Ikaw ba Motuo sa Dili Nimo Makita?

SA DIHANG dunay moingong, ‘Motuo lang ko sa kon unsay akong makita,’ wala siya magsulti sa literal nga diwa. Sa pagkatinuod, kitang tanan motuo sa mga butang nga dili nato makita.

Pananglitan, sa eskuylahan ikaw tingali nakahimog eksperimento nga gidisenyo sa pagpamatuod nga naglungtad ang magnetic field. Tingali ingon niini ang eksperimento: Butangig linimbas nga puthaw ang palid sa papel. Dayon itungtong ang papel sa magnet. Kon irog-irogon ang papel, daw madyik  nga magtapok ang linimbas nga puthaw duol sa kusog nga bahin sa magnet ug moporma ngadto sa hulad sa magnetic field. Kon imo kining gihimo, nakita mo ba sa aktuwal ang magnetic field? Wala, apan ang epekto niini diha sa linimbas nga puthaw dayag nga makita, nga naghatag kanimog makapakombinsir nga pamatuod nga naglungtad ang magnetismo.

Kita dili magduhaduha nga motuo sa ubang mga butang nga dili nato makita. Sa dihang kita molantaw sa usa ka matahom nga dibuho o ginindotan sa usa ka maayong kinulit, kita dili magduhaduha sa paglungtad sa pintor o tigkulit. Busa sa dihang kita maglantaw sa usa ka busay o magsud-ong sa pagsalop sa adlaw, dili ba kita angayng matandog sa labing menos sa paghunahuna sa posibilidad nga kini maoy mga hinimo sa usa ka Hawod nga Magdidibuho o Tigkulit?

Kon Nganong Dili Motuo ang Uban

Sa kasukwahi, ang ubang tawo dili na motuo sa Diyos tungod sa gitudlo kanila diha sa simbahan. Mao kini ang nahitabo sa usa ka Norwegong lalaki nga giingnang sunogon sa Diyos ang mga daotan diha sa nagdilaab nga impiyerno. Dili gayod masabtan sa lalaki kon unsang matanga sa Diyos ang magsakit sa mga tawo nianang paagiha, busa siya nahimong ateyista.

Apan, sa ulahi ang lalaki misugot sa pagsusi sa Bibliya, nga gitabangan sa usa sa mga Saksi ni Jehova. Nahibulong siya sa pagkakat-on nga ang Bibliya wala magtudlo nga ang mga daotan paantoson diha sa nagdilaab nga impiyerno. Gipakasama sa Bibliya ang kamatayon sa pagkatulog. Sa lubnganan, kita dili mobati ug sakit; kita walay mahibaloan nga bisan unsa. (Ecclesiastes 9:5, 10) Nakat-onan usab sa maong lalaki nga kadtong mga tawo nga hukman sa Diyos ingong tugob sa pagkadaotan magpabilin diha sa lubnganan hangtod sa hangtod. (Mateo 12:31, 32) Ang ubang mga patay pagabanhawon sa gitakdang panahon sa Diyos, uban ang paglaom nga makabaton ug kinabuhing walay kataposan ubos sa Paraisong mga kahimtang. (Juan 5:28, 29; 17:3) Kini nga pagpatin-aw makataronganon. Uyon kini sa giingon sa Bibliya nga “ang Diyos gugma.” (1 Juan 4:8) Kining sinsero nga lalaki nagpadayon sa iyang pagtuon sa Pulong sa Diyos ug, sa ngadtongadto, nakakat-on sa paghigugma sa Diyos sa Bibliya.

Ang uban dili motuo nga naglungtad ang usa ka mahigugmaong Maglalalang tungod sa pagkakaylap sa kasakit ug inhustisya. Sila mouyon sa Swekong lalaki nga kas-a mitudlo sa kalangitan ug nangutana: “Sa unsang paagi nga dunay labing gamhanan, mahinatagon sa ngatanan nga Diyos sa langit samtang kita adunay tumang korapsiyon ug pagkadaotan dinhi sa yuta?” Tungod kay walay nakatubag sa iyang pangutana, siya usab nahimong ateyista. Sa ulahi siya misugod sa pagtuon  sa Bibliya uban sa mga Saksi ni Jehova. Iyang nakat-onan nga ang Pulong sa Diyos nagtaganag makapatagbawng tubag sa dugay na kaayong pangutana, Nganong gitugotan sa Diyos ang pagkadaotan? a

Kining sinsero nga lalaki nakakat-on nga ang paglungtad sa pagkadaotan dili pamatuod nga wala maglungtad ang Diyos. Sa pag-ilustrar: Ang usa ka tawo tingali magdisenyo ug kutsilyo aron gamiton sa paghiwa ug karne. Tingali ang usa ka kustomer mopalit sa kutsilyo ug mogamit niini, dili aron ihiwa sa karne, kondili aron sa pagbuno. Tungod kay ang kutsilyo gigamit sa sayop nga paagi dili pamatuod nga wala maglungtad ang tiggama niini. Sa kaamgid, tungod kay ang yuta wala gamita uyon sa gitinguha nga katuyoan niini wala magpasabot nga kini walay Maglalalang.

Ang Bibliya nagtudlo nga hingpit ang binuhatan sa Diyos. Kaniya “walay inhustisya; matarong ug matul-id siya.” (Deuteronomio 32:4) Ang Diyos mohatag ug maayong mga gasa sa tawo, apan ang ubang gasa gigamit sa sayop nga paagi, nga nagpahinabog dili mabatbat nga pag-antos. (Santiago 1:17) Apan, taposon sa Diyos ang pag-antos. Human niana, “ang mga maaghop mismo magapanag-iya sa yuta, . . . ug sila mopuyo sa ibabaw niini sa walay kataposan.”—Salmo 37:11, 29.

Ang Swekong lalaki nga gihisgotan ganiha naapektohan sa dihang iyang nakita ang pag-antos sa iyang mga isigkatawo. Sa pagkatinuod, ang iyang malumong kabalaka sa uban nagpamatuod sa paglungtad sa Diyos. Sa unsang paagi?

Sa kadaghanang tawo, ang bugtong kapilian gawas sa pagtuo sa Diyos mao ang pagtuo sa ebolusyon. Ang mga ebolusyonista nagtudlo sa “pagpabiling-buhi sa labing lig-on”—nga ang mga tawo ug mga hayop makigbisog sa ilang kaugalingong matang aron magpabiling buhi. Ang labing lig-on mabuhi; ang labing huyang mamatay. Kana mao ang kinaiyanhong kahikayan sa mga butang, matod nila. Apan kon “kinaiyanhon” alang sa mga huyang nga mamatay aron kahatagag luna ang mga lig-on, sa unsang paagi atong ikapatin-aw ang kamatuoran nga, sama sa Swekong lalaki, ang ubang lig-on nga mga tawo maapektohan sa dihang makita ang pag-antos sa ilang isigkatawo?

Pagkaila sa Diyos

Kita dili makakita sa Diyos tungod kay siya walay tawhanong dagway. Apan, gusto sa Diyos nga atong mailhan siya. Usa ka paagi nga atong masinati siya mao ang pagpaniid sa iyang talagsaong mga binuhatan—ang “mga dibuho” ug “mga kinulit” sa kalalangan. Sa Roma 1:20, ang Bibliya nag-ingon: “Ang dili-makita nga mga hiyas [sa Diyos] tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos.” Oo, maingon nga ang pagtuon sa usa ka dibuho o kinulit makatabang kanimo nga makabaton ug pagsabot sa personalidad sa magdidibuho, ang pagpamalandong sa kahibulongang mga binuhatan sa Diyos makatabang kanimo nga mas mailhan ang iyang personalidad.

Tinuod, kita dili makatubag sa tanang makapabalakang mga pangutana pinaagi lamang sa pagsud-ong sa mga buhat sa paglalang sa Diyos. Apan kita makakaplag ug mga tubag sa maong mga pangutana pinaagi sa pagtuki sa Pulong sa Diyos, ang Bibliya. Pinaagi sa pagbasa sa Bibliya uban ang bukas nga hunahuna ang duha ka lalaking gihisgotan ganiha nakahinapos nga naglungtad diay ang Diyos ug nga siya may kahangawa sa kon unsay mahitabo kanato.

[Footnote]