Musika nga Makapahimuot sa Diyos

Ang musika gihubit ingong “kinakaraanan ug labing kinaiyanhon sa tanang belyas artes.” Sama sa pinulongan, kini usa ka talagsaong gasa nga nagpalahi sa mga tawo gikan sa mga mananap. Ang musika mopukaw sa pagbati. Kini mananoyng paminawon ug magpabilin sa hunahuna. Labaw sa tanan, ang musika makapahimuot sa Diyos.

SUMALA sa gipakita sa Bibliya, ang mga Israelinhon maoy mga tawo nga mahiligon sa musika. Ang musika maoy “prominenteng arte sa karaang kapanahonan sa Bibliya,” mikomento ang Unger’s Bible Dictionary. Ingong bahin sa adlaw-adlawng kinabuhi, ang giawit ug gitugtog sa tulonggon nga musika maoy bahin sa ilang pagsimba. Apan ang tingog sa tawo maoy kaylap nga gigamit.

Si Haring David nagtudlo ug mga hawas taliwala sa mga Levihanon “aron sa pagdirihir sa pag-awit” diha sa tabernakulo, una pa inagurahi ang templo nga gitukod ni Solomon, nga iyang anak. (1 Cronicas 6:31, 32) Sa dihang ang arka sa tugon, nga naghawas sa presensiya ni Jehova, miabot sa Jerusalem, gihikay ni David nga ang uban sa mga Levihanon “magsaulog ug magpasalamat ug magdayeg kang Jehova.” Ilang giduyogan ang ilang mga awit sa pagdayeg “sa mga instrumento nga kinuwerdasan ug sa mga alpa, . . . sa mga piyangpiyang nga gitugtog ug kusog, . . . sa mga trompeta.” Kining mga tawhana “gitudlo pinaagig mga ngalan sa pagpasalamat kang Jehova, tungod kay ‘hangtod sa panahong walay tino ang iyang mahigugmaong-kalulot.’”—1 Cronicas16:4-6, 41; 25:1.

Ang koro nga “ang mahigugmaong-kalulot [ni Jehova] maoy hangtod sa panahong walay tino” kadaghang makita diha sa mga Salmo, ang basahon sa Bibliya nga labing nalangkit sa musika. Pananglitan, mao kini ang ikaduhang bahin sa matag usa sa 26 ka bersikulo sa Salmo 136. “Ang kamubo niini naghimo niini nga daling litokon sa mga tawo,” matod sa usa ka eskolar sa Bibliya. “Ang tanan, kay nakadungog na niana, makahinumdom niana.”

Ang mga superscription sa mga salmo nagpakita sa kaylap nga paggamit sa mga instrumento sa musika. Ang Salmo 150 naghisgot sa trompeta,  alpa, tamborin, plawta, ug mga piyangpiyang, dugang pa sa kinuwerdasang mga instrumento. Bisan pa niana, ang pangunang gigamit mao ang tingog sa tawo. Ang bersikulo 6 nag-awhag: “Ang tagsatagsa nga may gininhawa—padayega kini kang Jah. Dayega ninyo si Jah!”

Sanglit ang musika nagpahayag sa atong pagbati, ang masulub-ong mga hunahuna sa kapanahonan sa Bibliya nag-aghat sa pagkomposo sa mga awit sa pagbakho o mga laylay. Apan, kining matanga sa pag-awit maoy diha lamang sa listahan sa musika sa Israel. “Diha lamang sa awit sa pagbakho o pagbangotan nga angayan ang estilo nga paglaylay diha kaha sa tono sa musika o sa pag-usab-usab sa tingog ug sa binabang pagpasiugda sa putling pinulongan,” matod pa sa ensiklopedia sa Bibliya nga Insight on the Scriptures. a

Si Jesus ug ang iyang matinumanong mga apostol nag-awit ug mga pagdayeg kang Jehova sa gabii una mamatay si Jesus, sa walay duhaduha nag-awit sa mga pulong sa Hallel nga mga Salmo. (Salmo 113-118) Tinong nagpalig-on kini sa mga tinun-an ni Jesus sa pag-atubang sa kamatayon sa ilang Agalon! Labaw pa niana, ang ilang determinasyon sa pagpabiling matinumanong mga alagad sa Supremong Soberano sa uniberso, si Jehova, lagmit gayod nga napalalom samtang sila kalimang miawit sa koro nga “kay ang iyang mahigugmaong-kalulot maoy hangtod sa panahong walay-tino.”—Salmo 118:1-4, 29.

Ang unang mga Kristohanon sa Efeso ug Colosas miawit ug “mga salmo ug mga pagdayeg sa Diyos” (sa literal, “mga himno”). Niini ilang gidugang ang “espirituwal nga mga awit” nga giawit diha sa ilang kasingkasing. (Efeso 5:19; Colosas 3:16) Pinaagi sa awit ug pulong, sila haom nga naggamit sa ilang mga baba sa pagbungat ug mga pagdayeg. Wala ba mopahayag si Jesus nga “gikan sa kadagaya sa kasingkasing ang baba mosulti”?—Mateo 12:34.

Musika nga Dili-Makapahimuot sa Diyos

Dili tanang musika nga gihisgotan sa Bibliya ang nakapahimuot sa Diyos. Tagda ang nahitabo sa Bukid sa Sinai, diin nadawat ni Moises ang Balaod, lakip na ang Napulo ka Sugo. Sa dihang milugsong si Moises sa bukid, unsay iyang nadungog? “Dili tingog sa pag-awit tungod sa gamhanang buhat,” “dili tingog sa pag-awit sa kaparotan,” kondili “tingog sa laing matang sa pag-awit.” Kini maoy musika nga nalangkit sa idolatriya, usa ka buhat nga nakapasuko sa Diyos ug miresulta sa kamatayon sa mga 3,000 niadtong mga nanag-awit.—Exodo 32:18, 25-28.

Bisan tuod ang mga tawo makakomposo, makatugtog, ug makapahimulos sa tanang matang sa musika, dili buot ipasabot nga ang tanan niini makapahimuot sa Diyos. Nganong dili? Ang Kristohanong apostol Pablo misaysay: “Ang tanan nakasala ug wala makaabot sa himaya sa Diyos.” (Roma 3:23) Ang paganong mga rituwal sa pertilidad, ang doktrina sa pagkadili-mamatay sa tawhanong kalag, ug ang pagsimba kang Maria ingong “inahan sa Diyos” kasagarang maoy topiko sa mga alawiton. Bisan pa niana, kining maong mga tinuohan ug mga buhat wala magpasidungog sa Diyos sa kamatuoran, kay kini kasumpaki sa gipadayag diha sa iyang inspiradong Pulong, ang Bibliya.—Deuteronomio 18:10-12; Ezequiel 18:4; Lucas 1:35, 38.

Paghimog Maalamong Pagpili sa Musika

Ang pagpili sa mabatonang musika makapalibog. Ang mga hapin sa mga compact disc gidisenyo aron madani ang mga pumapalit sa tanang matang sa girekord nga musika. Apan kon ang usa ka magsisimba sa Diyos buot nga magpahimuot Kaniya, mag-amping siya ug mopili sa maalamong paagi aron malikayan ang giawit ug gitugtog sa instrumento nga musika nga giinspirar sa bakak nga relihiyosong mga tinuohan o nasentro sa imoralidad ug demonismo.

Si Albert, kinsa nag-alagad kanhi ingong Kristohanong misyonaryo sa Aprika, miangkon nga diyutay ra siyag kahigayonan sa pagtugtog sa piano didto. Apan, balikbalik siyang namati sa pipila ka long playing nga plaka nga iyang gidala. Balik sa iyang nasod nga natawhan, si Albert nagduawan karon sa Kristohanong mga kongregasyon ingong nagapanawng magtatan-aw. Limitado na ang iyang panahon sa pagpamati sa musika. “Ang akong paboritong tigkomposo mao si Beethoven,” matod niya. “Latas sa katuigan, nakatigom ako ug mga plaka sa iyang mga simponiya, konserto, sonata, ug kuwartet.” Ang pagpamati niini nakalingaw gayod kaniya. Siyempre, ang matag tawo dunay kaugalingong gusto nga musika, apan ingong mga Kristohanon hinumdoman nato ang tambag ni Pablo: “Kon kamo man magakaon o magainom o magabuhat sa unsa pang butang, himoa ang tanang butang alang sa kahimayaan sa Diyos.”—1 Corinto 10:31.

 Musika ug Pagpahinungod

Ang unang gikaikagan ni Susie mao ang musika. “Nagsugod ako sa pagtugtog sa piano sa edad nga 6, sa biolin sa 10, ug sa kataposan sa alpa sa 12,” misaysay siya. Sa ulahi si Susie mieskuyla sa Royal College of Music sa London, Inglaterra, aron magtuon sa pagtugtog ug alpa. Nagtuon siya sulod sa upat ka tuig uban sa iladong Katsilang manunugtog sa alpa ug usa pa ka tuig sa Paris Conservatoire, nga nakadawat ug mga pasidungog sa musika maingon man mga diploma tungod sa pagtugtog sa alpa ug pagtudlo ug piano.

Si Susie nakig-uban sa usa ka kongregasyon sa mga Saksi ni Jehova sa London. Didto nakaplagan niya ang tiunayng interes ug gugma taliwala sa kaubang mga Saksi. Sa hinayhinay, ang iyang gugma kang Jehova mitubo, ug ang iyang kasibot sa pag-alagad kaniya nagtukmod kaniya sa pagpangitag mga paagi sa pag-alagad kaniya. Misangpot kini sa pagpahinungod ug pagpabawtismo. “Ang paghimo sa musika nga usa ka karera maoy usa ka napahinungod nga paagi sa pagkinabuhi, busa ang kinabuhi nga napahinungod dili bag-o alang kanako,” matod pa ni Susie. Ang iyang panahon sa pagtugtog diha sa mga konsiyerto mikunhod samtang nakig-ambit siya sa Kristohanong ministeryo sa pagsangyaw sa maayong balita sa Gingharian sa Diyos ingong pagsugot sa mga instruksiyon ni Jesus.—Mateo 24:14; Marcos 13:10.

Karon nga mogugol lamang siyag limitadong panahon sa pagtugtog, unsay iyang gibati? “Usahay medyo mahigawad nga kulang kog panahon sa pagbansay,” miangkon siya, “apan motugtog gihapon ko sa akong mga instrumento ug malingaw sa musika. Ang musika maoy gasa gikan kang Jehova. Mas malingaw ako niini karon nga maoy una sa akong kinabuhi ang pag-alagad kaniya.”—Mateo 6:33.

Musika nga Nagdayeg sa Diyos

Si Albert ug Susie duyog sa duolan sa unom ka milyon pang Saksi ni Jehova regular nga nanagdayeg kang Jehova nga Diyos pinaagi sa musika. Diha sa Kristohanong mga tigom nga gipahigayon diha sa mga Kingdom Hall sa 234 ka kayutaan, ilang sugdan ug taposon ang ilang mga tigom, kon posible, pinaagi sa pag-awit ngadto kang Jehova. Diha sa major ug minor key, ang mananoyng mga awit dunay pinasukad sa Kasulatan nga mga liriko sa pagdayeg kang Jehova nga Diyos.

Ang tanang nanambong magpatugbaw sa ilang mga tingog aron sa pag-awit nga madasigon nga si Jehova maoy mahangawaon nga Diyos (Awit 44). Sila moawit ug pagdayeg kang Jehova (Awit 190). Ang ilang mga awit nag-ila sa kalipay ug mga responsibilidad sa Kristohanong panag-igsoonay, Kristohanong pagkinabuhi, ug Kristohanong mga hiyas. Nakadugang sa ilang kahimuot ang nagkadaiyang estilo sa musika nga gigamit sa mga Saksi gikan sa Amerika del Norte ug Sur, Asia, Australia, ug Uropa sa dihang nagkomposo sa mga awit. b

“Pag-awit alang kang Jehova ug usa ka bag-ong awit. Manag-awit kamo alang kang Jehova, kamong tanang tawo sa yuta. Manag-awit kamo alang kang Jehova, dayegon ninyo ang iyang ngalan,” mao ang pangbukas nga mga pulong sa maanindot kaayong harianong awit nga gisulat sa adlaw sa salmista. “Sa adlaw-adlaw imantala ang maayong balita sa kaluwasan pinaagi kaniya. Ipahayag taliwala sa kanasoran ang iyang himaya, taliwala sa tanang katawhan ang iyang kahibulongang mga buhat.” (Salmo 96:1-3) Mao kini ang ginabuhat sa mga Saksi ni Jehova diha sa imong dapit, ug sila nagadapit kanimo sa pagduyog sa pag-awit niini nga pagdayeg. Abiabihon ka diha sa ilang mga Kingdom Hall, diin makakat-on ka kon unsaon pagdayeg si Jehova pinaagig musika nga makapahimuot kaniya.

[Mga footnote]

[Hulagway sa panid 28]

Pag-awit ug mga pagdayeg kang Jehova