Kita ang Matang nga Adunay Pagtuo

Pagmantala sa Maayong Balita Diha sa mga Basakan sa Taiwan

ANG Taiwan kanunayng makapahimulos ug dagayang ulan, nga nakapaarang niini sa pag-ani ug duha ka maayong mga abot sa humay kada tuig. Apan, usahay, ang ulan dili moabot sa hustong panahon, ug ang mga binhi mangamatay. Kon mahitabo kini, molunga ba ang mag-uuma? Dili. Nasayod siya nga ang pagkamalahutayon gikinahanglan. Magpatubo siyag bag-ong mga binhi ug tamnan pag-usab ang basakan. Unya, kon moarang-arang ang mga kahimtang, ang mag-uuma moani ug maayong abot. Usahay ang espirituwal nga pagpananom ug pagpangani susama gayod niana.

Paglahutay Diha sa Espirituwal nga Pagpangani

Latas sa katuigan ang mga Saksi ni Jehova sa Taiwan naghago pag-ayo sa pagtanom ug pag-anig mga binhi sa Kasulatanhong kamatuoran diha sa pipila ka mga dapit nga daw dili mabungahon. Ang usa ka pananglitan mao ang Miao-li County. Diyutay rag pagsanong sa popanahong mga paningkamot sa pagsangyaw sa maong dapit. Busa sa 1973 usa ka espesyal payunir nga magtiayon ang gitudlo nga moalagad didto ingong bug-os-panahong mga magwawali sa Gingharian. Sa sinugdan, ang pipila nagpakitag interes sa maayong balita. Apan, ang maong interes nahanaw sa wala madugay. Ang mga espesyal payunir gitudlo dayon sa ubang dapit.

Sa 1991 duha ka lain pang mga espesyal payunir ang gitudlo didto. Apan sa makausa pa ang mga kalamboan nagpakita nga ang klima dili angayan sa espirituwal nga pagtubo. Human sa pipila ka tuig, ang mga espesyal payunir gibalhin ngadto sa gilaomang mas mabungahong basakan. Busa, ang yuta wala matikad sulod sa usa ka yugto.

Gibag-ong mga Paningkamot Mianig Kalamposan

Sa Septiyembre 1998 nadesisyonan nga paningkamotan ang pagpangitag mas mabungahong mga dapit diha sa halapad wala-maasayn nga teritoryo sa Taiwan. Sa unsang paagi kini palamposon? Pinaagi sa pagtudlog mga 40 ka temporaryong mga espesyal payunir sa pag-alagad diha sa mas dasok ug molupyo nga mga teritoryong wala-maasayn.

Duha ka kanait nga siyudad sa Miao-li County ang napiling mga teritoryo alang sa maong kampanya. Upat ka sister nga mga dalaga ang moalagad didto sulod sa tulo ka bulan aron sulayan ang teritoryo. Wala madugay human sa ilang pag-abot, misulat silag makapalipayng mga taho bahin sa gidaghanon sa interesadong mga tawo nga ilang nakaplagan. Pagkahuman sa ilang tulo ka bulan nga pagpayunir sa maong dapit, nagdumala silag daghang panagtuon sa Bibliya sa balay. Nakatukod usab silag grupo sa pagtuon sa libro sa tabang sa usa ka ansiyano gikan sa sikbit nga kongregasyon.

Gitin-aw sa tulo niining maong mga sister nga buot nilang magpadayon sa pag-atiman sa huyang nga “mga binhi” nga maayo kaayo ang tubo. Ingong resulta, duha kanila ang gitudlo ingong permanenteng mga espesyal payunir, ug ang ikatulo nagpadayon sa pag-alagad didto ingong regular payunir. Usa ka ansiyano gikan sa sikbit nga kongregasyon ang mibalhin sa maong dapit sa pagtabang kanila. Kapin sa 60 ang mitambong sa unang pakigpulong publiko nga gipahayag sa maong dapit. Karon ang sikbit nga kongregasyon nagtabang niining bag-ong grupo sa pagpahigayon ug mga tigom sa Dominggo dugang pa sa daghang pagtuon sa libro. Sa dili madugay usa ka bag-ong kongregasyon ang lagmit nga matukod sa maong dapit.

 Pagkamalahutayon Nagdalag mga Panalangin Diha sa Ubang mga Bahin sa Taiwan

Ang ubang mga dapit misanong sa samang paagi. Sa I-Ian County sa amihanan-sidlakang bahin sa isla, usa ka bag-ong Pagtuon sa Libro sa Kongregasyon ang natukod sa maong dapit diin nag-alagad ang temporaryong mga espesyal payunir.

Samtang namalaybalay usa ka gabii niana, usa ka temporaryong espesyal payunir ang nakahimamat ug usa ka batan-ong lalaki ug nagpakita kaniya sa handbill nga gilistahan sa mga tigom sa kongregasyon. Dihadiha siya nangutana: “Mahimo ba akong motambong sa tigom ugma sa gabii? Kon mao, unsay akong isul-ob?” Kining maong payunir nagdumalag walo ka pagtuon sa Bibliya uban sa mga interesado kada semana. Wala madugay ubay-ubayng estudyante sa Bibliya ang nagplano nga mahimong mga magmamantala sa maayong balita, uban ang tumong nga mabawtismohan.

Laing babaye niini gihapong lungsora ang tigsimba na sulod sa daghang tuig apan walay makaplagang tawo nga motudlo kaniya sa Bibliya. Sa pagkadungog niya bahin sa kahikayan sa pagtuon sa Bibliya, iyang gipahimuslan ang kahigayonan. Nadasig siya sa pagpangandam daan sa iyang leksiyon. Inig-abot sa temporaryong espesyal payunir aron sa pagdumala sa pagtuon, iyang nakaplagan nga ang babaye nag-andam nang daan pinaagi sa pagpalit ug notbok nga iyang gisulatan sa pinatik nga mga pangutana diha sa iyang tun-anang materyal. Dayon iyang gisulat ang tanan niyang mga tubag sa matag pangutana. Gikopya usab niya sa iyang notbok ang tanang gisitar nga mga kasulatan sa iyang leksiyon. Sa pag-abot sa sister aron sa pagdumala sa unang pagtuon, ang babaye nakaandam na sa unang tulo ka leksiyon!

Susamang mga resulta ang nakaplagan sa lungsod sa Dongshih sa sentral Taiwan. Ang temporaryong mga espesyal payunir nakapahilunag 2,000 ka brosyur sulod sa tulo ka bulan nilang pag-alagad didto. Sa ikatulong bulan, nagdumala na silag 16 ka panagtuon sa Bibliya sa balay. Ang lungsod nadaot pag-ayo sa linog nga mitay-og sa sentral Taiwan sa Septiyembre 21, 1999, apan ang pipila ka mga interesado nagpadayon sa pag-uswag sa espirituwal, bisan tuod kinahanglang mopanaw silag mga usa ka oras aron sa pagtambong sa mga tigom diha sa kinadul-ang Kingdom Hall. Oo, ang pagkamalahutayon gikinahanglan aron makaanig maayong abot, sa materyal nga ani o nianang sa espirituwal nga matang.

[Mapa sa panid 8]

(Alang sa aktuwal nga pagkahan-ay, tan-awa ang publikasyon)

TSINA

Taiwan Strait

TAIWAN

[Credit Line]

Mountain High Maps® Copyright © 1997 Digital Wisdom, Inc.