Hingpit nga Kinabuhi—Dili Usa ka Damgo Lamang!

Usa ka hingpit nga kalibotan—unsay kahulogan niini alang kanimo? Handurawa ang usa ka tawhanong katilingban diin walay krimen, pag-abuso sa droga, gutom, kakabos, o inhustisya. Ang tanan makatagamtam ug ekselenteng emosyonal ug pisikal nga kahimsog. Walay kasubo o kagul-anan tungod kay bisan ang kamatayon giwagtang na. Realistikanhon ba ang pagpangandoy sa ingon niana nga kalibotan?

BISAN tuod wala ibalewala ang mga kauswagan sa siyensiya ug teknolohiya, kadaghanang tawo dili gayod motuo nga ang tawhanong intelihensiya o kahibalo magpatungha ug hingpit nga kalibotan nga niana ang tanan mabuhi sa pakigdait ug kalipay. Sa laing bahin, dili ikalimod nga ang tawhanong kiling mao ang pagtinguha nga mapauswag ang mga kahimtang ug tul-iron ang mga dili-kahingpitan. Siyempre, ang dili-realistikanhong damgo lamang dili motabang sa mga tawong walay balay ug mga kabos, ni magtagbaw kini sa mga baldado ug mga masakiton nga dugay nang nangandoy ug kahupayan gikan sa ilang pag-antos. Ang usa ka hingpit nga kalibotan dili basta moabot na lang pinaagi sa pagkamamugnaon sa tawo. Apan, bisan pa sa kaalaotan ug pagdaogdaog karon, dunay lig-ong mga katarongan nga motuo nga ang usa ka kalibotan nga imong tawgong hingpit sa pagkatinuod haduol na.

Sa dihang maghunahuna ka bahin sa hingpit nga kinabuhi, mosantop tingali sa imong hunahuna ang kinabuhi ni Jesu-Kristo. Si Jesus dili lamang mao ang hingpit nga tawo nga nabuhi sukad sa yuta. Si Adan ug Eva, nga gilalang sa dagway sa Diyos, nakatagamtam ug hingpit nga kinabuhi sa usa ka paraiso. Bisan pa niana, nawala kanila kining ekselenteng kahimtang tungod sa pagrebelde nila sa ilang langitnong Amahan. (Genesis 3:1-6) Apan, ang Maglalalang nagtisok diha sa mga tawo sa tinguha nga mabuhi sa walay kataposan. Ang Ecclesiastes 3:11 nagpamatuod niini: “Ang tanan gihimo [sa Diyos] nga matahom sa panahon niini. Bisan ang panahong walay tino iyang gibutang diha sa ilang kasingkasing, aron nga ang tawo dili mahibalo sa buluhaton nga gihimo sa matuod nga Diyos sukad sa sinugdan hangtod sa kataposan.”

Bisan tuod ang pagkadili-hingpit ug sala mitultol sa mga tawo sa usa ka kinabuhi nga ‘walay-pulos’ ug ‘naulipon sa pagkadunot,’ matikdi ang makapahupayng mga pulong ni apostol Pablo: “Ang maikagong pagpaabot sa kalalangan nagahulat sa pagpadayag sa mga anak sa Diyos. Kay ang kalalangan gipailalom sa pagkawalay-pulos, dili pinaagi sa  kaugalingong kabubut-on niini apan pinaagi kaniya nga nagsakop niini, pinasukad sa paglaom aron nga ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:19-21) Gitin-aw sa Bibliya nga ang mga tagana sa Diyos sa pagpasig-uli sa hingpit nga tawhanong kinabuhi mabatonan pinaagi ni Jesu-Kristo.—Juan 3:16; 17:3.

Dugang pa niining kahibulongang paglaom sa umaabot, kitang tanan dunay kalaoman nga mouswag sa espirituwal, nga magpadayag sa atong pag-uswag bisan karon.

Paningkamoti nga Mahimong Makataronganon

Giisip ni Jesu-Kristo ang kahingpitan nga hinungdanon kaayo nga iyang giingnan ang daghan kaayong mamiminaw: “Busa kinahanglan kamong magmahingpit, ingon nga ang inyong langitnong Amahan hingpit.” (Mateo 5:48) Gidahom ba gayod ni Jesus kanato nga kita mahimong walay-sala niining presenteng daotang sistema? Wala. Tinong angay kitang manglimbasog nga maugmad ang mga hiyas sa pagkamanggihatagon, kalulot, ug gugma ngadto sa atong mga isigkatawo, bisan pa niana kasagarang mapakyas kita sa pagbuhat kon unsay matarong. Bisan ang usa sa mga apostol ni Jesus misulat: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong. Kon kita mopahayag: ‘Wala kita makasala,’ ginahimo nato siyang bakakon, ug ang iyang pulong wala kanato.”—1 Juan 1:9, 10.

Bisan pa niana, mapauswag nato ang paagi sa paglantaw nato sa atong kaugalingon ug pagtratar sa uban, nga likayan ang paghinobra. Kinsa bay makakaplag ug mas maayong lagda aron makabaton ug timbang, makataronganong personalidad kay nianang makaplagan diha sa Pulong sa Diyos, ang Bibliya? Ang pag-ugmad sa mga hiyas sama sa kalipay ug pagkamakasaranganon motabang kanato nga makabaton ug maayong relasyon sa uban diha sa trabaho, uban sa atong kapikas sa kaminyoon, ug sa atong mga ginikanan o mga anak. Si apostol Pablo nag-awhag sa mga Kristohanon: “Pagmaya kanunay diha sa Ginoo. Sa makausa pa ako magaingon, Pagmaya! Ipaila ang inyong pagkamakatarunganon ngadto sa tanang tawo.”—Filipos 4:4, 5.

Mga Benepisyo sa Pagkahimong Makataronganon

Kon ikaw makataronganon sa imong mga panahom ug likayan ang makapasakit-sa-kaugalingon ug makapaluya-sa-kaugalingon nga pagkamahingpiton, makabenepisyo ka maingon man ang uban. Ang pagkahibalo sa imong tinuod nga katakos naglakip sa pagkahimong realistikanhon ug makataronganon bahin sa kon unsay buot nimong buhaton. Hinumdomi, ang Diyos naglalang kanato aron mabuhi dinhi sa yuta ug makakaplag ug katagbawan sa makahuloganong trabaho nga makabenepisyo kanato ug sa uban.—Genesis 2:7-9.

Kon ikaw mahingpiton kaayo sa imong kaugalingon, nganong dili modangop kang Jehova diha sa pag-ampo? Ang pagkabaton sa pabor sa Diyos maghatag kanimog dakong kahupayan. Nahibalo si Jehova sa atong kahulmahan ug pagkadili-hingpit, busa siya makataronganon o daling pahimut-an. Ang salmista nagpasalig kanato: “Maingon nga ang usa ka amahan magpakitag kaluoy sa iyang mga anak, si Jehova nagpakita ug kaluoy kanilang nahadlok kaniya. Kay siya mismo nahibalo sa atong pagkahulma, nga nahinumdom nga kita mga abog lamang.” (Salmo 103:13, 14) Pagkamapasalamaton nato nga ang Diyos nakiglabot sa mga tawo sa maluluy-ong paagi! Nahibalo siya sa atong mga limitasyon,  bisan pa niana kita sama ka bililhon sa iyang mga mata sa hinigugmang mga anak.

Inay kay tinguhaon ang pagkamahingpiton, mas maalamon gayod nga ugmaron ang espirituwal nga pagsabot ug timbang nga panglantaw! Dugang pa, makaseguro kita nga walay makapugong kang Jehova sa pagtuman sa iyang katuyoan sa pagtuboy sa katawhan ngadto sa kahingpitan ilalom sa Gingharian sa Diyos. Apan unsay buot ipasabot sa tawhanong kahingpitan?

Hingpit nga Kinabuhi Mas Maayo kay sa Pagkamahingpiton

Ang kahingpitan wala magpasabot nga mahimong mahingpiton. Kadtong makapribilehiyo sa pagkinabuhi sa Paraiso sa yuta ilalom sa Gingharian sa Diyos tinong dili mahimong mapugsanon, nagpakamatarong-sa-kaugalingon nga mga tawo. Usa sa mga kinahanglanon sa paglabang-buhi sa dakong kasakitan mao ang kinasingkasing nga apresasyon sa halad lukat, sumala sa gipahayag sa internasyonal nga dakong panon nga gihubit ni apostol Juan: “Ang kaluwasan utang namo sa atong Diyos, nga naglingkod sa trono, ug sa Kordero.” (Pinadayag 7:9, 10, 14) Ang tanang makalabang-buhi sa nagsingabot nga dakong kasakitan magmapasalamaton nga si Kristo kinabubut-ong namatay alang kanila ug niadtong tanan nga nagpasundayag ug pagtuo kaniya. Ang iyang mahigugmaong halad nagpahiluna sa pasukaranan alang sa pagpahinabo ug dumalayong kahupayan gikan sa ilang mga dili-kahingpitan ug kahuyangon.—Juan 3:16; Roma 8:21, 22.

Sama sa unsa unya ang hingpit nga kinabuhi? Inay sa pag-indigay ug hakog nga ambisyon, ang gugma ug kalulot taliwala sa katawhan maghimo sa kinabuhi nga mapuslanon, nga magwagtang sa kabalaka ug ubos nga pagtamod-sa-kaugalingon. Bisan pa niana, ang hingpit nga kinabuhi dili unya laay o sumo. Ang Pulong sa Diyos wala magtagana sa tanang detalye bahin sa Paraiso apan naghubit sa matang sa kinabuhi nga atong madahom: “Sila magatukod ug mga balay ug magapuyo niini; ug sila magatanom ug mga kaparasan ug magakaon sa bunga niini. Sila dili magatukod ug lain ang magapuyo; sila dili magatanom ug lain ang magakaon. Kay ingon sa mga adlaw sa usa ka kahoy mao man ang mga adlaw sa akong katawhan; ug ang akong mga pinili magapahimulos pag-ayo sa buhat sa ilang mga kamot. Sila dili magabuhat nga walay kapuslanan, ni manganak sila alang sa kasamok.”—Isaias 65:21-23.

Inay kay magmaukiton bahin sa kon unsang matanga sa kalingawan, mga tindahan, teknolohiya, o transportasyon ang itagana sa Gingharian, handurawa ang imong kaugalingon nga nagatagamtam sa katumanan niining mga pulonga: “‘Ang lobo ug ang nating karnero mag-usa sa pagpaningaon, ug ang leyon mokaon ug uhot ingon sa torong baka; ug kon bahin sa bitin, ang iyang pagkaon mao unyay abog. Sila dili mohimog kadaot ni magpahinabog bisan unsang kadaot sa tibuok nakong balaan nga bukid,’ nag-ingon si Jehova.” (Isaias 65:25) Pagkalahi gayod sa hingpit nga kinabuhi nianang imong makita karon! Kon mahitabong usa ka niadtong isipon nga takos nga mabuhi nianang panahona, may katarongan kang mosalig nga ang imong mahigugmaong langitnong Amahan magmaikagon kanimo ug sa imong pamilya. “Magkalipay usab sa hilabihan diha kang Jehova, ug iyang ihatag kanimo ang mga hangyo sa imong kasingkasing.”—Salmo 37:4.

Ang hingpit nga kinabuhi dili usa ka damgo lamang. Ang mahigugmaong katuyoan ni Jehova mahitungod sa katawhan bug-os nga matuman. Ikaw ug ang imong pamilya mahilakip niadtong ituboy ngadto sa tawhanong kahingpitan ug mabuhi sa walay kataposan sa bag-ong kalibotan sa Diyos. Ang Bibliya nagtagna: “Ang mga matarong magapanag-iya sa yuta, ug sila mopuyo sa ibabaw niini sa walay kataposan.”—Salmo 37:29.

[Hulagway sa panid 6]

Mapauswag nato ang paagi sa paglantaw nato sa atong kaugalingon ug sa uban, nga likayan ang pagkamahingpiton o pagkakutihan

[Hulagway sa panid 7]

Nganong dili handurawon ang imong kaugalingon nga nagatagamtam na sa malinawon ug matarong nga mga kahimtang sa Paraiso?