Ang Kahulogan ba sa Pulong “Kristohanon” Nagakawala Na?

UNSAY kahulogan sa pagkahimong usa ka Kristohanon? Unsaon nimo kini pagtubag? Ang mga tawo nga gipiling sulagma sa lainlaing mga nasod gisukna nianang pangutanaha, ug aniay pipila sa ilang mga tubag:

“Pagsunod kang Jesus ug pagsundog kaniya.”

“Pagkahimong maayong tawo ug ang pagpaambit ngadto sa uban.”

“Pagdawat kang Kristo ingong Ginoo ug Manluluwas.”

“Pagtambong sa Misa, pagrosaryo, ug pagpangalawat.”

“Dili ko motuo nga kinahanglan kang mosimba aron mahimong usa ka Kristohanon.”

Bisan ang mga diksiyonaryo nagtanyag ug daghan kaayong makapalibog nga mga kahubitan. Ang usa ka diksiyonaryo, sa pagkatinuod, adunay napulo ka kahulogan ubos sa pulong “Kristohanon,” gikan sa “pagtuo o pagkahimong membro sa relihiyon ni Jesu-Kristo” ngadto sa “usa ka desente o presentableng tawo.” Dili makapatingala nga daghan ang maglisod sa pagpatin-aw kon unsay kahulogan sa pagkahimong usa ka Kristohanon.

Kiling sa Pagkahimong Matugoton

Karong adlawa, diha sa pundok sa nag-angkong mga Kristohanon—bisan diha sa pundok niadtong parehas ug relihiyon—ang usa makakaplag ug daghang matang sa panglantaw bahin sa mga ulohan sama sa pag-inspirar sa Diyos sa Bibliya, teoriya sa ebolusyon, pagkalangkit sa simbahan sa politika, ug pagpaambit sa pagtuo sa usa ka tawo ngadto sa uban. Ang moral nga mga isyu, sa mga topiko sama sa aborsiyon, homoseksuwalidad, ug pagpuyopuyo, kasagarang nahimong pugaran sa panaglantugi. Ang dayag nga kiling mao ang pagkahimong matugoton.

Usa ka hukmanan sa simbahan sa Protestante, pananglitan, di pa dugay nga miboto sa pagtuboy sa katungod sa simbahan “sa pagpili ug ministrong dayag nga usa ka homoseksuwal para sa ilang hunta sa mga tigdumala,” nagtaho ang mantalaang Christian Century. Pipila ka teologo ang nagsugyot pa gani sa panglantaw nga ang pagtuo kang Jesus dili hinungdanon sa kaluwasan. Sila nagtuo nga ang mga Hudiyo, Muslim, ug uban pa “mahimong may purohan usab nga makasulod sa langit [sama sa mga Kristohanon],” matod pa sa usa ka taho diha sa The New York Times.

Handurawa kuno ang usa ka Marxista nga nag-awhag ug kapitalismo o usa ka demokrata nga nagpasiugdag pagkadiktador o usa ka tawong batid sa kalikopan nga nagpaluyo sa pagpuril sa kalasangan. “Kanang tawhana dili tinuod nga Marxista o demokrata o batid sa kalikopan,” moingon ka—ug husto ka. Apan, kon imong tagdon ang pagkalainlain sa mga panglantaw nga gihuptan sa nag-angkong mga Kristohanon karon, imong mamatikdan ang mga tinuohan nga lahi kaayo ug kanunayng sumpaki sa gitudlo sa Magtutukod sa Kristiyanidad, si Jesu-Kristo. Unsay ginapakita niana sa ilang matang sa Kristiyanidad?—1 Corinto 1:10.

Ang agda sa pag-usab sa Kristohanong mga pagtulon-an aron ipahaom sa espiritu sa panahon adunay taas nga kasaysayan, ingon sa atong masabtan unya. Unsay pagbati sa Diyos ug ni Jesu-Kristo bahin sa maong mga kausaban? Ang mga iglesya nga nagpasiugda sa mga pagtulon-an nga wala maggikan kang Kristo angayan bang magtawag sa ilang kaugalingon nga Kristohanon? Kining mga pangutanaha pagakonsiderahon sa sunod nga artikulo.