Nganong Magmakataronganon sa Atong mga Pagdahom?

ANG mga paglaom nga matuman ug mga pangandoy nga makab-ot mohatag kanato ug tagbaw nga pagbati. Apan, sa pagkatinuod daghan sa atong mga damgo ug mga pagdahom lahi ug resulta kay sa atong gusto. Ang balikbalik nga mga kahigawad sa kinabuhi makapabati kanato ug kalagot sa atong kaugalingon ug bisan sa uban. Usa ka maalamong tawo haom nga nag-ingon: “Ang pagdahom nga malangan makapasakit sa kasingkasing.”—Proverbio 13:12.

Unsa ang pipila ka hinungdan nga mahimong mosangpot sa mga pagbati sa kahigawad? Sa unsang paagi atong mapauswag ang pagkahimong makataronganon sa atong mga pagdahom? Dugang pa, nganong makaayo kanato ang pagkahimong makataronganon?

Mga Pagdahom ug mga Kahigawad

Tungod sa kusog nga paso sa kinabuhi karon, sa atong sigeng paningkamot nga makaapas, morag samot na hinuon kitang malangan. Ang mga buluhaton kanunayng nagkinahanglan sa atong panahon ug kusog, ug kon dili nato matapos ang atong gisugdan, may posibilidad nga basolon nato ang atong kaugalingon. Basig mobati pa kita nga maora bag atong gipakyas ang uban. Si Cynthia, usa ka asawa ug inahan nga nahibalo sa mga kapit-os sa pagkaginikanan, nag-ingon: “Ang akong pagkadili-matubayon sa pagbadlong sa akong mga anak ug pagbati nga kulang ang akong pagbansay kanila makapalagot.” Si Stephanie, usa ka tin-edyer, nagsulti mahitungod sa iyang pag-eskuyla: “Kulang ang akong panahon sa paghimo sa tanan nga akong gustong buhaton, ug makapukaw kanag mga pagbati sa kawalay-pailob dinhi kanako.”

Ang tawong dagkog mga pagdahom nga dili makataronganon dali nga mahimong perpeksiyonista, ug kini makapahigawad kaayo. Si Ben, usa ka batan-ong minyong lalaki, mipahayag: “Kon akong susihon ang akong mga lihok, hunahuna, o pagbati, akong makita kanunay kon sa unsang paagi mahimong mas maayo pa unta kini. Kanunay kong mangitag kahingpitan, ug misangpot kini sa kawalay-pailob, kapakyasan, ug kahigawad.” Si Gail, usa ka Kristohanong asawa, miingon: “Ang perpeksiyonistang panghunahuna dili motugot ug kapakyasan. Gusto kitang mahimong kinahawrang mga mama ug kinahawrang mga asawa. Kinahanglan kitang magmabungahon aron magmalipayon, busa ang nausik nga paningkamot makapalagot kanato.”

Ang lain pang hinungdan nga mahimong mosangpot sa personal nga kahigawad mao ang nagkaluyang panglawas ug pagkatigulang. Ang pagkadili na makalihoklihok ug kakulang ug kusog makapadako sa atong mga limitasyon ug makadugang sa atong mga pagbati sa kapakyasan. “Wala koy pailob sa akong kaugalingon tungod kay dili nako mahimo ang mga butang nga sayon kaayo ug naandan niadtong wala pa ako magsakit,” miadmitir si Elizabeth.

Ang gihisgotan sa ibabaw maoy pananglitan sa kon unsay makapukaw sa mga pagbati sa kahigawad. Kon dili kontrolahon, ang maong mga pagbati makapatuo pa gani kanato nga wala kita pabilhi sa uban. Busa, unsang positibong mga lakang ang atong mahimo aron masagubang ang mga kahigawad ug maugmad ang makataronganong mga pagdahom?

Mga Paagi sa Pag-ugmad sa Makataronganong mga Pagdahom

Una, hinumdomi nga si Jehova makataronganon ug masinaboton. Ang Salmo 103:14 nagpahinumdom kanato: “Siya nahibalo pag-ayo sa atong pagkaumol, nga nahinumdom nga kita mga abog.” Kay nahibalo sa atong mga katakos ug mga limitasyon, si Jehova nagdahom gikan kanato sa kon unsa lamang ang atong maarangan sa paghatag. Ug ang usa ka butang nga iyang gipangayo kanato mao “ang paglakaw nga makasaranganon uban sa [atong] Diyos.”—Miqueas 6:8.

 Si Jehova nag-awhag usab kanato sa pagduol kaniya pinaagig pag-ampo. (Roma 12:12; 1 Tesalonica 5:17) Apan, sa unsang paagi kana makatabang kanato? Ang pag-ampo maghimo sa atong hunahuna nga lig-on ug timbang. Ang tim-os nga pag-ampo maoy pag-ila nga atong gikinahanglan ang tabang—usa kini ka timaan sa pagkamakasaranganon ug pagkamapaubsanon. Si Jehova maikag nga mosanong sa atong mga pag-ampo pinaagi sa paghatag kanato sa iyang balaang espiritu, nga ang mga bunga niana naglakip sa gugma, kalulot, pagkamaayo, ug pagpugong-sa-kaugalingon. (Lucas 11:13; Galacia 5:22, 23) Ang pag-ampo makahupay usab sa kabalaka ug kapakyasan. Pinaagi sa pag-ampo, “makabaton ka ug kahupayan nga dili makuha gikan sa ubang tinubdan,” matod pa ni Elizabeth. Si Kevin miuyon: “Mag-ampo ako alang sa usa ka kalmadong kasingkasing ug tin-awng hunahuna aron akong maatubang ang problema. Wala gayod ako pakyasa ni Jehova.” Si apostol Pablo nahibalo sa bililhong kapuslanan sa pag-ampo. Mao kanay hinungdan kon nganong siya miawhag: “Ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Oo, ang pakigkomunikar kang Jehova epektibo gayod sa pagtabang kanato nga maugmad ang makataronganong mga pagdahom sa atong kaugalingon ug sa uban.

Apan, kita nagkinahanglan usahay ug dihadiha nga pasalig. Ang pulong nga isulti sa hustong panahon maoy maayo. Ang pribado nga pagpakigsulti sa masaligan ug hamtong nga higala makatabang kanato nga makabaton ug bag-ong panglantaw sa kon unsay hinungdan sa atong kahigawad o kabalaka. (Proverbio 15:23; 17:17; 27:9) Ang mga batan-on nga nakigbisog sa mga kahigawad nakakat-on nga ang pagpangayog tambag sa ginikanan makatabang kanila nga mahimong timbang. Si Kandi mapabilhong miingon: “Ang mahigugmaong pagtultol sa akong mga ginikanan naghimo nako nga mas makataronganon ug timbang ug mas makalipay nga ikauban.” Oo, ang pahinumdom sa Proverbio 1:8, 9 maoy tukma kaayo sa panahon: “Anak ko, pamatia ang disiplina sa imong amahan, ug ayaw talikdi ang balaod sa imong inahan. Kay kini sila maoy usa ka madanihong purongpurong sa imong ulo ug usa ka maanindot nga kulentas sa imong liog.”

Ang mga sangpotanan sa perpeksiyonistang panghunahuna gipalutaw ug maayo sa panultihon: “Ang pagdahom nga ang kinabuhi gipahiangay sumala sa atong linain nga kagustohan maoy pagpangitag kapakyasan.” Aron malikayan kini, gikinahanglan ang pagpasibo sa hunahuna. Ang pagkamapaubsanon ug pagkamakasaranganon—pagbaton ug realistikanhong panglantaw sa atong mga limitasyon—tino gayod nga makapalambog timbang ug makataronganong mga pagdahom diha kanato. Tukma nga ang Roma 12:3 nagpasidaan kanato nga “dili maghunahunag labaw bahin sa [atong] kaugalingon kay sa gikinahanglan nga pagahunahunaon.” Dugang pa, ang Filipos 2:3 nagdasig kanato nga magbaton ug mapaubsanong hunahuna ug isipon ang uban nga labaw.

Si Elizabeth, nga gihisgotan ganiha, dili-mapailobon sa iyang kaugalingon tungod sa iyang sakit. Alang kaniya, gikinahanglan ang panahon aron mabatonan ang panglantaw ni Jehova sa mga butang ug aron mahupay sa pagkahibalo nga dili siya malimot sa atong pag-alagad. Si Colin dili makalihok tungod sa usa ka makapaluyang sakit. Sa sinugdan, iyang gibati nga halos walay bili ang iyang ministeryo kon itandi sa iyang nabuhat sa maayo pa ang panglawas. Pinaagi sa pagpalandong sa mga kasulatan sama sa 2 Corinto 8:12, iyang nawagtang kining mga pagbatia. Kini nga bersikulo nag-ingon: “Kon ang pagkaandam anaa nang daan, kini ilabinang dalawaton sumala sa kon unsay ginabatonan sa usa, dili sumala sa kon unsay wala kaniya.” “Bisan tuod gamay na lang ang akong ikahatag,” matod pa ni Colin, “makahatag gihapon ako, ug kana dalawaton kang Jehova.” Sa Hebreohanon 6:10, kita gipahinumdoman: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”

Nan, sa unsang paagi atong matino kon makataronganon ba ang atong mga pagdahom? Pangutan-a ang imong kaugalingon, ‘Ang ako bang mga pagdahom sama sa mga pagdahom sa Diyos?’ Ang Galacia 6:4 nag-ingon: “Ipapamatuod sa matag usa kon unsa ang iyang kaugalingong buhat, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” Hinumdomi, si Jesus nag-ingon: “Maluloton ang akong yugo ug gaan ang akong luwan.” Oo, ingong mga Kristohanon, kita aduna gayoy yugo nga pagapas-anon, apan kini “maluloton” ug “gaan,” ug misaad si Jesus nga kini makapalagsik kon kita magtuon sa pagpas-an niini sa hustong paagi.—Mateo 11:28-30.

 Makataronganong mga Pagdahom Mohatag ug mga Ganti

Dunay dihadiha ug malungtarong mga ganti nga madawat gikan sa pagpaminaw ug pagpadapat sa tambag sa Pulong sa Diyos samtang kita naningkamot nga maugmad ang makataronganong mga pagdahom. Ang usa ka rason mao nga kini dunay maayong epekto kanato sa pisikal. Si Jennifer, kinsa nakabatog kaayohan gikan sa mga pahinumdom ni Jehova, midawat: “Duna koy dugang kusog ug kaikag sa kinabuhi.” Sa pagkahaom, ang Proverbio 4:21, 22 nag-awhag kanato nga maminaw sa mga pulong ni Jehova pinaagi sa atong mga mata ug kasingkasing, “kay sila kinabuhi alang niadtong nagapangita kanila ug kahimsog alang sa ilang tibuok nga unod.”

Ang laing ganti mao ang mental ug emosyonal nga kaayohan. “Sa dihang akong iladlad ang akong hunahuna ug kasingkasing sa Pulong sa Diyos, akong makaplagan nga kanunay kong mas malipayon,” matod pa ni Theresa. Tinuod, masinati gihapon nato ang mga kahigawad sa kinabuhi. Apan, mas dali nato kining maantos. “Duol sa Diyos, ug siya moduol kaninyo,” nag-awhag ang Santiago 4:8. Si Jehova nagsaad usab sa pagpalig-on kanato sa pag-atubang sa mga problema sa kinabuhi ug sa pagpanalangin kanato ug pakigdait.—Salmo 29:11.

Ang pagbaton ug makataronganong mga pagdahom makapaarang kanato sa paghupot ug espirituwal nga kalig-on. Kini usab maoy usa ka panalangin. Klaro natong makita ang mas hinungdanong mga butang sa kinabuhi. (Filipos 1:10) Sa ingon ang atong mga tumong maoy realistikanhon ug makab-ot, nga mohatag ug mas dakong kalipay ug katagbawan. Mas andam kita nga motugyan sa atong kaugalingon kang Jehova, kay nasayod nga iyang himoong maayo ang sangpotanan sa tanan. “Busa, ipaubos ang inyong kaugalingon ilalom sa gamhanang kamot sa Diyos, aron nga iya kamong bayawon sa takdang panahon,” nag-ingon si Pedro. (1 Pedro 5:6) Duna pa bay laing butang nga mas magantihon kay sa mapasidunggan ni Jehova?

[Mga hulagway sa panid 31]

Ang pag-ugmad ug makataronganong mga pagdahom makatabang kanato sa pagsagubang sa mga kapakyasan ug mga kahigawad