Hupting Masanag ang Imong “Paglaom sa Kaluwasan”!
Hupting Masanag ang Imong “Paglaom sa Kaluwasan”!
“Isul-ob . . . ingong helmet ang paglaom sa kaluwasan.”—1 TESALONICA 5:8.
1. Sa unsang paagi “ang paglaom sa kaluwasan” makatabang sa paglahutay?
ANG paglaom nga maluwas makatabang sa usa ka tawo sa pagpabiling malig-on bisan sa malisod kaayong mga kahimtang. Ang usa ka biktima sa pagkalunod sa barko nga naglutawlutaw sa salbabida makaagwanta ug dugaydugay kon mahibalo siya nga duol na ang tabang. Sa susama, sa libolibong katuigan, ang paglaom diha sa “kaluwasan ni Jehova” nakahatag ug kalig-on sa mga lalaki ug babaye sa pagtuo sa mga panahon sa kalisod, ug kini nga paglaom dili gayod mosangpot ug kahigawad. (Exodo 14:13; Salmo 3:8; Roma 5:5; 9:33) Gipakasama ni apostol Pablo “ang paglaom sa kaluwasan” sa “helmet” sa espirituwal nga hinagiban sa Kristohanon. (1 Tesalonica 5:8; Efeso 6:17) Oo, ang atong pagkamasaligon nga luwason kita sa Diyos mopanalipod sa atong mga kagahom sa panghunahuna, nga motabang kanato sa paghupot sa atong panimuot bisan pa sa kalisod, pagsupak, ug tentasyon.
2. Sa unsang mga paagi “ang paglaom sa kaluwasan” hinungdanon sa matuod nga pagsimba?
2 “Ang paglaom maylabot sa umaabot dili kinaiyanhon sa paganong kalibotan,” ang kalibotan nga naglibot sa unang-siglong mga Kristohanon, nag-ingon ang The International Standard Bible Encyclopedia. (Efeso 2:12; 1 Tesalonica 4:13) Bisan pa niana, “ang paglaom sa kaluwasan” maoy usa ka hinungdanong bahin sa matuod nga pagsimba. Sa unsang paagi? Una, ang kaluwasan sa mga alagad ni Jehova nalanggikit sa iyang kaugalingong ngalan. Ang salmistang Asap miampo: “Tabangi kami, Oh Diyos sa among kaluwasan, alang sa kahimayaan sa imong ngalan; ug luwasa kami.” (Salmo 79:9; Ezequiel 20:9) Dugang pa, ang pagsalig diha sa gisaad nga mga panalangin ni Jehova hinungdanon aron makabaton ug maayong relasyon kaniya. Gipahayag kini ni Pablo niining paagiha: ‘Kon walay pagtuo imposible ang pagpahimuot kaniya pag-ayo, kay siya nga moduol sa Diyos kinahanglang motuo nga siya mao ug nga siya mahimong tigganti sa mga matinuorong nagapangita kaniya.’ (Hebreohanon 11:6) Dugang pa, gipatin-aw ni Pablo nga ang kaluwasan sa mga mahinulsolon mao ang pangunang katarongan sa pag-anhi ni Jesus sa yuta. Siya miingon: “Kasaligan ug takos sa bug-os nga pagdawat ang pamulong nga si Kristo Jesus mianhi sa kalibotan sa pagluwas sa mga makasasala.” (1 Timoteo 1:15) Ug si apostol Pedro naghisgot sa kaluwasan ingong ‘ang sangkoan [o, resulta] sa atong pagtuo.’ (1 Pedro 1:9) Tin-aw, husto nga maglaom ug kaluwasan. Apan unsa man gayod ang kaluwasan? Ug unsay gikinahanglan aron makabaton niini?
Unsa ang Kaluwasan?
3. Unsang matanga sa kaluwasan ang nasinati sa mga alagad ni Jehova sa karaang panahon?
3 Diha sa Hebreohanong Kasulatan, ang “kaluwasan” kasagarang nagkahulogan ug pagluwas o kaluwasan gikan sa pagdaogdaog o gikan sa mapintas, wala-sa-panahon nga kamatayon. Pananglitan, misangpit kang Jehova nga “Magtatagana sa kaluwasan,” si David miingon: “Ang akong Diyos mao ang akong bato. . . . Akong dapit nga kalagiwan, akong Manluluwas; gikan sa kapintasan ikaw nagluwas kanako. Sa Usa nga pagadayegon, si Jehova, ako motawag, ug gikan sa akong mga kaaway ako pagaluwason.” (2 Samuel 22:2-4) Si David nahibalo nga si Jehova mamati sa dihang ang Iyang matinumanong mga alagad mangayog tabang.—Salmo 31:22, 23; 145:19.
4. Unsang paglaom alang sa umaabot nga kinabuhi ang gihandom sa una-Kristohanong mga alagad ni Jehova?
4 Ang una-Kristohanong mga alagad ni Jehova naghandom usab ug paglaom sa umaabot nga kinabuhi. (Job 14:13-15; Isaias 25:8; Daniel 12:13) Sa pagkatinuod, daghan sa mga saad sa pagluwas nga makita diha sa Hebreohanong Kasulatan maoy matagnaon sa labaw pa nga kaluwasan—usa nga motultol sa kinabuhing walay kataposan. (Isaias 49:6, 8; Buhat 13:47; 2 Corinto 6:2) Sa mga adlaw ni Jesus, daghang Hudiyo naglaom ug kinabuhing walay kataposan, apan wala sila modawat kang Jesus ingong yawi aron makab-ot ang ilang paglaom. Gisultihan ni Jesus ang relihiyosong mga pangulo sa iyang panahon: “Kamo nagasusi sa mga Kasulatan, tungod kay kamo nagahunahuna nga pinaagi niini nila kamo makabaton ug kinabuhing walay-kataposan; ug kini sila mao ang mismong nagapanaksi bahin kanako.”—Juan 5:39.
5. Unsa sa kataposan ang kahulogan unya sa kaluwasan?
5 Pinaagi kang Jesus, gipadayag sa Diyos ang lainlaing kahulogan sa kaluwasan. Kini nag-apil sa kagawasan gikan sa pagmando sa sala, gikan sa pagkaulipon sa bakak nga relihiyon, gikan sa kalibotan nga gimandoan ni Satanas, gikan sa kahadlok sa tawo, ug bisan gikan sa kahadlok sa kamatayon. (Juan 17:16; Roma 8:2; Colosas 1:13; Pinadayag 18:2, 4) Sa kataposan, alang sa matinumanong mga alagad sa Diyos, ang kaluwasan pinaagi sa Diyos nagkahulogan ug kaluwasan dili lamang gikan sa pagdaogdaog ug kalisod kondili sa kahigayonan usab nga makabaton ug kinabuhing walay kataposan. (Juan 6:40; 17:3) Si Jesus nagtudlo nga alang sa “gamayng panon,” ang kaluwasan nagkahulogan sa ilang pagkabanhaw ngadto sa langitnong kinabuhi aron makaambit uban kang Kristo sa pagmando sa Gingharian. (Lucas 12:32) Alang sa ubang katawhan, ang kaluwasan nagkahulogan ug pagkapasig-uli ngadto sa hingpit nga kinabuhi ug relasyon uban sa Diyos nga gitagamtam ni Adan ug Eva diha sa tanaman sa Eden sa wala pa sila makasala. (Buhat 3:21; Efeso 1:10) Ang kinabuhing walay kataposan ilalom sa maong paraisonhong mga kahimtang mao ang orihinal nga katuyoan sa Diyos alang sa katawhan. (Genesis 1:28; Marcos 10:30) Apan, sa unsang paagi mapasig-uli ang maong mga kahimtang?
Ang Pasikaranan sa Kaluwasan—Ang Lukat
6, 7. Unsa ang papel ni Jesus diha sa atong kaluwasan?
6 Ang walay kataposang kaluwasan posible lamang pinaagi sa halad lukat ni Kristo. Ngano? Ang Bibliya nagpatin-aw nga sa dihang si Adan nakasala, iyang “gibaligya” ang iyang kaugalingon ug ang tanan niyang umaabot nga mga kaliwat, apil kanato, ngadto sa sala—sa ingon gikinahanglan ang usa ka lukat aron ang katawhan makabaton ug tinuod nga paglaom. (Roma 5:14, 15; 7:14) Ang Diyos magtagana ug lukat alang sa tanang katawhan nga gilandongan diha sa mga halad nga mananap ilalom sa Moisesnong Kasugoan. (Hebreohanon 10:1-10; 1 Juan 2:2) Si Jesus mao ang usa kansang halad nagtuman niadtong matagnaong mga larawan. Ang manulonda ni Jehova miproklamar panahon sa pagkatawo ni Jesus: “Iyang luwason ang iyang katawhan gikan sa ilang kasal-anan.”—Mateo 1:21; Hebreohanon 2:10.
7 Si Jesus milagrosong natawo sa ulay nga si Maria, ug ingong Anak sa Diyos, siya wala makapanunod sa kamatayon gikan kang Adan. Kining kamatuorana uban sa iyang dalan sa hingpit nga pagkamatinumanon naghatag sa iyang kinabuhi sa bili nga gikinahanglan sa pagpalit ug balik sa katawhan gikan sa sala ug kamatayon. (Juan 8:36; 1 Corinto 15:22) Dili sama sa ubang mga tawo, si Jesus wala hukmi nga mamatay tungod sa sala. Siya mituyo pag-anhi sa yuta aron “sa paghatag sa iyang kalag nga usa ka lukat baylo sa daghan.” (Mateo 20:28) Sanglit nakatuman na niini, ang nabanhaw ug naentrono na karong Jesus anaa sa posisyon sa paghatag ug kaluwasan ngadto sa tanan nga makaabot sa mga kinahanglanon sa Diyos.—Pinadayag 12:10.
Unsay Gikinahanglan Aron Makabaton ug Kaluwasan?
8, 9. (a) Sa unsang paagi gitubag ni Jesus ang pangutana sa usa ka adunahang batan-ong magmamando bahin sa kaluwasan? (b) Sa unsang paagi gigamit ni Jesus kining okasyona sa pagtudlo sa iyang mga tinun-an?
8 Kas-a, usa ka adunahang batan-ong magmamandong Israelinhon nangutana kang Jesus: “Unsay kinahanglan kong buhaton aron makapanunod sa kinabuhing walay-kataposan?” (Marcos 10:17) Ang iyang pangutana tingali nagpabanaag sa kasagarang kaisipan sa Hudiyohanon sa iyang panahon—nga ang Diyos nangayog pipila ka maayong mga buhat ug nga pinaagi sa paghimog igoigo niadtong mga buluhatona, ang usa makabaton ug kaluwasan gikan sa Diyos. Apan kanang matanga sa pormal nga debosyon mahimong nagatubod sa hakog nga mga motibo. Ang maong mga buhat napakyas sa pagtaganag seguradong paglaom sa kaluwasan, sanglit walay tawong dili-hingpit ang makaabot gayod sa mga sukdanan sa Diyos.
9 Sa pagtubag sa pangutana sa tawo, gipahinumdoman lamang siya ni Jesus nga kinahanglang tumanon niya ang mga kasugoan sa Diyos. Ang batan-ong magmamando dalidaling mipasalig kang Jesus nga iyang gihimo na kini sukad sa bata pa siya. Tungod sa iyang tubag si Jesus natandog sa pagbati ug gugma alang kaniya. Si Jesus miingon kaniya: “Usa ka butang ang kulang bahin kanimo: Lakaw, ibaligya ang unsa mang mga butang nga imong gibatonan ug ipanghatag sa mga kabos, ug makabaton ka ug bahandi sa langit, ug umari magmahimong akong sumusunod.” Apan, ang batan-ong lalaki milakaw nga naguol, “kay naghupot man siya ug daghang kabtangan.” Human niadto gipasiugda ni Jesus ngadto sa iyang mga tinun-an nga ang sobrang pagmahal sa mga katigayonan niining kalibotana makababag sa pagkabaton ug kaluwasan. Siya midugang nga walay makabaton ug kaluwasan pinaagi sa iyang kaugalingong paningkamot. Apan si Jesus mipadayon sa pagpasalig kanila: “Sa mga tawo imposible kini, apan dili ingon niini sa Diyos, kay ang tanang butang posible sa Diyos.” (Marcos 10:18-27; Lucas 18:18-23) Sa unsang paagi mahimong posible ang kaluwasan?
10. Unsang mga kondisyona ang kinahanglan natong kab-oton aron makabaton ug kaluwasan?
10 Ang kaluwasan maoy usa ka gasa gikan sa Diyos, apan dili kini moabot dihadiha dayon. (Roma 6:23) Adunay pipila ka pasikaranang mga kondisyon nga kinahanglang kab-oton sa matag tawo aron mahimong takos alang niana nga gasa. Si Jesus miingon: ‘Kay gihigugma pag-ayo sa Diyos ang kalibotan mao nga iyang gihatag ang iyang bugtong Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.’ Ug si apostol Juan midugang: “Siya nga nagapasundayag ug pagtuo sa Anak adunay kinabuhing walay-kataposan; siya nga dili-mosunod sa Anak dili makakita sa kinabuhi.” (Juan 3:16, 36) Tin-aw, ang Diyos nagkinahanglan ug pagtuo ug pagkamasinugtanon gikan sa matag usa ka tawo nga naglaom nga makabaton ug walay kataposang kaluwasan. Ang matag usa kinahanglang mohimog desisyon sa pagdawat sa lukat ug sa pagsunod sa mga tunob ni Jesus.
11. Sa unsang paagi mabatonan sa usa ka tawong dili-hingpit ang pag-uyon ni Jehova?
11 Sanglit kita dili man hingpit, dili nato kinaiya nga makiling sa pagkahimong masinugtanon ug imposible nga kita bug-os nga makasunod. Maoy hinungdan nga si Jehova mitagana ug lukat sa pagtabon sa atong mga sala. Bisan pa niana, kita kinahanglang maningkamot kanunay nga magkinabuhi sumala sa mga dalan sa Diyos. Sama sa giingon ni Jesus sa adunahang batan-ong magmamando, atong sundon gayod ang kasugoan sa Diyos. Ang pagsunod mosangpot dili lamang sa pag-uyon sa Diyos kondili sa dakong kalipay usab, kay ang “iyang mga sugo dili man mabug-at”; kini “makapalagsik.” (1 Juan 5:3; Proverbio 3:1, 8) Bisan pa niana, dili sayon ang pagpabilin sa paglaom sa kaluwasan.
“Kusganong Makigbugno Alang sa Pagtuo”
12. Sa unsang paagi ang paglaom sa kaluwasan makapalig-on sa usa ka Kristohanon sa pagsukol sa imoral nga mga tentasyon?
12 Ang tinun-ang si Judas nagtinguha sa pagsulat ngadto sa unang mga Kristohanon bahin sa “kaluwasan nga gihuptan [nilang] tanan.” Apan, ang naglungtad nga daotang kahimtang sa moral nagtukmod kaniya sa pagtambag sa iyang mga igsoon nga “kusganong makigbugno alang sa pagtuo.” Oo, aron maluwas dili igo ang pagkaadunay pagtuo, ang pagpabiling maunongon sa matuod nga Kristohanong pagtuo, ug ang pagsunod kon hapsay ang lakat sa tanang butang. Ang atong debosyon kang Jehova kinahanglang may igong kalig-on sa pagtabang kanato nga makasukol sa mga tentasyon ug imoral nga mga impluwensiya. Bisan pa niana, ang paghinobra sa sekso ug mga kahiwian, pagkawalay-pagtahod sa awtoridad, mga panagbahinbahin, ug mga pagduhaduha nakadaot sa espiritu sa unang-siglong kongregasyon. Aron sila matabangan sa pagsukol niining mga kilinga, giawhag ni Judas ang kaubang mga Kristohanon nga isilsil gayod sa hunahuna ang ilang tumong: “Mga hinigugma, pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, ipabilin ang inyong kaugalingon diha sa gugma sa Diyos, samtang kamo nagapaabot sa kaluoy sa atong Ginoong Jesu-Kristo nga nagalantaw sa kinabuhing walay-kataposan.” (Judas 3, 4, 8, 19-21) Ang paglaom nga makabaton ug kaluwasan makapalig-on kanila sa ilang pagpakigbugno aron makapabiling hinlo sa moral.
13. Sa unsang paagi atong ikapasundayag nga wala nato sipyata ang katuyoan sa dili-takos nga kalulot sa Diyos?
13 Si Jehova nga Diyos nagdahom ug dalayegong moral nga panggawi sa bahin niadtong iyang pagahatagan ug kaluwasan. (1 Corinto 6:9, 10) Apan, ang pagpabilin diha sa moral nga mga sukdanan sa Diyos wala magkahulogan nga mahimong mahukmanon sa uban. Dili kita ang mohukom sa walay kataposang dulnganan sa atong mga isigkatawo. Hinunoa, ang Diyos mao ang mohukom, ingon sa gisulti ni Pablo ngadto sa mga Grego sa Atenas: “Siya nakatakda na ug adlaw nga iyang ginatuyo nga hukman ang gipuy-ang yuta sa pagkamatarong pinaagi sa usa ka tawo kinsa iyang gikatudlo”—si Jesu-Kristo. (Buhat 17:31; Juan 5:22) Kon kita nagkinabuhi pinaagi sa pagtuo sa halad lukat ni Jesus dili nato angay kahadlokan ang pag-abot sa adlaw sa paghukom. (Hebreohanon 10:38, 39) Ang hinungdanon mao nga kita dili gayod ‘modawat sa dili-takos nga kalulot sa Diyos [atong pagkapasig-uli ngadto kaniya pinaagi sa lukat] ug sipyaton ang katuyoan niini’ pinaagi sa pagtugot sa atong kaugalingon nga matental sa sayop nga panghunahuna ug panggawi. (2 Corinto 6:1) Dugang pa, pinaagi sa pagtabang sa uban nga makabaton ug kaluwasan, kita nagpakita nga wala nato sipyata ang katuyoan sa kaluoy sa Diyos. Sa unsang paagi atong matabangan sila?
Pagpaambit sa Paglaom sa Kaluwasan
14, 15. Ngadto kang kinsa gitudlo ni Jesus ang pagmantala sa maayong balita sa kaluwasan?
14 Nagkutlo kang manalagnang Joel, si Pablo nagsulat: “Ang tanang nanagtawag sa ngalan ni Jehova mamaluwas.” Dayon siya midugang: “Apan, unsaon nila pagtawag kaniya kang kinsa wala sila magbutang ug pagtuo? Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali?” Diha sa ulahing pipila ka bersikulo, si Pablo nagpasiugda nga ang pagtuo dili kinaiyanhong moabot; hinunoa, kini “mosunod sa butang nadungog,” sa ato pa, ang “pulong mahitungod kang Kristo.”—Roma 10:13, 14, 17; Joel 2:32.
15 Kinsay magdala sa “pulong mahitungod kang Kristo” ngadto sa kanasoran? Gitudlo ni Jesus kanang buluhatona ngadto sa iyang mga tinun-an—ngadto niadtong natudloan na sa maong “pulong.” (Mateo 24:14; 28:19, 20; Juan 17:20) Sa dihang makigbahin kita sa buluhatong pagsangyaw sa Gingharian ug paghimog tinun-an, ginahimo nato ang gisulat mismo ni apostol Pablo, niining higayona nagkutlo kang Isaias: “Pagkatahom sa mga tiil niadtong mga nagapahayag sa maayong balita sa maayong mga butang!” Bisan pag daghan ang dili modawat sa maayong balita nga atong ginadala, ang atong mga tiil ‘matahom’ gihapon alang kang Jehova.—Roma 10:15; Isaias 52:7.
16, 17. Nag-alagad sa unsang duha ka katuyoan ang atong buluhaton sa pagsangyaw?
16 Ang pagtuman niining buluhatona magsilbi sa duha ka hinungdanong mga katuyoan. Una, ang maayong balita kinahanglang iwali aron ang ngalan sa Diyos mabayaw ug kadtong gustong makabaton ug kaluwasan mahibalo kon asa modangop. Nasabtan ni Pablo kining bahina sa sugo. Siya miingon: “Sa pagkatinuod, si Jehova nagbutang ug sugo kanamo niining mga pulonga, ‘Gitudlo ko ikaw ingong usa ka kahayag sa kanasoran, aron ikaw mahimong usa ka kaluwasan hangtod sa kinatumyan sa yuta.’” Busa, ingong mga tinun-an ni Kristo, ang matag usa kanato kinahanglang makigbahin sa pagdala sa mensahe sa kaluwasan ngadto sa mga tawo.—Buhat 13:47; Isaias 49:6.
17 Ikaduha, ang pagsangyaw sa maayong balita magpahimutang sa pundasyon alang sa matarong nga paghukom sa Diyos. Mahitungod niana nga paghukom, si Jesus miingon: “Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono. Ug ang tanang kanasoran tigomon atubangan kaniya, ug siya maglain sa katawhan gikan sa usag usa, maingon sa usa ka pastol nga nagalain sa mga karnero gikan sa mga kanding.” Bisan pag ang pagpanghukom ug paglain pagahimoon “sa dihang moabot ang Anak sa tawo diha sa iyang himaya,” ang buluhatong pagsangyaw naghatag sa mga tawo karon ug kahigayonan sa pag-ila sa espirituwal nga mga igsoon ni Kristo ug sa ingon molihok sa pagpaluyo kanila alang sa ilang kaugalingong walay kataposang kaluwasan.—Mateo 25:31-46.
Hupti “ang Bug-os nga Kasegurohan sa Paglaom”
18. Sa unsang paagi atong mahuptang masanag ang atong “paglaom sa kaluwasan”?
18 Ang atong aktibong pagpakigbahin sa buluhatong pagsangyaw maoy usa usab ka paagi sa pagtabang kanato nga mahuptang masanag ang atong paglaom. Si Pablo nagsulat: “Kami nagatinguha nga ang matag usa kaninyo magpakita sa samang kakugi aron mabatonan ang bug-os nga kasegurohan sa paglaom hangtod sa kataposan.” (Hebreohanon 6:11) Nan, hinaot nga isul-ob sa matag usa kanato “ingong helmet ang paglaom sa kaluwasan,” sa ingon naghinumdom nga ang “Diyos migahin kanato, dili alang sa kapungot, kundili aron sa pagbaton sa kaluwasan pinaagi sa atong Ginoong Jesu-Kristo.” (1 Tesalonica 5:8, 9) Atong isilsil usab sa kasingkasing ang tambag ni Pedro: “Lig-ona ang inyong kaisipan alang sa buluhaton, hupti sa bug-os ang inyong mga panimuot; ibutang ang inyong paglaom diha sa dili-takos nga kalulot nga igapadangat kaninyo.” (1 Pedro 1:13) Ang tanan nga motuman niini makakita sa ilang “paglaom sa kaluwasan” nga bug-os nga matuman!
19. Unsay atong hisgotan sa sunod nga artikulo?
19 Sa kasamtangan, unsay atong angayng panghunahuna sa panahon nga nahibilin niining sistemaha? Sa unsang paagi magamit nato kanang panahona aron makabaton ug kaluwasan alang sa atong kaugalingon ug sa uban? Atong hisgotan kining mga pangutanaha sa sunod nga artikulo.
Makapatin-aw Ka Ba?
• Nganong kinahanglang huptan natong masanag ang atong “paglaom sa kaluwasan”?
• Unsay naapil sa kaluwasan?
• Unsay kinahanglan natong himoon aron madawat ang gasa sa kaluwasan?
• Unsay mapalampos sa atong buluhatong pagsangyaw diha sa katuyoan sa Diyos?
[Mga pangutana]
[Mga hulagway sa panid 10]
Ang kaluwasan nagkahulogan ug labaw pa kay sa pagkaluwas lamang gikan sa kalaglagan