Ang Paglaom sa Pagkabanhaw Segurado!
Ang Paglaom sa Pagkabanhaw Segurado!
“Ako adunay paglaom ngadto sa Diyos . . . nga aduna unyay pagkabanhaw.”—BUHAT 24:15.
1. Nganong makalaom kita sa pagkabanhaw?
SI Jehova naghatag kanato ug maayong mga katarongan nga molaom sa pagkabanhaw. Kita gisaaran niya nga ang mga patay mobangon, mabuhi pag-usab. Ug ang iyang katuyoan maylabot niadtong nangatulog sa kamatayon seguradong matuman. (Isaias 55:11; Lucas 18:27) Sa pagkatinuod, gipakita na sa Diyos ang iyang gahom sa pagbangon sa mga patay.
2. Sa unsang paagi ang paglaom sa pagkabanhaw makabenepisyo kanato?
2 Ang pagtuo sa tagana sa Diyos alang sa pagbangon sa mga patay pinaagi sa iyang Anak, si Jesu-Kristo, makapalig-on kanato sa mga panahon sa kapit-os. Ang pagkasegurado sa paglaom sa pagkabanhaw makatabang usab kanato sa paghupot sa integridad ngadto sa atong langitnong Amahan bisan hangtod sa kamatayon. Lagmit, ang atong paglaom sa pagkabanhaw mapalig-on samtang atong konsiderahon ang mga pagkabuhi pag-usab nga gisulat diha sa Bibliya. Kining tanang milagro napalampos pinaagi sa gahom gikan sa Soberanong Ginoong Jehova.
Sila Midawat sa Ilang mga Patay Pinaagig Pagkabanhaw
3. Si Elias gihatagag gahom sa pagbuhat sa unsa sa dihang ang anak nga lalaki sa usa ka babayeng balo sa Zarepta namatay?
3 Sa kulbahinam nga paghisgot pag-usab sa pagtuo nga gipasundayag sa mga saksi ni Jehova una pa ang Kristohanong panahon, si apostol Pablo misulat: “Ang mga babaye midawat sa ilang mga patay pinaagig pagkabanhaw.” (Hebreohanon 11:35; 12:1) Usa niining mga babayhana mao ang kabos nga babayeng balo sa Fenicianhong lungsod sa Zarepta. Tungod kay maabiabihon siya sa manalagna sa Diyos nga si Elias, sa milagrosong paagi ang iyang harina ug lana wala mahurot panahon sa gutom nga mokalas unta sa iyang kinabuhi ug nianang sa iyang anak nga lalaki. Sa dihang ang bata namatay sa ulahi, si Elias nagpahigda kaniya sa higdaanan, nag-ampo, mikulob ibabaw sa bata sa makatulo, ug nangaliyupo: “Oh Jehova nga akong Diyos, palihog, pabalikon mo unta kaniya ang kalag niining bataa.” Gipahinabo gayod sa Diyos ang kalag, o kinabuhi, nga mobalik sulod sa bata. (1 Hari 17:8-24) Handurawa ang kalipay sa babayeng balo samtang ang iyang pagtuo gigantihan sa unang gisulat nga pagkabanhaw—kanang sa iya mismong minahal nga anak lalaki!
4. Unsang milagro ang gihimo ni Eliseo sa Shunem?
4 Ang laing babaye nga midawat sa iyang patay pinaagi sa pagkabanhaw nagpuyo sa lungsod sa Shunem. Asawa sa usa ka tigulang nga lalaki, siya nagpakita ug kalulot sa manalagna nga si Eliseo ug sa iyang sulugoon. Gigantihan siya ug usa ka anak nga lalaki. Apan, ubay-ubayng katuigan sa ulahi iyang gipatawag ang manalagna, kinsa nakakaplag sa bata nga patay na diha sa iyang balay. Human mag-ampo ug mohimo ug pipila ka lakang si Eliseo, “ang unod sa bata nag-anam ka init.” Siya “misugod sa pag-atsi hangtod sa pito ka higayon, nga human niana ang batang lalaki mibuka sa iyang mga mata.” Kini nga pagkabanhaw sa walay duhaduha naglipay pag-ayo sa inahan ug sa iyang anak. (2 Hari 4:8-37; 8:1-6) Apan pagkamalipayon pa nila sa dihang banhawon ngadto sa kinabuhi dinhi sa yuta sa “mas maayong pagkabanhaw”—usa nga magbutang sa ilang atubangan sa posibilidad nga dili na gayod mamatay pag-usab! Pagkadakong katarongan sa pagkamapasalamaton sa mahigugmaong Diyos sa pagkabanhaw, si Jehova!—Hebreohanon 11:35.
5. Sa unsang paagi nalangkit si Eliseo sa usa ka milagro bisan human sa iyang kamatayon?
5 Bisag namatay ug gilubong na si Eliseo, gihimo sa Diyos nga gamhanan ang iyang mga bukog pinaagi sa balaang espiritu. Atong mabasa: “Samtang [may pipila ka Israelinhon] nga naglubong sa usa ka tawo, aw, ania sila nakakita sa usa ka panon sa mga bandido [nga Moabinhon]. Dihadiha giitsa nila ang tawo ngadto sa lubnganan ni Eliseo ug nanagan. Sa dihang ang tawo [nga patay] midapat sa mga bukog ni Eliseo, dihadiha siya nabuhi ug mitindog.” (2 Hari 13:20, 21) Pagkadako kaha sa kahibulong ug kalipay niadtong tawhana! Handurawa ang kalipay nga bation sa dihang ang atong mga minahal mabuhi pag-usab kaharmonya sa dili-mapakyas nga katuyoan ni Jehova nga Diyos!
Ang Anak sa Diyos Nagbangon sa mga Patay
6. Unsang milagro ang gihimo ni Jesus duol sa siyudad sa Nain, ug sa unsang paagi kining maong hitabo mag-apektar kanato?
6 Ang Anak sa Diyos, si Jesu-Kristo, naghatag kanato ug maayong mga katarongan sa pagtuo nga ang mga patay mabanhaw, uban sa paglaom nga mabuhi sa walay kataposan. Ang usa ka panghitabo duol sa siyudad sa Nain makatabang kanato sa pagsabot nga ang maong milagro posible pinaagi sa hinatag-sa-Diyos nga gahom. Sa usa ka higayon, nahibalag ni Jesus ang mga tawong nagbalata nga nagyayong sa lawas sa usa ka batan-ong lalaki pagawas sa siyudad aron ilubong. Siya mao ang bugtong anak sa usa ka babayeng balo. Giingnan siya ni Jesus: “Hunong na sa paghilak.” Dayon gihikap niya ang yayonganan sa patay ug miingon: “Batan-ong lalaki, ako magaingon kanimo, Bangon!” Niana siya milingkod ug misulti. (Lucas 7:11-15) Kining maong milagro magpalig-on gayod sa atong pagtuo nga ang paglaom sa pagkabanhaw segurado.
7. Unsay nahitabo maylabot sa anak nga babaye ni Jairo?
7 Tagda, usab, ang usa ka hitabo nga naglangkit kang Jairo, usa ka pangulong opisyal sa sinagoga sa Capernaum. Gihangyo niya si Jesus nga moadto ug motabang sa iyang hinigugmang 12-anyos nga dalagita, kinsa nag-ungaw sa kamatayon. Sa wala madugay gitaho nga ang dalagita namatay. Nag-awhag sa naguol pag-ayong si Jairo sa pagpasundayag ug pagtuo, miuban si Jesus kaniya sa iyang balay, diin usa ka panon ang nagminatay. Nangatawa sila sa dihang giingnan sila ni Jesus: “Wala mamatay ang bata, kundili natulog.” Sa pagkatinuod patay siya, apan ipakita ni Jesus nga ang mga tawo mahimong banhawon sama ra nga sila mahimong pukawon gikan sa hinanok nga pagkatulog. Gikuptan ang kamot sa dalagita, siya miingon: “Inday, bangon!” Dihadiha siya mibangon, ug ang ‘iyang mga ginikanan gibayaw sa kalipay.’ (Marcos 5:35-43; Lucas 8:49-56) Sa walay duhaduha, ang mga membro sa pamilya ‘bayawon sa kalipay’ sa dihang ang ilang namatayng mga minahal banhawon ngadto sa kinabuhi diha sa paraisong yuta.
8. Unsay gibuhat ni Jesus diha sa lubnganan ni Lazaro?
8 Si Lazaro upat na ka adlawng patay sa dihang si Jesus miduol sa iyang lubnganan ug gipakuha ang bato diha sa entrada niini. Human mag-ampo nga dayag aron ang mga maniniid mahibalo nga siya nag-agad sa hinatag-sa-Diyos nga gahom, si Jesus misulti sa makusog nga tingog: “Lazaro, gula ngari!” Ug migula siya! Ang iyang mga kamot ug mga tiil gibugkosan pa ug panglimin sa paglubong, ug ang iyang nawong gitabonan ug panapton. “Badbari siya ug palakwa siya,” matod ni Jesus. Sa pagkakita niining milagroha, daghang anaa didto aron sa paghupay sa mga igsoon ni Lazaro, si Maria ug Marta, nanuo kang Jesus. (Juan 11:1-45) Dili ba kining asoya naghatag kanimog paglaom nga ang imong mga minahal mahimong banhawon ngadto sa kinabuhi sa bag-ong kalibotan sa Diyos?
9. Nganong makaseguro gayod kita nga si Jesus karon makabanhaw na sa mga patay?
9 Sa dihang nabilanggo si Juan Bawtista, gipadalhan siya ni Jesus ug makapadasig nga mensahe: “Nagpakakita pag-usab ang mga buta, . . . ug ang mga patay gipamangon.” (Mateo 11:4-6) Sanglit sa dinhi pa si Jesus sa yuta gibanhaw niya ang mga patay, seguradong buhaton niya kana ingong gamhanang espiritung linalang nga gihatagag gahom sa Diyos. Si Jesus mao “ang pagkabanhaw ug ang kinabuhi,” ug pagkamakapahupay ang pagkahibalo nga sa haduol nga umaabot “kadtong tanan nga anaa sa handomanang mga lubnganan makadungog sa iyang tingog ug managpanggula”!—Juan 5:28, 29; 11:25.
Ang Ubang mga Pagkabanhaw Nagpalig-on sa Atong Paglaom
10. Unsaon nimo paghubit ang unang gitaho nga pagkabanhaw nga gihimo sa usa ka apostol?
10 Sa dihang gisugo ni Jesus ang iyang mga apostoles ingong mga magwawali sa Gingharian, siya miingon: “Pagbangon ug mga patay.” (Mateo 10:5-8) Aron mabuhat kini, siyempre, kinahanglang mosalig sila sa gahom sa Diyos. Sa Jope sa 36 K.P., ang diyosnong babaye nga si Dorcas (Tabitha) natulog sa kamatayon. Ang iyang maayong mga binuhatan naglakip sa paghimog mga besti alang sa kabos nga mga babayeng balo, nga taliwala kanila ang iyang kamatayon nagpahinabog hilabihang pagminatay. Ang mga tinun-an nag-andam kaniya alang sa paglubong ug nagpatawag kang apostol Pedro, tingali alang sa paghupay. (Buhat 9:32-38) Iyang gipapahawa ang tanan gikan sa lawak sa taas, miampo, ug miingon: “Tabitha, bangon!” Siya mibuka sa iyang mga mata, milingkod, ug mikupot sa kamot ni Pedro, ug iyang gibangon siya. Tungod niining unang gitaho nga pagkabanhaw nga gihimo sa usa ka apostol daghan ang nahimong mga magtutuo. (Buhat 9:39-42) Naghatag usab kini kanato ug dugang katarongan nga molaom sa pagkabanhaw.
11. Unsa ang kataposang pagkabanhaw nga gisulat diha sa Bibliya?
11 Ang kataposang pagkabanhaw nga gisulat diha sa Bibliya nahitabo sa Troas. Sa dihang mihapit si Pablo didto sa iyang ikatulong misyonaryong panaw, gipadayon niya ang iyang pakigpulong hangtod sa tungang gabii. Nadaog sa kakapoy ug tingali sa kainit sa daghang suga ug sa naghuot nga kahimtang sa tigomanan, usa ka batan-ong lalaki nga ginganlag Eutiko nahikatulog ug nahulog gikan sa bentana sa ikatulong andana. Siya “gialsa nga patay,” dili kay nawad-an ra sa panimuot. Si Pablo miubo kang Eutiko, migakos kaniya, ug miingon sa mga tumatan-aw: “Hunong na kamo sa paghimo ug kasaba, kay ang iyang kalag anaa kaniya.” Gipasabot ni Pablo nga ang kinabuhi sa batan-on napasig-uli. Kadtong atua didto ‘nangahupay pag-ayo.’ (Buhat 20:7-12) Karong adlawa, ang mga alagad sa Diyos mahupayan pag-ayo sa pagkahibalo nga ang ilang kanhing mga kauban diha sa pag-alagad sa Diyos makasinati sa katumanan sa paglaom sa pagkabanhaw.
Pagkabanhaw—Dugay na nga Paglaom
12. Unsang lig-on nga pagtuo ang gipahayag ni Pablo sa dihang miatubang sa Romanong Gobernador Felix?
12 Sa dihang gihusay atubangan sa Romanong Gobernador Felix, si Pablo nagpamatuod: “Ginatuohan ko man ang tanan nga nahimutang diha sa Balaod ug nahisulat diha sa mga Propeta; ug ako adunay paglaom ngadto sa Diyos . . . nga aduna unyay pagkabanhaw sa mga matarong ug sa mga dili-matarong.” (Buhat 24:14, 15) Sa unsang paagi ang mga bahin sa Pulong sa Diyos, sama sa “Balaod,” nagpunting sa pagbangon sa mga patay?
13. Nganong ikaingon nga ang Diyos dili-direktang naghisgot sa pagkabanhaw sa dihang gihatag niya ang unang tagna?
13 Ang Diyos mismo dili-direktang naghisgot sa pagkabanhaw sa dihang gihatag niya ang unang tagna sa Eden. Sa dihang gihukman “ang orihinal nga halas,” si Satanas nga Yawa, ang Diyos miingon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Pinadayag 12:9; Genesis 3:14, 15) Ang pagsamad sa tikod sa binhi sa babaye nagpasabot ug pagpatay kang Jesu-Kristo. Kon ang maong Binhi magsamad sa ulo sa bitin human niana, si Kristo kinahanglang bangonon gikan sa mga patay.
14. Sa unsang paagi nga si Jehova “usa ka Diyos, dili sa mga patay, kundili sa mga buhi”?
14 Si Jesus miingon: “Nga ang mga patay pagabangonon bisan gani si Moises nagbutyag, sa asoy mahitungod sa tunokong-tanom, dihang iyang gitawag si Jehova nga ‘ang Diyos ni Abraham ug Diyos ni Isaac ug Diyos ni Jacob.’ Siya usa ka Diyos, dili sa mga patay, kundili sa mga buhi, kay kaniya silang tanan buhi.” (Lucas 20:27, 37, 38; Exodo 3:6) Si Abraham, Isaac, ug Jacob nangamatay, apan ang katuyoan sa Diyos nga banhawon sila segurado kaayong matuman nga kaniya sila sama rag buhi.
15. Nganong si Abraham dunay katarongan nga motuo sa pagkabanhaw?
15 Si Abraham dunay katarongan nga molaom sa pagkabanhaw, kay sa dihang siya ug ang iyang asawa, si Sara, tigulang na kaayo, ug sila mga patay maylabot sa ilang katakos sa pagpanganak, ang Diyos nagpabalik sa ilang mga gahom sa pagsanay sa milagrosong paagi. Sama kinig pagkabanhaw. (Genesis 18:9-11; 21:1-3; Hebreohanon 11:11, 12) Sa dihang ang ilang anak, si Isaac, mga 25 anyos na, gisugo sa Diyos si Abraham nga ihalad siya. Hinunoa, sa dihang patyon na unta ni Abraham si Isaac, ang manulonda ni Jehova mipugong sa iyang kamot. Si Abraham ‘nag-isip nga ang Diyos makahimo sa pagbangon [kang Isaac] bisan gikan sa mga patay; ug gikan niana siya midawat usab kaniya sa masambingayong paagi.’—Hebreohanon 11:17-19; Genesis 22:1-18.
16. Si Abraham karon natulog sa kamatayon, nga nagpaabot sa unsa?
16 Si Abraham naglaom sa pagkabanhaw ilalom sa pagmando sa Mesiyas, ang gisaad nga Binhi. Gikan sa panglantaw niya sa wala pa siya mahimong tawo, namatikdan sa Anak sa Diyos ang pagtuo ni Abraham. Busa, ingong tawo nga si Jesu-Kristo, giingnan niya ang mga Hudiyo: “Si Abraham nga inyong amahan nagmaya sa hilabihan sa paglaom nga makita ang akong adlaw.” (Juan 8:56-58; Proverbio 8:30, 31) Si Abraham karon natulog na sa kamatayon, nga nagpaabot sa pagkabanhaw ngadto sa kinabuhi dinhi sa yuta ilalom sa Mesiyanikong Gingharian sa Diyos.—Hebreohanon 11:8-10, 13.
Pamatuod Gikan sa Balaod ug sa mga Salmo
17. Sa unsang paagi ang “nahimutang diha sa Balaod” nagpunting sa pagkabanhaw ni Jesu-Kristo?
17 Ang kang Pablo nga paglaom sa pagkabanhaw kaharmonya sa “nahimutang diha sa Balaod.” Giingnan sa Diyos ang mga Israelinhon: “Magdala . . . kamo ug usa ka binangan sa mga unang-bunga sa inyong ani ngadto sa saserdote. Ug [sa Nisan 16] iyang itabyog ang binangan atubangan ni Jehova aron makabaton ug pag-uyon alang kaninyo.” (Levitico 23:9-14) Tingali naghunahuna niining balaora, si Pablo misulat: “Si Kristo gibangon na gikan sa mga patay, ang unang-bunga kanilang kinsa nahikatulog sa kamatayon.” Ingong “unang-bunga,” si Jesus gibanhaw sa Nisan 16, 33 K.P. Sa ulahi, panahon sa iyang presensiya, dunay pagkabanhaw sa ‘mga ikaduhang-bunga’—iyang dinihogan-sa-espiritu nga mga sumusunod.—1 Corinto 15:20-23; 2 Corinto 1:21; 1 Juan 2:20, 27.
18. Sa unsang paagi gipakita ni Pedro nga ang pagkabanhaw ni Jesus gitagna diha sa mga Salmo?
18 Ang mga Salmo nagpaluyo usab sa pagkabanhaw. Sa adlaw sa Pentekostes 33 K.P., si apostol Pedro mikutlo sa Salmo 16:8-11, nga nag-ingon: “Si David nagaingon labot [kang Kristo], ‘Si Jehova kanunay anaa kanako atubangan sa akong mga mata; tungod kay siya ania sa akong tuong kamot aron ako dili matay-og. Gumikan niini ang akong kasingkasing nahimong masayahon ug ang akong dila nagmaya pag-ayo. Dugang pa, bisan ang akong unod magapuyo diha sa paglaom; tungod kay dili mo biyaan ang akong kalag sa Hades, ni tugotan mo ang imong maunongong usa nga makakitag pagkadunot.’” Si Pedro midugang: “[Si David] nakakita daan ug namulong mahitungod sa pagkabanhaw sa Kristo, nga wala siya biyai sa Hades ni ang iyang unod nakakitag pagkadunot. Kining maong Jesus gibanhaw sa Diyos.”—Buhat 2:25-32.
19, 20. Kanus-a mikutlo si Pedro sa Salmo 118:22, ug sa unsang paagi nalangkit kini sa kamatayon ug pagkabanhaw ni Jesus?
19 Pipila ka adlaw sa ulahi, si Pedro mitindog atubangan sa Sanhedrin ug mikutlo na usab sa mga Salmo. Gipangutana kon giunsa niya pag-ayo ang bakol nga makililimos, ang apostol miingon: “Angayng mahibaloan ninyong tanan ug sa tanang katawhan sa Israel, nga sa ngalan ni Jesu-Kristo nga Nasaretnon, kinsa inyong gilansang apan kinsa gibangon sa Diyos gikan sa mga patay, pinaagi kaniya kining tawhana nagabarog dinhi nga maayo atubangan kaninyo. Kini [si Jesus] mao ‘ang bato nga gitratar ninyo nga mga magtutukod ingong walay hinungdan nga nahimong ulohan sa pamag-ang.’ Dugang pa, walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.”—Buhat 4:10-12.
20 Dinhi si Pedro mikutlo sa Salmo 118:22, nga nagpadapat sa giingon niini ngadto sa kamatayon ug pagkabanhaw ni Jesus. Gihulhogan sa ilang relihiyosong mga lider, ang mga Hudiyo nagsalikway kang Jesus. (Juan 19:14-18; Buhat 3:14, 15) ‘Ang pagsalikway sa mga magtutukod sa bato’ misangpot sa kamatayon ni Kristo, apan ang ‘pagkahimo sa bato nga ulohan sa pamag-ang’ nagpasabot sa iyang pagkabanhaw ngadto sa espiritung himaya sa langit. Sumala sa gitagna sa salmista, ‘kini gikan kang Jehova mismo.’ (Salmo 118:23) Ang paghimo sa “bato” nga Ulohan sa pamag-ang naglakip sa pagtuboy kaniya ingong Tinudlong-Hari.— Efeso 1:19, 20.
Gipalig-on sa Paglaom sa Pagkabanhaw
21, 22. Unsang paglaom ang gipahayag ni Job, sumala sa nasulat sa Job 14:13-15, ug sa unsang paagi makahupay kini sa nanagbangotan karon?
21 Bisan tuod sa personal wala pa kitay nakita nga gibangon gikan sa mga patay, atong nahisgotan ang pipila ka asoy sa Kasulatan nga nagpasalig kanato bahin sa pagkabanhaw. Busa, mahuptan nato ang paglaom nga gipahayag sa matul-id nga tawong si Job. Sa dihang siya nag-antos, siya nangaliyupo: “Oh nga sa Sheol imo [Jehova] unta akong tagoan, . . . nga imo unta akong tagalan ug panahon ug hinumdoman ako! Kon ang tawo nga lig-on ug lawas mamatay mabuhi ba siya pag-usab? . . . Ikaw motawag, ug ako mismo motubag kanimo. Kay ikaw mangandoy sa buhat sa imong mga kamot.” (Job 14:13-15) Ang Diyos ‘mangandoy sa buhat sa iyang mga kamot,’ nga magtinguha gayod sa pagbanhaw kang Job. Naghatag gayod kanag paglaom kanato!
22 Ang mahinadlokon-sa-Diyos nga membro sa pamilya basin grabeng masakit, sama kang Job, ug basin mabuntog sa kaaway nga kamatayon. Ang nagbangotan mohilak tingali tungod sa kasubo, maingon nga si Jesus mihilak tungod sa kamatayon ni Lazaro. (Juan 11:35) Apan pagkamakapahupay ang pagkahibalo nga ang Diyos motawag ug kadtong anaa sa iyang panumdoman motubag! Sama ra nga sila nahiuli gikan sa usa ka panaw—dili masakiton o baldado, kondili maayog panglawas.
23. Sa unsang paagi ang uban nagpahayag sa ilang pagsalig sa paglaom sa pagkabanhaw?
23 Ang kamatayon sa usa ka matinumanong tigulang nga Kristohanon nagpalihok sa mga isigkamagtutuo sa pagsulat: “Palihog dawata ang among sinserong simpatiya sa pagkamatay sa imong inahan. Dili na magdugay nga ato siyang abiabihon—matahom ug lagsik!” Ang mga ginikanan nga namatyag anak nga lalaki miingon: “Nagpaabot gayod kami sa adlaw sa dihang si Jason momata! Motan-aw siya sa iyang palibot ug makita ang Paraiso nga iyang gipangandoy pag-ayo. . . . Pagkadakong panukmod alang kanamo nga nahigugma kaniya nga maatua usab didto.” Oo, ug pagkamapasalamaton nato nga ang paglaom sa pagkabanhaw segurado!
Unsay Imong Tubag?
• Sa unsang paagi ang pagtuo sa tagana sa Diyos sa pagbangon sa mga patay makabenepisyo kanato?
• Unsang mga hitabo nga nasulat sa Kasulatan ang maghatag kanato ug katarongan nga molaom sa pagkabanhaw?
• Nganong ikaingon nga ang pagkabanhaw usa ka dugay nang paglaom?
• Unsang makapalig-ong paglaom ang atong mahuptan maylabot sa mga patay?
[Mga Pangutana sa Pagtuon]
[Hulagway sa panid 10]
Pinaagi sa gahom gikan kang Jehova, gipasig-uli ni Elias ang kinabuhi sa batan-ong anak nga lalaki sa usa ka babayeng balo
[Hulagway sa panid 12]
Sa dihang gibanhaw ni Jesus ang anak nga babaye ni Jairo, ang iyang mga ginikanan gibayaw sa kalipay
[Hulagway sa panid 15]
Sa adlaw sa Pentekostes 33 K.P., si apostol Pedro maisogong nagpamatuod nga si Jesus gibangon na gikan sa mga patay