Asa Nimo Makaplagan ang Kalinaw sa Galamhan?

Dunay daghang kalainan tali sa atong panahon ug sa panahon ni Thoreau, nga gihisgotan sa nag-unang artikulo. Usa ka dakong kalainan mao nga karon daghang tambag ang mabatonan kon unsaon pag-angkon ug kalinaw sa hunahuna. Ang mga sikologo ug mga magsusulat sa mga basahon nga makatabang sa kaugalingon—bisan mga kolumnista sa mantalaan—naghatag sa ilang mga ideya. Ang ilang tambag mahimong makatabang sa makadiyot; apan alang sa layog-abot nga mga kasulbaran, ang usa ka butang nga mas dulot maoy gikinahanglan. Mao kanay nakaplagan sa mga indibiduwal nga gihisgotan sa nag-unang artikulo.

SI Antônio, Marcos, Gerson, Vania, ug Marcelo lainlain ug kaagi ug may lainlaing mga problema. Apan labing menos sila may tulo ka butang nga gikausahan. Una, dihay panahon nga sila “walay paglaom ug mga walay Diyos dinhi sa kalibotan.” (Efeso 2:12) Ikaduha, nangandoy sila ug kalinaw sa hunahuna. Ug ikatulo, silang tanan nakakaplag sa kalinaw sa galamhan nga ilang gitinguha human sila modawat ug usa ka pagtuon sa Bibliya uban sa mga Saksi ni Jehova. Samtang sila nag-uswag, sila nakaamgo nga ang Diyos interesado kanila. Sa pagkatinuod, sumala sa gisulti ni Pablo sa mga taga-Atenas sa iyang adlaw, ang Diyos “dili halayo gikan sa matag usa kanato.” (Buhat 17:27) Ang tim-os nga pagtuo niini maoy usa ka dakong hinungdan sa pagbaton ug kalinaw sa galamhan.

 Nganong Diyutay ra Kaayo ang Kalinaw?

Ang Bibliya naghatag ug duha ka paninugdang mga rason sa kakulang sa kalinaw dinhi sa kalibotan—kini man kalinaw sa galamhan o pakigdait tali sa mga tawo. Ang una gibatbat diha sa Jeremias 10:23: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” Ang tawo walay kaalam ni kagahom sa pagkahibalong daan aron sa pagmando sa iyang kaugalingon nga walay tabang, ug ang bugtong tabang nga tinuod nga bililhon naggikan sa Diyos. Ang mga tawo nga dili mangita sa paggiya sa Diyos dili gayod makakab-ot ug dumalayong kalinaw. Ang ikaduhang rason sa kakulang sa kalinaw makita diha sa mga pulong ni apostol Juan: “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Kon walay paggiya sa Diyos, ang mga paningkamot sa tawo sa pagbaton ug kalinaw mapakyas kanunay gumikan sa mga kalihokan sa dili makita apan tinuod gayod—ug gamhanan kaayo—nga “tuman-kadaotang usa,” si Satanas.

Tungod niining duha ka katarongan—nga ang kadaghanang tawo dili mangita sa paggiya sa Diyos ug si Satanas aktibo kaayo sa kalibotan—ang tawhanong rasa sa kinatibuk-an anaa sa makaluluoy nga kahimtang. Maayong pagkahubit kana ni apostol Pablo: “Ang tanang kalalangan padayong nagaagulo nga tingob ug tingob nga anaa sa kasakit hangtod karon.” (Roma 8:22) Kinsay makasupak nianang hunahunaa? Diha sa adunahan ug kabos nga mga nasod, ang mga problema sa pamilya, krimen, inhustisya, mga kasungian sa personalidad, pagkawalay-kasegurohan sa ekonomiya, tribonhon ug etnikong mga pagdumot, pagdaogdaog, sakit, ug daghan pang uban, naghikaw sa mga tawo sa ilang kalinaw sa hunahuna.

Kon Asa Makaplagan ang Kalinaw sa Galamhan

Sa dihang si Antônio, Marcos, Gerson, Vania, ug Marcelo nagtuon sa Pulong sa Diyos, ang Bibliya, ilang nakat-onan ang mga butang nga nag-usab sa ilang mga kinabuhi. Pananglitan, ilang nakat-onan nga moabot unya ang adlaw nga ang kahimtang sa kalibotan mausab. Dili kini hanap lamang nga paglaom nga ang tanang butang mamaayo ra sa kataposan. Kini tinuod, may-pasikaranang pagsalig nga ang Diyos adunay katuyoan alang sa katawhan ug bisan karon kita makabatog kaayohan gikan nianang maong katuyoan kon atong tumanon ang iyang kabubut-on. Ilang gipadapat sa ilang kinabuhi ang ilang nakat-onan gikan sa Bibliya, ug miarang-arang ang ilang mga kahimtang. Nakaplagan nila ang kalipay ug kalinaw nga labaw pa sa gihunahuna nilang posible.

Si Antônio wala na malambigit sa mga protesta ug kagubot bahin sa pamuo. Siya nahibalo nga ang mga kausaban nga ipahinabo nianang paagiha limitado ug temporaryo lamang. Kining kanhing lider sa pamuo nakakat-on bahin sa Gingharian sa Diyos. Kini mao ang Gingharian nga giampo sa milyonmilyon sa dihang litokon nila ang Pag-ampo sa Ginoo (o, ang Amahan Namo) ug moingon sa Diyos: “Moabot ang imong gingharian.” (Mateo 6:10a, New International Version) Nakat-onan ni Antônio nga ang Gingharian sa Diyos maoy usa ka tinuod nga langitnong kagamhanan nga magpahinabog tinuod nga pakigdait sa katawhan.

Nakat-onan ni Marcos ang pagpadapat sa maalamong tambag sa Bibliya bahin sa kaminyoon. Ingong resulta, kining kanhing politiko malipayon na karon nga nahiusa pag-usab uban sa iyang asawa. Siya usab nagpaabot sa panahon, nga moabot sa dili madugay, sa dihang pulihan sa Gingharian sa Diyos kining dalo, hakog nga sistema sa kalibotan sa usa ka mas maayong sistema. Siya adunay mas lalom nga pagsabot sa tudling pulong diha sa Pag-ampo sa Ginoo nga mabasa: “Ang imong kabubut-on matuman sa yuta maingon sa langit.” (Mateo 6:10b, NIV) Sa dihang ang kabubut-on sa Diyos matuman sa yuta, ang mga tawo makasinati sa kalidad sa kinabuhi nga wala pa makita sukad.

Unsa na man ang bahin kang Gerson? Dili na siya laagan ug kawatan. Ang kinabuhi karon niining kanhing lalaki nga nagdako sa kalye aduna nay kahulogan kay iya nang gigamit ang iyang kusog sa pagtabang sa uban sa pagkaplag ug kalinaw sa galamhan. Sumala sa gipakita niining mga kasinatiana, ang pagtuon sa Bibliya ug pagpadapat sa gisulti niini makapaarang-arang gayod sa kinabuhi sa usa ka tawo.

 Kalinaw sa Galamhan Diha sa Gubot nga Kalibotan

Ang pangunang makasaysayanhong tawo diha sa katumanan sa kabubut-on sa Diyos mao si Jesu-Kristo, ug sa dihang ang mga tawo magtuon sa Bibliya uban sa mga Saksi ni Jehova, sila makakat-on ug daghan bahin kaniya. Sa gabii nga siya nahimugso, ang mga manulonda miawit ug mga pagdayeg ngadto sa Diyos: “Himaya ngadto sa Diyos sa kahitas-an, ug nganha sa yuta pakigdait taliwala sa mga tawong maayog kabubut-on.” (Lucas 2:14) Sa midako na si Jesus, interesado siya sa pagpausbaw sa mga kinabuhi sa mga tawo. Iyang nasabtan ang ilang mga pagbati ug nagpakitag talagsaong kaluoy sa mga sinakit ug sa mga masakiton. Ug, uyon sa mga pulong sa mga manulonda, siya nagpahinabog usa ka sukod sa kalinaw sa galamhan ngadto sa mga maaghop. Sa kataposan sa iyang ministeryo, siya miingon sa iyang mga tinun-an: “Ako nagabilin kaninyog kalinaw, ako nagahatag kaninyo sa akong kalinaw. Wala ko kini ihatag kaninyo sama sa paghatag niini sa kalibotan. Ayaw tugoti nga ang inyong mga kasingkasing masamok ni tugotan kini silang mokupos sa kahadlok.”—Juan 14:27.

Si Jesus dili lang kay makitawhanon. Iyang gitandi ang iyang kaugalingon sa usa ka magbalantay, ug iyang gipakasama ang iyang mga sumusunod sa mga karnero sa dihang siya miingon: ‘Ako mianhi aron sila makabaton ug kinabuhi ug makabaton niini nga dagaya. Ako ang maayong magbalantay; ang maayong magbalantay nagatugyan sa iyang kalag alang sa mga karnero.’ (Juan 10:10, 11) Oo, sukwahi sa daghang lider karon nga nabalaka labaw sa tanan sa ilang kaugalingon, gitahan ni Jesus ang iyang kinabuhi alang sa iyang mga karnero.

Sa unsang paagi kita makabatog kaayohan sa gihimo ni Jesus? Daghan ang sinati sa mga pulong: ‘Gihigugma pag-ayo sa Diyos ang kalibotan mao nga iyang gihatag ang iyang bugtong Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.’ (Juan 3:16) Ang pagpasundayag ug pagtuo kang Jesus nagkinahanglan ug, una sa tanan, kahibalo bahin kaniya ug sa iyang Amahan, si Jehova. Ang kahibalo bahin sa Diyos ug kang Jesu-Kristo mosangpot sa suod nga relasyon uban kang Jehova nga Diyos nga motabang kanato nga makab-ot ang kalinaw sa hunahuna.

Si Jesus miingon: “Ang akong mga karnero nagapamati sa akong tingog, ug ako nakaila kanila, ug sila nagasunod kanako. Ug ako magahatag kanilag kinabuhing walay-kataposan, ug sila dili gayod malaglag, ug walay magasakmit nila gikan sa akong kamot.” (Juan 10:27, 28) Pagkamakapadasig, makapahupay nga mga pulong! Tinuod, gisulti ni Jesus kadto halos duha ka libo ka tuig na kanhi, apan kini puwersado gihapon karon sama kaniadto. Ayaw gayod kalimot nga si Jesu-Kristo buhi ug aktibo gihapon, nga nagmando karon ingong naentronong Hari sa langitnong Gingharian sa Diyos. Sama niadtong dinhi pa siya sa yuta katuigan na kanhi, siya interesado gihapon sa mga maaghop nga nangandoy ug kalinaw sa hunahuna. Dugang pa, siya gihapon ang Magbalantay sa iyang mga karnero. Kon kita mosunod kaniya, siya motabang kanato nga mabatonan ang kalinaw sa galamhan, nga maglakip sa masaligong pagpaabot nga makita ang bug-os nga pakigdait sa umaabot—nga magpasabot ug pagkawala sa kapintasan, gubat, ug krimen.

Ang tinuod nga mga kaayohan modangat gumikan sa pagkahibalo ug pagtuo nga si Jehova, pinaagi kang Jesus, motabang kanato. Nahinumdom ka ba kang Vania, kinsa sa bata pa siya gisangonan na ug bug-at nga mga kaakohan ug naghunahuna nga ang Diyos nahikalimot na kaniya? Karon si Vania nahibalo nga ang Diyos wala mobiya kaniya. Siya miingon: “Akong nakat-onan nga ang Diyos maoy usa ka tinuod nga persona nga may hiligugmaong mga hiyas. Ang iyang gugma nagpalihok kaniya sa pagpadala sa iyang Anak nganhi sa yuta aron sa paghatag kanatog kinabuhi. Hinungdanon kaayo ang pagkahibalo niini.”

Gipamatud-an ni Marcelo nga tinuod ang iyang relasyon sa Diyos. Kining kanhing tig-adto sa parti mikomento: “Ang mga batan-on sagad dili mahibalo kon unsay buhaton, ug sila mahitumpawak na hinuon sa kadaot. Ang uban malangkit sa pag-abuso sa droga, sama sa akong gibuhat. Ako nanghinaot nga daghan pa ang mapanalanginan, sama kanako,  pinaagi sa pagkakat-on sa kamatuoran bahin sa Diyos ug sa iyang Anak.”

Pinaagi sa maampingong pagtuon sa Bibliya, si Vania ug Marcelo nakaugmad ug lig-ong pagtuo sa Diyos ug pagsalig sa iyang pagkaandam nga motabang kanila sa pagsagubang sa ilang mga problema. Kon atong buhaton ang ilang gibuhat—magtuon sa Bibliya ug ipadapat ang gisulti niini—atong makaplagan ang dakong kalinaw sa galamhan, sama kanila. Unya ang pagdasig ni apostol Pablo mapadapat gayod sa atong kahimtang: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.

Pagkaplag sa Tinuod nga Kalinaw Karon

Gigiyahan ni Jesu-Kristo ang mga tawong gutom sa kamatuoran diha sa dalan nga motultol sa walay kataposang kinabuhi sa yutan-ong paraiso. Samtang iyang giyahan sila ngadto sa putling pagsimba sa Diyos, masinati nila ang kalinaw sama nianang gibatbat sa Bibliya: “Ang akong katawhan magapuyo sa malinawong puloy-anang dapit ug sa mga pinuy-anan sa bug-os nga pagsalig ug sa wala matugaw nga mga dapit-pahulayanan.” (Isaias 32:18) Ug kana maoy pasiuna lamang sa kalinaw nga ilang matagamtam sa umaabot. Atong mabasa: “Ang mga maaghop mismo magapanag-iya sa yuta, ug sa pagkatinuod makakaplag sila ug tumang kalipay tungod sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:11, 29.

Busa makabaton ba kita ug kalinaw sa galamhan karon? Oo. Dugang pa, kita makaseguro nga sa dili madugay, panalanginan sa Diyos ug labaw nga kalinaw ang masinugtanong katawhan. Nan, nganong dili mohangyo kaniya diha sa pag-ampo nga hatagan ka sa iyang kalinaw? Kon ikaw adunay mga problema nga naghikaw kanimo sa kalinaw, pag-ampo sumala sa paagi nga nag-ampo si Haring David: “Ang mga kasakit sa akong kasingkasing midaghan; Oh pagawasa ako gikan sa akong mga kapit-os. Tan-awa ang akong kasakitan ug ang akong kalisdanan, ug pasayloa ang tanan kong mga sala.” (Salmo 25:17, 18) Magmasaligon nga ang Diyos maminaw sa maong mga pag-ampo. Siya magtuy-od sa iyang kamot ug magtaganag kalinaw sa tanang mangita niana uban ang katim-os sa kasingkasing. Kita mahigugmaong gipasaligan: “Si Jehova haduol kanilang tanan nga nagatawag kaniya, kanilang tanan nga nagatawag kaniya sa kamatinud-anon. Pagatumanon niya ang tinguha niadtong nahadlok kaniya, ug pagadunggon ang ilang pagpakitabang, ug siya magaluwas kanila.”—Salmo 145:18, 19.

[Blurb sa panid 5]

Ang tawo walay kaalam ni kagahom sa pagkahibalong daan aron sa pagmando sa iyang kaugalingon nga walay tabang, ug ang bugtong tabang nga tinuod nga bililhon naggikan sa Diyos

[Blurb sa panid 6]

Ang kahibalo bahin sa Diyos ug kang Jesu-Kristo mosangpot sa suod nga relasyon uban kang Jehova nga Diyos nga motabang kanato nga makab-ot ang kalinaw sa hunahuna

[Hulagway sa panid 7]

Ang pagsunod sa tambag sa Bibliya makatampo sa usa ka malinawong kinabuhi sa pamilya