Pagtahod sa Awtoridad—Nganong Hinungdanon?

KINSAY dili mapasalamaton nga ang kapolisan adunay awtoridad sa pagdakop sa mga kriminal nga mangawat sa atong mga kabtangan o manghulga sa atong pamilya? Ug dili ba nato pabilhan nga ang mga korte adunay awtoridad sa pagsilot sa mga kriminal aron sa pagpanalipod sa katilingban?

Ang ubang mapuslanong mga serbisyo sa publiko, sama sa pag-ayo sa kadalanan, sanitasyon, ug edukasyon—nga kasagarang gibayran gikan sa mga buhis nga gikuha pinaagig awtoridad sa gobyerno—tingali mosantop usab sa hunahuna. Ang tinuod nga mga Kristohanon maoy nanguna sa pag-ila nga ang pagtahod sa angay nga tinudlong awtoridad maoy hinungdanon. Apan hangtod sa unsang gilapdon nga ang maong pagtahod ipakita? Ug sa unsang mga bahin sa kinabuhi nga ang pagtahod sa awtoridad gikinahanglan?

Awtoridad Diha sa Katilingban

Ang Bibliya nagsulti sa tanang tawo, magtutuo o dili magtutuo, sa pagtahod sa sibil nga awtoridad, nga naglihok alang sa ikaayo sa katilingban. Ang Kristohanong apostol Pablo misulat ngadto sa iyang mga isigkamagtutuo sa Roma bahin niini, ug mapuslanon ang pagtagad sa iyang giingon, sumala sa natala sa Roma 13:1-7.

Si Pablo maoy usa ka Romanong lungsoranon, ug ang Roma mao ang gahom sa kalibotan niadtong panahona. Ang sulat ni Pablo, nga gisulat sa tuig 56 K.P., nagtambag sa mga Kristohanon nga mahimong sumbanan nga mga lungsoranon. Siya misulat: “Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang diha sa ilang relatibong mga posisyon pinaagi sa Diyos.”

Gisaysay dinhi ni Pablo nga wala untay bisan unsang tawhanong awtoridad kon ang Diyos wala pa magtugot niana. Nianang puntoha ang labaw nga mga awtoridad adunay relatibong posisyon sulod sa gambalay sa katuyoan sa Diyos. Tungod niini “siya nga nagasupak sa awtoridad mibarog batok sa kahikayan sa Diyos.”

Bisan tuod ang mga lungsoranon nga magbuhat ug maayo makadawat ug pagdayeg gikan sa labaw nga mga awtoridad, kini nga mga awtoridad gihatagan usab ug gahom sa pagsilot sa mga mamumuhat ug daotan. Kadtong mobuhat ug daotan adunay igong katarongan nga mahadlok sa katungod sa mga awtoridad sa paglihok ingong “tigpanimalos,” sanglit ang mga kagamhanan mobuhat niana ingong “ministro sa Diyos.”

 Gitapos ni Pablo ang iyang pangatarongan pinaagi sa pag-ingon: “Busa adunay mapugsanong katarungan nga kamo magpasakop, dili lamang tungod niana nga kapungot apan usab tungod sa inyong tanlag. Kay mao kana kon nganong kamo usab nagabayad ug mga buhis; kay sila publikong mga alagad sa Diyos nga kanunayng nagasilbi niining katuyoana mismo.”

Ang responsabilidad sa paggamit sa mga buhis nahiluna diha sa labaw nga mga awtoridad, dili sa nagabayad sa buhis. Ingon nga matinud-anong lungsoranon, ang usa ka Kristohanon naghupot ug maayong tanlag. Nasayod siya nga pinaagi sa pagpasakop sa iyang kaugalingon ngadto sa labaw nga mga awtoridad ug pagbayad sa angay nga buluhisan, siya nagapaluyo dili lamang sa sukdanan sa katilingban diin siya nagpuyo kondili nagakinabuhi usab siya uyon sa mga gikinahanglan sa Diyos.

Ang Pamilya ug ang Awtoridad

Unsa na man ang awtoridad sa pamilya? Sa unang mga adlaw sa iyang kinabuhi, ang usa ka masuso sagad mangayog pagtagad pinaagi sa paghilak o bisan sa pagsiyagit. Apan ang maalamong ginikanan makasabot sa tinuod nga mga panginahanglan sa masuso ug dili magtugot nga diktahan lamang sa kasapoton sa masuso. Ang ubang mga bata, samtang nagkadako sila, gipatuyangan ug gitugotan sa pagpahiluna sa ila mismong mga sukdanan. Kay walay kasinatian, sila mahimong malangkit sa krimen o ubang daotang mga binuhatan, nga magdaot sa pamilya ug sa katilingban sa kinatibuk-an, sumala sa nahibaloan pag-ayo sa lokal nga mga awtoridad.

“Ang mga ginikanan magdisiplina sa ilang mga anak nga ulahi na kaayo,” matod ni Rosalind Miles, awtor sa Children We Deserve. “Ang panahon sa pagsugod mao ang gutlo sa pagkatawo sa bata.” Kon gikan sa sinugdanan ang mga ginikanan mosulti pa unta uban ang tingog sa maluloton, mahangawaong awtoridad ug nga nahiuyon sa ilang mga lihok, ang ilang mga anak sa dili madugay makatuon sa pagdawat nianang maong awtoridad ug sa mahigugmaong disiplina nga nagagikan diha niana.

Ang Bibliya naundan sa daghang impormasyon bahin sa awtoridad sa pamilya. Sa basahon sa Proverbio, ang maalamong tawong si Solomon nagbutad sa pagtagad sa panaghiusa sa mahinadlokon-sa-Diyos nga mga ginikanan atubangan sa ilang mga anak, nga nag-ingon: “Anak ko, pamatia ang disiplina sa imong amahan, ug ayaw talikdi ang balaod sa imong inahan.” (Proverbio 1:8) Kon ang mga ginikanan magmentinar nianang matanga sa makataronganong panaghiusa atubangan sa ilang mga anak, ang mga bata mahibalo kon unsay gidahom kanila sa ilang mga ginikanan. Ila tingaling maniobrahon ang usa ka ginikanan batok sa usa sa paningkamot nga matuman ang ilang gusto, apan ang nahiusang awtoridad sa ginikanan maoy usa ka panalipod alang sa mga batan-on.

Ang Bibliya nagsaysay nga ang bana adunay pangunang responsabilidad sa espirituwal nga kaayohan dili lamang sa iyang mga anak kondili sa iyang asawa usab. Kini gihubit ingon nga pagkaulo. Sa unsang paagi kini nga pagkaulo dumalahon? Gipakita ni Pablo nga samang si Kristo mao ang Ulo sa kongregasyon mao man usab ang bana mao ang ulo sa iyang asawa. Dayon si Pablo midugang: “Mga bana, padayong higugmaa ang inyong mga asawa, maingon nga ang Kristo usab nahigugma sa kongregasyon [iyang espirituwal nga pangasaw-onon] ug mitugyan sa iyang kaugalingon alang niini.” (Efeso 5:25) Sa dihang ang lalaki mosunod sa panig-ingnan ni Jesus ug modumala sa pagkaulo sa mahigugmaong paagi, iyang maangkon ang “halalom nga pagtahod” sa iyang asawa. (Efeso 5:33) Ang mga bata nianang panimalaya makasabot usab sa bili sa hinatag-sa-Diyos nga awtoridad ug madasig sa pagdawat niana.—Efeso 6:1-3.

Sa unsang paagi ang nag-inusarang mga ginikanan, lakip kadtong namatyan ug kapikas, makasagubang niining isyuha? Kon kaha amahan o inahan, sila direktang makahangyo sa awtoridad ni  Jehova nga Diyos ug ni Jesu-Kristo. Si Jesus kanunayng nagsulti nga may awtoridad—nianang sa iyang Amahan ug sa dinasig nga Kasulatan.—Mateo 4:1-10; 7:29; Juan 5:19, 30; 8:28.

Ang Bibliya nagtaganag dagayang bililhon nga mga prinsipyo maylabot sa mga suliran nga giatubang sa mga bata. Pinaagi sa pagpangita niining mga prinsipyoha ug sa pagsunod niini, ang usa ka ginikanan makataganag mahigugmaon ug mapuslanong tambag alang sa mga bata. (Genesis 6:22; Proverbio 13:20; Mateo 6:33; 1 Corinto 15:33; Filipos 4:8, 9) Ang mga ginikanan makagamit usab sa gipasukad-sa-Bibliyang materyal nga gidisenyo sa espesipikong paagi sa pagtabang kanila sa pagbansay sa ilang mga anak aron pabilhan ang mga kaayohan sa pagtahod sa awtoridad sa Kasulatan. a

Ang Kristohanong Kongregasyon ug ang Awtoridad

“Kini mao ang akong Anak, ang hinigugma, kinsa akong giuyonan; pamati kamo kaniya.” (Mateo 17:5) Kining mga pulonga, nga gilitok ni Jehova nga Diyos mismo, nagpaila kang Jesus ingong usa nga nagsulti nga may awtoridad sa Diyos. Ang iyang gisulti gitala diha sa upat ka asoy sa Ebanghelyo nga niana kita daling makagamit.

Sa wala pa siya mokayab sa langit, gipahibalo ni Jesus ang iyang mga tinun-an: “Ang tanang awtoridad gikahatag na kanako sa langit ug sa yuta.” (Mateo 28:18) Ingong Ulo sa iyang kongregasyon, si Jesus dili lamang nagbantay sa iyang dinihogang mga sumusunod sa iyang lakang dinhi sa yuta kondili, sukad sa pagbubo sa balaang espiritu sa Pentekostes 33 K.P., siya naggamit usab kanila ingong agianan sa kamatuoran, ingon nga ‘matinumanon ug maalamong ulipon.’ (Mateo 24:45-47; Buhat 2:1-36) Unsay iyang nahimo sa pagpalampos niining tanan aron sa pagpalig-on sa Kristohanong kongregasyon? “Sa dihang siya misaka sa itaas . . . , siya mihatag ug mga gasa nga mga tawo.” (Efeso 4:8) Kining “gasa nga mga tawo” mao ang Kristohanong mga ansiyano, nga gitudlo sa balaang espiritu ug gihatagag awtoridad sa pag-atiman sa espirituwal nga mga intereses sa mga isigkamagtutuo.—Buhat 20:28.

Tungod niining katarongana si Pablo mitambag: “Hinumdomi silang mga nagapanguna taliwala kaninyo, kinsa nagsulti sa pulong sa Diyos kaninyo, ug sa mamalandong kamo kon unsay ginasangpotan sa ilang panggawi sundoga ang ilang pagtuo.” Sanglit kining matinumanong mga lalaki nagsunod pag-ayo sa mga lakang ni Jesus, usa gayod ka dalan sa kaalam ang pagsundog sa ilang pagtuo. Dayon si Pablo midugang: “Magmasinugtanon kamo kanilang nagapanguna taliwala kaninyo ug magmapinasakopon, [“padayong nag-ila sa ilang awtoridad ibabaw kaninyo,” The Amplified Bible] kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.”—Hebreohanon 13:7, 17.

Unsay mahitabo kon ang maong direksiyon dili tagdon? Ang pipila ka membro sa unang Kristohanong kongregasyon nagbuhat gayod niana ug nahimong mga apostata. Si Himeneo ug Fileto gihisgotan ingong mga lalaki nga nagdaot sa pagtuo sa uban ug kansang binuang nga mga pakigpulong ‘nagpasipala kon unsay balaan.’ Usa sa ilang mga gibarogan mao nga ang pagkabanhaw nahitabo na, lagmit nga usa ka espirituwal o simboliko, ug busa wala nay dugang pagkabanhaw sa umaabot ilalom sa Gingharian sa Diyos.—2 Timoteo 2:16-18.

Ang tinudlong awtoridad nakatabang. Ang Kristohanong mga ansiyano nakahimo pagtumba sa maong mga argumento kay ingong mga hawas  ni Jesu-Kristo, ilang gigamit ang awtoridad sa Kasulatan. (2 Timoteo 3:16, 17) Susama usab karon diha sa Kristohanong kongregasyon, nga gihubit ingong “haligi ug tukod sa kamatuoran.” (1 Timoteo 3:15) Nungka nga ang bakak nga mga pagtulon-an tugotang makadaot sa “sumbanan sa makapahimsog nga mga pulong,” nga gitipigan alang kanato ingon nga maayong butang nga gisalig sulod sa mga panid sa Bibliya.—2 Timoteo 1:13, 14.

Samtang ang pagtahod sa awtoridad kusog nga nagakahanaw sa kalibotan, ingong mga Kristohanon kita nagaila nga ang nahiangayng mga awtoridad diha sa katilingban, sa pamilya, ug sa Kristohanong kongregasyon gilatid alang sa atong kaayohan. Ang pagtahod sa awtoridad hinungdanon alang sa atong kaayohan sa pisikal, emosyonal, ug espirituwal nga paagi. Pinaagi sa pagtahod sa maong hinatag-sa-Diyos nga awtoridad, kita panalipdan sa kinalabwang mga awtoridad—si Jehova nga Diyos ug si Jesu-Kristo—alang sa atong walay kataposang kaayohan.—Salmo 119:165; Hebreohanon 12:9.

[Footnote]

[Blurb sa panid 5]

Ang Bibliya naundan sa daghang impormasyon bahin sa awtoridad sa pamilya

[Hulagway sa panid 6]

Ang nag-inusarang mga ginikanan direktang makahangyo sa awtoridad ni Jehova nga Diyos ug ni Jesu-Kristo

[Mga hulagway sa panid 7]

Ang mga Kristohanon nagaila nga ang nahiangayng mga awtoridad diha sa pamilya, sa Kristohanong kongregasyon, ug sa katilingban gilatid alang sa ilang kaayohan

[Picture Credit Line sa panid 4]

Photo by Josh Mathes, Collection of the Supreme Court of the United States