Nganong Buntogon ang Pagkamahingpiton?

Kanunay ka bang maningkamot pag-ayo sa paghimo sa imong kinamaayohan? Tin-aw, ang imong pagbuhat niana sa daghang paagi makabenepisyo kanimo ug kanilang anaa sa palibot nimo. Sa laing bahin, ang uban naghinobra na ug nahimong mga mahingpiton. Unsay buot ipasabot niana?

BUWENO, ang usa ka kahulogan sa pulong nga “pagkamahingpiton” maoy “usa ka kinaiya nga isipon ang bisan unsa nga wala makaabot sa kahingpitan ingong dili dalawaton.” Lagmit nakahibalag ka ug mga tawo nga duna nianang maong kinaiya. Makita nimo nga ang naghingaping mga kinahanglanon nga ilang gipahamtang sa uban makapahinabog daghang suliran, nga magpatungha ug kahimtang sa kawalay-katagbawan ug pagkaluya. Kadaghanang tawo nga maayog panimbang moila nga ang pagkamahingpiton sa diwa nga mohimog hinobra ug dili-makataronganong mga panginahanglan diha sa tanang bahin sa kinabuhi dili gayod tilinguhaon. Usa kini ka kinaiya nga kinahanglang buntogon. Apan, usa ka suliran mao nga sa dihang nalangkit na ang atong tinamdan o kinaiya, lisod tingali ang pag-ila sa kiling nga mahimong mahingpiton, busa usa ka hagit ang pagbuntog niana.

Si Nelson dunay dako kaayong responsibilidad ug daghang suliran nga sulbaronon. Kanunay siyang mag-analisar sa mga estadistika, ug ang produksiyon maoy prioridad. Ang pagkamahingpiton kasagarang isipon ingong kinahanglanon sa kalamposan diha sa maindigon nga pangempleyo. Bisan tuod ang uban moapresyar tingali sa pagkaepisyente ni Nelson, ang iyang pagkamahingpiton naghatag kaniyag mga sakitsakit sa lawas, sama sa mga labad sa ulo ug kapit-os. Susama ka ba kang Nelson?

Ang mga batan-on naapektahan usab sa pagkamahingpiton. Sa bata pa, si Rita, nga taga-Rio de Janeiro, gustong moeskuyla. Gipaningkamotan niya nga mahimong dili ambisyosa tan-awon, apan maguol siya pag-ayo kon dili siya makakuha sa kinatas-ang mga grado. Miingon si Rita: “Sukad sa pagkabata, akong gitandi ang akong kaugalingon sa uban nga daghag panahon, samtang ako kanunayng napit-osan ug nagdalidali sa pagbuhat sa mga butang. Wala gayod nako batia nga may panahon akong mopahulay tungod kay kanunayng dunay mga butang nga kinahanglang buhaton.”

 Sa bata pa, si Maria mohilak tungod sa kahigawad sa dihang dili siya makadibuho nga sama ka maayo sa uban. Dugang pa, sa iyang pagtinguha ug kahingpitan sa arte diha sa musika, kasagaran siyang mapit-osan ug mabalaka inay malingaw sa iyang pagtugtog o pag-awit. Laing babaye nga taga-Brazil, si Tânia, kinsa misulay nga mahimong makasaranganon ug naglikay sa indigay, miangkon nga duna gihapon siyay taas kaayong mga sukdanan alang sa iyang kaugalingon, diha sa eskuylahan ug sa balay. Gibati niya nga gawas kon hingpit ang iyang trabaho, ang mga tawo dili kaayo makaangay kaniya. Dugang pa, usahay sobra ra kaayo ang panahom ni Tânia sa uban, nga mopabati niyag kahiubos ug kasubo.

Bisan tuod ang kabatid, pagkamakugihon, ug ang pagbatig personal nga katagbawan hinungdanon, ang negatibong mga pagbati, sama sa kahadlok nga mapakyas, mahimong moresulta gikan sa paghimog dili-makab-ot nga mga tumong. Ang mga ginikanan o ang uban maghimo tingalig sukdanan sa kahingpitan diha sa asaynment sa eskuylahan o sa mga esport nga lisod kab-oton sa mga batan-on. Pananglitan, ang inahan ni Ricardo taas kaayog panahom alang kaniya, nga gustong mahimo siyang doktor, motugtog sa piano, ug mosultig daghang pinulongan. Masabtan ba nimo nga kining paagiha, kon pasobraan, magpauswag sa kalagmitan nga motungha ang mga suliran o mga kahigawad?

Nganong Likayan ang Pagkamahingpiton?

Ang trabaho nga dekalidad, nga nakakab-ot sa hataas nga mga sukdanan sa pagkatukma ug pagkaekselente, maoy pinangita. Busa ang mga tawo kinahanglang makig-indig diha sa pagpangempleyo. Ang laing hinungdan nga daghan ang naningkamot pag-ayo mao ang kahadlok nga mawad-ag panginabuhian. Ang ubang mga trabahante mahimong sama sa atleta nga mohimog hilabihang mga pagsakripisyo aron makakab-ot ug bag-ong kinamaayohang nahimo. Unya, sa dihang mag-atubang ug lisod nga indigay, mapugos tingali siya sa pagbansay pa ug dugang, tingali mogamit ug kemikal nga mga substansiya aron moarang-arang pa ug—naglaom siya—makadaog. Inay mangagpas nga makab-ot ang kinamaayohan sa hustong paagi, ang pagkamahingpiton magpahinabo sa mga tawo nga “matukmod sa kahadlok nga mapakyas” o “mapugos nga mahimong numero uno.”—The Feeling Good Handbook.

Tinuod, ang uban mobati nga ang ila tingaling buhaton diha sa arte o sa mga esport kanunayng mapauswag. Sa gihapon, sumala kang Dr. Robert S. Eliot, “ang pagkamahingpiton maoy panahom nga dili gayod matinuod.” Siya midugang: “Gilangkoban kini sa pagbating sad-an, pagkamapanalipdanon, ug pagkahadlok nga bugalbugalan.” Busa, tinuod gayod ang mga pulong sa maalamong Haring Solomon: “Nakita ko ang tanang kahago ug ang tanang kabatid sa trabaho, nga kini nagkahulogan ug pag-indigay sa usag usa; kini usab kakawangan ug paggukod sa hangin.”—Ecclesiastes 4:4.

Unsay imong mahimo kon mokiling ka sa pagkahimong mahingpiton? Tinuod ba nga kon mas dako ang imong paningkamot, mas dako ang imong kahigawad? Buot ba nimo nga mahimong dili kaayo mapugsanon ug mas relaks? Unsay ipasabot sa pagkahimong hingpit? Wala ka ba magtinguha sa paggamit sa tanan nimong maarangan samtang likayan ang pagkamahingpiton? Kon ang dili-hingpit nga mga tawo makagamit sa ilang hinatag-Diyos nga mga katakos sa pagdiskobre sa mga butang alang sa kaayohan sa uban, handurawa kon unsay makab-ot sa mga tawo ilalom sa hingpit nga mga kahimtang ug diyosnong paggiya!

[Hulagway sa panid 4]

Ang mga ginikanan o ang uban magkinahanglan tingalig kahingpitan, nga dili makab-ot sa mga batan-on