Mga Magmamantala sa Gingharian Nagtaho

Pagsinati sa Mahigugmaong Diyos

SA EDAD nga 16, usa ka Braziliano nga ginganlag Antônio ang nahigawad na sa kinabuhi. Ang pagbati sa pagkawalay-pulos mitultol kaniya sa pag-abuso sa droga ug alkoholismo. Kanunay siyang naghunahuna nga maghikog. Nianang mga higayona nga iyang nahinumdoman ang gisulti sa iyang inahan kaniya: “Ang Diyos gugma.” (1 Juan 4:8) Apan hain man kining mahigugmaong Diyos?

Sa paningkamot nga maulian gikan sa iyang pag-abuso sa droga ug alkoholikong ilimnon, si Antônio nangayog tabang sa kura paroko sa ilang dapit. Bisan pag si Antônio nahimong aktibo kaayo sa Iglesya Katolika, daghan gihapon siyag mga pangutana. Pananglitan, ang mga pulong ni Jesus, “Inyong mahibaloan ang kamatuoran, ug ang kamatuoran magpagawas kaninyo” nakapalibog kaniya. (Juan 8:32) Unsang matanga sa kagawasan ang gisaad ni Jesus? Ang iglesya dili makahatag ug bisan unsang makapatagbaw nga mga tubag sa iyang mga pangutana. Sa ngadtongadto, si Antônio dili na aktibo ug mibalik sa iyang karaang mga bisyo. Sa pagkatinuod, migrabe pa ang iyang pagkagiyan.

Nianang mga tungora, ang asawa ni Antônio, si Maria, misugod sa pagtuon sa Bibliya uban sa mga Saksi ni Jehova. Bisan tuod wala mosupak sa iyang pagtuon, giisip ni Antônio ang mga Saksi ingong “Amerikanhong relihiyon nga nag-alagad sa intereses sa imperyalismo sa Amerika.”

Wala mawad-ig kadasig, nagbilin si Maria diha sa lainlaing bahin sa balay ug mga kopya sa mga magasing Bantayanang Torre ug Pagmata! nga naghisgot sa mga artikulo nga iyang gihunahunang makapaikag kang Antônio. Sanglit ganahang mobasa si Antônio, matag karon ug unya daklit siyang mobasa sa mga magasin kon wala diha ang iyang asawa. Sa unang higayon sa iyang kinabuhi, nakakaplag siyag mga tubag sa iyang mga pangutana sa Bibliya. “Namatikdan usab nako ang gugma ug kalulot nga gipakita kanako sa akong asawa ug sa mga Saksi,” siya nahinumdom.

Sa tungatungang bahin sa 1992, nakahukom si Antônio nga buot usab niyang magtuon sa Bibliya uban sa mga Saksi ni Jehova. Ugaling, nagpadayon siya sa pag-abusog droga ug paghuboghubog. Usa ka halawom nga kagabhion samtang siya ug ang iyang higala mipauli gikan sa usa ka timawang dapit sa lungsod, gisanta sila sa polis. Sa dihang ang polis may nakaplagan nga cocaine kang Antônio, sila misugod sa pagkulata kaniya. Gitulod siya sa usa ka polis ngadto sa lunang ug gition ang pusil sa iyang nawong. “Tiwasi na!” misinggit ang laing polis.

Samtang si Antônio naghay-ad diha sa lunang, iyang nahinumdoman ang iyang kinabuhi. Ang bugtong maayong mga butang nga iyang mahinumdoman mao ang iyang pamilya ug si Jehova. Miampo siya sa daklit, nga nagpakiluoy alang sa tabang ni Jehova. Sa walay tin-awng katarongan, gibiyaan siya sa mga polis. Mipauli siya, kombinsido nga gipanalipdan siya ni Jehova.

Si Antônio misugod sa pagtuon sa Bibliya uban ang bag-ong kalagsik. Sa inanay, naghimo siyag mga kausaban aron pahimut-an si Jehova. (Efeso 4:22-24) Pinaagi sa pag-ugmad sa pagpugong-sa-kaugalingon, iyang giatubang ang iyang mga problema sa droga. Bisan pa niana, siya nagkinahanglan ug medikal nga tabang. Ang duha ka bulan diha sa klinika sa rehabilitasyon naghatag kaniya sa kahigayonan nga mabasa ang ubay-ubay nga publikasyon sa Bibliya, lakip ang librong Kahibalo nga Motultol sa Kinabuhing Walay Kataposan. Dayon gipaambit ni Antônio sa ubang mga pasyente ang iyang nakat-onan gikan niining mga libroha.

Human mobiya si Antônio sa klinika, iyang gipadayon ang iyang pagtuon sa Bibliya uban sa mga Saksi. Karong adlawa, si Antônio, Maria, ilang duha ka anak babaye, ug inahan ni Antônio duyog nga nag-alagad kang Jehova ingong usa ka malipayon ug nahiusang pamilya. Matod ni Antônio: “Karon ako nang nasabtan ang tinuod nga kahulogan sa mga pulong ‘ang Diyos gugma.’”

[Hulagway sa panid 8]

Pagsangyaw sa Rio de Janeiro