Paminawa Kon Unsay Ginaingon sa Espiritu

“Ang imong mga igdulungog makadungog ug pulong sa imong likod nga magaingon: ‘Kini mao ang dalan. Lakaw kamo diha niana,’ sa inyong pagliko sa tuo o sa inyong pagliko sa wala.”—ISAIAS 30:21.

1, 2. Sa unsang paagi si Jehova nakigsulti sa mga tawo latas sa kasaysayan?

 ANG isla sa Puerto Rico mao ang nahimutangan sa kinadak-an ug labing sensitibong usa-ray-replektor nga radyo-teleskopyo sa kalibotan. Sulod sa mga dekada, ang mga siyentipiko naglaom nga makadawat ug mga mensahe gikan sa mga linalang sa kawanangan, ginamit kining dakong instrumento. Apan walay ingon nianang mga mensahea ang nadawat sukad. Apan, sa kaatbang dunay klarong mga mensahe gikan sa gawas sa dominyo sa tawo nga mahimong madawat ni bisan kinsa kanato sa bisan unsang panahon—nga dili mogamit ug komplikadong kahimanan. Kini naggikan sa usa ka Tinubdan nga mas labaw pa sa bisan unsang hinanduraw nga linalang sa kawanangan. Kinsa ang Tinubdan sa maong impormasyon, ug kinsa ang nagadawat niana? Unsay ginaingon sa mga mensahe?

² Ang rekord sa Bibliya naundan ug ubay-ubayng asoy sa mga okasyon sa dihang ang mga mensahe gikan sa Diyos madungog sa mga tawo. Usahay kining mga mensahea gihatod sa espiritung mga linalang nga nag-alagad ingong mga mensahero sa Diyos. (Genesis 22:11, 15; Zacarias 4:4, 5; Lucas 1:26-28) Sa tulo ka okasyon, ang tingog mismo ni Jehova nadungog. (Mateo 3:17; 17:5; Juan 12:28, 29) Ang Diyos misulti usab pinaagi sa tawhanong mga manalagna, nga daghan kanila ang nagsulat sa giinspirar niya nga ilang isulti. Karon, nabatonan nato ang Bibliya, nga naglakip sa usa ka sinulat nga rekord sa daghan niining mga impormasyona, maingon man sa mga pagtulon-an ni Jesus ug sa iyang  mga tinun-an. (Hebreohanon 1:1, 2) Sa pagkatinuod si Jehova nagpasa ug impormasyon ngadto sa iyang tawhanong mga linalang.

3. Unsay katuyoan sa mga mensahe sa Diyos, ug unsay gidahom kanato?

³ Kining tanang dinasig nga mga mensahe gikan sa Diyos diyutay rag gipadayag bahin sa pisikal nga uniberso. Kini nagtumong sa pagtagad sa mas hinungdanong mga butang, nga dunay epekto sa atong kinabuhi karon ug sa umaabot. (Salmo 19:7-11; 1 Timoteo 4:8) Gigamit kini ni Jehova aron ipahibalo ang iyang kabubut-on ug ihatag kanato ang iyang giya. Kini maoy usa ka paagi nga ang mga pulong ni manalagnang Isaias natuman: “Ang imong mga igdulungog makadungog ug pulong sa imong likod nga magaingon: ‘Kini mao ang dalan. Lakaw kamo diha niana,’ sa inyong pagliko sa tuo o sa inyong pagliko sa wala.” (Isaias 30:21) Si Jehova dili mamugos kanato nga mamati sa iyang “pulong.” Naa ra nato kon kita mosunod sa pagtultol sa Diyos ug molakaw sa iyang dalan. Tungod niana ang Kasulatan nagtambag kanato nga magpatalinghog sa mga impormasyon gikan kang Jehova. Sa basahon sa Pinadayag, ang pagdasig nga ‘paminawa kon unsay ginaingon sa espiritu’ makita sa pito ka beses.—Pinadayag 2:7, 11, 17, 29; 3:6, 13, 22.

4. Makataronganon ba sa atong adlaw ang pagdahom nga ang Diyos direktang makigsulti gikan sa langit?

⁴ Karong adlawa, si Jehova dili mosulti kanato nga direkta gikan sa langit. Bisan sa kapanahonan sa Bibliya, kining dili-kinaiyanhong pagpakigsulti panagsa rang mahitabo, usahay gilat-angan ug mga siglo. Latas sa kasaysayan, si Jehova kasagaran kaayong nakigsulti sa iyang katawhan sa dili gayod direktang mga paagi. Mao kana ang kahimtang sa atong adlaw. Tagdon nato ang tulo ka paagi diin si Jehova nakigsulti kanato karon.

“Ang Tibuok Kasulatan Inspirado”

5. Unsa ang pangunang instrumento ni Jehova sa pagpakigsulti karon, ug sa unsang paagi kita makabenepisyo gikan niana?

⁵ Ang pangunang instrumento sa Diyos sa pagpakigsulti sa mga tawo mao ang Bibliya. Kini inspirado sa Diyos, ug ang tanan diha niini makabenepisyo kanato. (2 Timoteo 3:16) Ang Bibliya dunay daghang panig-ingnan sa tinuod nga mga tawo nga nagpasundayag sa ilang kagawasan sa pagpili sa pagdesidir kon mamati ba sa tingog ni Jehova o dili. Ang maong mga panig-ingnan magpahinumdom kanato kon nganong hinungdanon nga mamati sa ginasulti sa espiritu sa Diyos. (1 Corinto 10:11) Ang Bibliya naundan usab sa praktikal nga kaalam, nga naghatag kanato ug tambag sa mga panahong kinahanglan kitang mohimog mga desisyon sa kinabuhi. Sama rag ang Diyos anaa sa atong likod, nga nagasulti diha sa atong igdulungog sa mga pulong: ‘Kini mao ang dalan. Lakaw diha niana.’

6. Nganong ang Bibliya mas labaw kay sa tanang ubang mga sinulat?

⁶ Aron madungog ang ginaingon sa espiritu pinaagi sa mga panid sa Bibliya, kinahanglang makanunayon nato kining basahon. Ang Bibliya dili lamang usa ka maayong pagkasulat, popular nga basahon, usa sa daghan nga mabatonan karon. Ang Bibliya inspirado sa espiritu ug naundan sa mga hunahuna sa Diyos. Ang Hebreohanon 4:12 nag-ingon: “Ang pulong sa Diyos buhi ug gamhanang nagalihok ug mas hait kay sa bisan unsang espada nga duhay-sulab ug modulot bisan pa hangtod sa pagbahin sa kalag ug espiritu, ug sa mga lutahan ug sa ilang uyok, ug arang makaila sa mga hunahuna ug mga tuyo sa kasingkasing.” Samtang magabasa kita sa Bibliya, ang mga unod niini molagbas sa atong kinasulorang mga hunahuna ug mga panukmod sama sa usa ka espada, nga magpadayag sa gilapdon nga ang atong kinabuhi nahiuyon sa kabubut-on sa Diyos.

7. Nganong hinungdanon ang pagbasa sa Bibliya, ug unsa ka subsob nga kita gidasig sa pagbuhat niana?

⁷ Ang “mga hunahuna ug mga tuyo sa kasingkasing” mahimong mausab sa paglabay sa panahon ug samtang kita naapektahan sa atong mga kasinatian sa kinabuhi—maanindot ug malisod. Kon kita dili kanunayng magtuon sa Pulong sa Diyos, ang atong mga hunahuna, tinamdan, ug emosyon dili na mahiuyon sa diyosnong mga prinsipyo. Busa, ang Bibliya nagtambag kanato: “Padayong sulayi  kon kamo anaa ba sa pagtuo, padayong pamatud-i kon unsa kamo sa inyong kaugalingon.” (2 Corinto 13:5) Aron makapadayon kita sa pagpaminaw sa ginaingon sa espiritu, kinahanglang patalinghogan nato ang tambag nga basahon ang Pulong sa Diyos sa adlaw-adlaw.—Salmo 1:2.

8. Unsang mga pulonga ni apostol Pablo ang motabang kanato sa pagsusi sa atong kaugalingon maylabot sa pagbasa sa Bibliya?

⁸ Ang usa ka hinungdanong pahinumdom alang sa mga magbabasa sa Bibliya mao kini: Hatagig igong panahon nga masabtan ang imong gibasa! Sa paningkamot nga matuman ang tambag nga mobasa sa Bibliya kada adlaw, dili nato buot nga magdalidali pagbasa sa ubay-ubayng kapitulo nga wala makasabot sa diwa sa atong gibasa. Bisan tuod ang makanunayong pagbasa sa Bibliya hinungdanon, ang atong panukmod dili lamang mao ang pagsunod sa eskedyul; kinahanglang duna kitay tim-os nga tinguha nga mahibalo bahin kang Jehova ug sa iyang mga katuyoan. Bahin niini, maayong gamiton nato kining mga pulonga ni apostol Pablo aron masusi ang kaugalingon. Nagsulat sa iyang mga isigka-Kristohanon, siya miingon: “Akong ginapiko ang akong mga tuhod ngadto sa Amahan, sa tuyo nga iya untang itugot kaninyo . . . aron mopuyo ang Kristo pinaagi sa inyong pagtuo diha sa inyong mga kasingkasing uban sa gugma; aron kamo makagamot ug matukod ibabaw sa patukoranan, aron bug-os ninyong masabtan uban sa tanang mga balaan kon unsa ang gilapdon ug gitas-on ug gihabogon ug giladmon, ug aron mahibaloan ang gugma sa Kristo nga nagalabaw sa kahibalo, aron mapuno kamo sa tanang kabug-osan nga ginahatag sa Diyos.”—Efeso 3:14, 16-19.

9. Sa unsang paagi nato maugmad ug mapalalom ang atong tinguha nga mahibalo bahin kang Jehova?

⁹ Tugotan ta, ang uban kanato sa kinaiyanhon dili ganahang mobasa, samtang ang uban mga himasa. Apan, bisan unsa pay atong tagsatagsa ka hilig, atong maugmad ug mapalalom ang atong tinguha nga mahibalo bahin kang Jehova. Si apostol Pedro misaysay nga kinahanglang mangandoy kita sa kahibalo sa Bibliya, ug iyang giila nga ang maong tinguha basin kinahanglang ugmaron. Siya misulat: “Sama sa bag-o pang nahimugso nga mga bata, ugmara ang pagpangandoy sa walay-sambog nga gatas nga iya sa pulong, aron nga pinaagi niini managtubo kamo ngadto sa kaluwasan.” (1 Pedro 2:2) Ang pagdisiplina-sa-kaugalingon hinungdanon aron atong ‘maugmad ang pangandoy’ sa pagtuon sa Bibliya. Sama ra nga maugmad nato ang gana alang sa usa ka bag-ong pagkaon human kana matilawi sa makadaghan, ang atong tinamdan ngadto sa pagbasa ug pagtuon mahimong moarang-arang kon atong disiplinahon ang atong kaugalingon nga mosunod sa usa ka regular nga rutina.

“Pagkaon sa Hustong Panahon”

10. Kinsa ang naglangkob sa ‘matinumanon ug maalamong ulipon,’ ug sa unsang paagi ginagamit sila ni Jehova karon?

¹⁰ Ang laing paagi nga gigamit ni Jehova sa pagsulti kanato karon gipaila ni Jesus diha sa Mateo 24:45-47. Didto naghisgot siya bahin sa dinihogan-sa-espiritu nga Kristohanong kongregasyon—‘ang matinumanon ug maalamong ulipon’ nga gitudlo sa pagtagana ug espirituwal nga “pagkaon sa hustong panahon.” Ingong mga indibiduwal, ang mga membro niining maong matang mao ang “mga sulugoon sa panimalay” ni Jesus. Sila, duyog sa “dakong panon” sa “ubang mga karnero,” makadawat ug pagdasig ug giya. (Pinadayag 7:9; Juan 10:16) Kadaghanan niini nga pagkaon sa hustong panahon maoy sa dagway sa pinatik nga mga publikasyon, sama sa Ang Bantayanang Torre, Pagmata!, ug ubang mga publikasyon. Ang dugang espirituwal nga pagkaon gihatag sa dagway sa mga pakigpulong ug mga demonstrasyon diha sa mga  kombensiyon, asembliya, ug tigom sa kongregasyon.

11. Sa unsang paagi mapamatud-an nato nga kita madinawaton sa ginaingon sa espiritu pinaagi sa ‘matinumanon ug maalamong ulipon’?

¹¹ Ang impormasyon nga gitagana sa ‘matinumanon ug maalamong ulipon’ gidisenyo aron sa pagpalig-on sa atong pagtuo ug pagbansay sa atong kagahom sa pag-ila. (Hebreohanon 5:14) Ang maong tambag malangkobon tingali aron katugotan ang matag usa nga mohimog personal nga kapadapatan. Matag karon ug unya, makadawat usab kita ug tambag nga naghisgot sa espesipikong mga bahin sa atong panggawi. Unsang tinamdan ang angay natong batonan kon kita tinuod nga namati sa ginaingon sa espiritu pinaagi sa ulipon nga matang? Si apostol Pablo mitubag: “Magmasinugtanon kamo kanilang nagapanguna taliwala kaninyo ug magmapinasakopon.” (Hebreohanon 13:17) Tinuod, ang tanang nalangkit niining kahikayana maoy dili-hingpit nga mga tawo. Sa gihapon, si Jehova malipay sa paggamit sa iyang tawhanong mga alagad, bisan tuod dili-hingpit, sa paggiya kanato niining panahon sa kataposan.

Giya Gikan sa Atong Tanlag

12, 13. (a) Unsang laing tinubdan sa giya ang gihatag ni Jehova kanato? (b) Dunay unsang positibong impluwensiya ang tanlag bisan diha sa mga tawong walay tukmang kahibalo sa Pulong sa Diyos?

¹² Si Jehova naghatag kanato ug laing tinubdan sa giya—ang atong tanlag. Gilalang niya ang tawo uban ang pansulod nga katakos sa pag-ila sa husto ug sa sayop. Bahin kini sa atong kinaiya. Sa iyang sulat sa mga taga-Roma, si apostol Pablo misaysay: “Dihang ang katawhan sa kanasoran nga walay balaod nagabuhat nga kinaiyanhon sa mga butang sa balaod, kining mga tawhana, bisan tuod walay balaod, maoy balaod ngadto sa ilang kaugalingon. Sila mao mismo ang nagapasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagapanaksi duyog kanila ug, tali sa ilang kaugalingong mga panghunahuna, sila ginasumbong o gani ginapalingkawas.”—Roma 2:14, 15.

¹³ Daghang wala masinati kang Jehova, sa usa ka sukod, makapahiuyon sa ilang mga hunahuna ug aksiyon sa diyosnong mga prinsipyo bahin sa kon unsay husto ug sayop. Sama rag nakadungog sila ug hinayng tingog sa sulod nila nga nagagiya kanila sa hustong direksiyon. Kon tinuod kini niadtong walay tukmang kahibalo sa Pulong sa Diyos, ilabina gayod nga kanang tingog sa sulod mosulti sa kahimtang sa matuod nga mga Kristohanon! Sa pagkatinuod, ang Kristohanong tanlag nga gilunsay sa tukmang kahibalo sa Pulong sa Diyos ug nagbuhat nga nahiuyon sa balaang espiritu ni Jehova makatagana ug kasaligang giya.—Roma 9:1.

14. Sa unsang paagi ang nabansay-sa-Bibliya nga tanlag motabang kanato sa pagsunod sa giya sa espiritu ni Jehova?

¹⁴ Ang usa ka maayong tanlag, usa nga nabansay-sa-Bibliya, makapahinumdom kanato sa dalan nga diha niana buot sa espiritu nga kita molakaw. Duna tingaliy mga panahon sa dihang dili espesipikong mokomento ang Kasulatan ni ang atong mga pinasukad-sa-Bibliya nga mga publikasyon bahin sa usa ka kahimtang nga ato tingaling nahimutangan. Sa gihapon, ang atong tanlag mahimong mopasidaan, mopabantay kanato batok sa lagmit makadaot nga dalan. Sa maong mga kahimtang, ang dili-pagpanumbaling sa gidiktar sa atong tanlag mahimong, sa tinuoray, magkahulogan ug dili-pagpanumbaling sa ginaingon sa espiritu ni Jehova. Sa laing bahin, pinaagi sa pagkat-on sa pagsalig sa atong nabansay nga Kristohanong tanlag, makahimo kita ug maalamong mga pagpili bisan pag walay gisulat nga espesipikong sugo. Apan, hinungdanong hinumdoman nga sa dihang walay hinatag sa Diyos nga prinsipyo, lagda, o balaod, dili husto nga ipugos ang mga panghukom sa atong tanlag diha sa mga isigka-Kristohanon maylabot sa lunlon personal nga mga butang.—Roma 14:1-4; Galacia 6:5.

15, 16. Unsay motukmod sa atong tanlag sa paglihok sa sayop nga paagi, ug sa unsang paagi mapugngan nato nga mahitabo kana?

¹⁵ Ang hinlo, nabansay-sa-Bibliya nga tanlag maoy maayong gasa gikan sa Diyos. (Santiago 1:17) Apan kinahanglang panalipdan nato kining gasaha gikan sa madunotong mga impluwensiya aron kini makalihok sa hustong paagi ingong kahimanan sa moral nga kahilwas. Ang lokal nga mga kostumbre, tradisyon, ug batasan nga kasumpaki sa mga sukdanan sa Diyos, kon sundon, mahimong motukmod sa atong tanlag sa paglihok sa sayop nga paagi ug kini dili na moaghat kanato ngadto sa hustong direksiyon. Basin dili na hinuon kita makahukom sa mga butang sa hustong paagi ug malimbongan pa gani ang atong kaugalingon sa pagtuo nga ang daotang buhat sa pagkatinuod maoy maayo.—Itandi ang Juan 16:2.

 ¹⁶ Kon padayon natong dili-panumbalingon ang mga pasidaan sa atong tanlag, ang tingog niini mag-anam ka hinay hangtod nga dili na kita mobati o dili na sensitibo sa moral. Ang salmista naghisgot sa maong mga tawo sa dihang siya miingon: “Ang ilang kasingkasing dili na mobati sama sa tambok.” (Salmo 119:70) Ang uban nga wala manumbaling sa mga pangaghat sa ilang tanlag nawad-an sa katakos sa paghunahuna sa hustong paagi. Wala na sila magiyahi sa diyosnong mga prinsipyo ug dili na makahimog hustong mga desisyon. Aron malikayan ang maong kahimtang, kinahanglang sensitibo kita sa mga pagtultol sa atong Kristohanong tanlag bisan pag ang mga isyung nalangkit morag gamay ra.—Lucas 16:10.

Malipayon Kadtong Mamati ug Mosugot

17. Samtang mamati kita sa ‘pulong sa atong likod’ ug magpatalinghog sa atong nabansay-sa-Bibliya nga tanlag, sa unsang paagi kita mapanalanginan?

¹⁷ Samtang tukoron nato ang sumbanan sa pagpamati sa ‘pulong sa atong likod’—samtang kini gitagana pinaagi sa Kasulatan ug sa matinumanon ug maalamong ulipon—ug samtang magpatalinghog kita sa mga pahinumdom sa atong nabansay-sa-Bibliya nga tanlag, si Jehova magapanalangin kanato sa iyang espiritu. Ang balaang espiritu, sa baylo, magpauswag sa atong katakos sa pagdawat ug pagsabot sa gisulti ni Jehova kanato.

18, 19. Sa unsang paagi ang giya ni Jehova makabenepisyo kanato diha sa atong ministeryo ug sa atong personal nga kinabuhi?

¹⁸ Ang espiritu ni Jehova magdasig usab kanato sa pag-atubang sa malisod nga mga kahimtang uban ang kaalam ug kaisog. Sama sa kahimtang sa mga apostoles, ang espiritu sa Diyos makapalihok sa atong kagahom sa hunahuna ug makatabang kanato nga kanunayng molihok ug mosulti nga nahiuyon sa mga prinsipyo sa Bibliya. (Mateo 10:18-20; Juan 14:26; Buhat 4:5-8, 13, 31; 15:28) Ang kombinasyon sa espiritu ni Jehova ug sa atong kaugalingong mga paningkamot magpalampos kanato samtang magahimo kita ug hinungdanong mga desisyon sa kinabuhi, nga maghatag kanatog kaisog nga motuman niana nga mga desisyon. Pananglitan, naghunahuna ka tingali nga ipasibo ang imong estilo-sa-kinabuhi aron makagahin ug dugang panahon sa espirituwal nga mga butang. O nag-atubang ka tingali ug hinungdanon, mag-usab sa kinabuhi nga mga pagpili, sama sa pagpili ug kapikas, pagtimbangtimbang sa gitanyag nga trabaho, o pagpalit ug balay. Inay tugotan ang atong tawhanong emosyon nga maoy bugtong pasikaranan sa paghimo sa atong mga desisyon, kinahanglang mamati kita sa ginaingon sa espiritu sa Diyos ug molihok nga nahiuyon sa giya niini.

¹⁹ Giapresyar gayod nato ang malulotong mga pahinumdom ug tambag nga atong madawat gikan sa mga isigka-Kristohanon, lakip na sa mga ansiyano. Bisan pa niana, dili kinahanglang kanunay kitang maghulat sa uban nga maoy magpamatikod kanato sa mga butang. Kon nahibalo kita sa maalamong dalan nga sundon ug kon unsang mga pagpasibo ang atong kinahanglang himoon sa paghimo sa atong tinamdan ug panggawi nga makapahimuot sa Diyos, molihok na ta. Si Jesus miingon: “Kon kamo nahibalo niining mga butanga, malipayon kamo kon ginabuhat ninyo kini sila.”—Juan 13:17.

20. Unsang panalangin ang modangat niadtong namati sa ‘pulong sa ilang likod’?

²⁰ Tin-aw, aron mahibaloan kon unsaon pagpahimuot ang Diyos, ang mga Kristohanon dili na kinahanglang makadungog pa sa usa ka literal nga tingog gikan sa langit, ni kinahanglan silang duawon sa usa ka manulonda. Sila gipanalanginan sa pagkabaton sa sinulat nga Pulong sa Diyos ug mahigugmaong giya pinaagi sa iyang dinihogang matang dinhi sa yuta. Kon sila mainampingong mamati niining ‘pulong sa ilang likod’ ug mosunod sa giya sa ilang nabansay-sa-Bibliya nga tanlag, magmalamposon sila sa pagbuhat sa kabubut-on sa Diyos. Dayon seguradong makita nila nga matuman ang gisaad ni apostol Juan: “Siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.

Mubong Repaso

• Nganong si Jehova nakigsulti sa iyang tawhanong mga linalang?

• Sa unsang paagi kita makabenepisyo gikan sa programa sa makanunayong pagbasa sa Bibliya?

• Sa unsang paagi kita mosanong sa pagtultol gikan sa ulipon nga matang?

• Nganong angay natong panumbalingon ang mga diktar sa nabansay-sa-Bibliya nga tanlag?

[Mga pangutana]

[Hulagway sa panid 13]

Ang tawo wala magkinahanglan ug komplikadong kahimanan aron makadawat ug mga mensahe gikan sa Diyos

[Credit Line]

Courtesy Arecibo Observatory/David Parker/Science Photo Library

[Hulagway sa panid 15]

Si Jehova nagasulti kanato pinaagi sa Bibliya ug pinaagi sa ‘matinumanon ug maalamong ulipon’