Kita ang Matang nga May Pagtuo

Pagpalig-on sa Pagtuo Pinaagi sa Pagtuon sa Bibliya sa India

GIKAN sa maanindot, gitabonag-yelo nga Kabukiran sa Himalaya sa amihanan ngadto sa mainit nga kabaybayonan sa Indian Ocean sa habagatan, ang India maoy yuta sa kadaiyahan, sa geograpiya ug sa relihiyon. Sa populasyon niini nga kapin sa usa ka bilyon, mga 83 porsiyento ang mga Hindu, 11 porsiyento ang mga Muslim, ug ang nahibilin gilangkoban ilabina sa mga Kristohanon sa ngalan lamang, sa mga Sikh, mga Budhista, ug mga Jain. Ang tanan nagtagamtam ug kagawasan sa pagsimba. “Ang relihiyon dunay hinungdanong bahin sa paagi sa pagkinabuhi sa India,” matod pa sa The World Book Encyclopedia.

Ang mga Saksi ni Jehova, kinsa miabot ug kapin sa 21,200 sa India, nagkinabuhi gayod sumala sa ilang Kristohanong pagtuo. Sama sa ilang espirituwal nga mga kauban sa ubang bahin sa kalibotan, ang mga Saksi sa India nag-isip nga usa ka pribilehiyo ang pagtabang sa ilang mga silingan sa pagtukod ug lig-ong pagtuo sa Pulong sa Diyos, ang Balaang Bibliya. (2 Timoteo 3:16, 17) Tagda kon sa unsang paagi ang usa ka pamilya sa Chennai sa habagatang India nakadangat sa kahibalo sa kamatuoran sa Bibliya.

Una pa nila mahimamat ang mga Saksi ni Jehova, kining pamilyaha aktibong nalangkit sa karismatikong mga kalihokan sa Katoliko, nga nag-angkong makakita ug mga panan-awon, makasultig lainlaing mga pinulongan, ug makaayo sa mga masakiton. Ilado sila sa simbahan ug sa komunidad, ang mga tawo motawag pa gani sa ubang mga membro sa pamilya ug “swami,” nga nagkahulogang “ginoo.” Unya usa ka adlaw niana may Saksi nga miduaw sa pamilya ug nagpakita kanila gikan sa Bibliya nga si Jesus mao ang Anak sa Diyos, dili ang Labing Gamhanang Diyos, ingon sa gituohan sa kadaghanan. Gipakita usab sa Saksi ngadto kanila nga ang ngalan sa Diyos maoy Jehova ug nga ang katuyoan ni Jehova alang sa yuta mao ang paghimo niini nga usa ka matahom nga paraiso.—Salmo 83:18; Lucas 23:43; Juan 3:16.

Tungod kay gitahod nila ang Pulong sa Diyos ug nakaangay sa ilang nadunggan, ang mga membro niining pamilyaha miuyon nga regular nga magtuon sa Bibliya uban sa mga Saksi ni Jehova. Tungod niini gibiaybiay sila sa ilang mga kaila sa simbahan. Bisan pa niana, ang pamilya determinado gihapon nga mopadayon sa ilang pagtuon sa Bibliya. Samtang miuswag ang ilang kahibalo ug milig-on pa ang ilang pagtuo, ilang gihunong ang ilang bakak nga relihiyosong mga tulumanon. Karon, tulo ka membro niining pamilyaha maoy masiboton, bawtismadong mga Saksi, ug ang inahan nag-alagad ingong oksilyare payunir kon posible.

Pagtuo Aron Mabuntog ang mga Depekto sa Lawas

Si Sunder Lal, usa ka batan-ong lalaki nga nagpuyo sa balangay sa Punjab, nagkinahanglag dakong pagtuo ug kaisog aron makapakig-ambit sa maayong balita sa Gingharian sa Diyos ngadto sa uban. (Mateo 24:14) Ang usa ka rason mao, gitalikdan niya ang daghag-diyos nga tinuohan sa iyang pamilya ug balangay aron mosimba sa matuod nga Diyos, si Jehova. Ang laing rason, si Sunder Lal walay mga bitiis.

Hangtod sa 1992, usa ka rutina ang kinabuhi si Sunder Lal. Nagtrabaho siya ingong luyoluyo sa doktor ug miduyog sa iyang pamilya sa pagsimba sa lainlaing mga diyos ilalom sa paggiya sa ilang pinili nga relihiyosong magtutudlo. Unya usa ka gabii, natumba siya samtang mitabok sa riles. Naligsan siya sa tren ug naputol ang iyang duha ka bitiis sa may paa. Bisan tuod nabuhi siya, nahugno ang iyang kalibotan. Masabtan kon nganong si Sunder Lal naguol pag-ayo ug naghunahuna pa ganing maghikog. Ang iyang pamilya mapaluyohon,  apan ang iyang kaugmaon morag walay-paglaom.

Unya usa sa mga Saksi ni Jehova miduaw kang Sunder Lal ug nagpakita kaniya gikan sa Bibliya nga ang Diyos nagsaad nga himoon ang yuta nga usa ka matahom nga paraiso ug maghatag ug hingpit nga panglawas sa tanan nga nahigugma ug nahadlok kaniya. Si Sunder Lal miuyon nga magtuon sa Bibliya, ug sulod sa usa ka tuig makugihon siyang nagtuon. Gidapit siya nga motambong sa Kristohanong mga tigom ug sa kataposan mikuyog nga miangkas sa bisikleta sa usa ka higala. Bisan tuod masakit kaayo kadto nga biyahe, ang ganti dako. Ang iyang nakat-onan sa iyang personal nga pagtuon sa Bibliya napalig-on samtang nahimamat niya ang uban kinsa tinuod nga nagtuo sa mga saad sa Pulong sa Diyos ug nagkinabuhi nga kaharmonya sa mga pagtulon-an sa Bibliya.

Si Sunder Lal nagsugod pagpakig-ambit sa maayong balita sa iyang mga silingan, ug sa 1995 siya nabawtismohan. Sa sinugdan, nakig-ambit siya sa ministeryo pinaagi sa pag-aginod gikan sa balay ngadto sa balay diha sa iyang balangay, nga maoy iyang normal nga paagi sa paglakawlakaw. Apan karon duna siyay gasa gikan sa iyang espirituwal nga mga igsoon—usa ka traysikol nga sinangkapan sa espesyal nga paagi aron “mapadagan” sa kamot. Tungod sa traysikol, sa pagkakaron siya mas independente ug makabiyahe ug 12 kilometros nga mag-inusara aron motambong sa mga tigom sa kongregasyon. Usahay magtraysikol siya latas sa bahaong mga habagat; usahay ang temperatura maoy kapin sa 43 grado Celsius.

Dugang pa sa pagtambong sa mga tigom, si Sunder Lal nagdumala ug daghang pagtuon sa Bibliya duyog sa uban kinsa nagtinguha nga makatabang sa pagtukod ug lig-ong pagtuo sa matuod nga Diyos, si Jehova. Sa pagkatinuod, pito sa iyang kanhing mga estudyante sa Bibliya bawtismado na karon, maingon man ang tulo ka lain pang mga tawo nga iyang nakontak apan nagtuon sa Bibliya uban sa kaubang mga Saksi.

“Ang pagtuo,” sumala sa Bibliya, ‘wala mapanag-iya sa tanang tawo.’ (2 Tesalonica 3:2) Apan alang niadtong “sa husto nahimutang alang sa kinabuhing walay-kataposan,” ang regular nga pagtuon sa Pulong sa Diyos makapalig-on sa pagtuo. (Buhat 13:48) Ang maong pagtuon magpadan-ag usab sa mga mata uban ang paglaom sa kahibulongang kaugmaon—usa ka butang nga niana nagkadaghang tawo sa India ang nagpasundayag ug pagtuo.

[Mapa sa panid 30]

(Alang sa aktuwal nga pagkahan-ay, tan-awa ang publikasyon)

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.