Mga Magmamantala sa Gingharian Nagtaho

Bililhon Kang Jehova Kadtong Nahigugma Kaniya

ANG Lebanon nailhan tungod sa kinaiyanhong mga kahinguhaan niini sukad pa sa kapanahonan sa Bibliya. (Salmo 72:16; Isaias 60:13) Ilabinang bililhon mao ang dagkong mga sedro niini, nga halinon kaayo ingong materyales nga igtutukod tungod sa katahom, kaamyon, ug kalig-on niini. Sa unang siglo, dihay usa ka butang nga mas bililhon nga mitungha gikan sa Lebanon. Ang Ebanghelyo ni Marcos nagtaho nga gikan sa Tiro ug Sidon, sa karaang teritoryo sa Lebanon, “usa ka dakong panon sa katawhan, sa pagkadungog sa kon unsa kadaghang mga butang nga gihimo [ni Jesus], nangadto kaniya.”—Marcos 3:8.

Karon usab, ang Lebanon padayong nagpatunghag bunga nga bililhon kaayo sa mga mata ni Jehova. Gipasiugda kini sa mosunod nga mga kasinatian.

• Usa ka batan-ong Saksi nga ginganlag Wissam gihangyo sa paghatag ug 30-minutos nga pakigpulong sa iyang klase sa eskuylahan. Nakahukom si Wissam nga usa kadto ka maayong kahigayonan aron makapamatuod. Busa iyang gigamit ang librong Life—How Did It Get Here? By Evolution or by Creation? ug nangandam ug pakigpulong bahin sa paglalang. Apan, sa dihang nakita ang topiko, ang magtutudlo ni Wissam nag-ingon nga sanglit hinungdanon kadtong ulohana, puwedeng patas-an pa ni Wissam ang iyang pakigpulong ngadto sa 45 minutos.

Sa dihang gisugdan ni Wissam ang iyang pakigpulong, gipahunong siya sa iyang magtutudlo ug gipatawag ang prinsipal. Wala madugay miabot ang prinsipal, ug misugod na usab si Wissam gikan sa sinugdanan. Samtang naminaw siya sa mga pangutana nga gisukna ni Wissam sa introduksiyon sa iyang pakigpulong, naikag kaayo ang prinsipal ug miingon nga ang tanang estudyante kinahanglang makadawat ug kopya sa maong pakigpulong.

Pagkataudtaod laing magtutudlo, kinsa milabay lang, nakamatikod sa kaukyab diha sa lawak-klasehan ug nangutana kon unsay nahitabo. Sa dihang gisultihan siya, nangutana siya kon si Wissam naningkamot bang pamatud-an ang paglalang o ebolusyon. “Paglalang,” maoy tubag. Sa pagkahibalo nga usa sa mga Saksi ni Jehova si Wissam, giingnan sa magtutudlo ang klase: “Inyong masabtan pinaagi sa iyang pakigpulong nga gipaluyohan sa siyensiya ang paglalang, dili ang ebolusyon.”

Duna diay kopya sa librong Creation kining maong magtutudlo ug naggamit niini sa paghatag ug mga pakigpulong sa unibersidad! Sa wala pa molakaw, nangutana siya kon puwede ba siyang mobalik pagkasunod adlaw uban sa iyang mga estudyante aron makahatag ug pakigpulong si Wissam sa iyang klase. Miresulta kana ug laing maayong pagpamatuod ngadto kang Jehova.

• Ang 22-anyos nga si Nina giuhaw sa mga tubig sa kamatuoran. Usa ka adlaw niana gihatagan siya sa iyang ig-agaw ug Bibliya ug gitudloan siya bahin sa Pentecostal Church. Malipayong gibasa ni Nina ang Bibliya ug iyang natun-an sa iyang pagbasa nga ang mga Kristohanon kinahanglang mosangyaw, busa misugod siya sa pagpakig-estorya sa iyang mga kaila. Ang tanan nga iyang naestorya nangutana niya: “Saksi ni Jehova ka ba?” Nakapalibog kana kaniya.

Unom ka tuig sa ulahi, giduaw sa mga Saksi ni Jehova si Nina diha sa iyang balay ug gisultihan siya bahin sa Gingharian sa Diyos. Sa sinugdanan naningkamot siyang pangitaan ug sayop ang ilang mga pagtulon-an. Apan, iyang nakaplagan nga ang tanan nilang tubag makataronganon ug binase sa Bibliya.

Ang nakat-onan ni Nina sa ngadtongadto—ngalan sa Diyos, si Jehova; ang mga panalangin sa Gingharian; ug uban pa—nakakombinsir kaniya nga iyang nakaplagan ang kamatuoran. Iyang gipahinungod ang iyang kinabuhi sa Diyos ug nagpabawtismo. Sa milabayng pito ka tuig, si Nina nag-alagad ingong usa ka bug-os-panahong ebanghelisador. Sa pagkatinuod, panalanginan ni Jehova kadtong dunay tinuod nga gugma kaniya.—1 Corinto 2:9.