Kon sa Unsang Paagi Mahimong Mas Makahuloganon ang Imong Kinabuhi

USA ka karaang proverbio ang nag-ingon: “Ayaw pagbudlay aron makabaton ug mga bahandi. Hunong gikan sa imong kaugalingong pagsabot. Imo bang gipasiplat ang imong mga mata niana, nga kana wala may kapuslanan? Kay tino nga kana maghimog mga pako alang sa iyang kaugalingon sama nianang sa usa ka agila ug molupad ngadto sa kalangitan.” (Proverbio 23:4, 5) Sa laing pagkasulti, dili maalamong pataypatayon nato ang atong lawas sa paningkamot nga madato, kay ang bahandi mahimong molupad sama nga anaa sa mga pako sa agila.

Sumala sa gipakita sa Bibliya, ang materyal nga bahandi daling mahanaw. Sa usa lang ka gabii kini mahimong mahanaw tungod sa katalagman, pagkahugno sa ekonomiya, o ubang wala-damhang mga panghitabo. Dugang pa, bisan kadtong makabaton ug materyal nga kalamposan sagad nga mahigawad. Matikdi ang kahimtang ni John, kansang trabaho naglakip sa pag-abiabig mga politiko, mga iladong magdudula, ug mga hamili.

Si John miingon: “Gideboto nako ang akong kaugalingon sa akong trabaho. Ako nadato, nagpuyo sa maluhong mga hotel, ug usahay moadto ako sa trabahoan sakay sa pribadong ayroplano. Sa sinugdan nalingaw ako niadto, apan sa hinayhinay ako gilaayan. Ang mga tawo nga gipaningkamotan nakong pahimut-an maorag taphaw lamang. Walay kahulogan niadto ang akong kinabuhi.”

Sumala sa nakaplagan ni John, ang kinabuhing walay espirituwal nga mga prinsipyo dili-makapatagbaw. Sa iyang iladong Wali sa Bukid, gipakita ni Jesu-Kristo kon sa unsang paagi masinati ang dumalayong kalipay. Siya miingon: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit.” (Mateo 5:3) Nan, tin-aw nga maalamong unahon ang espirituwal nga mga butang diha sa kinabuhi. Bisan pa niana, ang ubang mga hinungdan makatabang usab sa paghimo sa kinabuhi nga mas makahuloganon.

Ang Imong Pamilya ug mga Higala Hinungdanon Gayod

Magmalipayon ka ba sa kinabuhi kon ikaw walay kontak sa imong pamilya ug walay suod nga mga higala? Dili gayod. Ang atong Maglalalang naghimo kanato uban ang panginahanglan  nga mahigugma ug higugmaon. Usa kana ka hinungdan kon nganong gipasiugda ni Jesus ang kahinungdanon sa ‘paghigugma sa atong silingan sama sa atong kaugalingon.’ (Mateo 22:39) Ang pamilya maoy gasa gikan sa Diyos nga nagtaganag maayong dapit sa pagpakitag dili-mahakogong gugma.—Efeso 3:14, 15.

Sa unsang paagi ang atong pamilya makahimo sa atong kinabuhi nga mas makahuloganon? Buweno, ang usa ka nahiusang pamilya mahimong itandi sa usa ka matahom nga hardin nga nagtaganag makapahupay nga dalangpanan gikan sa kapit-os sa adlaw-adlawng kinabuhi. Sa susama, sa sulod sa pamilya, kita makakaplag ug makapahupay nga panag-ubanay ug kainit nga makahanaw sa kamingaw. Siyempre, ang usa ka pamilya dili awtomatikong makahatag sa maong dalangpanan. Apan, samtang lig-onon nato ang mga bugkos sa pamilya, mas masuod pa kita sa usag usa, ug ang kinabuhi mahimong mas tugob. Pananglitan, ang panahon ug pagtagad nga igahin nato sa pagpakitag gugma ug pagtahod alang sa atong kapikas sa kaminyoon susamag adlaw-adlawng pagpamuhunan nga sa kataposan moanig dagayang mga resulta.—Efeso 5:33.

Kon kita adunay mga anak, kinahanglang maningkamot kita sa pagtaganag hustong palibot sa pagmatuto kanila. Ang paggugol ug panahon uban kanila, paghupot nga bukas sa mga linya sa komunikasyon, ug paghatag kanilag espirituwal nga pagtudlo tingali nagkinahanglag dakong panahon. Apan ang maong panahon ug paningkamot maghatag kanatog dakong katagbawan. Ang malamposong mga ginikanan mag-isip sa ilang mga anak ingong panalangin, ingong panulondon gikan sa Diyos nga angayng atimanon pag-ayo.—Salmo 127:3.

Ang maayong mga higala makatampo usab sa usa ka makapatagbaw ug makahuloganong kinabuhi. (Proverbio 27:9) Makahimo kitag daghang higala pinaagi sa pagpakitag pagbati sa isigkaingon. (1 Pedro 3:8) Ang tinuod nga mga higala motabang sa pagbangon kanato kon kita mapandol. (Ecclesiastes 4:9, 10) Ug ang “tinuod nga higala . . . maoy usa ka igsoon nga gipakatawo alang sa panahon sa kasakit.”—Proverbio 17:17.

Pagkamakapatagbaw gayod sa tinuod nga panaghigalaay! Ang pagsalop sa adlaw mas monindot, ang pagkaon mas molami, ug ang musika mas makapalipay kon salohan uban sa usa ka higala. Siyempre, ang suod nga pamilya ug kasaligang mga higala maoy duha lamang ka bahin sa usa ka makahuloganong kinabuhi. Unsang ubang mga tagana ang gihimo sa Diyos nga makahimo sa atong mga kinabuhi nga mas makahuloganon?

Pagtagbaw sa Atong Espirituwal nga Panginahanglan

Sumala sa gihisgotan ganina, gilangkit ni Jesu-Kristo ang kalipay sa pagkaamgo sa atong espirituwal nga panginahanglan. Kita gilalang uban ang espirituwal ug moral nga kapasidad. Busa, ang Bibliya nagtumong sa “tawong espirituwal” ug sa “natago nga pagkatawo sa kasingkasing.”—1 Corinto 2:15; 1 Pedro 3:3, 4.

Sumala sa An Expository Dictionary of New Testament Words, ni W. E. Vine, ang mahulagwayong kasingkasing naghawas sa “tibuok mental ug moral nga kalihokan sa tawo, ang makataronganon ug emosyonal nga mga elemento.” Sa pagsaysay, si Vine midugang: “Sa laing pagkasulti, ang kasingkasing gigamit sa mahulagwayong paagi alang sa tinagong mga tinubdan sa galamhan.” Ang mao gihapong basahon nag-ingon usab nga “sanglit nahiluna sa kinasuloran, anaa sa kasingkasing ang ‘tinagong tawo,’ . . . ang tinuod nga tawo.”

Unsaon man nato pagtagbaw ang mga panginahanglan sa “tawong espirituwal,” o ang “tinagong tawo,” buot ingnon, ang “natago nga pagkatawo sa kasingkasing”? Mahimo nato ang hinungdanong tikang sa pagbuhat niini ug sa pagtagbaw sa atong espirituwal nga panginahanglan kon ilhon nato ang gipakitang punto sa dinasig nga salmista nga miawit: “Hibaloi nga Diyos si Jehova. Siya mao ang nagbuhat kanato, ug dili kita sa atong kaugalingon. Kita mao ang iyang katawhan ug ang mga karnero sa iyang sibsibanan.” (Salmo 100:3) Ang pag-ila niini makataronganong moagak kanato sa paghinapos nga kita may tulubagon sa Diyos. Kon buot natong mahiapil sa ‘iyang katawhan ug sa mga karnero sa iyang sibsibanan,’ kinahanglang molihok kita uyon sa iyang Pulong, ang Bibliya.

Daotan ba kana? Dili, kay ang pagkasayod nga ang atong panggawi hinungdanon sa Diyos magdugang ug kahulogan sa atong mga kinabuhi. Magdasig kini kanato nga mahimong mas maayong mga tawo—tino gayod nga usa ka mapuslanong tumong. “Malipayon ang tawo nga nahadlok kang Jehova, nga diha sa iyang mga sugo siya may hilabihang kahimuot,” nag-ingon ang Salmo 112:1. Ang matahaong kahadlok sa Diyos ug kinasingkasing nga pagsugot sa iyang mga sugo makahimo sa atong mga kinabuhi nga mas makahuloganon.

Nganong ang pagkamasinugtanon sa Diyos makatagbaw kanato? Tungod kay kita adunay tanlag, usa ka gasa nga gihatag sa Diyos sa tanang katawhan. Ang tanlag maoy usa ka moral nga tigsusi nga nagtala sa pag-uyon ug di-pag-uyon sa atong nahimo o gihunahunang himoon. Kitang tanan nakasinati sa  kasubo gumikan sa nahasol nga tanlag. (Roma 2:15) Apan ang atong tanlag mahimong moganti usab kanato. Kon kita molihok nga dili-mahakogon ngadto sa Diyos ug sa mga isigkatawo, kita mobating kontento ug tagbaw. Atong makaplagan nga “adunay labaw nga kalipay sa paghatag kay sa pagdawat.” (Buhat 20:35) Adunay hinungdanong rason niini.

Ang atong Maglalalang naghimo kanato sa paagi nga ang mga tinguha ug mga panginahanglan sa mga isigkatawo makaapektar kanato. Ang pagtabang sa uban makapalipay sa atong mga kasingkasing. Dugang pa, ang Bibliya nagpasalig kanato nga kon kita mohatag sa usa ka tawong nanginahanglan, ang Diyos mag-isip niini nga usa ka pabor nga gibuhat ngadto kaniya.—Proverbio 19:17.

Gawas pa sa paghatag ug katagbawan sa galamhan, ang pagtagad ba sa atong espirituwal nga mga panginahanglan makatabang kanato sa praktikal nga paagi? Buweno, usa ka negosyante sa Tungang Sidlakan nga ginganlag Raymond nagtuo nga kini makatabang. “Ang akong bugtong tumong mao ang pagpanapi,” matod niya. “Apan sukad nga gidawat nako sa akong kasingkasing nga dunay usa ka Diyos ug nga ang Bibliya nagpadayag sa iyang kagustohan, ako nausab. Ang pagpanginabuhi ikaduha na lamang sa akong kinabuhi. Pinaagi sa pagpaningkamot nga mapahimut-an ang Diyos, nakalingkawas ako sa makadaot nga pagbati ug pagdumot. Bisan tuod namatay ang akong amahan panahon sa gubat, wala ako magtinguha nga manimalos sa mga responsable niana.”

Sumala sa nakaplagan ni Raymond, ang pag-atiman pag-ayo sa mga panginahanglan sa “tawong espirituwal” makaayo sa laglom nga mga samad sa emosyon. Bisan pa niana, gawas lamang kon kita mosagubang sa mga problema nga motungha matag adlaw, ang kinabuhi dili gayod bug-os nga makapatagbaw.

Mabatonan Nato “ang Kalinaw sa Diyos”

Niining gubot nga kalibotan, pipila ray moaging adlaw nga way suliran. Mahitabo ang mga aksidente, madaot ang mga plano, ug ang mga tawo mopahigawad kanato. Kining maong mga kapakyasan mahimong makawagtang sa atong kalipay. Apan, ngadto kanilang nag-alagad kang Jehova nga Diyos, ang Bibliya nagsaad ug pagkakontento sa galamhan—“ang kalinaw sa Diyos.” Sa unsang paagi mabatonan nato kini nga kalinaw?

Si apostol Pablo misulat: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Inay mosulay pagpas-an sa atong mga problema nga mag-inusara, kinahanglang mag-ampo kitang mainiton, nga magtugyan sa atong adlaw-adlawng mga palas-anon ngadto sa Diyos. (Salmo 55:22) Ang pagtuo nga mosanong siya sa maong pangaliyupo pinaagi sa iyang Anak, si Jesu-Kristo, mouswag samtang motubo kita sa espirituwal ug makasabot kon sa unsang paagi motabang ang Diyos kanato.—Juan 14:6, 14; 2 Tesalonica 1:3.

Human nato mapalig-on ang atong pagsalig kang Jehova nga Diyos, ang “Tigpatalinghog sa pag-ampo,” mas makasagubang kita sa mga pagsulay, sama sa laygay nga sakit, pagkatigulang, o pagbangotan. (Salmo 65:2) Apan, aron makabaton ug tinuod nga makahuloganong kinabuhi, kinahanglang tagdon usab nato ang umaabot.

Pagkalipay Diha sa Paglaom sa Umaabot

Ang Bibliya nagsaad ug “bag-ong mga langit ug usa ka bag-ong yuta,” usa ka matarong, nagatagad nga langitnong kagamhanan nga magmando ibabaw sa masinugtanon nga tawhanong pamilya. (2 Pedro 3:13) Nianang bag-ong kalibotan nga gisaad  sa Diyos, ang gubat ug inhustisya pulihan sa pakigdait ug hustisya. Dili kini lumalabay lamang nga pangandoy, kondili usa kini ka kombiksiyon nga mag-anam ka lig-on matag adlaw. Usa gayod kini ka maayong balita ug tinong usa ka hinungdan sa pagmaya.—Roma 12:12; Tito 1:2.

Si John, nga gihisgotan sa sinugdan, karon mibati nga ang iyang kinabuhi mas makahuloganon. “Bisan tuod dili gayod ako relihiyoso kaayo, nagtuo gayod ako sa Diyos,” siya miingon. “Apan wala akoy gibuhat bahin niining maong pagtuo hangtod nga duha ka Saksi ni Jehova ang miduaw kanako. Nagpusotpusot ang akong mga pangutana kanila, sama sa, ‘Unsay atong ginabuhat dinhi sa yuta? Asa kita padulong?’ Ang ilang makapatagbaw nga Kasulatanhong mga tubag naghatag kanakog pagbati nga may katuyoan sa unang higayon sa akong kinabuhi. Sinugdanan lamang kadto. Akong naugmad ang kauhaw sa kamatuoran nga mitultol kanako sa pag-usab sa tanan nakong mga prinsipyo. Bisan tuod dili na ako dato sa materyal, ako mibating samag milyonaryo sa espirituwal nga paagi.”

Sama kang John, tingali gipasagdan lamang nimo ang imong espirituwal nga kapasidad sa daghang tuig. Apan, pinaagi sa pag-ugmad ug “kasingkasing nga manggialamon,” kini imong mapasig-uli. (Salmo 90:12) Uban ang determinasyon ug paningkamot, imong maangkon ang tiunay nga kalipay, kalinaw, ug paglaom. (Roma 15:13) Oo, ug ang imong kinabuhi mahimong mas makahuloganon.

[Hulagway sa panid 6]

Ang pag-ampo makahatag kanato sa “kalinaw sa Diyos”

[Mga hulagway sa panid 7]

Nasayod ka ba kon unsay makapahimo sa kinabuhi sa pamilya nga mas makapatagbaw?