Mahimo Bang Mas Makahuloganon ang Imong Kinabuhi?

ANG tinuod nga bili dili kanunayng makita sa panggawas nga panagway. Ang kinadak-ag bili nga papel de bangko sa Tinipong Bansa nagkantidad ug $10,000. Apan, ang papel nga gipatikan niini gamay ra kaayog bili.

Nakahunahuna ka na ba kon kaha ang mga piraso sa papel nga gamay rag kantidad makahatag ug tinuod nga kahulogan sa imong kinabuhi? Daghang tawo naghunahuna nga kini makahatag. Minilyon ang nagtrabaho adlaw ug gabii aron makasapig daghan kutob sa ilang mahimo. Usahay ang pagpangitag salapi nagkahulogan ug pagsakripisyo sa ilang panglawas, ilang mga higala, ug bisan sa ilang mga pamilya. Unsay kapuslanan? Ang salapi ba—o ang mapalit nato niini—makahatag ug tinuod ug dumalayon nga katagbawan?

Sumala sa mga tigdukiduki, kon mas daghang panahon ang atong igahin sa pagpangitag katagbawan pinasikad sa materyal nga mga kabtangan, mas diyutay ang purohan nga makaplagan nato kana. Ang magsusulat nga si Alfie Kohn nanghinapos nga “ang katagbawan dili gayod mapalit. . . . Ang mga tawo nga ang kadato maoy gihimong prioridad sa kinabuhi may purohang makasinatig di-kasagarang sukod sa kabalaka ug depresyon maingon man sa mas ubos nga  kinatibuk-ang sukod sa pagkamalipayon.”—International Herald Tribune.

Bisan tuod ang mga tigdukiduki makaamgo tingali nga ang makahuloganong kinabuhi may gikinahanglan pa gawas sa salapi, daghang tawo ang wala maghunahuna niana. Kini dili makapatingala, sanglit kadtong nagpuyo sa kayutaan sa Kasadpan kanunay tingaling pakitaan ug ingon ka daghan sa 3,000 ka panganunsiyo sa usa ka adlaw. Panganunsiyo man kini bahin sa mga kotse o kendi, ang sukaranang ideya mao: ‘Palita kining produktoha, ug ikaw labi pang magmalipayon.’

Unsay sangpotanan sa way-puas nga pagpasiugda sa materyal nga mga butang? Aw, sagad nga gisalikway ang espirituwal nga mga butang! Sumala sa usa ka taho sa magasing Newsweek, ang arsobispo sa Cologne, Alemanya, di pa dugayng miingon nga “sa atong katilingban, ang Diyos wala na hisgoti.”

Tingali nagugol nimo ang halos tanan nimong kusog sa pagpanginabuhi. Tingali gibati nimong diyutay ka rag panahon sa pagbuhat ug laing butang. Apan, usahay, bation tingali nimo nga duna pa gayoy labawng kahulogan sa kinabuhi kay sa way-hunong makapuol nga rutina hangtod nga ang imong panglawas o ang imong edad magpahunong na niana.

Ang paghatag ba ug dugang pagtagad sa espirituwal nga mga butang makapausbaw sa imong katagbawan? Unsay makahimo sa imong kinabuhi nga mas makahuloganon?