambit sa pagkaon ug ilimnon nga gitagana alang sa dinapit nga mga bisita. Kadtong matental sa pag-adto nga wala dapita angayng mangutana sa ilang kaugalingon, ‘Ang akong pagtambong niini nga kombira sa kasal dili ba pagpakita ug kawalay-gugma sa bag-ong kinasal? Dili ba ko mahimong hinungdan sa kahasol ug makadaot sa kalipay sa okasyon?’ Imbes masilo tungod kay wala dapita, ang masinabotong Kristohanon mahigugmaong magpadala ug mensahe aron sa pagpahalipay sa kaslonon ug manghinaot sa panalangin ni Jehova kanila. Mahimo gani siyang maghunahuna sa pagtabang sa kaslonon pinaagi sa pagpadala ug regalo aron makadugang sa kalipay sa adlaw sa ilang kasal.—Ecclesiastes 7:9; Efeso 4:28.

Kinsa ang Responsable?

Sa mga bahin sa Aprika, naandan alang sa mas edaran nga mga paryente nga maoy magbuot sa mga kahikayan sa kasal. Ang mga kaslonon mapasalamaton tingali niini, sanglit malibre sila sa pinansiyal nga mga obligasyon. Ila tingaling bation nga malibre usab sila sa tulubagon sa bisan unsa nga mahimong mahitabo. Apan, sa dili pa modawat ug bisan unsang matang sa tabang gikan sa maayog-tuyo nga mga paryente, kinahanglang tinoon sa kaslonon nga ang ilang personal nga kagustohan pagatahoron.

Bisan tuod si Jesus Anak sa Diyos kinsa “nanaog gikan sa langit,” walay gipakita nga siya ang nagbuot ug nagdumala sa kadaghanang alatimanon sa kasal sa Cana. (Juan 6:41) Hinunoa, ang asoy sa Bibliya nagtug-an kanato nga dihay laing tawong gitudlo nga nagsilbing “tagdumala sa kombira.” (Juan 2:8) Kining tawhana, sa baylo, mao ang manubag sa bag-ong ulo sa pamilya, nga mao ang pamanhonon.—Juan 2:9, 10.

Ang Kristohanong mga paryente angayng motahod  sa tinudlo-sa-Diyos nga ulo sa bag-ong pamilya. (Colosas 3:18-20) Siya mao ang usa nga angayng moabaga sa responsabilidad kon unsay himoon panahon sa iyang kasal. Natural, ang pamanhonon kinahanglang makataronganon ug, kon posible, mokonsiderar sa kagustohan sa iyang pangasaw-onon, sa iyang mga ginikanan, ug sa pamilya sa iyang pangasaw-onon. Bisan pa niana, kon ang mga paryente moinsistir sa paghikay sa mga butang nga supak sa kagustohan sa kaslonon, nan tingali kinahanglang matinahurong balibaran sa kaslonon ang ilang tabang ug silay mogasto sa ila mismong simpleng kasal. Nianang paagiha walay mahitabo nga magbilin ug dili-nindot nga mga panumdoman sa kaslonon. Pananglitan, sa usa ka Kristohanong kasal sa Aprika, usa ka di-magtutuong paryente kinsa nagsilbing tig-abiabi sa maong okasyon ang nagtagay agig pasidungog sa patay nga mga katigulangan!

Usahay ang magtiayon mobiya alang sa ilang honeymoon sa dili pa matapos ang selebrasyon sa kasal. Sa ingon nianang kahimtang, kinahanglang hikayon sa pamanhonon nga dunay responsableng mga tawo nga maoy magseguro nga padayong sundon ang mga sukdanan sa Bibliya ug nga ang selebrasyon matapos sa rasonableng oras.

Maayong Pagplano ug Pagkatimbang

Dayag nga dihay daghang maayong pagkaon sa kasal nga gitambongan ni Jesus, tungod kay ang Bibliya naghubit niini ingong usa ka kombira sa kasal. Ingon sa nahisgotan na, dihay daghan usab nga bino. Walay duhaduha, dihay nahiangay nga musika ug maligdong nga pagsayaw tungod kay naandang bahin kini sa Hudiyohanong sosyal nga kinabuhi. Gipakita kini ni Jesus diha sa iyang iladong ilustrasyon bahin sa anak nga mausikon. Ang adunahang amahan sa maong estorya nalipay kaayo sa paghibalik sa iyang mahinulsolong anak nga siya miingon: “Mangaon kita ug maglipay sa atong kaugalingon.” Sumala pa kang Jesus, ang selebrasyon naglakip sa “musika ug panagsayaw.”—Lucas 15:23, 25.

Apan, makaiikag nga ang Bibliya walay espesipikong gihisgotan bahin sa musika ug pagsayaw sa kasal sa Cana. Sa pagkatinuod, wala maghisgot ug pagsayaw ang bisan unsang asoy sa Bibliya bahin sa mga kasal. Mopatim-aw nga taliwala sa matinumanong mga alagad sa Diyos sa kapanahonan sa Bibliya, ang pagsayaw maoy pangdugang lang ug dili mao ang pangunang bahin sa ilang mga kasal. Duna ba kitay makat-onan gikan niini?

Sa ubang Kristohanong mga kasal sa Aprika, gigamit ang kusog kaayog tingog nga elektronikong mga sound system. Ang musika kusog kaayo nga ang mga bisita dili komportableng magkaestoryahanay. Usahay dunay dayag nga kakulang sa pagkaon apan walay kakulang sa pagsayaw nga dali rang mahimong mapatuyangon. Imbes nga usa ka kombira sa kasal, ang maong mga okasyon mahimong pasumangil lamang para sa usa ka parti sa pagsayawsayaw. Dugang pa, ang kusog nga musika sagad nga modani ug mga samokan, mga estranyong basta lang moadto nga wala dapita.

Sanglit ang rekord sa Bibliya bahin sa mga kasal wala magpasiugda ug musika ug pagsayaw, dili ba angay kining maggiya sa kaslonon nga nagplano ug usa ka kasal nga magapasidungog kang Jehova? Ugaling lang, sa pagpangandam alang sa daghang kasal di pa dugay sa habagatang Aprika, ang Kristohanong mga batan-on nga napiling mahimong bahin sa parti alang sa pangasaw-onon migugol ug daghang oras sa pag-ensayog lisod nga sayaw. Sa pipila ka bulan ang ilang dakong panahon gigamit niining paagiha. Apan ang mga Kristohanon kinahanglang ‘magpalit sa panahon’ alang sa “mas hinungdanong mga butang,” sama sa buluhatong pag-ebanghelyo, personal nga pagtuon, ug pagtambong sa Kristohanong mga tigom.—Efeso 5:16; Filipos 1:10.

Pinasikad sa gidaghanon sa bino nga gitagana ni Jesus, mopatim-aw nga ang kasal sa Cana maoy dako, luho nga kasal. Bisan pa niana, makaseguro kita nga ang okasyon dili banha ug nga ang mga bisita wala magpatuyang sa alkoholikong ilimnon ingon sa kahimtang sa ubang Hudiyohanong mga kasal. (Juan 2:10) Sa unsang paagi kita makatino niini? Tungod kay mitambong si Ginoong Jesu-Kristo. Sa tanang tawo, si Jesus mao ang labing maampingon nga motuman sa sugo sa Diyos mahitungod sa daotang pakig-uban: “Ayaw pagpakig-uban sa mga hilabihan ka hinginom ug bino.”—Proverbio 23:20.

 Busa, kon ang kaslonon mohukom sa pagdalit ug bino o ubang alkoholikong mga ilimnon sa ilang kasal, kinahanglan nilang hikayon nga mailalom kini sa estriktong pagkontrolar sa responsableng mga indibiduwal. Ug kon mohukom sila nga dunay musika, kinahanglang pilion nila ang haom nga mga awit ug motudlog responsableng tawo nga magbantay sa gikusgon sa tunog. Ang mga bisita kinahanglang dili tugotan nga maoy magbuot ug magpatokar ug kuwestiyonableng musika o magpakusog kaayo sa tunog. Kon dunay pagsayaw, mahimo kini sa maligdong ug kontroladong paagi. Kon ang di-magtutuong mga paryente o di-hamtong nga mga Kristohanon mogamit ug bastos o mahilayon nga mga linihokan sa pagsayaw, tingali kinahanglang ilisdan sa pamanhonon ang matang sa musika o mataktikanhong mohangyo nga undangon ang pagsayaw. Kay kon dili kini himoon ang kasal moresulta sa magubot nga okasyon ug mahimong hinungdan sa pagkapandol.—Roma 14:21.

Tungod sa mga kapeligrohan nga kasagaran diha sa pipila ka matang sa modernong sayaw, kusog nga musika, ug pagpatuyang sa pag-inom ug alkoholikong ilimnon, daghang Kristohanong mga pamanhonon ang nakahukom nga dili ilakip kining mga bahina diha sa ilang kasal. Ang uban gisaway tungod niini, apan angay hinuon silang dayegon tungod sa ilang tinguha nga likayan ang bisan unsa nga malagmit makapasipala sa balaang ngalan sa Diyos. Sa laing bahin, ang ubang pamanhonon mihikay alang sa haom nga musika, usa ka panahon alang sa pagsayaw, ug pagdalit ug alkoholikong ilimnon sa kasarangang gidaghanon. Sa bisan hain niini nga kahimtang ang pamanhonon mao ang responsable sa kon unsay iyang tugotang mahitabo panahon sa iyang kasal.

Sa Aprika ang pipila nga di-hamtong nagtamay sa maligdong nga Kristohanong mga kasal ug nag-ingon nga sama kinig pagtambong ug lubong. Apan, dili kana usa ka timbang nga panglantaw. Ang makasasala nga mga buhat sa unod magdulot tingali ug temporaryong kaukyab, apan magtugaw kini sa tanlag sa mga Kristohanon ug magpasipala sa ngalan sa Diyos. (Roma 2:24) Sa laing bahin, ang balaang espiritu sa Diyos mopatunghag tinuod nga kalipay. (Galacia 5:22) Daghang Kristohanong mga magtiayon ang malipayon nga molantaw ug balik sa adlaw sa ilang kasal, nga nahibalong kadto maoy usa ka malipayong okasyon ug dili “hinungdan sa pagkapandol.”—2 Corinto 6:3.

Mahinumdoman gihapon ni Welsh ug Elthea ang daghang paborableng mga komento sa di-magtutuong mga paryente nga mitambong sa ilang kasal. Matod sa usa: “Gikapoy na kami sa banha nga mga kasal nga ginahimo karong panahona. Nindot kaayong makatambong sa usa ka desenteng kasal agig pagpalahi.”

Labing hinungdanon, ang Kristohanong mga kasal nga malipayon ug maligdong magpasidungog sa Tagmugna sa kaminyoon, si Jehova nga Diyos.

[Kahon/Hulagway sa panid 22]

LISTAHAN ALANG SA SALOSALO SA KASAL

• Kon ikaw modapit ug usa ka di-magtutuo nga paryente aron pasultihon panahon sa salosalo, imo na bang natino nga dili siya magtudlo ug usa ka di-Kristohanong tradisyon?

• Kon magpatugtog ug musika, imo bang gipili ang nahiangay lamang nga mga awit?

• Ang imo bang musika ipatokar sa kasarangang gikusgon?

• Kon tugotan ang pagsayaw, himoon kaha kini sa maligdong nga paagi?

• Magdalit ba ug kasarangan lamang nga gidaghanon sa alkoholikong ilimnon?

• Aduna bay responsableng mga tawo nga mokontrolar sa pagdalit niini?

• Nagtakda ka ba ug rasonableng oras nga taposon ang salosalo sa kasal?

• Aduna bay responsableng mga tawo nga presente aron paneguroon ang kahusay hangtod sa pagkatapos?