Pagbaton ug Pagtuo sa Matagnaong Pulong sa Diyos!
Pagbaton ug Pagtuo sa Matagnaong Pulong sa Diyos!
‘Atong nabatonan ang propetikanhong pulong nga gihimong labi pang tino.’—2 PEDRO 1:19.
1, 2. Unsa ang unang tagna nga natala sukad, ug unsa ang usa ka pangutana nga gipatugbaw niini?
SI Jehova mao ang Tuboran sa unang tagna nga natala sukad. Human makasala si Adan ug Eva, gisultihan sa Diyos ang halas: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:1-7, 14, 15) Molabay una ang daghang siglo ayha pa masabtan sa bug-os ang maong matagnaong mga pulong.
2 Kanang maong unang tagna nagtanyag ug tinuod nga paglaom alang sa makasasalang katawhan. Gipaila sa Kasulatan sa ulahi si Satanas nga Yawa ingong ang “orihinal nga halas.” (Pinadayag 12:9) Apan kinsa ang gisaad nga Binhi sa Diyos?
Pagpangita sa Binhi
3. Sa unsang paagi si Abel nagpasundayag ug pagtuo sa unang tagna?
3 Dili sama sa iyang amahan, ang diyosnon nga si Abel nagpasundayag ug pagtuo sa unang tagna. Si Abel lagmit nahibalo nga ang pag-ula ug dugo gikinahanglan aron sa pagtabon sa sala. Busa ang pagtuo nagpalihok kaniya sa pagtanyag ug usa ka halad nga mananap nga nakitang dalawaton sa Diyos. (Genesis 4:2-4) Bisan pa, ang kailhanan sa gisaad nga Binhi nagpabiling misteryo.
4. Unsang saad ang gihatag sa Diyos kang Abraham, ug unsay gipaila niini bahin sa gisaad nga Binhi?
4 Mga 2,000 ka tuig human sa adlaw ni Abel, gihatagan ni Jehova ang patriarkang Abraham niining matagnaong saad: “Ako magpanalangin gayod kanimo ug ako tinong magpadaghan sa imong binhi sama sa mga bituon sa kalangitan . . . Ug pinaagi sa imong binhi ang tanang nasod sa yuta tinong magapanalangin sa ilang kaugalingon.” (Genesis 22:17, 18) Kadtong mga pulonga naglangkit kang Abraham sa katumanan sa unang tagna. Kini nagpaila nga ang Binhi nga pinaagi kaniya ang mga buhat ni Satanas pagalaglagon motungha sa banay ni Abraham. (1 Juan 3:8) “Tungod sa saad sa Diyos [si Abraham] wala magpalingpaling diha sa kawalay pagtuo” ug ni ang ubang una-Kristohanong mga saksi ni Jehova nga “wala makabaton sa katumanan sa saad.” (Roma 4:20, 21; Hebreohanon 11:39) Hinunoa, sila nagpadayon sa pagtuo sa matagnaong pulong sa Diyos.
5. Diha kang kinsa natuman ang gisaad sa Diyos nga Binhi, ug nganong mao kanay imong tubag?
5 Gipaila ni apostol Pablo ang gisaad nga Binhi sa Diyos sa dihang siya misulat: “Ang mga saad gipamulong ngadto kang Abraham ug sa iyang binhi. Kini wala magaingon: ‘Ug sa mga binhi,’ nga ingon nianang sa kini daghan, kundili ingon nianang sa usa ra: ‘Ug sa imong binhi,’ nga mao si Kristo.” (Galacia 3:16) Ang Binhi nga pinaagi kaniya ang mga nasod magapanalangin sa ilang kaugalingon wala mag-apil sa tanang anak ni Abraham. Ang mga kaliwat sa iyang anak nga si Ismael ug ang mga anak nila ni Keturah dili gamiton sa pagpanalangin sa katawhan. Ang Binhi sa panalangin nagagikan sa iyang anak nga si Isaac ug sa iyang apo nga si Jacob. (Genesis 21:12; 25:23, 31-34; 27:18-29, 37; 28:14) Si Jacob nagpakita nga ang “mga tawo” magmasinugtanon kang Shilo sa tribo ni Juda, apan ang Binhi motungha lamang diha sa banay ni David. (Genesis 49:10; 2 Samuel 7:12-16) Ang unang-siglong mga Hudiyo nagpaabot ug usa ka tawo nga moabot ingong ang Mesiyas, o Kristo. (Juan 7:41, 42) Ug ang tagna sa Diyos bahin sa Binhi natuman diha sa iyang Anak, si Jesu-Kristo.
Ang Mesiyas Mitungha!
6. (a) Unsay atong pagsabot sa tagna sa 70 ka semana? (b) Kanus-a ug sa unsang paagi si Jesus ‘nagtapos sa sala’?
6 Ang manalagnang Daniel nagtala ug usa ka hinungdanong Mesiyanikong tagna. Sa unang tuig ni Dario nga Medianhon, siya nakaamgo nga ang 70 ka tuig nga pagkalumpag sa Jerusalem haduol na sa kataposan niini. (Jeremias 29:10; Daniel 9:1-4) Samtang nag-ampo si Daniel, ang manulondang Gabriel miabot ug miingon nga ‘kapitoan ka semana ang gikatino sa pagtapos sa sala.’ Ang Mesiyas pagaputlon sa tungatunga sa ika-70ng semana. “Ang kapitoan ka semana sa mga tuig” nagsugod sa 455 W.K.P. sa dihang ang Persianong Haring Artaxerxes I ‘nagsugo sa pagtukod pag-usab sa Jerusalem.’ (Daniel 9:20-27; Moffatt; Nehemias 2:1-8) Ang Mesiyas moabot human sa 7 ka semana nga dugangan pag 62 ka semana. Kining 483 ka tuig modagan gikan sa 455 W.K.P. ngadto sa 29 K.P., sa dihang si Jesus gibawtismohan ug gidihogan siya sa Diyos ingong ang Mesiyas, o Kristo. (Lucas 3:21, 22) Si Jesus ‘nagtapos sa sala’ pinaagi sa pagtugyan sa iyang kinabuhi ingong lukat sa 33 K.P. (Marcos 10:45) Pagkamaayong katarongan sa pagbaton ug pagtuo sa matagnaong pulong sa Diyos! a
7. Ginamit ang Kasulatan, ipatin-aw kon sa unsang paagi natuman diha kang Jesus ang Mesiyanikong tagna.
7 Ang pagtuo sa matagnaong pulong sa Diyos nagpaarang kanato sa pagkaila sa Mesiyas. Tali sa daghang Mesiyanikong mga tagna nga natala sa Hebreohanong Kasulatan, ubay-ubay ang gipadapat diha kang Jesus mismo sa mga magsusulat sa Kristohanon Gregong Kasulatan. Sa pag-ilustrar: Si Jesus natawo sa usa ka ulay sa Betlehem. (Isaias 7:14; Miqueas 5:2; Mateo 1:18-23; Lucas 2:4-11) Siya gitawag sa paggawas sa Ehipto, ug ang mga masuso gipamatay human siya natawo. (Jeremias 31:15; Oseas 11:1; Mateo 2:13-18) Gidala ni Jesus ang atong mga sakit. (Isaias 53:4; Mateo 8:16, 17) Ingon sa gitagna, siya misulod sa Jerusalem nga nagsakay sa usa ka laki nga nating asno. (Zacarias 9:9; Juan 12:12-15) Ang mga pulong sa salmista natuman human sa paglansang kang Jesus sa dihang gibahinbahin sa mga sundalo ang iyang besti taliwala kanila ug giripahan ang iyang pangsulod nga sapot. (Salmo 22:18; Juan 19:23, 24) Ang kamatuoran nga walay mga bukog ni Jesus nga nabali ug nga siya giduslak nagtuman usab sa tagna. (Salmo 34:20; Zacarias 12:10; Juan 19:33-37) Kini maoy pipila lamang sa Mesiyanikong mga tagna nga gipadapat diha kang Jesus pinaagi sa dinasig sa Diyos nga mga magsusulat sa Bibliya. b
Himayaa ang Mesiyanikong Hari!
8. Kinsa ang Karaan sa mga Adlaw, ug sa unsang paagi ang tagna nga natala sa Daniel 7:9-14 natuman?
8 Sa unang tuig sa Babilonyanhong Haring Belsazar, gihatagan ni Jehova ang iyang manalagnang Daniel ug usa ka damgo ug talagsaong mga panan-awon. Ang unang nakita sa manalagna mao ang upat ka dagkong mga mananap. Ang manulonda sa Diyos nagpaila kanila ingong “upat ka hari,” busa nagpakita nga kini gisimbolohan sa sunodsunod nga mga gahom sa kalibotan. (Daniel 7:1-8, 17) Sunod nakita ni Daniel si Jehova, ang “Karaan sa mga Adlaw,” nga naglingkod nga mahimayaong naentrono. Gihukman ug kalaglagan ang mga mananap, iyang gikuha gikan kanila ang pagmando ug gilaglag ang ikaupat nga mananap. Ang dumalayong pagmando sa “mga katawhan, nasodnong mga pundok ug mga pinulongan” gitugyan sa maong panahon diha sa “sama sa Anak sa tawo.” (Daniel 7:9-14) Pagkatahom nga tagna labot sa pagkaentrono sa “Anak sa tawo,” si Jesu-Kristo, didto sa mga langit sa tuig 1914!—Mateo 16:13.
9, 10. (a) Sa unsa nagtumong ang nagkalainlaing mga bahin sa damgo nga larawan? (b) Unsaon nimo pagpatin-aw sa katumanan sa Daniel 2:44?
9 Si Daniel nahibalo nga ang Diyos “nagatangtang ug mga hari ug nagpahimutang ug mga hari.” (Daniel 2:21) Nagbaton ug pagtuo kang Jehova, ang “Tigpadayag sa mga tinago,” gibutyag sa manalagna ang kahulogan sa damgo ni Haring Nabucodonosor sa Babilonya nga usa ka dakong larawan. Ang nagkalainlaing mga bahin niini nagtumong sa pagtungha ug pagkapukan sa maong mga gahom sa kalibotan sama sa Babilonya, Medo-Persia, Gresya, ug Roma. Gigamit usab sa Diyos si Daniel sa paglatid sa mga hitabo sa kalibotan hangtod sa atong panahon ug saylo pa.—Daniel 2:24-30.
10 “Sa mga adlaw niadtong mga haria,” nag-ingon ang tagna, “ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Sa dihang natapos ang “tinudlong panahon sa kanasoran” sa 1914, ang Diyos nagtukod sa langitnong Gingharian ilalom ni Kristo. (Lucas 21:24; Pinadayag 12:1-5) Pinaagi sa gahom sa Diyos ang Mesiyanikong “bato” sa Gingharian gisapsap gikan sa “bukid” sa unibersohanong pagkasoberano sa Diyos. Sa Armagedon ang maong bato mohapak sa larawan ug magadugmok niini hangtod mapulbos. Ingong pangkagamhanan nga bukid nga nagaapektar sa “tibuok yuta,” ang Mesiyanikong Gingharian magpabilin sa walay kataposan.—Daniel 2:35, 45; Pinadayag 16:14, 16. c
11. Ang pagkausab sa dagway ni Jesus maoy pagtan-aw daan sa unsa, ug unsay epekto sa maong panan-awon diha kang Pedro?
11 Naghunahuna sa iyang pagmando sa Gingharian, giingnan ni Jesus ang iyang mga tinun-an: “Adunay pipila kanilang nagabarog dinhi nga dili gayod makatilaw ug kamatayon hangtod nga makita nila una ang Anak sa tawo nga moanhi diha sa iyang gingharian.” (Mateo 16:28) Unom ka adlaw sa ulahi, gidala ni Jesus si Pedro, Santiago, ug Juan ngadto sa usa ka taas nga bukid diin ang iyang dagway nausab atubangan kanila. Samtang ang hayag nga panganod milandong sa mga apostoles, ang Diyos miingon: “Kini mao ang akong Anak, ang hinigugma, kinsa akong giuyonan; pamati kamo kaniya.” (Mateo 17:1-9; Marcos 9:1-9) Pagkakatingalahang pagtan-aw daan sa himaya ni Kristo sa Gingharian! Dili ikatingala nga gihisgotan ni Pedro kanang maong sulaw nga panan-awon ug miingon: ‘Tungod niana atong nabatonan ang propetikanhong pulong nga gihimong labi pang tino.’—2 Pedro 1:16-19. d
12. Nganong panahon na gayod kini sa pagpasundayag sa atong pagtuo sa matagnaong pulong sa Diyos?
12 “Ang propetikanhong pulong” dayag nga naglakip dili lamang sa mga tagna sa Hebreohanong Kasulatan bahin sa Mesiyas kondili sa mga pulong usab ni Jesus nga siya moabot “uban ang gahom ug dakong himaya.” (Mateo 24:30) Ang pagkausab sa dagway nagpamatuod sa matagnaong pulong bahin sa mahimayaong pag-abot ni Kristo diha sa Gingharianong gahom. Sa dili madugay, ang pagpadayag niya diha sa himaya magkahulogan ug kalaglagan alang sa mga walay pagtuo ug mga panalangin alang niadtong nagpasundayag ug pagtuo. (2 Tesalonica 1:6-10) Ang katumanan sa tagna sa Bibliya nagpamatuod nga mao na kini ang “kataposang mga adlaw.” (2 Timoteo 3:1-5, 16, 17; Mateo 24:3-14) Ingong Pangunang Tiglaglag ni Jehova, si Miguel, kinsa mao si Jesu-Kristo, andam na sa paglaglag niining daotang sistema sa mga butang panahon sa “dakong kasakitan.” (Mateo 24:21; Daniel 12:1) Nan, panahon na gayod kini sa pagpasundayag nga kita nagbaton ug pagtuo sa matagnaong pulong sa Diyos.
Hupti ang Pagtuo Diha sa Matagnaong Pulong sa Diyos
13. Unsay makatabang kanato sa paghupot sa atong gugma sa Diyos ug magtipig nga buhi sa atong pagtuo diha iyang pulong?
13 Sa pagkatinuod kita nalipay pag-ayo sa dihang una natong nakat-onan ang mga katumanan sa matagnaong pulong sa Diyos. Apan sukad niadto ang ato bang pagtuo nagkawala ug ang atong gugma nagkabugnaw? Hinaot nga dili kita mahisama sa mga Kristohanon sa Efeso kinsa ‘mibiya sa gugma nga ilang gibatonan sa sinugdan.’ (Pinadayag 2:1-4) Bisag unsa na kita ka dugay nga nag-alagad kang Jehova, dako gayod ang mapildi kanato gawas kon kita ‘magpadayon sa pagpangita pag-una sa gingharian sa Diyos ug sa iyang pagkamatarong’ aron makatigom ug mga bahandi sa langit. (Mateo 6:19-21, 31-33) Ang kuging pagtuon sa Bibliya, regular nga pagpakigbahin sa Kristohanong mga tigom, ug madasigong pagsangyaw sa Gingharian nga buluhaton makatabang kanato sa paghupot sa atong gugma alang kang Jehova, sa iyang Anak, ug sa Kasulatan. (Salmo 119:105; Marcos 13:10; Hebreohanon 10:24, 25) Sa ingon, kini magtipig nga buhi sa atong pagtuo sa pulong sa Diyos.—Salmo 106:12.
14. Sa unsang paagi ang dinihogang mga Kristohanon gigantihan sa ilang pagtuo sa matagnaong pulong ni Jehova?
14 Maingon nga ang matagnaong pulong sa Diyos natuman sa miagi, sa ingon kita makabaton ug pagtuo sa gitagna niini alang sa umaabot. Pananglitan, ang presensiya ni Kristo sa Gingharianong gahom natuman na karon, ug ang dinihogang mga Kristohanon nga nagmatinumanon hangtod sa kamatayon nakasinati sa katumanan sa matagnaong saad: “Kaniya nga magamadaogon igatugot ko ang pagkaon sa kahoy sa kinabuhi, nga anaa sa paraiso sa Diyos.” (Pinadayag 2:7, 10; 1 Tesalonica 4:14-17) Gihatagan ni Jesus kining mga madaogon ug pribilehiyo sa “pagkaon sa kahoy sa kinabuhi” diha sa langitnong “paraiso sa Diyos.” Sa ilang pagkabanhaw ug pinaagi ni Jesu-Kristo, ambitan nila ang imortalidad ug pagkadili-madunot nga gihatag ni Jehova, ang “Hari sa kadayonan, dili-madunoton, dili-makita, ang bugtong nga Diyos.” (1 Timoteo 1:17; 1 Corinto 15:50-54; 2 Timoteo 1:10) Pagkadakong ganti alang sa ilang walay-kamatayong gugma sa Diyos ug malig-ong pagtuo sa iyang matagnaong pulong!
15. Diha kang kinsa gipahimutang ang pundasyon sa “bag-ong yuta,” ug kinsa ang ilang mga kauban?
15 Wala magdugay human gibanhaw ang mga dinihogan ngadto sa langitnong “paraiso sa Diyos,” ang nahibilin sa espirituwal nga Israel dinhi sa yuta gihatagan ug kagawasan gikan sa “Dakong Babilonya,” ang imperyo sa bakak nga relihiyon sa kalibotan. (Pinadayag 14:8; Galacia 6:16) Diha kanila ang pundasyon sa “bag-ong yuta” gipahimutang. (Pinadayag 21:1) Sa ingon “usa ka yuta” ang napatungha, ug kini gitukod diha sa espirituwal nga paraiso nga naglambo sa tibuok yuta karong adlawa. (Isaias 66:8) Ngadto niana nagaganayan ang mga panon sa samag-karnero nga mga kauban sa espirituwal nga Israel karon mismo, “sa kataposang bahin sa mga adlaw.”—Isaias 2:2-4; Zacarias 8:23; Juan 10:16; Pinadayag 7:9.
Ang Umaabot sa Katawhan Gitagna Diha sa Matagnaong Pulong sa Diyos
16. Unsay mga palaaboton sa maunongong mga tigpaluyo sa mga dinihogan?
16 Unsay mga palaaboton sa maunongong mga tigpaluyo sa mga dinihogan? Sila usab adunay pagtuo sa matagnaong pulong sa Diyos, ug ang ilang paglaom nasandig sa pagsulod sa yutan-ong Paraiso. (Lucas 23:39-43) Didto sila manginom sa naghatag-kinabuhi nga “suba sa tubig sa kinabuhi” ug mangaayo gikan sa “mga dahon sa mga kahoy” nga gitanom sa kadaplinan niana. (Pinadayag 22:1, 2) Kon aduna kay ingon niana nga maanindot nga paglaom, hinaot nga magpadayon ka sa pagpasundayag ug lalom nga gugma alang kang Jehova ug pagtuo sa iyang matagnaong pulong. Hinaot nga usa ikaw niadtong makasinati ug walay-kinutobang kalipay sa kinabuhing walay kataposan diha sa Paraiso nga yuta.
17. Ang kinabuhi sa yutan-ong Paraiso maglakip ug unsang mga panalangin?
17 Ang mga tawong dili-hingpit dili gayod makahubit sa kinabuhi diha sa umaabot nga yutan-ong Paraiso, apan ang matagnaong pulong sa Diyos naghatag kanato ug pagsabot sa mga panalangin nga naghulat sa maong panahon alang sa masinugtanong katawhan. Sa dihang ang Gingharian sa Diyos magmando nga walay mosupak ug ang iyang kabubut-on matuman sa yuta maingon man sa langit, walay mga tawong mapintas—wala, wala bisan mga mananap—ang mohimog “kadaot o mopahinabog bisan unsang paggun-ob.” (Isaias 11:9; Mateo 6:9, 10) Ang mga maaghop magapuyo sa yuta, ug “sila makakaplag gayod sa ilang tumang kalipay sa kadagaya sa pakigdait.” (Salmo 37:11) Wala nay mga tawo nga gutomon, kay “daghan na unyay mga lugas sa ibabaw sa yuta; sa tumoy sa kabukiran adunay pagkaburaska.” (Salmo 72:16) Wala na unyay motulo nga mga luha sa kaguol. Ang sakit mawala na, ug bisan ang kamatayon wala na. (Isaias 33:24; Pinadayag 21:4) Handurawa lang—walay mga doktor, walay mga tambal, walay mga ospital o mga balay sa mga buang, walay punerarya. Pagkanindot nga mga palaaboton!
18. (a) Unsay gipasalig diha kang Daniel? (b) Unsay “bahin” ni Daniel?
18 Bisan ang komon nga lubnganan sa katawhan pagahaw-asan sanglit ang mga kamatayon moiway alang sa mga pagkabanhaw. Ang matarong nga tawo nga si Job adunay ingon niana nga paglaom. (Job 14:14, 15) Maingon man si manalagnang Daniel, tungod kay gihatagan siya sa manulonda ni Jehova ug makahupayng pasalig: “Kon bahin kanimo, magpadayon ka hangtod sa kataposan; ug ikaw mopahulay, apan ikaw mobarog alang sa imong bahin sa kataposan sa mga adlaw.” (Daniel 12:13) Si Daniel nag-alagad sa Diyos nga matinumanon hangtod sa kataposan sa iyang kinabuhi. Karon siya nagpahulay diha sa kamatayon, apan siya “mobarog” diha sa “pagkabanhaw sa mga matarong” panahon sa Pagmando ni Kristo sa Milenyo. (Lucas 14:14) Unsay “bahin” ni Daniel? Buweno, diha sa katumanan niini sa Paraiso, ang tagna ni Ezequiel nagpaila nga ang tanang katawhan ni Jehova adunay usa ka dapit, diin ang yuta bahinbahinon sa makiangayon ug mahusay nga paagi. (Ezequiel 47:13–48:35) Busa si Daniel adunay dapit diha sa Paraiso, apan ang iyang bahin didto maglangkit ug labaw pa kay sa yuta. Kini maglakip sa iyang dapit diha sa katuyoan ni Jehova.
19. Unsay gikinahanglan alang sa kinabuhi diha sa yutan-ong Paraiso?
19 Unsay ikasulti labot nimo ug sa imong bahin? Kon ikaw adunay pagtuo sa Pulong sa Diyos, ang Bibliya, dakog kalagmitan nga nangandoy kang mabuhi sa yutan-ong Paraiso. Tingali naghanduraw ka nga atua didto, nga nagpahimulos sa daghang panalangin, nag-atiman sa yuta, ug malipayong nagaabiabi sa mga patay. Gawas pa, iya sa katawhan ang Paraiso. Gilalang sa Diyos ang unang tawhanong paris aron mabuhi diha sa maong dapit. (Genesis 2:7-9) Ug buot niya nga ang mga tawong masinugtanon mabuhi sa walay kataposan diha sa Paraiso. Molihok ka ba sumala sa Kasulatan aron maapil ka niadtong bilyonbilyon nga sa ngadtongadto magpuyo diha sa Paraisong yuta? Mahimong makaabot ka didto kon ikaw adunay tinuod nga gugma sa atong langitnong Amahan, si Jehova, ug malungtarong pagtuo sa matagnaong pulong sa Diyos.
[Mga footnote]
a Tan-awa ang kapitulo 11 sa Patalinghogi ang Tagna ni Daniel! ug ang “Seventy Weeks” diha sa Insight on the Scriptures, nga gipatik sa Watchtower Bible and Tract Society of New York, Inc.
b Tan-awa “Ang Tibuok Kasulatan Dinasig sa Diyos ug Mapuslanon,” mga panid 343-4, nga gipatik sa Watchtower Bible and Tract Society of New York, Inc.
d Tan-awa ang artikulo nga nag-ulohang “Patalinghogi ang Matagnaong Pulong sa Diyos,” nga migula sa Ang Bantayanang Torre sa Abril 1, 2000.
Unsaon Nimo Pagtubag?
• Unsa ang unang tagna, ug kinsa ang gisaad nga Binhi?
• Unsa ang pipila ka Mesiyanikong mga tagna nga natuman diha kang Jesus?
• Sa unsang paagi ang Daniel 2:44, 45 matuman?
• Ang matagnaong pulong sa Diyos nagtumong sa unsang umaabot alang sa masinugtanong katawhan?
[Mga pangutana]
[Hulagway sa panid 18]
Ikaw ba nagalaom nga mabuhi sa yutan-ong Paraiso?