Pagpugas ug mga Binhi sa Kamatuoran sa Gingharian
Pagpugas ug mga Binhi sa Kamatuoran sa Gingharian
“Sa buntag ipugas ang imong binhi ug hangtod sa gabii ayaw papahulaya ang imong kamot.”—ECCLESIASTES 11:6.
1. Sa unsang diwa nga ang mga Kristohanon nagpugas ug binhi karon?
ANG agrikultura may hinungdanong bahin sa karaang Hebreohanong katilingban. Mao nga si Jesus, kansang tibuok kinabuhi ingong tawo gigugol sa Yutang Saad, naglakip ug mga ulohan bahin sa agrikultura diha sa iyang mga ilustrasyon. Pananglitan, gipakasama niya ang pagsangyaw sa maayong balita sa Gingharian sa Diyos sa pagpugas ug binhi. (Mateo 13:1-9, 18-23; Lucas 8:5-15) Hangtod niining adlawa, nagpuyo man kita sa agrikultural nga katilingban o wala, ang pagpugas ug espirituwal nga binhi niining paagiha mao ang labing hinungdanong buluhaton nga ginahimo sa mga Kristohanon.
2. Unsa ka hinungdanon ang atong buluhatong pagsangyaw, ug unsa ang pipila ka butang nga ginahimo karon sa pagtuman niana?
2 Usa ka dakong pribilehiyo ang pagpakig-ambit diha sa pagpugas sa kamatuoran sa Bibliya niining panahon sa kataposan. Maayong pagkapahayag sa Roma 10:14, 15 ang kahinungdanon niining buluhatona: “Unsaon, sa baylo, nila pagkadungog kon walay magwali? Unsaon, sa baylo, nila pagwali gawas kon sila gipadala? Maingon gayod sa nahisulat: ‘Pagkatahom sa mga tiil niadtong mga nagapahayag sa maayong balita sa maayong mga butang!’” Labi na gayong hinungdanon karon ang pagpadayon uban ang positibong tinamdan sa pagtuman niining hinatag-sa-Diyos nga sugo. Tungod niana ang mga Saksi ni Jehova okupado kaayo sa pagpatik ug pagpanagtag ug mga Bibliya ug mga tabang sa pagtuon sa Bibliya diha sa 340 ka pinulongan. Ang pag-andam niining materyala nagkinahanglag 18,000 ka boluntaryo diha sa ilang hedkuwarter ug sa mga sangang buhatan sa lainlaing kayutaan. Ug duolan sa unom ka milyong Saksi ang nakig-ambit sa pagpanagtag niining literatura sa Bibliya sa tibuok kalibotan.
3. Unsay napalampos pinaagi sa pagpugas sa kamatuoran sa Gingharian?
3 Unsa ang mga bunga niining hago nga trabaho? Sama sa unang mga adlaw sa Kristiyanidad, daghan karon ang midawat sa kamatuoran. (Buhat 2:41, 46, 47) Apan, labi pang hinungdanon kay sa daghang bag-ong nabawtismohan nga mga magmamantala sa Gingharian mao ang kamatuoran nga kining dakong pagpamatuod nakaamot sa pagbalaan sa ngalan ni Jehova ug sa iyang bindikasyon ingong bugtong matuod nga Diyos. (Mateo 6:9) Dugang pa, ang kahibalo sa Pulong sa Diyos nagpauswag sa kinabuhi sa daghan ug mahimong mosangpot sa ilang kaluwasan.—Buhat 13:47.
4. Sa unsang gilapdon ang mga apostol nabalaka maylabot sa mga tawo nga ilang gisangyawan?
4 Ang mga apostoles nahibalo gayod sa naghatag-kinabuhi nga kahinungdanon sa maayong balita, ug sila may halalom nga pagbati alang niadtong ilang gisangyawan. Tataw kini diha sa mga pulong ni apostol Pablo, sa dihang misulat siya: “Kay may malumong pagmahal kaninyo, kami nahimuot pag-ayo nga ipaambit kaninyo, dili lamang ang maayong balita sa Diyos, apan usab ang among kaugalingong mga kalag, tungod kay kamo nahimo mang hinigugma alang kanamo.” (1 Tesalonica 2:8) Sa pagpasundayag nianang tiunayng kabalaka alang sa mga tawo, si Pablo ug ang ubang mga apostol nagsundog kang Jesus ug sa langitnong mga manulonda, kinsa nalangkit pag-ayo niining nagaluwas-sa-kinabuhi nga buluhaton. Repasohon nato ang hinungdanong mga bahin niining langitnong mga alagad sa Diyos diha sa pagpugas sa kamatuoran sa Gingharian, ug susihon nato kon sa unsang paagi ang ilang panig-ingnan magdasig kanato sa pagtuman sa atong bahin.
Si Jesus—Ang Magpupugas sa Kamatuoran sa Gingharian
5. Sa unsang buluhaton nga si Jesus sa panguna okupado sa dinhi pa siya sa yuta?
5 Si Jesus, nga usa ka hingpit nga tawo, may gahom sa pagtagana ug daghang maayong mga butang sa materyal nga paagi alang sa mga tawo sa iyang panahon. Pananglitan, mahimo niyang sulbaron ang daghan sa sayop nga mga pagsabot maylabot sa medisina sa iyang adlaw, o mahimong pauswagon niya ang pagsabot sa tawo sa ubang mga siyensiya. Bisan pa niana, gitin-aw niya sa unang bahin sa iyang ministeryo nga ang iyang buluhaton mao kanang pagsangyaw sa maayong balita. (Lucas 4:17-21) Ug sa naghinapos ang iyang ministeryo, siya misaysay: “Tungod niini ako gipakatawo, ug tungod niini ako mianhi sa kalibotan, aron ako manaksi sa kamatuoran.” (Juan 18:37) Busa okupado siya sa pagpugas sa mga binhi sa kamatuoran sa Gingharian. Ang pagtudlo sa iyang mga katalirongan bahin sa Diyos ug sa Iyang mga katuyoan labi pang hinungdanon kay sa bisan unsang ubang edukasyon nga ikahatag ni Jesus kanila.—Roma 11:33-36.
6, 7. (a) Unsang talagsaong saad ang gihimo ni Jesus una pa siya mokayab sa langit, ug sa unsang paagi gituman niya kini? (b) Sa unsang paagi ang tinamdan ni Jesus sa buluhatong pagsangyaw mag-apektar kanimo sa personal?
6 Sa dili laktod nga paagi gipaila ni Jesus ang iyang kaugalingon ingong Magpupugas sa kamatuoran sa Gingharian. (Juan 4:35-38) Gisabwag niya ang mga binhi sa kamatuoran sa tanang higayon. Bisan sa dihang himalatyon siya diha sa kahoy, iyang gimantala ang maayong balita bahin sa umaabot nga yutan-ong paraiso. (Lucas 23:43) Dugang pa, ang iyang dulot nga kaikag nga ang maayong balita isangyaw wala matapos sa iyang kamatayon diha sa kahoy sa pagsakit. Una pa siya mokayab sa langit, iyang gisugo ang mga apostol sa pagpadayon sa pagpugas ug mga binhi sa kamatuoran sa Gingharian ug sa paghimog mga tinun-an. Dayon mihimo si Jesus ug talagsaong saad. Miingon siya: “Tan-awa! ako uban kaninyo sa tanang mga adlaw hangtod sa katiklopan sa sistema sa mga butang.”—Mateo 28:19, 20.
7 Niining mga pulonga si Jesus misaad nga mopaluyo, motultol, ug magbantay sa buluhaton nga pagsangyaw sa maayong balita “sa tanang mga adlaw hangtod sa katiklopan sa sistema sa mga butang.” Hangtod sa atong adlaw, si Jesus duna gihapoy personal nga interes diha sa buluhatong pag-ebanghelyo. Siya mao ang atong Pangulo, maoy nagdumala sa pagpugas sa kamatuoran sa Gingharian. (Mateo 23:10) Ingong Ulo sa Kristohanong kongregasyon, siya maoy manubag atubangan kang Jehova niining tibuok-yutang buluhaton.—Efeso 1:22, 23; Colosas 1:18.
Ang mga Manulonda Nagpahayag ug Makalipayng Mensahe
8, 9. (a) Sa unsang paagi ang mga manulonda nagpasundayag ug tiunay nga interes sa mga kalihokan sa tawo? (b) Sa unsang diwa nga ikaingon nga kita usa ka talan-awon diha sa teatro alang sa mga manulonda?
8 Sa dihang gilalang ni Jehova ang yuta, ang mga manulonda “nagdungan paghugyaw sa kalipay, ug . . . misinggit sa pagdayeg.” (Job 38:4-7) Sukad niadto, kining langitnong mga linalang nagpasundayag ug dulot nga interes sa mga kalihokan sa tawo. Gigamit sila ni Jehova sa pagpasa ug langitnong mga pahayag ngadto sa mga tawo. (Salmo 103:20) Kini tinuod ilabina maylabot sa pagpakaylap sa maayong balita sa atong adlaw. Sa pinadayag nga gihatag kaniya, si apostol Juan nakakita ug “anghel nga nagalupad sa katung-ang langit” kinsa dunay ‘walay-kataposang maayong balita nga ipahayag ingon nga makalipayng mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan, nga sa makusog nga tingog nagaingon: “Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na.”’—Pinadayag 14:6, 7.
9 Ang Bibliya naghisgot sa mga manulonda ingong “mga espiritu alang sa publikong pag-alagad, gipadala aron mag-alagad niadtong mga magapanunod ug kaluwasan.” (Hebreohanon 1:14) Samtang ang mga manulonda masibotong nagtuman sa gitudlo kanilang mga katungdanan, sila adunay kahigayonan sa pagpaniid kanato ug sa atong buluhaton. Nga morag anaa sa dayag kaayo nga entablado sa teatro, kita nagatuman sa atong buluhaton atubangan sa langitnong mga tumatan-aw. (1 Corinto 4:9) Pagkamakapahinuklog ug pagkamakalilipay ang pagkahibalo nga wala kita mag-inusara ingong mga magpupugas sa kamatuoran sa Gingharian!
Kita Masibotong Nagtuman sa Atong Bahin
10. Sa unsang paagi ang praktikal nga tambag diha sa Ecclesiastes 11:6 ikapadapat sa atong buluhatong pag-ebanghelyo?
10 Nganong si Jesus ug ang mga manulonda interesado kaayo sa atong buluhaton? Si Jesus naghatag ug usa ka katarongan sa dihang siya miingon: “Ako magasulti kaninyo, motugbaw ang kalipay taliwala sa mga anghel sa Diyos tungod sa usa ka makasasala nga maghinulsol.” (Lucas 15:10) Kita usab duna nianang tiunayng interes sa mga tawo. Busa, buhaton nato ang labing maayo nga atong maarangan sa pagpakaylap sa mga binhi sa kamatuoran sa Gingharian bisan asa. Ang mga pulong sa Ecclesiastes 11:6 ikapadapat sa atong buluhaton. Didto ang Bibliya nagtambag kanato: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala mahibalo kon diin kini magmalamposon, dinhi man o didto, o kon kining duha sama nga mahimong maayo.” Tugotan ta, sa matag tawo nga modawat sa atong mensahe mahimong dunay gatosan o bisan linibo nga mosalikway niana. Apan sama sa mga manulonda, kita magmaya sa dihang bisan ang “usa ka makasasala” modawat sa mensahe sa kaluwasan.
11. Unsa ka epektibo ang paggamit sa mga publikasyon nga pinasukad-sa-Bibliya?
11 Dako ang nalangkit sa pagsangyaw sa maayong balita. Usa ka hinungdanong tabang niining buluhatona mao ang pinasukad-sa-Bibliya nga mga basahon nga gigamit sa mga Saksi ni Jehova. Sa pipila ka paagi, kining mga publikasyona sama usab sa mga binhi nga gisabwag bisan asa. Wala kita mahibalo kon asa kini molampos. Usahay ang usa ka publikasyon mapasapasa tingali una pa nga dunay mobasa niini. Si Jesus ug ang mga manulonda mahimong mogiya gani sa mga hitabo sa pipila ka kahimtang aron mahitabo kini alang sa kaayohan sa mga matarong ug kasingkasing. Tagda ang pipila ka eksperyensiya nga nag-ilustrar kon sa unsang paagi si Jehova makapahinabo ug wala damha ug kahibulongang mga sangpotanan ginamit ang literatura nga gibilin sa mga tawo.
Ang Buluhaton sa Matuod nga Diyos
12. Sa unsang paagi nahimong galamiton ang usa ka daang magasin sa pagtabang sa usa ka pamilya sa pagkaila kang Jehova?
12 Sa 1953, si Robert, Lila, ug ilang mga anak mibalhin gikan sa usa ka dakong siyudad ngadto sa usa ka gubaon nga karaang balay sa uma sa banika sa Pennsylvania, T.B.A. Wala madugay human sa pagbalhin, si Robert mihukom sa paghimog kaligoanan ilalom sa siradong hagdanan. Human matangtang ang ubay-ubayng tabla, iyang nadiskobrehan nga luyo sa bungbong, ang mga ilaga nagtipig ug nagisigisi nga mga papel, walay sulod nga mga kabhang sa walnut, ug ubang mga sagbot. Didto, sa taliwala niining tanan, nahimutang ang usa ka kopya sa magasing The Golden Age. Si Robert ilabinang interesado sa usa ka artikulo bahin sa ulohan sa pagmatuto ug mga anak. Nakadayeg kaayo siya sa tin-aw, pinasukad-sa-Bibliya nga pagtultol nga gihatag diha sa magasin nga iyang giingnan si Lila nga moanib sila sa “relihiyon sa The Golden Age.” Sulod sa pipila lamang ka semana, ang mga Saksi ni Jehova mituktok sa ilang pultahan, apan giingnan sila ni Robert nga ang pamilya interesado lamang sa “relihiyon sa The Golden Age.” Ang mga Saksi misaysay nga ang The Golden Age may bag-ong titulo na, Pagmata! Si Robert ug Lila misugod pagtuon sa Bibliya nga regular uban sa mga Saksi, ug ngadtongadto sila nabawtismohan. Sila, sa baylo, nagpugas ug mga binhi sa kamatuoran diha sa ilang mga anak ug nakaani ug daghan. Karon, kapin sa 20 ka membro niining pamilyaha, lakip ang tanang pito ka anak ni Robert ug Lila, maoy bawtismadong mga alagad ni Jehova nga Diyos.
13. Unsay nagtukmod sa usa ka magtiayon sa Puerto Rico nga mainteres sa Bibliya?
13 Mga 40 ka tuig kanhi, si William ug Ada, usa ka magtiayon sa Puerto Rico, walay interes sa pagtuon sa Bibliya. Matag higayon nga ang mga Saksi ni Jehova motuktok sa ilang pultahan, ang magtiayon magpakaaron-ingnong wala sa balay. Usa ka adlaw niana si William miadto sa usa ka tindahag segunda mano aron mopalit ug usa ka butang nga gikinahanglan sa alayohon diha sa balay. Sa molakaway na siya, nakamatikod siya ug sanag berdehong-dalag nga libro diha sa sulod sa dakong basurahan. Kadto mao ang Religion, usa ka libro nga gipatik sa mga Saksi ni Jehova niadtong 1940. Gidala ni William ang libro sa balay ug nahinam sa pagbasa bahin sa kalainan sa bakak ug matuod nga relihiyon. Sa sunod higayon nga miduaw ang mga Saksi ni Jehova, si William ug Ada andam nang mamati sa ilang mensahe ug misugod pagtuon sa Bibliya uban kanila. Pipila ka bulan sa ulahi sila nabawtismohan sa Balaang Kabubut-on nga Internasyonal nga Asembliya sa 1958. Sukad niadto, sila nakatabang na ug kapin sa 50 ka tawo nga mahimong bahin sa atong Kristohanong panag-igsoonay.
14. Ingon sa gipakita sa eksperyensiya, unsay posibleng sangpotan sa atong pinasukad-sa-Bibliya nga literatura?
14 Si Karl 11 anyos pa lamang ug pilyohon. Morag para kaniya kanunay lang siyang malangkit sa kasamok. Ang iyang amahan, nga usa ka magwawali sa Alemang Metodista, nagtudlo kaniya nga ang mga daotan sunogon sa impiyerno inigkamatay. Busa si Karl nahadlok pag-ayo sa impiyerno. Usa ka adlaw niana sa 1917, namatikdan ni Karl ang usa ka handbill diha sa karsada ug gipunit kini. Samtang gibasa niya kini, ang iyang mga mata nasentro dayon diha sa pangutana nga: “Unsa ang impiyerno?” Ang handbill usa ka imbitasyon sa pakigpulong publiko bahin sa ulohang impiyerno, nga gipaluyohan sa mga Estudyante sa Bibliya, nga nailhan karong mga Saksi ni Jehova. Mga usa ka tuig sa ulahi, human sa daghang sesyon sa pagtuon sa Bibliya, si Karl nabawtismohan, sa ingon nahimong usa sa mga Estudyante sa Bibliya. Sa 1925 gidapit siya sa pagtrabaho didto sa tibuok-kalibotang hedkuwarter sa mga Saksi ni Jehova—diin siya nag-alagad gihapon. Ang usa ka Kristohanong karera nga gidangtag kapin sa otsenta ka tuig nagsugod sa usa ka pirasong papel diha sa karsada.
15. Unsay mahimo ni Jehova, sumala sa nakita niyang angayng mahitabo?
15 Tinuod, saylo sa katakos sa tawo ang pagtino kon ug sa unsang gilapdon nga ang mga manulonda laktod nga nalangkit niining maong mga eksperyensiya. Sa gihapon, dili gayod kita magduhaduha nga si Jesus ug ang mga manulonda dunay aktibong bahin sa buluhatong pagsangyaw ug nga si Jehova makagiya sa mga butang sumala sa nakita niyang angayng mahitabo. Kini ug ang daghang susamang mga eksperyensiya nag-ilustrar sa posibleng maayong sangpotan sa atong literatura human nato kini ikapahimutang.
Gipiyalan Kita ug Usa ka Bahandi
16. Unsay atong makat-onan gikan sa mga pulong sa 2 Corinto 4:7?
16 Si apostol Pablo naghisgot bahin sa “bahandi diha sa mga kulonong sudlanan.” Kanang maong bahandi mao ang hinatag-sa-Diyos nga sugo sa pagsangyaw, ug ang mga kulonong sudlanan mao ang mga tawo nga gipiyalan ni Jehova niining bahandia. Sanglit kanang mga tawhana dili hingpit ug may limitasyon, si Pablo nagpadayon sa pag-ingon nga ang sangpotanan sa ilang pagkahinatagan sa maong sugo mao nga “ang gahom nga labaw sa kasarangan mamahimong iya sa Diyos ug dili gikan sa among kaugalingon.” (2 Corinto 4:7) Oo, makasalig kita kang Jehova sa pagtagana sa gahom nga gikinahanglan aron matuman nato ang atong buluhaton.
17. Unsay atong mahibalag samtang kita magpugas ug mga binhi sa kamatuoran sa Gingharian, ug nganong huptan gihapon nato ang positibong tinamdan?
17 Kasagaran kinahanglan kitang mohimog mga pagsakripisyo. Malisod tingali o dili kombenyente ang pagsangyaw diha sa pipila ka teritoryo. Dunay mga dapit diin ang kadaghanang tawo morag hilabihan ka walay pagtagad, mabatokon pa gani. Dakong paningkamot tingali ang gugolon sa maong mga dapit nga walay dayag nga kalamposan. Apan takos ang maong paningkamot kon dako kaayo ang nalangkit. Hinumdomi, ang mga binhi nga imong ipugas makahatag sa mga tawo ug kalipay karon ug walay-kataposang kinabuhi sa umaabot. Ang mga pulong sa Salmo 126:6 napamatud-ang tinuod sa makadaghan: “Ang usa nga sa walay pakyas molakaw, nga maghilak pa gani, nga magdala ug usa ka buyot nga binhi, sa walay pakyas moabot inubanan sa malipayong paghugyaw, nga magdala sa iyang mga binangan.”
18. Sa unsang paagi mahatagan natog kanunayng pagtagad ang atong ministeryo, ug nganong angay natong buhaton kini?
18 Pahimuslan nato ang matag haom nga kahigayonan sa dagayang pagpugas ug mga binhi sa kamatuoran sa Gingharian. Hinaot nga dili nato kalimtan nga, bisan tuod kita mao ang nagtanom ug nagbisibis sa mga binhi, si Jehova ang nagpatubo niana. (1 Corinto 3:6, 7) Bisan pa niana, maingon nga si Jesus ug ang mga manulonda nagtuman sa ilang bahin sa maong buluhaton, si Jehova nagdahom nga atong tumanon sa bug-os ang atong ministeryo. (2 Timoteo 4:5) Hinaot nga hatagan natog kanunayng pagtagad ang atong pagpanudlo, ang atong tinamdan, ug ang atong kasibot diha sa ministeryo. Ngano man? Si Pablo mitubag: “Pinaagi sa pagbuhat niini imong maluwas ang imong kaugalingon ug kadtong kinsa mamati kanimo.”—1 Timoteo 4:16.
Unsay Atong Nakat-onan?
• Sa unsang mga paagi ang atong buluhatong pagpamugas nagpatunghag maayong mga sangpotanan?
• Sa unsang paagi si Jesu-Kristo ug ang mga manulonda nalangkit sa buluhatong pag-ebanghelyo karon?
• Nganong magmadagayaon kita ingong mga magpupugas sa kamatuoran sa Gingharian?
• Sa dihang makasinati kita ug kawalay-pagtagad o pagkamabatokon diha sa atong ministeryo, unsay mopalihok kanato sa paglahutay?
[Mga Pangutana sa Pagtuon]
[Hulagway sa panid 15]
Sama sa mga mag-uuma sa karaang Israel, ang mga Kristohanon karon dagayang nagasabwag ug mga binhi sa kamatuoran sa Gingharian
[Hulagway sa panid 16, 17]
Ang mga Saksi ni Jehova nagpatik ug nanagtag ug nagkadaiyang pinasukad-sa-Bibliyang mga publikasyon diha sa 340 ka pinulongan